The Phnom Penh Post Search

Search form




Logo of Phnom Penh Post newspaper Phnom Penh Post - មុន​ថ្ងៃ​ប្រឡង​មក​ដល់​ សិស្ស​នាំ​គ្នា​ទៅ​បន់​ឲ្យ​សម្រេច​ដូច​បំណង

មុន​ថ្ងៃ​ប្រឡង​មក​ដល់​ សិស្ស​នាំ​គ្នា​ទៅ​បន់​ឲ្យ​សម្រេច​ដូច​បំណង

Content image - Phnom Penh Post
សិស្ស​មក​មើល​ឈ្មោះប្រឡង ក្នុ​ង​មណ្ឌល​ប្រឡង​សាលា​ចតុមុខ រាជធានី​ភ្នំពេញ កាល​ពី​ម្សិលមិញ។ ផា លីណា

មុន​ថ្ងៃ​ប្រឡង​មក​ដល់​ សិស្ស​នាំ​គ្នា​ទៅ​បន់​ឲ្យ​សម្រេច​ដូច​បំណង

ភ្នំពេញៈ មួយ​ថ្ងៃ​មុន​ប្រឡង​សញ្ញាបត្រ​ទុតិយ​ភូមិ​ថ្នាក់​ទី​ ១២ សិស្ស​នានា​ក្នុង​រាជធានី​ភ្នំពេញ​បាន​នាំ​គ្នា​សម្រុក​ទៅ​វត្ត​ និង​កន្លែង​ស័ក្ដិសិទ្ធិ​នានា​កាល​ម្សិលមិញ​ដោយ​បន់ស្រន់​ឲ្យ​ខ្លួន​ប្រឡង​ជាប់​ និង​ឲ្យ​មេ​ប្រយោគ​ឲ្យ​ពួកគេ​ចម្លង​គ្នា​បាន​។

សិស្សានុសិស្ស​ទាំងនេះ​មាន​ការ​បារម្ភ​ខ្លាំង​ចំពោះ​ការ​ប្រឡង​របស់​ខ្លួន​បន្ទាប់ពី​ការ​ធ្វើ​កំណែទម្រង់​កាល​ឆ្នាំ​មុន​ដែល​លុប​បំបាត់​អំពើ​ពុករលួយ​ និង​ការ​ចម្លង​គ្នា ឬ​បើក​ប្រ៊ុយយ៉ុង​ចម្លង​ហើយ​សិស្ស​រហូត​ដល់​ ៧៤ ​ភាគរយ​ប្រឡង​ធ្លាក់​។

ឆ្នាំ​នេះ​រដ្ឋមន្រ្តី​ក្រសួង​អប់រំ លោក ហង់ ជួនណារុន បាន​ថ្លែង​ថា​លោក​សង្ឃឹម​ថា​នឹង​មាន​លទ្ធផល​ប្រសើរ​ជាង​មុន​។ លោក​ថា៖ «​នៅពេល​ដែល​​កំណែ​ទម្រង់​ត្រូវ​បាន​ធ្វើ​ឡើង​កាល​ឆ្នាំ​មុន​សិស្ស​ភាគច្រើន​បំផុត​នៅ​តែ​បន្ត​ទម្លាប់​ចម្លង​គ្នា​ និង​បើក​ប្រ៊ុយយ៉ុង។ ការ​ប្រឡង​ឆ្នាំ​នេះ​នឹង​ងាយស្រួល​ជាង​ឆ្នាំ​មុន​ពី​ព្រោះ​សិស្ស​ត្រូវ​បាន​បង្រៀន​ឲ្យ​ត្រៀម​ខ្លួន​សម្រាប់​ការ​ប្រឡង​។ ខ្ញុំ​ជឿ​ថា​ពួកគេ​នឹង​ធ្វើ​បាន​ល្អ​​»។

ប៉ុន្តែ​សិស្ស​ដែល​សម្ភាស​ដោយ​ភ្នំពេញ ប៉ុស្តិ៍ ពី​ម្សិលមិញ​មិន​បាន​ថ្លែង​ដូច​រដ្ឋមន្រ្តី​ទេ​ដោយ​ពួកគេ​ជាច្រើន​បន់​មិន​ឲ្យ​មាន​កំណែទម្រង់​ដូច​ឆ្នាំ​មុន​។

