.jpg)
ជនរងគ្រោះពីការបាញ់ដោយក្រុមព្រានព្រៃ នៅមណ្ឌលគិរី។ មន្ទីរបរិស្ថាន
មណ្ឌលគិរីៈ ប្រធានមន្ទីរបរិស្ថានខេត្តមណ្ឌលគិរី លោក កែវ សុភក្រ្ត បានអះអាងកាលពីម្សិលមិញថាអត្តសញ្ញាណក្រុមជនសង្ស័យដែលបាញ់ក្រុមមន្ត្រីឧទ្យានុរក្សដែនជម្រកសត្វព្រៃស្រែពក ក្នុងស្រុកកោះញែក ខេត្តមណ្ឌលគិរី កាលពីថ្ងៃពុធសប្ដាហ៍មុននឹងត្រូវលាតត្រដាងឆាប់ៗខាងមុខនេះ តាមរយៈ លទ្ធផលពិនិត្យ DNA។
លោក សុភក្រ្ត បានបញ្ជាក់ថា៖ «ពេលនេះខាងមន្ទីរបរិស្ថានយើងកំពុងសហការជាមួយសមត្ថកិច្ចជំនាញ និងអង្គការជាដៃគូពាក់ព័ន្ធដើម្បីនាំយកវត្ថុតាង ១ ចំនួនដែលប្រមូលបានពីកន្លែងកើតហេតុ ទៅធ្វើកោសល្យវិច័យតាមប្រព័ន្ធ DNA។តាមរយៈ DNA នេះយើងអាចកំណត់មុខសញ្ញានៃក្រុមជន សង្ស័យបានដោយងាយ»។
បើតាមលោក សុភក្រ្ត វត្ថុតាងដែលប្រមូលបាន រួមមាន សំណាកកន្ទុយសត្វទន្សោង ១ គ្រាប់កាំភ្លើងជាច្រើនគ្រាប់និងសម្ភារ ១ ចំនួនដែលបម្រើឲ្យការបរបាញ់សត្វព្រៃ។
កាលពីទៀបភ្លឺ ឈានចូលថ្ងៃទី ៣០ ខែមករា មានករណីផ្ទុះអាវុធដាក់គ្នារវាងក្រុមមន្ត្រីឧទ្យានុរក្សដែនជម្រកសត្វព្រៃស្រែពក និងក្រុមជនប្រមាញ់សត្វព្រៃនៅចំណុចភូមិសាស្ត្រឃុំស្រែហ៊ុយ ស្រុកកោះញែក ខេត្តមណ្ឌលគិរី បណ្ដាលឲ្យមន្ត្រីឧទ្យានុរក្សម្នាក់ ឈ្មោះ ចេង ចាន់ធី បានរងរបួសធ្ងន់។
ក្រោយកើតហេតុ ក្រុមជនសង្ស័យបានគេចខ្លួនដែលរហូតមកទល់ពេលនេះសមត្ថកិច្ចនៅពុំទាន់កំណត់មុខសញ្ញាអ្នកប្រព្រឹត្តបាននៅឡើយទេ។
ទោះជាបែបណាក្ដីក្រុមមន្ត្រីជំនាញកំពុងរង់ចាំលទ្ធផលនៃការធ្វើកោសល្យវិច័យទៅលើវត្ថុតាងទាំងនោះដើម្បីឈានទៅរកការកំណត់មុខសញ្ញាជនសង្ស័យនិងនាំខ្លួនពួកគេយកមកផ្ដន្ទាទោសទៅតាមផ្លូវច្បាប់។
ជុំវិញករណីនេះដែរ លោក សេង ទៀក នាយកអង្គការមូលនិធិសកលសម្រាប់អភិរក្សធនធានធម្មជាតិនៃប្រទេសកម្ពុជា (WWF-Cambodia) ដែលជាដៃគូចម្បងរបស់មន្ទីរបរិស្ថានខេត្តមណ្ឌលគិរីបានគាំទ្រការរៀបចំធ្វើកោសល្យវិច័យលើវត្ថុតាងនៃបទល្មើសដែលប្រមូលបាននៅកន្លែងកើតហេតុនោះ។
ជាមួយគ្នានេះ លោក ទៀក ក៏បានអំពាវនាវដល់ពលរដ្ឋទាំងអស់ឲ្យរួមគ្នាបញ្ឈប់ការបរបាញ់សត្វព្រៃ និងកាប់បំផ្លាញព្រៃឈើក្នុងតំបន់ដែនជម្រកសត្វព្រៃ និងតំបន់ការពារផ្សេងទៀត ជាបន្ទាន់ដើម្បីរក្សាការពារនូវនិរន្តរភាពសត្វព្រៃ និងព្រៃឈើនៅកម្ពុជាសម្រាប់ជាប្រយោជន៍ដល់មនុស្សជាតិជំនាន់ក្រោ។
ទន្ទឹមនឹងនេះ លោកបានជំរុញឲ្យសមត្ថកិច្ចនគរបាលយុត្តិធម៌ ស្រាវជ្រាវស៊ើបអង្កេតឲ្យបានហ្មត់ចត់ចំពោះករណីខាងលើនេះដើម្បីនាំក្រុមជនល្មើសមកផ្ដន្ទាទោសតាមច្បាប់ឲ្យខាងតែបាន៕
