ភ្នំពេញ៖ ក្រុមមេធាវីស្ម័គ្រចិត្តលោកនាយករដ្ឋមន្ត្រី ហ៊ុន សែន កំពុងស្រាវជ្រាវលើករណីកញ្ញា មាន ពេជ្ររីតា ពិធីការិនីទូរទស្សន៍ MyTV ដែលបានចោទឧកញ៉ា ហេង សៀ ពីបទប៉ុនប៉ងរំលោភសេពសន្ថវៈ ខណៈភាគីជម្លោះទាំង ២ កំពុងប្តឹងគ្នាទៅវិញទៅមកតាមផ្លូវតុលាការស្របពេលដែលកញ្ញារូបនេះ កំពុងជាប់ឃុំក្នុងពន្ធនាគារពីបទលួច។
នៅថ្ងៃនេះ មានការលើកឡើងជជែកគ្នានៅលើបណ្តាញទំនាក់ទំនងសង្គមជាច្រើន ជុំវិញករណីរឿងក្តីក្តាំរវាងកញ្ញា មាន ពេជ្ររីតា ដែលជាពិធីការិនីទូរទស្សន៍ My TV និងជាអតីតបេក្ខនារី Miss Grand Cambodia វ័យ ២០ ឆ្នាំ និងលោក ហេង សៀ ដែលមានអាយុជិត ៦០ ឆ្នាំ និងត្រូវបានគេស្គាល់ថា មានងារជាឧកញ៉ាដែលជាថៅកែក្រុមហ៊ុនកញ្ចក់មួយនៅក្នុងប្រទេសកម្ពុជា។
រឿងហេតុនេះ បានផ្ទុះចេញដំណាលគ្នានឹងការបង្ហោះនូវពាក្យបណ្តឹងរបស់កញ្ញា មាន ពេជ្ររីតា ដែលបានប្តឹងលោក ហេង សៀ ពីបទប៉ុនប៉ងរំលោភសេពសន្ថវៈ បន្ទាប់ពីរូបនាងត្រូវបានសាលាដំបូងរាជធានីភ្នំពេញឃុំខ្លួន និងចោទប្រកាន់កាលពីថ្ងៃទី ១១ ខែ ឧសភា ឆ្នាំ ២០២១ ពីបទលួចមានស្ថានទម្ងន់ទោសតាមបណ្តឹងរបស់លោក ហេង សៀ។
លោក គី តិច ប្រធានក្រុមមេធាវីរាជរដ្ឋាភិបាល និងជាប្រធានក្រុមមេធាវីស្ម័គ្រចិត្តលោកនាយករដ្ឋមន្ត្រី ហ៊ុន សែន បានអះអាងប្រាប់ ភ្នំពេញ ប៉ុស្តិ៍ នៅថ្ងៃនេះថា ក្រុមការងាររបស់លោកកំពុងស្រាវជ្រាវលើករណីបណ្តឹងរបស់កញ្ញា មាន ពេជ្ររីតា ដែលបានដាក់ពាក្យបណ្តឹងប្តឹងលោក ហេង សៀ ពីបទប៉ុនប៉ងរំលោភសេពសន្ថវៈ។
យ៉ាងណាក្ដី លោក គី តិច មិនទាន់បានបញ្ជាក់ទេថា ក្រុមមេធាវីស្ម័គ្រចិត្តរបស់លោកនឹងមានចំណាក់ការយ៉ាងណា ឬក៏ទទួលរឿងក្តីនេះមកការពារនោះទេ ដោយគ្រាន់តែអះអាងថា លោកនឹងជូនដំណឹងតាមក្រោយ បន្ទាប់ពីបញ្ចប់ការស្រាវជ្រាវ។
លោក គី តិច បានបញ្ជាក់ថា៖ «ករណីនេះ ខ្ញុំកំពុងតែស្រាវជ្រាវទេ។ ក្នុងដំណាក់កាលនេះ ខ្ញុំមិនទាន់ទទួលការពារក្តីទេ។ ខ្ញុំកំពុងធ្វើការ សុំធ្វើការតិចសិន សុំចាំសិន»។
យោងតាមដីកាបង្គាប់ឲ្យឃុំខ្លួនរបស់ចៅក្រមស៊ើបសួរសាលាដំបូងរាជធានីភ្នំពេញ លោក កូយ សៅ ចុះថ្ងៃទី ១១ ឧសភា បានឲ្យដឹងថា ការសម្រេចឃុំខ្លួន និងចោទប្រកាន់នេះ ដោយសំអាងលើកញ្ញា មាន ពេជ្ររីតា បានយកកាំបិតចុងស្រួចចាក់ទៅលើជនរងគ្រោះចំនួន ២ កាំបិត រួចយកទូរស័ព្ទដៃ ១ គ្រឿងម៉ាក Iphon 12 pro max ដែលបានប្រព្រឹត្តកាលពីថ្ងៃទី ៤ ខែឧសភា នៅសង្កាត់ទួលគោក រាជធានីភ្នំពេញ។
