ភ្នំពេញៈ លោក ចាន់ ចេន សហមេធាវីម្នាក់របស់លោក កឹម សុខា ប្រធាននៃអតីតគណបក្សប្រឆាំង បានប្រាប់សារព័ត៌មានថា ក្រុមមេធាវី គ្រោងស្នើទៅចៅក្រមស៊ើបសួរនៃសាលាដំបូងរាជធានីភ្នំពេញបិទបញ្ចប់ការស៊ើបសួរលើកូនក្តីរបស់ខ្លួន ក្នុងពេលឆាប់ៗ ខណៈសហមេធាវីផ្សេងទៀតក៏ទទូចឲ្យមានការទម្លាក់ចោលការចោទប្រកាន់ជាសំខាន់តែម្តង។
លោកមេធាវី ចាន់ ចេន អះអាងថា ដំណើរការនីតិវិធីស៊ើបអង្កេតលើលោក កឹម សុខា របស់ចៅក្រមស៊ើបសួរសាលាដំបូងរាជធានីភ្នំពេញមិនមានការវិវត្តទៅមុខនោះទេ គឺនៅទ្រឹងនៅឡើយ។ លោកបានប្រាប់ថា៖ «យើងពិតជាមានគម្រោងស្នើឱ្យបិទការស៊ើប ក្នុងពេលឆាប់ៗនេះ ដោយការស៊ើបរបស់ចៅក្រមយូរហើយ ជាង ១ ឆ្នាំហើយ សាក្សីក៏បានសួរច្រើនហូរហែហើយ»។
លោក កឹម សុខា អតីតប្រធាននៃអតីតគណបក្សសង្គ្រោះជាតិត្រូវបានចាប់ខ្លួននៅដើមខែកញ្ញាឆ្នាំ ២០១៧ និងត្រូវបានចោទប្រកាន់ពីបទក្បត់ជាតិដែលឃុបឃិតជាមួយសហរដ្ឋអាមេរិក។ បន្ទាប់ពីត្រូវបានឃុំខ្លួនប្រមាណ ១ ឆ្នាំនៅក្នុងពន្ធនាគារត្រពាំងផ្លុង លោកសុខាក៏ត្រូវបានដោះលែងឱ្យមកស្នាក់នៅក្នុងផ្ទះ ប៉ុន្តែដាក់ឲ្យនៅក្រោមការត្រួតពិនិត្យរបស់តុលាការវិញ កាលពីថ្ងៃទី ១០ ខែ កញ្ញា ឆ្នាំ ២០១៨។
រហូតមកដល់ពេលនេះ លោក កឹម សុខា បានស្ថិតក្នុងការឃុំខ្លួន និងឃ្លាំមើលអស់រយៈពេលជិត ២ ឆ្នាំមកហើយ ដើម្បីឱ្យចៅក្រមស៊ើបសួរសាលាដំបូងរាជធានីភ្នំពេញ បើកការស៊ើបអង្កេតលើសំណុំរឿងក្បត់ជាតិដែលចោទប្រកាន់ឡើងដោយរដ្ឋាភិបាលកម្ពុជា។
លោក ចាន់ ចេន ចាត់ទុកនីតិវិធីស៊ើបអង្កេតលើលោក កឹម សុខា បែបនេះថា ជាការអូសបន្លាយពេលវេលាច្រើនហួសហេតុមកលើកូនក្តីរបស់លោក។ ហេតុដូច្នេះ លោកនឹងពិភាក្សាជាមួយក្រុមមេធាវីដាក់សំណើសុំឱ្យតុលាការបិទបញ្ចប់ការស៊ើបអង្កេតលើកូនក្ដីលោក។ ប៉ុន្ដែ លោកមិនទាន់អាចប្រាប់ឱ្យដឹងថា នឹងដាក់សំណើនៅថ្ងៃណានោះទេ គ្រាន់តែបញ្ជាក់ថាក្នុងពេលឆាប់ៗនេះ។
លោក ផែង ហេង សហមេធាវីការពារក្ដីឱ្យលោក កឹម សុខា បានប្រាប់ថា លោកមិនទាន់បានជជែកគ្នាជាមួយសហមេធាវីផ្សេងទៀតជុំវិញការសុំបិទការស៊ើបសួរនោះទេក្រៅពីការសុំឱ្យទម្លាក់ចោលការចោទប្រកាន់មកលើលោកកឹម សុខា។
លោកបញ្ជាក់ថា៖ «ព្រោះមេធាវីយើងសិក្សារឿងហ្នឹងទៅ វាមិនមានបទល្មើសអី ឬក៏អង្គហេតុណាមួយ ដែលអាចចោទប្រកាន់បាន។ រឿងបិទមិនបិទនោះជារឿងមួយ ប៉ុន្ដែរឿងដែលសំខាន់បំផុតនោះ គឺយើងសុំឱ្យទម្លាក់ចោលការចោទប្រកាន់ ដើម្បីយុត្ដិធម៌សង្គម ការពារផ្លូវច្បាប់»។
បើតាមលោក ផែង ហេង គឺលោក កឹម សុខា កំពុងមានបញ្ហាជំងឺកៀបសរសៃស្មាដែលនៅតែបន្តធ្វើទុក្ខដល់សុខភាពរបស់លោកជារៀងរាល់ថ្ងៃ។
