.jpg)
ថ្នាក់ដឹកនាំអតីតបក្សប្រឆាំងនៅមុខស្ថានទូតខ្មែរ ពីថ្ងៃទី១១ វិច្ឆិកា។ រូប Eng Chhai Eang's FB
ភ្នំពេញៈ ថ្នាក់ដឹកនាំអតីតគណបក្សសង្គ្រោះជាតិ ដែលកំពុងស្នាក់នៅនិរទេសខ្លួននៅក្រៅប្រទេស បានប្រកាសកាលពីថ្ងៃទី ១ ធ្នូ ថា ខ្លួននឹងត្រឡប់ចូលមកកម្ពុជាវិញនៅថ្ងៃទី ៤ មករាជាមួយនឹងសកម្មជនផ្សេងទៀតដែលជាប់បណ្ដឹងនៅតុលាការ ដើម្បីឆ្លើយនៅមុខតុលាការ។ ប៉ុន្តែអ្នកវិភាគយល់ថា ការប្រកាសវិលត្រឡប់នេះ គ្រាន់តែជាការភូតកុហក។
បើតាមសេចក្ដីប្រកាសព័ត៌មានដែលចេញផ្សាយកាលពីថ្ងៃទី ១ ធ្នូ បញ្ជាក់ថា ការសម្រេចវិលត្រឡប់មកកម្ពុជាវិញនៃថ្នាក់ដឹកនាំ និងសកម្មជនគណបក្សត្រូវបានធ្វើឡើងក្នុងកិច្ចប្រជុំគណៈកម្មាធិការអចិន្រៃ្តយ៍ និងថ្នាក់ដឹកនាំគណបក្សនៅក្រៅប្រទេសតាមប្រព័ន្ធវីដេអូ ពីថ្ងៃទី ២៧ ដល់ ២៩ វិច្ឆិកា។
សេចក្ដីប្រកាសព័ត៌មានសរសេរថា៖ «ថ្នាក់ដឹកនាំ និងសកម្មជនគណបក្សសង្គ្រោះជាតិដែលមានឈ្មោះក្នុងដីកាកោះរបស់តុលាការក្រុងភ្នំពេញ ហើយដែលកំពុងរស់នៅនិរទេសត្រូវវិលត្រឡប់ទៅកាន់ប្រទេសកម្ពុជាវិញ»។ អតីតបក្សប្រឆាំងដែលត្រូវបានតុលាការកំពូលរំលាយនេះ បញ្ជាក់ថា ការវិលត្រឡប់នេះដឹកនាំដោយលោកស្រី មូរ សុខហួរ ដែលនឹងធ្វើឡើងនៅថ្ងៃទី ៤ មករា។
កាលពីសប្ដាហ៍មុន សាលាដំបូងរាជធានីភ្នំពេញបានចាប់ផ្ដើមសវនាការជំនុំជម្រះសកម្មជនអតីតគណបក្សសង្ក្រោះជាតិជាង ១៣០ នាក់ពាក់ព័ន្ធនឹងបទចោទរួមគំនិតក្បត់ និងញុះញង់ឱ្យប្រព្រឹត្តបទល្មើសជាអាទិ៍។ ប៉ុន្តែតុលាការបានលើកពេលសវនាការទៅថ្ងៃទី ១៤ មករា និង ថ្ងៃទី ៤ មីនា វិញ។
លោកស្រី មូរ សុខហួរ ថ្នាក់ដឹកនាំ ១ រូបនៃអតីតគណបក្សសង្គ្រោះជាតិប្រាប់ភ្នំពេញប៉ុស្តិ៍តាមប្រព័ន្ធអេឡិចត្រូនិកពីសហរដ្ឋអាមេរិកពីម្សិលមិញថា ការវិលត្រឡប់មកកម្ពុជាវិញនេះ គឺដើម្បីមានវត្តមាន និងឆ្លើយនៅក្នុងតុលាការក្នុងពេលកាត់ក្ដី តាមគោលការណ៍នៃការទទួលបានការកាត់ទោសដោយយុត្តិធម៌ និងបង្ហាញឆន្ទៈមិនគេចវេះ។
លោកស្រីថ្លែងដូច្នេះថា៖ «ថាតើ [គេ] ចាប់យើងខ្ញុំ ឬមិនចាប់ ខ្ញុំមិនធ្វើអត្ថាធិប្បាយទេ ប៉ុន្តែយើងត្រៀមខ្លួននៅគ្រប់កាលៈទេសៈទាំងអស់។ យើងត្រៀមខ្លួនទោះបីចាប់ ឬមិនចាប់ ឬត្រូវដាក់ ១៤ ថ្ងៃនៃការធ្វើចត្តាឡីស័កដោយសារកូវីដ១៩ យើងនឹងធ្វើទាំងអស់។ ចាប់ក៏ឱ្យចាប់ដាក់ឃុំក៏យើងឱ្យដាក់ឃុំ តែអ្វីដែលយើងទាមទារសូមឱ្យមានគឺឱ្យយើងខ្ញុំមានវត្តមានពេលកាត់សេចក្ដីយើងខ្ញុំ»។
