.jpg)
លោក ឧស្មាន់ ហាសាន់ ក្នុងសន្និសីទកាសែតម្សិលមិញ។ ហេង ជីវ័ន
ភ្នំពេញៈ មេដឹកនាំអ៊ិស្លាមបានអំពាវនាវឱ្យសាសនិកអ៊ិស្លាមនៅទូទាំងប្រទេស សូមកុំប្រមូលផ្តុំគ្នានៅតាមព្រះវិហារក្នុងពិធីបុណ្យសាសនារ៉ាម៉ាដន ឬបុណ្យតមអាហារ ដើម្បីចូលរួមទប់ស្កាត់ការរាតត្បាតនៃជំងឺកូវីដ ១៩។
លោក ឧស្មាន់ ហាសាន់ ទេសរដ្ឋមន្ត្រី ទទួលបន្ទុកបេសកកម្មពិសេសបានអំពាវនាវឱ្យសាសនិកអ៊ិស្លាមទាំងអស់នៅទូទាំងប្រទេសបន្តអនុវត្តតាមសេចក្ដីណែនាំរបស់រដ្ឋាភិបាលក្រសួងសុខាភិបាល និងគណៈដឹកនាំជាន់ខ្ពស់នៃសាសនាអ៊ិស្លាមនៅកម្ពុជា ដោយមិនត្រូវជួបជុំ និងប្រមូលផ្ដុំគ្នានៅតាមវិហារឡើយនាពិធីបុណ្យរ៉ាម៉ាដនដែលនឹងត្រូវចាប់ផ្ដើមពីថ្ងៃទី ២៤ ឬថ្ងៃទី ២៥ ខែមេសា។
លោកថា៖ «ជាកាតព្វកិច្ចសាសនិកអ៊ិស្លាម អ្នកដែលបាននាំជំងឺទៅឱ្យអ្នកដទៃ អ្នកនឹងទទួលបានបាបនេះបើនិយាយតាមខាងសាសនា។ ព្រោះជាច្បាប់ខាងអ៊ិស្លាមថា ត្រូវតែគោរពទៅតាមការដឹកនាំរបស់មេដឹកនាំ។ អ្នកកាន់សាសនាអ៊ិស្លាមហើយមិនគោរពទៅតាមមេដឹកនាំ នោះមិនទាន់ក្លាយទៅជាអ៊ិស្លាមនោះឡើយ លុះត្រាតែគោរពទៅតាមមេដឹកនាំរបស់ខ្លួន»។
លោក ឧស្មាន់ ហាសាន់ ថ្លែងបែបនេះនៅក្នុងសន្និសីទសារព័ត៌មានកាលពីថ្ងៃម្សិលមិញនៅទីស្ដីការគណៈរដ្ឋមន្ត្រី។ លោកបន្តថា ក្នុងចំណោមខ្មែរអ៊ិស្លាមទាំង ៣៣ នាក់ ដែលឆ្លងជំងឺកូវីដ ១៩ គឺត្រូវបានព្យាបាលជាសះស្បើយចំនួន ៣២ នាក់ហើយ និងនៅសល់តែម្នាក់ទៀតដែលកំពុងសម្រាកព្យាបាលនៅមន្ទីរពេទ្យខេត្តកំពង់ឆ្នាំង។
លោកបន្តថា ខ្មែរអ៊ិស្លាមដែលកំពុងសម្រាកព្យាបាលនេះគឺជាបុរសវ័យចំណាស់ជាងគេ និងកំពុងមានរោគប្រចាំកាយ ដូចជាទឹកនោមផ្អែម និងជំងឺលើសឈាម ប៉ុន្តែនៅមានសុខភាព និងកម្លាំងមាំមួននៅឡើយ។
កាលពីថ្ងៃទី ២០ ខែមេសា គណៈដឹកនាំជាន់ខ្ពស់នៃសាសនាអ៊ិស្លាមនៅកម្ពុជា បានចេញសេចក្តីជូនដំណឹងឱ្យសាសនិកអ៊ិស្លាមទាំងអស់ចូលរួមជាមួយរដ្ឋាភិបាលដើម្បីប្រយុទ្ធប្រឆាំងជំងឺកូវីដ ១៩ រហូតទទួលបានជោគជ័យទាំងស្រុងដោយនៅក្នុងអំឡុងពេលបុណ្យរ៉ាម៉ាដនគឺមិនត្រូវជួបជុំនៅតាមវិហារ ឬប្រមូលផ្ដុំគ្នាតាមផ្ទះឡើយ។
បើតាមលោក ហាសាន់ ប្រទេសដែលកាន់សាសនាអ៊ិស្លាមទាំង ៥៧ ដែលជាសមាជិកអង្គការ OIC ដែលមានប្រជាជនជិត ២ ពាន់លាននាក់គឺមានចំនួន ៥៤ ប្រទេសបានឆ្លងជំងឺកូវីដ ១៩ ដែលមានជាង ២ សែន ៤ ម៉ឺន ៥ ពាន់ករណី ក្នុងនោះប្រទេស តួកគី មានអ្នកឆ្លងច្រើនជាងបំផុត គឺជាង ៨៦ ពាន់ករណី ខណៈអ៊ីរ៉ង់គឺជាប្រទេសដែលមានអ្នកស្លាប់ច្រើនជាងគេមានរហូតចំនួន ៥ ១១៨ នាក់៕
