The Phnom Penh Post Search

Search form




Logo of Phnom Penh Post newspaper Phnom Penh Post - មេធាវី​ការពារ​ក្តី​ខ្មែរ​ក្រហម​ធ្វើ​ពហិការ​សវនាការ ០០២ វគ្គ ២

មេធាវី​ការពារ​ក្តី​ខ្មែរ​ក្រហម​ធ្វើ​ពហិការ​សវនាការ ០០២ វគ្គ ២

មេដឹកនាំ​ជាន់​ខ្ពស់​ក្នុង​របប​ខ្មែរ​ក្រហម​លោក ខៀវ សំផន និង​លោក នួន ជា នៅ​ក្នុង​សវនាការ​កាល​ពី​ខែ​សីហា។ រូបថត ECCC
មេដឹកនាំ​ជាន់​ខ្ពស់​ក្នុង​របប​ខ្មែរ​ក្រហម​លោក ខៀវ សំផន និង​លោក នួន ជា នៅ​ក្នុង​សវនាការ​កាល​ពី​ខែ​សីហា។ រូបថត ECCC

មេធាវី​ការពារ​ក្តី​ខ្មែរ​ក្រហម​ធ្វើ​ពហិការ​សវនាការ ០០២ វគ្គ ២

ភ្នំពេញៈ សហ​មេធាវី​ជាតិ និង​អន្តរជាតិ ការពារ​ក្តី​ជន​ជាប់​ចោទ ខៀវ សំផន និង នួន ជា បាន​ប្រកាស​ពហិការ​ចូល​រួម​សវនាការ​សាលា​ក្តី​ខ្មែរ​ក្រហម លើ​សំណុំ​រឿង ០០២ វគ្គ ២ រហូត​ដល់​ដើម ឆ្នាំ​២០១៥ ដើម្បី​មាន​រយៈ​ពេល​គ្រប់​គ្រាន់​ក្នុង​ការ​រៀបចំ​បណ្តឹង​សារ​ទុក្ខ​លើ​សំណុំ​រឿង ០០១ វគ្គ ១ និង​បណ្តឹង​ដិត​ចិត្ត (បណ្តឹង​ដក​ចៅ​ក្រម) ០០១ វគ្គ ២។ ការ​ប្រកាស​នេះ ធ្វើ​ឡើង​កាល​ពី​ថ្ងៃ​សៅរ៍​សប្តាហ៍​មុន ក្នុង​សន្និសីទ​សារ​ព័ត៌មាន​មួយ បន្ទាប់​ពី​សវនាការ​លើ​សំណុំ​រឿង ០០២ វគ្គ ២ កាល​ពី​ថ្ងៃ​សុក្រ ត្រូវ​បាន​ផ្អាក​ដោយ​សារ​សហ​មេធាវី​ជន​ជាប់​ចោទ​ទាំង​ពីរ​រូប បាន​ដើរ​ចេញ​ពី​សវនាការ។

លោក គង់ សំអុន មេធាវី​ការពារ​ក្តី​លោក ខៀវ សំផន បាន​ថ្លែង​ប្រាប់​អ្នក​សារ​ព័ត៌មាន​ជាតិ និង​អន្តរជាតិ​ថា ការ​ដក​ខ្លួន​ចេញ​ពី​នីតិវិធី​ជំនុំ​ជម្រះ​របស់​មេធាវី​ទាំង ២ ក្រុម គឺ​មិន​មែន​ចង់​ឲ្យ​ដំណើរ​ការ​ក្តី​រាំង​ស្ទះ​នោះ​ទេ តែ​នេះ​ជា​ការ​ទុក​ពេល​វេលា​សមរម្យ សម្រាប់​មេធាវី​ជួប​កូន​ក្តី​ពិនិត្យ និង​សិក្សា​លើ​សំណុំ​រឿង​បណ្តឹង​សារ​ទុក្ខ ដើម្បី​ឲ្យ​សេចក្តី​របស់​សវនាការ​មាន​គុណភាព​ត្រឹម​ត្រូវ មុន​នឹង​បន្ត​សវនាការ។

