ភ្នំពេញៈ មេធាវីការពារក្តីឱ្យលោក ស៊ាង ចែត មេឃុំមកពីគណបក្សប្រឆាំងដែលត្រូវជាប់ចោទពីបទសូកប៉ាន់សាក្សីទាក់ទងនឹងរឿងរ៉ាវដ៏ចម្រូងចម្រាសរបស់កញ្ញា ខុម ចាន់តារាទី ដែលត្រូវបានគេអះអាងថាជាស្រីកំណាន់របស់លោក កឹម សុខា ប្រធានស្តីទីគណបក្សសង្គ្រោះជាតិនឹងដាក់ពាក្យបណ្តឹងសុំនៅក្រៅឃុំទៅសាលាដំបូងរាជធានីនៅថ្ងៃស្អែកនេះបន្ទាប់ពីមេឃុំរូបនេះបានជាប់ឃុំជិតមួយខែមកហើយក្នុងរឿងក្តីដែលមជ្ឈដ្ឋានជាច្រើនចាត់ទុកថាជារឿងនយោបាយ។
មេធាវីការពារក្តីឱ្យលោក ស៊ាង ចែត លោក សំ សុគង់ បានឲ្យដឹងថានៅថ្ងៃព្រហស្បតិ៍ ទី ២៦ ខែឧសភា នេះលោកនឹងដាក់ពាក្យស្នើសុំឱ្យកូនក្តីរបស់លោកបាននៅក្រៅឃុំបណ្តោះអាសន្នដើម្បីឱ្យគាត់មានពេលទៅបំពេញការងារជួយប្រជាពលរដ្ឋនៅក្នុងឃុំ។ លោកថា៖ «គេស៊ើបអង្កេតមានរយៈពេលយូរដែរហើយមួយទៀតទាក់ទងនីតិវិធីច្បាប់ត្រូវតែដាក់សុំទៅតុលាការដើម្បីគាត់បាននៅក្រៅឃុំពីព្រោះពាក់ព័ន្ធនឹងសេរីភាពរបស់គាត់ខណៈគាត់ជាមេគ្រួសារ និងមានតួនាទីជាមេឃុំស្រកដែលគាត់ត្រូវការពេលវេលាទៅជួយប្រជាពលរដ្ឋធ្វើការដើម្បីបម្រើជាតិ»។
លោកមេធាវីបានឲ្យដឹងទៀតថាផ្អែកលើលក្ខខណ្ឌរបស់កូនក្តីលោកតុលាការគួរតែអនុញ្ញាតឱ្យកូនក្តីរបស់លោកនៅក្រៅឃុំ។ លោកថា៖ «នៅក្នុងលក្ខណៈដែលមេធាវីបាន និងដាក់ពាក្យស្នើសុំនោះវាស្របទៅហ្នឹងនីតិវិធីក្រមព្រហ្មទណ្ឌប៉ុន្តែទាក់ទងនឹងការសម្រេចយ៉ាងណានោះវាជាឆន្ទានុសិទ្ធិមួយរបស់ចៅក្រមស៊ើបសួរក្នុងសំណុំរឿងហ្នឹង»។
កាលពីថ្ងៃទី ២៧ ខែមេសាព្រះរាជអាជ្ញារងសាលាដំបូងរាជធានីលោក មាស ច័ន្ទពិសិដ្ឋ បានធ្វើការសួរចម្លើយលោកមេឃុំឈ្មោះ ស៊ាង ចែត តាំងពីម៉ោង ៨ និង ៣០ នាទីព្រឹករហូតដល់ម៉ោងជាង ៦ ល្ងាចបន្ទាប់មកចៅក្រមស៊ើបសួរបានចេញដីកាសម្រេចឃុំខ្លួនបណ្តោះអាសន្នដោយចោទពីបទសូកប៉ាន់សាក្សីទាក់ទងនឹងរឿងរ៉ាវចម្រូងចម្រាសរវាងកញ្ញា ខុម ចាន់តារាទី ដែលត្រូវបានគេអះអាងថាជាស្រីកំណាន់របស់លោក កឹម សុខា ប្រធានស្តីទីគណបក្សសង្គ្រោះជាតិ។ ទាក់ទងនឹងករណី ខុម ចាន់តារាទី នេះក៏បានធ្វើឱ្យមន្ត្រីសិទ្ធិមនុស្សអង្គការអាដហុក ៤ រូប និងមន្ត្រី គជប ១ រូបត្រូវបានជាប់ឃុំផងដែរដោយរងការចោទពីបទសូកប៉ាន់សាក្សី និងបទសមគំនិតសូកប៉ាន់សាក្សី៕
