ភ្នំពេញៈ មេធាវីស្ម័គ្រចិត្ដរបស់គណៈមេធាវីនៃព្រះរាជាណាចក្រកម្ពុជាប្រមាណពី ៣០០ ទៅ ៤០០ នាក់ នឹងចូលរួមដោះស្រាយការកកស្ទះសំណុំរឿងដែលកំពុងមានជិត ៤ ម៉ឺនករណី តាមរយៈការផ្ដល់មេធាវីជួយការពារសិទ្ធិដល់ជនត្រូវចោទ ឬជនជាប់ទោសតាមច្បាប់តម្រូវឱ្យមានមេធាវី។ នេះបើតាមលោក វ៉ា ពិសី ប្រធាននាយកដ្ឋានការពារក្តីជូនជនក្រីក្រនៃគណៈមេធាវី។
លោក វ៉ា ពិសី បានថ្លែងប្រាប់ភ្នំពេញប៉ុស្តិ៍កាលពីថ្ងៃអាទិត្យម្សិលមិញថា គណៈមេធាវីបានឯកភាពសហការជាមួយក្រសួងយុត្ដិធម៌ដើម្បីចូលរួមដោះស្រាយបញ្ហាកកស្ទះសំណុំរឿងនៅតាមសាលាដំបូងរាជធានី-ខេត្ដ។ ប៉ុន្ដែក្រុមមេធាវីស្ម័គ្រចិត្តរបស់គណៈមេធាវីនឹងចូលរួមជួយតែទៅលើសំណុំរឿង បទល្មើសឧក្រិដ្ឋ បទល្មើសមជ្ឈិម និងសំណុំរឿងអនីតិជនតែប៉ុណ្ណោះ។
លោកថ្លែងថា៖ «យើងក៏បានចេញសេចក្ដីជូនដំណឹង ដើម្បីជ្រើសរើសមេធាវីស្ម័គ្រចិត្ដរបស់យើងបន្ថែម ដើម្បីចូលរួមដោះស្រាយបន្ទាន់ ព្រោះមេធាវីនៅតាមសាលាដំបូងរាជធានី-ខេត្ដទាំង ២៥ មានចំនួនមិនគ្រប់គ្រាន់។ ពេលខ្លះក្នុង ១ ថ្ងៃយើងធ្វើសវនាការ ១០ រឿងក្ដី។ ដូចនៅសាលាដំបូងរាជធានីភ្នំពេញក្នុង ១ ថ្ងៃបើកសវនាការរហូតដល់ជាង ១០ រឿងក្ដីក៏មានដែរ»។
បើតាមលោក ពិសី នាពេលកន្លងមកគណៈមេធាវីក៏បានចូលរួមជួយដល់រាជរដ្ឋាភិបាលក្នុងការដោះស្រាយសំណុំរឿងនៅតាមសាលាដំបូងរាជធានី-ខេត្ដផងដែរ ដោយជួយការពារសិទ្ធិដល់ជនត្រូវចោទ ឬជនជាប់ទោស ដែលជាជនក្រីក្រ គ្មានលទ្ធភាពរកមេធាវី។ លោកឱ្យដឹងថា គិតចាប់តាំងពីខែមករា រហូតមកដល់ចុងខែមិថុនានេះ មេធាវីស្ម័គ្រចិត្ដនៃគណៈមេធាវីបានចូលរួមជួយការពារសិទ្ធិដល់ជនត្រូវចោទ ឬជនជាប់ទោសបានជិត ៣០០០ ករណីរួចហើយ។ លោកបន្តថា គណៈមេធាវីមានមេធាវីស្ម័គ្រចិត្ដជាង ២០០ នាក់។ បច្ចុប្បន្នមានការិយាល័យនៅទូទាំង ២៥ សាលាដំបូងរាជធានី-ខេត្ដ។
លោកថា៖ «ប៉ុន្ដែក្នុងការសហការបន្ថែមជាមួយក្រសួងយុត្ដិធម៌លើការអនុវត្ដយុទ្ធនាការដោះស្រាយការកកស្ទះសំណុំរឿងនេះគឺយើងត្រូវជ្រើសរើសមេធាវីស្ម័គ្រចិត្ដបន្ថែមទៀត។ ដូច្នេះមេធាវីយើង អាចកើនឡើងរហូតដល់ពី ៣០០ ទៅ ៤០០ នាក់ សម្រាប់ចូលរួមអនុវត្ដយុទ្ធនាការនេះ»។ លោក ពិសី ថាការសហការគ្នានេះ គឺខាងសាលាដំបូងរាជធានី-ខេត្ដ ជាអ្នកស្នើសុំមេធាវីពីគណៈមេធាវីហើយគណៈមេធាវីនឹងចាត់តាំងមេធាវីស្ម័គ្រចិត្ដទៅជួយតាមការស្នើសុំនោះ។
