ភ្នំពេញៈ អង្គការមូលនិធិអាស៊ីក្រោមកិច្ចសហប្រតិបត្តិការជាមួយក្រុមហ៊ុនស្មាតបានរៀបចំបង្កើតសៀវភៅកុមារ ក្រោមប្រធានបទ «តើខ្ញុំមានអារម្មណ៍យ៉ាងណា?» ដើម្បីផលិតសៀវភៅកុមារចំនួន ១០ ចំណងជើងផ្តោតលើការយល់ដឹងអំពីអារម្មណ៍ និងការឆ្លើយតបរបស់កុមារនៅក្នុងស្ថានភាពផ្សេងៗគ្នា ពិសេសក្នុងពេលរីករាលដាលជំងឺកូវីដ ១៩។
តាមសេចក្តីប្រកាសព័ត៌មានស្ដីពីការរៀបចំបង្កើតសៀវភៅនេះកាលពីថ្ងៃទី ១៧ ខែមករា បញ្ជាក់ថា៖ «សៀវភៅរឿងនឹងជួយកុមារក្នុងការយល់ដឹងអំពីអារម្មណ៍ និងការឆ្លើយតប»។ កុមារចាំបាច់ត្រូវយល់ដឹង និងចេះគ្រប់គ្រងអារម្មណ៍របស់ខ្លួនជាពិសេសនៅអំឡុងការរាតត្បាតជាសកលនៃជំងឺកូវីដ ១៩ ដែលមិនធ្លាប់កើតឡើងពីមុនមក។
សៀវភៅទាំងនោះនឹងបង្ហាញនូវស្ថានភាព និងចំណោទបញ្ហានានាដែលកុមារតូចអានអាចរៀនសូត្រស្វែងយល់ និងធ្វើការសម្រេចចិត្តក្នុងការឆ្លើយតបនៅក្នុងស្ថានភាពខុសៗគ្នា។ ការយល់ដឹងអំពីអារម្មណ៍ និងការឆ្លើយតបទៅនឹងស្ថានភាពខុសៗគ្នាគឺជាចំណុចសំខាន់នៃការអភិវឌ្ឍរបស់មនុស្ស និងការសិក្សារៀនសូត្ររបស់ពួកគេ។
លោកស្រី Meloney C. Lindberg តំណាងប្រចាំប្រទេសនៃអង្គការមូលនិធិអាស៊ីថ្លែងថា ការយល់ដឹងអំពីអារម្មណ៍ និងការឆ្លើយតបក្នុងស្ថានភាពខុសៗគ្នារបស់កុមារមានសមត្ថភាព ៥ ធំៗដែលទាក់ទងគ្នា រួមមានសមត្ថភាពក្នុងការយល់ដឹងអំពីខ្លួនឯងការគ្រប់គ្រងខ្លួនឯង ការយល់ដឹងអំពីសង្គមជំនាញទំនាក់ទំនង និងការសម្រេចចិត្តប្រកបដោយទំនួលខុសត្រូវ។
លោកស្រីថ្លែងថា៖ «ដូច្នេះគ្រប់ចំណងជើងនៃសៀវភៅរឿងសម្រាប់កុមារទាំង ១០ គឺរួមបញ្ចូលចំណុចទាំងនេះ»។ លោកស្រីបានឧទាហរណ៍បង្ហាញពីរឿង ១ នៅក្នុងចំណោមរឿងទាំង ១០ ដែលបង្កើតឡើងគឺរឿង «ខ្ញុំខ្លាច» បានបង្ហាញពីកុមារម្នាក់ឈ្មោះ ដារ៉ា ដែលមិនហ៊ានទៅសាលារៀនដោយខ្លួនឯង។ ដារ៉ា ទៅសាលារៀនជាមួយបងស្រីរៀងរាល់ថ្ងៃ។ ប៉ុន្តែ ថ្ងៃមួយបងស្រីរបស់ ដារ៉ា ឈឺហើយ ដារ៉ាមិនមានភាពជឿជាក់ក្នុងការទៅសាលារៀនដោយខ្លួនឯងឡើយ។