ទាក់ទងនឹងបញ្ហាជំងឺ និងការរកមិនឃើញភ័ស្តុតាងថ្មីណាមួយ ដើម្បីដាក់បន្ទុកលើលោក កឹម សុខា ទើបលោក ចាន់ ចេន ចង់ឱ្យតុលាការបញ្ចប់ដំណើរការស៊ើបអង្កេតតទៅទៀត ព្រោះមកដល់ពេលនេះ តុលាការរកមិនឃើញនូវភ័ស្តុតាងថ្មីណាមួយ ដើម្បីដាក់បន្ទុកលើ លោក កឹម សុខា ឡើយ។ លោកថា កន្លងមកក្រុមមេធាវីក៏ធ្លាប់បានដាក់សំណើឱ្យតុលាការពន្លឿនការស៊ើបអង្កេតលើលោក កឹម សុខា ដែរ ប៉ុន្តែមិនទទួលបានផលនោះទេ។
តុលាការរាជធានីភ្នំពេញបានបដិសេធចំនួន ៤ លើករួចមកហើយ ចំពោះសំណើសុំឱ្យទម្លាក់ចោលបទចោទលោក កឹម សុខា ខណៈលោកនាយករដ្ឋមន្រ្តី ហ៊ុន សែន ក៏ធ្លាប់បានព្រមានដោយប្រយោលថា នឹងមិនដោះលែងអតីតប្រធានគណបក្សប្រឆាំងរូបនេះទេ។ ការបដិសេធធ្វើឡើងក្រោយពេលក្រុមមេធាវីការពារក្តីលោក កឹម សុខា បានព្យាយាមដាក់ពាក្យស្នើសុំជាថ្មីម្តងទៀត។
ជុំវិញគម្រោងស្នើសុំឲ្យបិទការស៊ើបអង្កេតសំណុំរឿងនេះលោក ជិន ម៉ាលីន អ្នកនាំពាក្យក្រសួងយុត្តិធម៌ ប្រាប់ភ្នំពេញប៉ុស្ដិ៍ថា ការស្នើសុំនេះគឺជាសិទ្ធិរបស់មេធាវី ប៉ុន្ដែតាមនីតិវិធីច្បាប់ការសម្រេចគឺចៅក្រមស៊ើបសួរជាអ្នកសម្រេច។
លោកបន្តថា៖ «ប្រសិនបើគាត់ [ចៅក្រមស៊ើបសួរ] មានមូលដ្ឋានគ្រប់គ្រាន់ក្នុងការបិទបញ្ចប់ការស៊ើបសួររបស់គាត់ នោះគាត់អាចសម្រេចបិទការស៊ើបសួរត្រឹមប៉ុណ្ណឹង។ ប្រសិនបើគាត់យល់ថា គាត់ត្រូវការពេលវេលាបន្ថែមទៀត ហើយគាត់កំពុងតែដំណើរការនីតិវិធីនេះ គាត់អាចបន្ដនូវដំណើរការស៊ើបសួរនេះបន្ដទៀត។ មានតែចៅក្រមស៊ើបសួរទេដែលគាត់ដឹងថាមានអ្វីនៅពីក្រោយសំណុំរឿង ឬក៏ត្រូវការពេលវេលាបន្ថែមទៀតលើសំណុំរឿងនេះទៀតក៏អត់»។
កាលពីពេលថ្មីៗ ក្នុងដំណើរបេសកកម្មរបស់លោកស្រី រ៉ូណា ស្មុីត អ្នករាយការណ៍ពិសេសរបស់អង្គការសហប្រជាជាតិ លោកស្រី បានស្នើសុំចូលជួបលោក កឹម សុខា ប៉ុន្ដែត្រូវបានចៅក្រមស៊ើបសួរបដិសេធ។ ករណីនេះ លោកជិន ម៉ាលីន បានបញ្ជាក់ថា ព្រោះសំណុំរឿងនេះកំពុងស្ថិតនៅក្នុងដំណើរការនៃការស៊ើបសួរ ដោយផ្អែកលើនីតិវិធីច្បាប់បើការជួបនោះ ប៉ះពាល់ដល់ការស៊ើបសួរ ចៅក្រមមានសិទ្ធិបដិសេធ។
ពាក់ព័ន្ធករណីនេះអ្នកជំនាញផ្នែកច្បាប់លោកមេធាវី សុក សំអឿន បានសម្ដែងការគាំទ្រចំពោះការស្នើសុំបិទបញ្ចប់ការស៊ើបសួរសំណុំរឿងរបស់មេធាវីការពារលោក កឹម សុខា។
លោក សំអឿន បានថ្លែងថា៖ «ធម្មតាយើងយកគេទៅឃុំចោល ហើយអត់ធ្វើការអ៊ីចឹង គេមើលទៅវាអយុត្ដិធម៌។ តាមពិតត្រូវមានច្បាប់កំណត់ឱ្យច្បាស់ផង កុំចេះតែយកគេទៅឃុំចោល វាអត់សម។ ខ្ញុំគាំទ្រមេធាវីដែលចង់ឱ្យមានការស្នើសុំអ៊ីចឹង នេះវាជាភាពឆ្លាតវៃរបស់មេធាវីហើយ»៕