.jpg)
សាលាធម្មសភាដែលបាក់រលំកាលពីថ្ងៃទី ២ ធ្នូ នៅខេត្តសៀមរាប។ រូបថត សហការី
សៀមរាបៈ មេការសំណង់ម្នាក់និយាយថា សាលាធម្មសភានៅវត្តប្រាសាទគោកចកស្ថិតក្នុងក្រុងសៀមរាបដែលបានបាក់រលំសង្កត់មនុស្សស្លាប់ ៣ នាក់ និងរបួសធ្ងន់ស្រាលចំនួន ១៣ នាក់ ខណៈកំពុងចាក់ប្លង់សេកាលពីថ្ងៃទី ២ ធ្នូនោះ គឺបណ្ដាលមកពីការសាងសង់មិនត្រឹមត្រូវតាមលក្ខណៈបច្ចេកទេស។
លោក ឈុំ កុសល ដែលប្រកបរបរជាមេការសំណង់រយៈពេលប្រហែល ៤ ឆ្នាំ និងជាបុគ្គលិកស្ម័គ្រចិត្តរបស់សហព័ន្ធសហជីពកម្មករសំណង់ និងព្រៃឈើកម្ពុជានៅខេត្តសៀមរាបប្រាប់ភ្នំពេញ-ប៉ុស្ដិ៍កាលពីថ្ងៃទី ៣ ធ្នូ ថាការចាក់ប្លង់សេ ដើម្បីសាងសង់សាលាធម្មសភានៅវត្តប្រាសាទគោកចក ធ្វើឡើងដោយខ្វះការយកចិត្តទុកដាក់អំពីការប្រើប្រាស់ជើងរន្ទាសម្រាប់ទ្រការពារទម្ងន់ប្លង់សេ។
លោកបន្តថា គេបានប្រើប្រាស់ចំនួនឈើ និងឫស្សីច្រើនជាងដែកសម្រាប់ធ្វើជារន្ទា ហើយរន្ទាជាឈើ និងឫស្សីទាំងនោះភាគច្រើនមិនត្រូវបានគេប្រើក្ដារដើម្បីវាយដែកគោលតភ្ជាប់ពីរន្ទាមួយទៅរន្ទាមួយក្នុងការជួយទប់លំនឹងគ្នាឡើយ។ មួយវិញទៀតដែកដែលគេប្រើប្រាស់សម្រាប់ចាក់ធ្វើជាសសរ សម្រាប់ទ្រប្លង់សេក៏ត្រូវពិនិត្យឃើញថា ជាសរសៃដែកតូចៗខុសពីធម្មតា។
លោកបញ្ជាក់ថា៖ «វាជាទម្លាប់នៃការងាររបស់ខ្ញុំ។ ខ្ញុំមិនបានទៅរៀនវិស្វករអីទេ។ ប៉ុន្តែជាក់ស្ដែង ទោះមិនចេះអី ក៏អាចវិនិច្ឆ័យបានដែរ វា(ការធ្លាក់ប្លង់សេ) នេះប្រាកដជាមានបញ្ហាបច្ចេកទេសណាមួយ។ អ៊ីចឹងបញ្ហាបច្ចេកទេសគឺមានតែ ២ ទេដែលខ្ញុំកត់សម្គាល់ខ្លាំង ទី ១ ដែកឆ្អឹងក្នុងសសរវាអត់រឹងមាំដោយសារដែកតូចៗ ហើយទី ២ រន្ទាខាងក្រោមវាក៏អត់រឹងមាំ ហើយនៅពេលរន្ទានៅចំណុចណាមួយទន់ បេតុងនឹងហូរ។ កាលណាបេតុងហូរ វានឹងទាញសសរនៅជុំវិញហ្នឹងឱ្យបាក់ហើយ»។