ដារ៉ា និយាយ៖ «បងស្រីមិនទៅសាលារៀនជាមួយខ្ញុំទេ? ចុះបើខ្ញុំទៅរៀនតែម្នាក់ឯង ហើយក្មេងផ្សេងទៀតនឹងធ្វើបាបខ្ញុំ? ចុះប្រសិនបើខ្ញុំទៅតែម្នាក់ឯង ហើយក្មេងផ្សេងទៀតព្រួតគ្នាមកយកលុយ ឬនំរបស់ខ្ញុំ? ប៉ុន្តែខ្ញុំចង់រៀន... ប៉ុន្តែ ...»។ លោកស្រីបញ្ជាក់ថា៖ «ដូច្នេះរឿងនេះនឹងជួយកុមារឱ្យរំងាប់អារម្មណ៍ភ័យខ្លាចរបស់ពួកគេ ហើយជួយពួកគេឱ្យបង្កើតយុទ្ធសាស្ត្រដើម្បីកសាងទំនុកចិត្តរបស់ពួកគេ»។
បើតាមលោកស្រី Meloney C. Lindberg ដើម្បីបង្ហាញការយល់ដឹងអំពីអារម្មណ៍ និងការឆ្លើយតបក្នុងស្ថានភាពខុសៗគ្នា ឱ្យកាន់តែប្រសើរដល់អ្នកអាន និងលើកកម្ពស់ការច្នៃប្រឌិត និងការស្រមើលស្រមៃអ្នកនិពន្ធបានប្រើប្រាស់តួអង្គ បច្ចេកទេស និងវិធីសាស្ត្រក្នុងការសរសេរថ្មីៗ និងខុសៗគ្នាដើម្បីទាក់ទាញអ្នកអាន។
លោកស្រីបានឱ្យដឹងថា ក្នុងដំណើរការដំបូងនៃការផលិតសៀវភៅទាំងនេះ គម្រោង Let''s Read នៃអង្គការមូលនិធិអាស៊ីបានជ្រើសរើសអ្នកនិពន្ធចំនួន ១០ នាក់ ហើយផ្តល់វគ្គបណ្តុះបណ្តាលទៅដល់ពួកគេ លើការសរសេរសៀវភៅរឿងរបស់កុមារ។ អ្នកនិពន្ធត្រូវបានគាំទ្រ និងណែនាំពីការីនិពន្ធក្នុងស្រុកដែលពោរពេញដោយបទពិសោធ និងជំនាញខាងផលិតសៀវភៅកុមារ។
លោក គាំ ទីវា ប្រធានផ្នែកកិច្ចការសាធារណៈនៃក្រុមហ៊ុនស្មាតបានលើកឡើងថា ក្រុមហ៊ុនស្មាតជឿជាក់ថា អំណានជាជំនួយជួយឱ្យកុមារអាចស្វែងយល់អំពីសក្ដានុពលរបស់ពួកគេ។ ដូច្នេះហើយបានជាក្រុមហ៊ុនស្មាត ធ្វើកិច្ចសហការជាមួយអង្គការមូលនិធិអាស៊ី ដើម្បីបង្កើនទម្លាប់ក្នុងការអានក្នុងចំណោមកុមារកម្ពុជាតាមរយៈកម្មវិធីផលិតសៀវភៅនេះ។
លោកថ្លែងថា៖ «តាមរយៈសាច់រឿងរបស់តួអង្គនៅក្នុងសៀវភៅរឿង កុមារអាចចេះសម្របខ្លួនក្នុងសហគមន៍របស់គាត់ហើយក៏ដូចជាការគ្រប់គ្រងអារម្មណ៍អវិជ្ជមានរបស់ខ្លួនផងដែរ»៕