ភ្នំពេញៈ គណៈមេធាវីនៃព្រះរាជាណាចក្រកម្ពុជា ចេញសេចក្ដីសម្រេចតម្រូវឱ្យមេធាវីបរទេសដែលប្រកបវិជ្ជាជីវៈនៅសាលាក្ដីកាត់ទោសអតីតមេដឹកនាំខ្មែរក្រហមត្រូវចុះបញ្ជីជាមុនជាមួយគណៈមេធាវីកម្ពុជា និងត្រូវមានវិញ្ញាបនបត្រប្រកបវិជ្ជាជីវៈមេធាវី ដែលចេញដោយគណៈមេធាវី។ នេះបើតាមសេចក្ដីសម្រេចរបស់គណៈមេធាវីនៃព្រះរាជាណាចក្រកម្ពុជាចុះថ្ងៃទី ១៨ ខែធ្នូ។
សេចក្ដីសម្រេចបានចែងថា៖ «មេធាវីបរទេសដែលបំពេញតាមលក្ខខណ្ឌដែលបានកំណត់ក្នុងវិធានផ្ទៃក្នុងនៃអង្គជំនុំជម្រះវិសាមញ្ញក្នុងតុលាការកម្ពុជាត្រូវដាក់ពាក្យស្នើសុំចុះបញ្ជីតាមរយៈអង្គភាពគាំពារការពារក្ដី ឬអង្គភាពគាំពារជនរងគ្រោះនៃអង្គជំនុំជម្រះវិសាមញ្ញក្នុងតុលាការកម្ពុជា»។
អង្គភាពគាំពារការពារក្ដី ឬអង្គភាពគាំពារជនរងគ្រោះត្រូវត្រួតពិនិត្យ និងបកប្រែឯកសារមកជាភាសាខ្មែរឱ្យបានត្រឹមត្រូវព្រមទាំងដាក់ពាក្យស្នើសុំដែលមានលក្ខណៈគ្រប់គ្រាន់ទៅគណៈមេធាវី។ បន្ទាប់ពីដាក់ពាក្យរួច គណៈមេធាវីនឹងជូនដំណឹងត្រឡប់ទៅវិញក្នុងរយៈពេល ៣០ ថ្ងៃ។
ប្រសិនបើគណៈមេធាវីសម្រេចចុះឈ្មោះមេធាវីបរទេសក្នុងបញ្ជី មេធាវីដែលស្នើសុំត្រូវបង់ថ្លៃចុះបញ្ជី ៥០០ ដុល្លារសម្រាប់ពេលជាក់លាក់មួយហើយត្រូវស្នើសុំធ្វើសច្ចាប្រណិធាននៅចំពោះមុខសាលាឧទ្ធរណ៍ ហើយត្រូវមានវត្តមានតាមកាលកំណត់របស់សាលាឧទ្ធរណ៍។
ចំពោះមេធាវីដែលបានចុះបញ្ជីពីពេលមុនរួចហើយ និងចង់បន្តចុះឈ្មោះក្នុងបញ្ជីគណៈមេធាវីកម្ពុជា ដើម្បីប្រកបវិជ្ជាជីវៈនៅសាលាក្ដីកាត់ទោសអតីតមេដឹកនាំខ្មែរក្រហម មេធាវីរូបនោះត្រូវតែជាមេធាវីមានសុពលភាពនៅក្នុងរដ្ឋដែលទទួលស្គាល់ដោយអង្គការសហប្រជាជាតិ។ ការបន្តសុពលភាពត្រូវស្នើសុំ ១៥ ថ្ងៃមុនពេលវិញ្ញាបនបត្រចាស់ផុតកំណត់។ ចំណែកមេធាវីបរទេសដែលនៅមានសុពលភាពត្រូវផ្ដល់ឯកសារពាក់ព័ន្ធមកគណៈមេធាវី ឱ្យបានមុនថ្ងៃទី ៣១ មករា ២០២១។