លោក កុសល បន្ថែមថា៖ «នៅពេលនេះការសាងសង់សំណង់អីផ្សេងៗ ដូចជាការសាងសង់បុរីជាដើមគឺគេ Update (ធ្វើឲ្យទាន់សម័យ)ប្រើរន្ទាជាដែកអស់ហើយ ហើយដែកហ្នឹងសុទ្ធតែមានខ្នែងសម្រាប់ចងភ្ជាប់គ្នា។ ប៉ុន្តែដោយឡែកនៅក្នុងរូបភាពដែលយើងបានឃើញអំពីការបាក់សាលាធម្មសភានេះ គឺរន្ទាហ្នឹង ភាគច្រើនសុទ្ធតែកូនឈើ»។
សេចក្ដីប្រកាសព័ត៌មានរបស់រដ្ឋបាលខេត្តបញ្ជាក់ថា ករណីរលំធ្លាក់ប្លង់សេសាលាធម្មសភាដែលកំពុងសាងសង់ក្នុងវត្តប្រាសាទគោកចកកាលពីម៉ោង ២ និង ១៤ នាទីរសៀលថ្ងៃចន្ទ គឺមានអ្នករបួសធ្ងន់ ៣ នាក់ របួសស្រាល ១០ នាក់ និងស្លាប់ ៣ នាក់។ ក្នុងចំណោមអ្នករបួសទាំង ១៣ នាក់ជាងសំណង់ ៩ នាក់ ប្រជាការពារ ២ នាក់ និងព្រះសង្ឃ ២ អង្គ។
សេចក្ដីប្រកាសព័ត៌មានបន្តថា ករណីគ្រោះថ្នាក់នេះបានប្រើប្រាស់កម្លាំងជួយសង្គ្រោះចំនួន ៧៧៥ នាក់ដូចជាកម្លាំងប្រដាប់អាវុធ ព្រះសង្ឃ ប្រជាការពារ និងប្រជាពលរដ្ឋ។ រីឯរថយន្តសង្គ្រោះមានចំនួន ៩ គ្រឿង រថយន្តពន្លត់អគ្គីភ័យ ២ គ្រឿង រថយន្តស្ទូច ៣ គ្រឿង និងអេស្កាវ៉ាទ័រ ៤ គ្រឿង។
ទំព័រហ្វេសប៊ុករដ្ឋបាលខេត្តសៀមរាបផ្សាយថាលោកនាយករដ្ឋមន្ត្រី ហ៊ុន សែន បានសម្ដែងការសោកស្ដាយ និងចូលរួមរំលែកទុក្ខចំពោះឧបទ្ទវហេតុនេះនិងបានឧបត្ថម្ភថវិកា ៩៩ លានរៀលដល់គ្រួសារសព និងជនរងគ្រោះទាំង ១៦ នាក់។
ចំពោះអ្នករងរបួសម្នាក់ទទួលបាន ៣ លានរៀល ចំណែកគ្រួសារសពក្នុង ១ គ្រួសារទទួលបាន ២០ លានរៀល។ លោក សៀង ណាំ តំណាងរាស្ដ្រមណ្ឌលសៀមរាបក៏បានឧបត្ថម្ភក្នុងចំណោមអ្នករងរបួសផងដែរ ដែលក្នុងម្នាក់ចំនួន ១០០ ដុល្លារ និងគ្រួសារសពទទួលបាន ៣០០ ដុល្លារក្នុង ១ គ្រួសារ។
លោក ភឹង ចិន្តារ៉េត ស្នងការរងខេត្តសៀមរាបថ្លែងកាលពីថ្ងៃទី ៣ ធ្នូ ថាអាជ្ញាធរមិនទាន់អាចស្វែងរកអ្នកទទួលខុសត្រូវនៅឡើយទេ។ លោកអះអាងថា សាលាធម្មសភានៅក្នុងវត្តប្រាសាទគោកចក ព្រះសង្ឃក្នុងវត្តជាអ្នកចាត់ចែងដឹកនាំសាងសង់។ ការសាងសង់សំណង់ភាគច្រើនត្រូវបានប្រជាពលរដ្ឋដែលមានសទ្ធាចូលរួមជួយដោយមិនយកកម្រៃ។
