ភ្នំពេញៈ មេធាវីការពារក្តីលោក James Ricketson កំពុងរៀបចំឯកសារដើម្បីស្នើសុំទៅរាជរដ្ឋាភិបាលកម្ពុជាក្នុងការស្នើសុំលើកលែងទោសពីព្រះមហាក្សត្រដល់អ្នកផលិតខ្សែភាពយន្តជនជាតិអូស្ត្រាលីអាយុ ៦៩ ឆ្នាំ។
លោកមេធាវី គង់ សំអុន ថ្លែងថាលិខិតស្នើសុំលើកលែងទោសអាចនឹងដាក់ជូននៅដើមសប្តាហ៍ក្រោយនេះ។
លោកមេធាវីបានថ្លែងកាលពីម្សិលមិញថា៖ «យើងសម្រេចស្នើសុំការលើកលែងទោសពីព្រះមហាក្សត្រ។ យើងកំពុងរៀបចំដោយសារយើងត្រូវការឯកសារមួយចំនួនដែលត្រូវផ្ញើទៅជូនសម្តេចនាយក។ ប្រហែលដើមសប្តាហ៍ក្រោយមើលទៅព្រោះសប្តាហ៍នេះធ្វើអត់ទាន់ដោយសារយើងត្រូវការឯកសារមួយចំនួនដើម្បីដាក់ភ្ជាប់ជាមួយ»។
លោក Ricketson ត្រូវបានសាលាដំបូងរាជធានីភ្នំពេញផ្តន្ទាទោសដាក់ពន្ធនាគាររយៈពេល ៦ ឆ្នាំពីបទចារកម្ម ឬប្រមូលព័ត៌មានជាអាទិ៍ដែលប៉ះពាល់ដល់ការការពារជាតិ។ តុលាការបានអះអាងថាលោក Ricketson បានប្រព្រឹត្តបទល្មើសនេះនៅកម្ពុជាចាប់ពីខែធ្នូ ឆ្នាំ ២០១០ ដល់ពេលចាប់ខ្លួននៅថ្ងៃទី ៣ ខែមិថុនាឆ្នាំ ២០១៧។
ក្នុងពេលសវនាការរយៈពេល ៧ ថ្ងៃកាលពីខែមុនតុលាការបានចោទសួរគាត់លើចំណុចជាច្រើនរាប់ចាប់ពីការផលិតខ្សែភាពយន្តអំពីកម្ពុជា ការចិញ្ចឹមកុមារក្រីក្រកម្ពុជា និងទំនាក់ទំនងរបស់លោកជាមួយមេដឹកនាំគណបក្សសង្គ្រោះជាតិ។
លោកមេធាវី គង់ សំអុន បានថ្លែងថានៅពេលនេះលោកមិនប្តឹងឧទ្ធរណ៍ទេពីព្រោះថាលោកសង្ឃឹមលោក Ricketson នឹងទទួលបានការលើកលែងទោសពីរាជរដ្ឋាភិបាល និងពីព្រះមហាក្សត្រ។ លោកថ្លែងថា៖ «យើងសង្ឃឹមថាករណីរបស់គាត់នឹងទទួលបានការអនុគ្រោះពីរាជរដ្ឋាភិបាលក៏ដូចជាព្រះមហាក្សត្រកម្ពុជា។ ដូច្នេះរឿងនេះត្រូវបញ្ចប់ហើយ រឿងឧទ្ធរណ៍ហ្នឹងមិនចាំបាច់មានទេ»។
លោកបន្តថា៖ «គាត់ហ្នឹងបើនិយាយពីការងារជួយមកស្រុកខ្មែរវាច្រើន យើងឃើញ ហើយមួយទៀតជីវិតរបស់គាត់មិនមែនជាអ្នកនយោបាយ ឬជារាជការរបស់រដ្ឋាភិបាលណាទេ។ គាត់ជាមនុស្សសេរី ឯករាជ្យក្នុងការផលិតខ្សែភាពយន្តជាដើម។ អ្វីដែលគាត់ធ្វើនេះ ទោះបីសកម្មភាពខ្លះវាអាចលើសលស់ប៉ះពាល់ដល់ប្រមុខរាជរដ្ឋាភិបាល ប៉ះពាល់ដល់កម្ពុជា ក៏ប៉ុន្តែក្នុងចេតនារបស់គាត់គឺអត់មានអីអាក្រក់សម្រាប់កម្ពុជាទេ។ អ៊ីចឹងយើងឃើញថា គាត់ជាមនុស្សល្អ ជាមនុស្សដែលគួរទទួលបានការលើកលែងទោស»។
ភ្នំពេញ ប៉ុស្តិ៍ មិនអាចសុំការបំភ្លឺពីក្រុមគ្រួសាររបស់លោក Ricketson បានទេកាលពីម្សិលមិញ៕