គណៈមេធាវីបានបញ្ជាក់ថា ករណីមេធាវីបរទេសដែលចុះឈ្មោះហើយ មិនបានបង់ថ្លៃ ៥០០ ដុល្លារ ឬមិនបានឯកសារបញ្ជាក់ពីសុពលភាពតាមកាលកំណត់មេធាវីរូបនោះនឹងត្រូវលុបឈ្មោះចេញពីបញ្ជីគណៈមេធាវី។
កាលពីឆ្នាំ ២០១៨ គណៈមេធាវីនៃព្រះរាជាណាចក្រកម្ពុជាបានសម្រេចលុបឈ្មោះមេធាវីការពារលោក នួន ជា គឺលោក Victor Koppe ចេញពីបញ្ជីគណៈមេធាវីកម្ពុជាក្រោយពេលរកឃើញថា សុពលភាពនៃការប្រកបវិជ្ជាជីវៈមេធាវីរបស់លោកនៅប្រទេសហូឡង់ដែលលោកបានចុះឈ្មោះនៅគណៈមេធាវីទីក្រុងអាំស្ទែរដាំ បានហួសសុពលភាពកាលពីឆ្នាំ ២០១៦។
លោក លី ច័ន្ទតុលា ប្រធានគណៈមេធាវីនៃព្រះរាជាណាចក្រកម្ពុជាបានពន្យល់ថា សេចក្ដីសម្រេចថ្មីនេះធ្វើឡើងដោយមានការកែប្រែ ការតម្រូវមួយចំនួនដូចជា លុបចោលការតម្រូវឱ្យបង់ថ្លៃស្នើសុំវិញ្ញាបនបត្រ ៥០ ដុល្លារ និងថ្លៃសមាជិកភាពប្រចាំឆ្នាំ ២៥០ ដុល្លារ។ ការសម្រេចថ្មីគឺឱ្យមេធាវីបរទេសបង់តែម្ដងទេ គឺពេលចុះឈ្មោះត្រូវបង់ ៥០០ ដុល្លារ។
លោកបញ្ជាក់ថា៖ «នៅពេលដែលគាត់សុំចុះឈ្មោះបន្តវិញ្ញាបបត្រយើងអត់យកថវិកាគាត់ទេ។ ចំណុចខុសប្លែកមួយទៀតគឺយើងនៅក្នុងសេចក្ដីសម្រេចថ្មីនេះ យើងមានការកំណត់នូវនីតិវិធីលម្អិតជាងមុនដើម្បីងាយស្រួលក្នុងការអនុវត្ត»។
លោក នេត្រ ភក្ត្រា អ្នកនាំពាក្យអង្គជំនុំជម្រះវិសាមញ្ញក្នុងតុលាការកម្ពុជាបានឱ្យដឹងពីថ្ងៃទី ២០ ធ្នូថា បច្ចុប្បន្ននេះសំណុំរឿងសកម្មនៅសាលាក្ដីខ្មែរក្រហមរួមមានសំណុំរឿង ០០២/០១ មានលោក ខៀវ សំផន ជាជនត្រូវចោទ, សំណុំរឿង ០០៣ ប្រឆាំងនឹងលោក មាស មុត និងសំណុំរឿង ០០៤ ដែលមាន យឹម ទិត្យ ជាជនសង្ស័យ។ សំណុំរឿងទាំងនេះមានមេធាវីជាតិ និងអន្តរជាតិ។ ក្រៅពីនេះក៏មានមេធាវីការពារក្ដីឱ្យជនរងគ្រោះដែលមានមេធាវីជាតិ និងអន្តរជាតិផងដែរ។
លោកញ្ជាក់ថា តាមវិធានផ្ទៃក្នុងមេធាវីទាំងអស់ដែលការពារក្ដីជនជាប់ចោទ និងជនរងគ្រោះនៅសាលាក្ដីកាត់ទោសអតីតមេដឹកនាំខ្មែរក្រហមត្រូវចុះឈ្មោះក្នុងបញ្ជីគណៈមេធាវីសិន។ បើសិនជាអស់សុពលភាពត្រូវសុំការពន្យារបន្ថែម៕