លោកបន្តថា អ្នកបានចូលរួមជួយចាក់ប្លង់សេសាលាធម្មសភាកាលពីថ្ងៃចន្ទ មានទាំងប៉ូលិស ប្រជាការពារ និងប្រជាពលរដ្ឋ។ លោកបញ្ជាក់ថា អ្នករបួសធ្ងន់ម្នាក់ដែលប៉ះពាល់ខ្លាំងនៅឆ្អឹងខ្នងត្រូវបានបញ្ជូនទៅព្យាបាលនៅមន្ទីរពេទ្យកាល់ម៉ែត ខណៈអ្នករងរបួសផ្សេងទៀតព្យាបាលនៅមន្ទីរពេទ្យបង្អែកខេត្ត។
លោក ភឹង ចិន្តារ៉េត បញ្ជាក់ថា៖ «នៅថ្ងៃចាក់ប្លង់សេហ្នឹង គឺមានទាំងប៉ូលិសប៉ុស្ដិ៍ ១២ នាក់ ប្រជាពលរដ្ឋស្ម័គ្រចិត្ត និងប្រជាការពារ ដើម្បីចូលរួមជួយចាក់ប្លង់សេហ្នឹងតាំងពីព្រឹករហូតដល់ប្រហែល (ម៉ោង) ២ បើសរុបមានមនុស្សជិត ៥០ នាក់។ ដល់ពេលចាក់ជិតហើយមានអ្នកចុះមកខ្លះ ហើយនៅសល់តែជាង ១០ នាក់ហ្នឹង ឧបទ្ទវហេតុក៏កើតឡើងទៅ»។
លោកបន្ថែមថា រន្ទាភាគច្រើនសម្រាប់ទ្រទម្ងន់ការចាក់ប្លង់សេដែលមានកម្ពស់ ៨ ម៉ែត្រ ទទឹង ៣០ ម៉ែត្រ និងបណ្ដោយ ៤០ ម៉ែត្រ ភាគច្រើនពិតជាឈើមែន។ ប៉ុន្តែមិនសន្និដ្ឋានថា មូលហេតុអ្វីបណ្ដាលឱ្យបាក់សសរ និងធ្លាក់ប្លង់សេសង្កត់មនុស្សនោះទេ ដោយលោកបានជំរុញឱ្យទៅសួរមន្ត្រីជំនាញរបស់ក្រសួងដែនដីវិញ។
ប៉ុន្តែលោក សេង ឡូត អ្នកនាំពាក្យក្រសួងដែនដីបញ្ជាក់ថា ការសាងសង់សាលាធម្មសភានោះមិនស្ថិតក្រោមការគ្រប់គ្រងរបស់ក្រសួងដែនដីឡើយ ប៉ុន្តែស្ថិតក្រោមអាជ្ញាធរអប្សរា និងបានជំរុញឱ្យទៅសួរអាជ្ញាធរអប្សរាវិញ។
លោក ឡុង កុសល ប្រធាននាយកដ្ឋានផ្សព្វផ្សាយនៃអាជ្ញាធរជាតិអប្សរាថ្លែងថា ស្ថាប័នរបស់លោកមិនពាក់ព័ន្ធនឹងរឿងនោះប៉ុន្មានទេ។ ថ្វីដ្បិតអាជ្ញាធរជាតិអប្សរាជាអ្នកអនុញ្ញាតឱ្យមានការសាងសង់សាលាធម្មសភានៅវត្តប្រាសាទ គោកចកនេះក្ដី ប៉ុន្តែមិនមែនជាអ្នកគ្រប់គ្រងសំណង់ក្នុងក្រុងសៀមរាបឡើយ។