លោក ឆាយ គឹមខឿន អ្នកនាំពាក្យអគ្គស្នងការដ្ឋាននគរបាលជាតិថ្លែងថា សមត្ថកិច្ចមិនរារាំងការវិលត្រឡប់របស់ពួកគាត់ទេ ប៉ុន្តែសមត្ថកិច្ចនឹងចាប់ខ្លួនអ្នកដែលតុលាការចេញដីកាឱ្យចាប់ខ្លួន។
លោក អ៊ូ ច័ន្ទរ័ត្ន អតីតតំណាងរាស្ត្របក្សប្រឆាំងថ្លែងថា លោកមិនបានដឹងពីការប្រជុំសម្រេចនេះទេ។ លទ្ធភាពនៃការវិលត្រឡប់ក៏មិនងាយស្រួល ព្រោះលិខិតឆ្លងដែនរបស់ពួកគាត់មួយចំនួនធំត្រូវបានរដ្ឋាភិបាលលុបចោល។ បើពួកគាត់ត្រឡប់មកវិញមែន រដ្ឋាភិបាលអាចនឹងចាត់វិធានការក្ដៅ។
លោកថា៖ «ខ្ញុំមើលទៅ ខ្ញុំមិនមានជំនឿថា ពួកគាត់នឹងត្រឡប់មកវិញទេ។ ទាំងការប្ដេជ្ញាចិត្តរបស់គាត់ម្ដងហើយម្ដងទៀត ទាំងការធ្វើមាតុភូមិនិវត្តន៍នេះ គឺទី ១ មិនមានលទ្ធភាពត្រឡប់មកវិញ។ ទី ២ ការប្ដេជ្ញាចិត្តរបស់គាត់គឺមិនច្បាស់លាស់ទេ គឺមានប៉ុន្មានដងហើយ»។
លោកបន្តថា៖ «ចំពោះមន្ត្រីថ្នាក់ក្រោម និងសកម្មជន ខ្ញុំជឿថាមកដល់ពេលនេះប្រហែលមិនសូវមានអ្នកចាប់អារម្មណ៍ចូលរួមគាំទ្រប៉ុន្មានទេ ព្រោះកន្លងមកនេះពួកគាត់ទទួលរងការគំរាមកំហែងខ្លាំងពីស្ថាប័នតុលាការពីរដ្ឋាភិបាល។ ដូច្នេះពួកគាត់ប្រហែលមិនហ៊ានចេញមុខប្រកូកប្រកាស ឬទៅទទួលដំណើរនិវត្តន៍របស់ថ្នាក់ដឹកនាំទេ ព្រោះពួកគាត់នៅក្នុងកណ្ដាប់ដៃរបស់តុលាការនៅឡើយមួយចំនួនធំ»។
លោក ជែម សុខ អ្នកវិភាគនយោបាយមានមូលដ្ឋាននៅសហរដ្ឋអាមេរិកថ្លែងថា ក្រុមថ្នាក់ដឹកនាំអតីតបក្សប្រឆាំងកំពុងបង្កើតព្រឹត្តិការណ៍ភូតកុហកម្ដងទៀត។ កាលពីពេលថ្មីៗនេះលោកស្រី មូរ សុខហួរ បានទៅសម្ដែង ១ ឆាកនៅមុខស្ថានទូតកម្ពុជាប្រចាំទីក្រុងវ៉ាស៊ីនតោន ដោយប្រកាសថា មនុស្សមួយចំនួនត្រូវការឱ្យលិខិតឆ្លងដែនរបស់ខ្លួនមានសុពលភាពឡើងវិញ។
លោកថា៖ «ដល់ឥឡូវបែរជាមកប្រកាសថា ខ្លួនប្រុងត្រឡប់មកនៅថ្ងៃទី ៤ មករា វាជារឿងអស់សំណើចទៅវិញ។ រឿងគួរឱ្យអស់សំណើចគឺថា បើអត់មានលិខិតស្នាមធ្វើដំណើរធ្វើម៉េចត្រឡប់មកបាន ចំពោះអ្នកដែលកាន់លិខិតឆ្លងដែនកម្ពុជា។ ចំណែកឯមនុស្ស ដូចលោកស្រី មូរ សុខហួរ ឬអ្នកខ្លះដែលកាន់លិខិតឆ្លងដែនបរទេស ខ្លួនបានលេងសៀកសម្ដែងនៅមុខ ស្ថានទូតថា ខ្លួនមកសវនាការមិនកើតទេ ព្រោះគ្មានលិខិតឆ្លងដែន។ នេះជាការកុហក ២ ជាន់»៕
វីដេអូ៖
