ភ្នំពេញៈ អគ្គលេខាធិការនៃគណៈកម្មាធិការមជ្ឈិមបក្សកុម្មុយនីស្ដ និងជាប្រធានរដ្ឋនៃសាធារណរដ្ឋសង្គមនិយមវៀតណាម លោក ង្វៀន ហ៊្វូជុង (Nguyen Phu Trong) នឹងមានជំនួបដោយឡែកពីគ្នាជាមួយថា្នក់ដឹកនាំកំពូលទាំង ៣ របស់កម្ពុជា និងធ្វើជាអធិបតីជាមួយលោកនាយករដ្ឋមន្ត្រី ហ៊ុន សែន ក្នុងពិធីចុះហត្ថលេខាលើឯកសារមួយចំនួន បន្ទាប់ពីលោកចូលគាល់ ព្រះករុណា ព្រះបាទសម្តេចព្រះបរមនាថ នរោត្តម សីហមុនី ព្រះមហាក្សត្រនៃព្រះរាជាណាចក្រកម្ពុជា។
ដំណើរទស្សនកិច្ចផ្លូវរដ្ឋមកកម្ពុជាដែលមានរយៈពេល ២ ថ្ងៃ ចាប់ពីថ្ងៃទី ២៥ ដល់ថ្ងៃទី ២៦ ខែកុម្ភៈ របស់លោកង្វៀន ហ៊្វូជុង (Nguyen Phu Trong) និង គណៈប្រតិភូជាន់ខ្ពស់របស់វៀតណាម ជាការឆ្លើយតបតាមការអញ្ជើញពីព្រះមហាក្សត្រកម្ពុជា ព្រះបាទ សម្តេចព្រះបរមនាថ នរោត្តម សីហមុនី។
តាមសេចក្ដីប្រកាសព័ត៌មានក្រសួងការបរទេសកម្ពុជាកាលពីថ្ងៃទី ២០ ខែកុម្ភៈនេះ បានឲ្យដឹងថាបន្ទាប់លោកង្វៀន ហ៊្វូជុងបានចូលគាល់ព្រះករុណាព្រះបាទសម្ដេចព្រះបរមនាថ នរោត្តម សីហមុនី និងសម្ដេចព្រះមហាក្សត្រី នរោត្តម មុនិនាថ សីហនុ ព្រះវររាជមាតាជាតិខ្មែរមុននឹងចូលទៅថ្វាយបង្គំសម្ដេចព្រះមហាសង្ឃរាជទាំង ២ គណៈនៃព្រះរាជាណាចក្រកម្ពុជា។
ក្រៅពីនោះសេចក្តីថ្លែងការណ៍បញ្ជាក់ថា៖ «ឯកឧត្តម ង្វៀន ហ៊្វូជុង នឹងមានជំនួបដោយឡែកពីគ្នាជាមួយសម្តេចវិបុលសេនាភក្តី សាយ ឈុំ ប្រធានព្រឹទ្ធសភា សម្តេចអគ្គមហាពញាចក្រី ហេង សំរិន ប្រធានរដ្ឋសភា និងសម្តេចអគ្គមហាសេនាបតីតេជោ ហ៊ុន សែន នាយករដ្ឋមន្ត្រី។ ឯកឧត្តម ង្វៀន ហ៊្វូជុង នឹងអញ្ជើញចូលរួមជាមួយ សម្តេចតេជោនាយករដ្ឋមន្ត្រី ហ៊ុន សែន ជាអធិបតីក្នុងពិធីចុះហត្ថលេខាលើឯកសារមួយចំនួនផងដែរ»។
លោក គិន ភា ប្រធានវិទ្យាស្ថានទំនាក់ទំនងអន្តរជាតិកម្ពុជានខៃរាជបណ្ឌិត្យសភាកម្ពុជាលើកឡើងថា កម្ពុជា-វៀតណាម គឺជាទំនាក់ទំនងធម្មតា ហើយថា ការពង្រឹងនិងពង្រីកទំនាក់ទំនង និងកិច្ចសហប្រតិបត្តិការនឹងជំរុញការដោះដូរពាណិជ្ជកម្ម រវាងប្រទេសទាំង ២។
លោកបញ្ជាក់ថា៖ «ដំណើរទស្សនកិច្ចប្រធានរដ្ឋវៀតណាមមកកម្ពុជា វាអាចនឹងធ្វើឲ្យទំនាក់ទំនងរវាងប្រទេសទាំង ២ វាកាន់តែប្រសើរឡើងហើយការយល់ដឹងពីគ្នាកាន់តែប្រសើរឡើង។ ធម្មតាដំណើរទស្សនកិច្ចប្រមុខរដ្ឋ ឬប្រធានរដ្ឋមួយ តែងតែភ្ជាប់ជាមួយនឹងកិច្ចព្រមព្រៀងផ្សេងៗដូច្នេះវាអាចជាកម្លាំងចលករជំរុញ និងលើកកម្ពស់បន្ថែមលើវិស័យពាណិជ្ជកម្ម»៕