លោកបានបញ្ជាក់ថា៖ «បើទោះជាវត្តប្រាសាទគោកចកស្ថិតក្នុងតំបន់ការពារបេតិកភណ្ឌក៏ដោយ ប៉ុន្តែអ្វីដែលខ្ញុំបញ្ជាក់បានគឺវត្តបានស្នើសុំមកអាជ្ញាធរអប្សរា ដើម្បីសាងសង់សាលាហ្នុង។ យើងបានអនុញ្ញាតឱ្យមានការកសាង ក៏ប៉ុន្តែរឿងគ្រប់គ្រងបច្ចេកទេសសំណង់ និងប្លង់សំណង់អីហ្នឹង លោក (ព្រះសង្ឃ) ត្រូវពិនិត្យពិចារណាជាមួយខាងណា អាហ្នឹងខ្ញុំក៏មិនដឹងដែរ ខ្ញុំមិនហ៊ាននិយាយទេ»។
លោក សុខ គីន ប្រធានសហព័ន្ធសហជីពកម្មករសំណង់ និងព្រៃឈើកម្ពុជាបានលើកឡើងថា ការសាងសង់សំណង់ដែលខ្វះគុណភាព និងបណ្តាលឱ្យមានគ្រោះថ្នាក់នាពេលកន្លងមកនោះ គឺដោយសារអាជ្ញាធរពាក់ព័ន្ធ និងមន្ត្រីជំនាញមិនមានការចុះទៅត្រួតពិនិត្យឱ្យបានត្រឹមត្រូវទៅលើគុណភាពក្នុងការសាងសង់សំណង់ទាំងនោះ។
លោក សុខ គីន បាននិយាយថា៖ «សូម្បីតែធ្វើរបង ឬក៏ផ្ទះមួយខ្នងក៏ត្រូវការសុំច្បាប់ដែរ។ ការសុំច្បាប់ ប្រសិនបើអាជ្ញាធរពាក់ព័ន្ធគាត់ឱ្យច្បាប់ ហើយមិនបានពិនិត្យគុណភាពសំណង់ឱ្យបានត្រឹមត្រូវ ខ្ញុំគិតថា នៅតែបន្តកើតមានគ្រោះថ្នាក់ដល់កម្មករសំណង់អ៊ីចឹង។ បើអាជ្ញាធរពិនិត្យគុណភាពសំណង់បានត្រឹមត្រូវដូចជាត្រូវដាក់ដែកប៉ុន្មាន និងសសរហ្នឹងគួរតែប៉ុន្មានតឹក អាចទ្របេតុងហ្នឹងបាន អាហ្នឹងខ្ញុំគិតថា សំណង់ទាំងអស់ហ្នឹងប្រហែលមិនបង្កគ្រោះថ្នាក់ដល់កម្មករសំណង់ទេ»។
លោកបន្ថែមថាជារឿងធម្មតាដែលជនរងគ្រោះទទួលបានសំណង ប៉ុន្តែតាមផ្លូវច្បាប់គឺត្រូវតែស្វែងរកអ្នកទទួលខុសត្រូវចំពោះការសាងសង់សំណង់ខ្វះគុណភាពទាំងនោះ។
លោក គីន បានបញ្ជាក់ថា៖ «យើងចង់ឱ្យមានវិធានការតឹងរ៉ឹងណាមួយ ដើម្បីការពារកុំឱ្យមានបញ្ហាហ្នឹងដដែលអ៊ីចឹង។ ឥឡូវយើងសង្កេតមើល ១ ខែឬ ២ ខែ យើងមានករណីហ្នឹងពី ២-៣ ករណី។ អ៊ីចឹងតើអាជ្ញាធរពាក់ព័ន្ធជំនាញគាត់ធ្វើអីវិញ បើមិនពិនិត្យគុណភាពសំណង់ តើជំនាញរបស់ពួកគាត់ធ្វើអីវិញ?»៕