យ៉ាងណា ភ្នំពេញ ប៉ុស្តិ៍ មិនអាចសុំការអត្ថាធិប្បាយពីសាច់ញាតិរបស់កញ្ញា មាន ពេជ្ររីតា បានទេ ដោយសារមិនមានអ្នកទទួលទូរស័ព្ទ។ ប៉ុន្តែតាមពាក្យបណ្តឹងរបស់កញ្ញា មាន ពេជ្ររីតា ចុះថ្ងៃទី ១១ ឧសភា បានអះអាងថា ក្នុងអំឡុងពេលនោះ លោក ហេង សៀ បានព្យាយាមលួងលោម និងចាប់បង្ខំនាងដើម្បីរួមភេទ ដោយគំរាមថា លោកមានកាំភ្លើង។
ប៉ុន្តែដោយសារការរើបម្រះ បានធ្វើឲ្យនាងគេចខ្លួនបាន និងមិនហ៊ានប្រាប់រឿងនេះដល់អ្នកផ្ទះនោះទេ រហូតដល់មានការកោះហៅនាងទៅសួរនាំពីបទលួចនៅប៉ុស្តិ៍នគរបាលខណ្ឌទួលគោក ទើបនាងសម្រេចបង្ហាញរឿងនេះ និងសម្រេចដាក់ពាក្យបណ្តឹងទៅតុលាការ ដើម្បីប្តឹងបកវិញ។
កញ្ញា មាន ពេជ្ររីតា បានអះអាងក្នុងពាក្យបណ្តឹងថា៖ «ប្រសិននាងខ្ញុំមិនអាចបើកទ្វារឡានចេញបានទេ គាត់នឹងធ្វើការរំលោភសេពសន្ថវៈនៅក្នុងឡាន ឬដឹកនាងខ្ញុំយកទៅផ្ទះសំណាក់តែម្ដង ពីព្រោះនាងខ្ញុំបានភ័យតត់ស្លុត ខ្លាចគាត់សម្លាប់ដោយប្រើប្រាស់កាំភ្លើងមិនហ៊ានតដៃ ឬរើបម្រះនោះឡើយ ហើយនាងខ្ញុំមិនហ៊ានប្រាប់ម្តាយឱ្យដឹងរឿងនេះទេ ព្រោះមិនចង់ឱ្យគាត់ពិបាកចិត្ត»។
ពាក្យបណ្តឹងរបស់កញ្ញា មាន ពេជ្ររីតា ដែលបានប្តឹងលោក ហេង សៀ គឺទាក់ទងនឹងបទប៉ុនប៉ងរំលោភសេពសន្ថវៈដោយមានស្ថានទម្ងន់ទៅសាលាដំបូងរាជធានីភ្នំពេញ និងទាមទារសំណងជំងឺចិត្តទឹកប្រាក់ ១០ ម៉ឺនដុល្លារ ព្រមទាំងទាមទារការខាតបង់ និងខូចខាតពេលវេលា និងសេវាផ្លូវច្បាប់ចំនួន ១ ម៉ឺនដុល្លារផងដែរ។
ជុំវិញករណី កញ្ញា ពេជ្ររីតា នេះ លោក ផុន ពុធបូរី ប្រធាននាយកដ្ឋានការពារផ្លូវច្បាប់នៃក្រសួងកិច្ចការនារីបានអះអាងថា ក្រុមការងារក្រសួងកំពុងមានចំណាក់ការដោយបានស្នើទៅខាងអគ្គស្នងការដ្ឋាននគរបាលជាតិ ដើម្បីឱ្យជួយស៊ើបអង្កេតបន្ថែម។ ក្នុងនោះ លោក ពុធបូរី ក៏បានអះអាងដែរថា ក្រសួងកិច្ចការនារីនឹងជួយគាំទ្រផ្នែកច្បាប់នៅតុលាការផងដែរ។
លោកបានបញ្ជាក់ថា៖ «យើងបានធ្វើការជាមួយអគ្គស្នងការដ្ឋាននគរបាលជាតិ ដើម្បីស្នើកិច្ចសហការឱ្យមានការស៊ើបអង្កេតបឋមស្រាវជ្រាវករណីហ្នឹង។ ដោយសារមានពាក្យបណ្ដឹង ២ ព្រោះឧកញ៉ា ហេង សៀ បានប្ដឹងនារីរងគ្រោះ ហើយនារីរងគ្រោះ គឺប្ដឹងតទល់នឹងឧកញ៉ា។ យើងមិនទាន់ដឹងរឿងពិត ឬមិនពិតយ៉ាងនោះទេ»។
សូមជម្រាបថា តាមដីកាបង្គាប់របស់ចៅក្រមស៊ើបសួរក្នុងពេលនេះ កញ្ញា មាន ពេជ្ររីតា កំពុងត្រូវបានឃុំខ្លួននៅពន្ធនាគារព្រៃស ឬមណ្ឌលឃុំខ្លួន (ម២)។ ចំណែកឯលោក ហេង សៀ ភ្នំពេញ ប៉ុស្តិ៍ មិនអាចស្វែងរកប្រភព ដើម្បីសុំការបកស្រាយបានទេនៅថ្ងៃនេះ៕