លោក ជិន ម៉ាលីន អ្នកនាំពាក្យក្រសួងយុត្ដិធម៌ថ្លែងកាលពីម្សិលមិញថា ការចូលរួមពីគណៈមេធាវី និងភាគីពាក់ព័ន្ធដទៃទៀតគឺសំខាន់ណាស់ក្នុងការពន្លឿនដំណើរការនីតិវិធីសំណុំរឿង ព្រោះថាសំណុំរឿងមួយចំនួន បើគ្មានមេធាវីទេ គឺមិនអាចដំណើរការទៅបានទេ។ ជាពិសេសសំណុំរឿងដែលច្បាប់តម្រូវដូចជាសំណុំរឿងបទឧក្រិដ្ឋ និងសំណុំរឿងអនីតិជន។
លោកថ្លែងថា៖ «ប្រសិនបើមិនមានមេធាវីគឺមិនអាចដំណើរការសវនាការនាំឱ្យស្ទះនីតិវិធី និងធ្វើឱ្យកកស្ទះសំណុំរឿង។ ដូច្នេះការចូលរួមគ្រប់ភាគីពាក់ព័ន្ធរួមមានគណៈមេធាវី មន្ដ្រីនគរបាលយុត្ដិធម៌ និងមន្ទីរពិសោធន៍គ្រឿងញៀនជាដើមគឺមានសារៈសំខាន់ណាស់ក្នុងការចូលរួមពន្លឿនដំណើរការនីតិវិធីរបស់តុលាការ។ ព្រោះថាការកកស្ទះសំណុំរឿងនេះមិនមែនពាក់ព័ន្ធតែការងាររបស់មន្ត្រីតុលាការតែប៉ុណ្ណោះទេ គឺទាមទារឲ្យមានការចូលរួមពីមន្ដ្រីដែលពាក់ព័ន្ធដទៃទៀត»។
ទាក់ទិននឹងបច្ចុប្បន្នភាពនៃការអនុវត្ដយុទ្ធនាការរបស់ក្រុមការងារទាំង ៤ លើការអនុវត្ដយុទ្ធនាការដោះស្រាយការកកស្ទះសំណុំរឿងនៅសាលាដំបូងរាជធានី-ខេត្ដ លោក ម៉ាលីន ឱ្យដឹងថា ក្រុមការងារកំពុងធ្វើការបូកសរុបលទ្ធផលទូទាំងប្រទេស។ ពេលធ្វើរួចនឹងត្រូវប្រកាសនៅបំណាច់ខែនេះជាសាធារណៈតែម្ដង។
លោក កើត រិទ្ធ រដ្ឋមន្ដ្រីក្រសួងយុត្តិធម៌បានប្រកាសបើកយុទ្ធនាការដោះស្រាយការកកស្ទះសំណុំរឿងនៅតាមសាលាដំបូងរាជធានី-ខេត្ដកាលពីថ្ងៃទី ១៨ ខែឧសភាក្រោយពីរកឃើញមានសំណុំរឿងព្រហ្មទណ្ឌដែលនៅសេសសល់ មិនទាន់បានចាត់ការសរុបជិត ៤ ម៉ឺន។ លោករដ្ឋមន្ដ្រីរំពឹងថា តាមរយៈយុទ្ធនាការនេះនឹងអាចកាត់បន្ថយការកកស្ទះសំណុំរឿងបានប្រមាណពី ៥០ ទៅ ៧០ ភាគរយក្នុងរយៈពេល ៦ ខែខាងមុខ។
គណៈមេធាវីកាលពីថ្ងៃទី ១៧ ខែមិថុនា ក៏បានចេញសេចក្ដីជូនដំណឹងមួយ ស្ដីពីការផ្ដល់មេធាវីជួយការពារក្ដីក្នុងយុទ្ធនាការនេះ និងបានអំពាវនាវដល់សមាជិកគណៈមេធាវី និងមេធាវីកម្មសិក្សាទាំងអស់ឲ្យចូលរួមជួយការពារសិទ្ធិជនត្រូវចោទ ឬជនជាប់ចោទស្របទៅតាមច្បាប់តម្រូវឱ្យមានមេធាវី ដោយអនុវត្តតាមអភិក្រមរបស់ក្រសួងយុត្តិធម៌ក្នុងយុទ្ធនាការនេះគឺ «លឿន ត្រឹមត្រូវ យុត្តិធម៌ និងគ្មានអំពើពុករលួយ» ៕