នៅ​ព្រះអង្គ​ដងកើ​នៅ​មាត់​ទន្លេ​សិស្ស​ជាច្រើន​បាន​ទៅ​ស្វែងរក​ទឹក​មន្ត អុជធូប លែង​បក្សី ​និង​ថ្វាយ​ផ្កា​សម្រាប់​ការ​ប្រឡង​របស់​ពួកគេ​។

ហេក ជិន ស៊ូ អាយុ​ ១៩ ​ឆ្នាំ​ថ្លែង​ថា​៖ «​នេះ​គឺជា​លើក​ទី​ពីរ​ដែល​ខ្ញុំ​មក​ទី​នេះ​»។ «​ខ្ញុំ​បន់​ឲ្យ​ខ្ញុំ​ប្រឡង​ជាប់​។ ខ្ញុំ​មិន​ខ្វល់​អំពី​ពិន្ទុ​ទេ​។ខ្ញុំ​បន់​ឲ្យ​ខ្ញុំ​ជួប​សិស្ស​ពូកែ​ដែល​ខ្ញុំ​អាច​ចម្លង​បាន​»។

បន្ទាប់ពី​អុជធូប​រួច​កញ្ញា ឆេង សុដាវ៉ុន អាយុ​ ១៨ ​ឆ្នាំ​បាន​ថ្លែង​ផង​ដែរ​ថា​កញ្ញា​សង្ឃឹម​ថា​កញ្ញា​នឹង​អាច​ចម្លង​គេ​បាន​នៅក្នុង​ការ​ប្រឡង​ថ្ងៃ​នេះ​។ កញ្ញា​ថា៖ «​ខ្ញុំ​បន់ស្រន់​ឲ្យ​គ្រូ​ទាំងអស់​ និង​មេ​ប្រយោគ​ដើរ​មើល​តាម​ថ្នាក់​ចិត្ត​ល្អ​ និង​មិន​តឹងរ៉ឹង​ពេក​។ ​ខ្ញុំ​សង្ឃឹម​ថា​ពួកគេ​នឹង​អនុញ្ញាត​ឲ្យ​ខ្ញុំ​មើល​គេ​បាន​ខ្លះ​»។

បើ​ទោះបី​ឆ្នាំ​នេះ​ជា​ឆ្នាំ​ទី​ពីរ​នៃ​ការ​ធ្វើ​កំណែទម្រង់​ក៏ដោយ សុដាវ៉ុន ដូច​សិស្ស​ដទៃៗ​ដែល​ភ្នំពេញ​ប៉ុស្តិ៍​សម្ភាស​ថ្លែង​ថា​កញ្ញា​គិត​ថា​វា​លឿន​ពេក​ចំពោះ​ការ​ធ្វើ​កំណែទម្រង់​នេះ​។

ទោះ​យ៉ាង​ណា​ការ​បន់​ឲ្យ​អាច​បើក​ប្រ៊ុយយ៉ុង​ និង​ចម្លង​គ្នា​បាន​ប្រហែល​ជា​មិន​ជោគជ័យ​ទេ​ដោយសារ​ក្រសួង​អប់រំ​ថា​នឹង​​រឹត​តែ​តឹងរ៉ឹង​ជាង​ឆ្នាំ​មុន​។ ក្រៅពី​ការ​ដាក់​ទោស​ចំពោះ​អនុរក្ស​ និង​មេ​ប្រយោគ​ដែល​លក់​ចម្លើយ​ និង​ទទួល​សំណូក​ពី​សិស្ស​លោក ហង់ ជួនណារ៉ុន បាន​ថ្លែង​ថា​ហាង​កាហ្វេ​ និង​ហាង​ហ្វូតូកូ​ពី​នៅ​ជិត​សាលា​នឹង​ត្រូវ​បិទ​ក្នុង​អំឡុង​ការ​ប្រឡង​រយៈពេល​ពីរ​ថ្ងៃ​ផង​ដែរ៕ PS

អត្ថបទគួរចាប់អារម្មណ៍