លោក​បាន​បញ្ជាក់​ថា៖ «យើង​ត្រូវ​ការ​ពេល​ពិនិត្យ​ឲ្យ​បាន​ដិត​ដល់ ព្រោះ​ឯកសារ​ច្រើន និង​ឯកសារ​យោង​ដល់​ទៅ​ជាង​រាប់​ពាន់​សន្លឹក​ឯ​ណោះ មិន​អាច​ធ្វើ​ឡើង​ក្នុង​ពេល​តែ ១ នោះ​ទេ ដូច្នេះ យើង​សុំ​ឲ្យ​ផ្អាក​ដំណើរ​ការ​សវនាការ​មួយ​រយៈ​សិន»។

លោក សុន អរុណ មេធាវី​ការពារ​ក្តី​លោក នួន ជា បាន​ថ្លែង​ស្រដៀង​នឹង​ការ​លើក​ឡើង​របស់​មេធាវី​លោក ខៀវ សំផន ដោយ​ចាត់​ទុក​ថា ដំណើរ​ការ​ទៅ​មុន​អាច​នឹង​រំលោភ​សិទ្ធិ​របស់​កូន​ក្តី​លោក បើ​មិន​មាន​ការ​សិក្សា​ច្បាស់​លាស់ ហើយ​នេះ​ជា​មូល​ហេតុ ទី១។ ចំណែក​មូល​ហេតុ ទី២ របស់​កូន​ក្តី​លោក គឺ​ដោយ​សារ​តែ​បណ្តឹង​ដិត​ចិត្ត ដែល​ប្តឹង​សុំ​ដក​ចៅ​ក្រម ៤ រូប មិន​ទាន់​មាន​ការ​ឆ្លើយ​តប​នៅ​ឡើយ។

លោក​បន្ត​ថា៖ «ការ​ប្តឹង​ដិត​ចិត្ត ត្រូវ​តែ​អនុវត្ត​ឲ្យ​មាន​ចម្លើយ​សិន ហើយ​មេធាវី​នឹង​មើល​ចម្លើយ​យ៉ាង​ម៉េច ពិចារណា​យ៉ាង​ម៉េច»។

កាល​ពី​ថ្ងៃ​សុក្រ លោក នួន ជា បាន​និយាយ​ជា​ច្រើន​ដង​ក្នុង​សវនាការ​ថា លោក​បាន​ប្រាប់​ឲ្យ​សហ​មេធាវី​របស់​លោក ពហិការ រហូត​ទាល់​តែ​មាន​ការ​សម្រេច​ណា​មួយ​លើ​បណ្តឹង​ដិត​ចិត្ត​ផ្លាស់​ប្តូរ​ចៅ​ក្រម​ភាគី​កម្ពុជា ៣ រូប និង​បរទេស ១ រូប ដែល​ពួក​គាត់​មិន​ចង់​ឲ្យ​បន្ត​កាត់​ក្តី​លើ​សំណុំ​រឿង ០០១ វគ្គ ២ និង​សំណុំ​រឿង​ផ្សេងៗ​ទៀត​របស់​គាត់ លើក​លែង​តែ​ចៅ​ក្រម Claudia Fenz ដែល​ទើប​មក​ថ្មី។

លោក​បាន​និយាយ​ថា៖ «សាលា​ក្តី​មួយ​នេះ បាន​បង្កើត​ឡើង​ដើម្បី​ស្វែង​រក​ការ​ពិត និង​យុត្តិធម៌ ប៉ុន្តែ​សេចក្តី​សម្រេច​ដំបូង​របស់​ពួក​លោក ប្រឆាំង​រូប​ខ្ញុំ កាល​ពី ២ ខែ​មុន គឺ​ពួក​លោក​បាន​បរាជ័យ​ហើយ។ ពួក​លោក​មិន​បាន​ស្វែង​រក​ការ​ពិត ហើយ​ពួក​លោក​បាន​ធ្វើ​ឲ្យ​មាន​ការ​សើច​ចំអក​ដ៏​ខក​ចិត្ត​ធំ​បំផុត​នៃ​យុត្តិធម៌»។

កាល​កំណត់​នៃ​បណ្តឹង​សារ​ទុក្ខ​ទៅ​តុលាការ​កំពូល គឺ​នៅ​ថ្ងៃ ទី២៩ ខែ​វិច្ឆិកា ដែល​មេធាវី​ការពារ​ជន​ជាប់​ចោទ​លើក​ឡើង​ថា ខ្លី និង​លឿន​ពេក ហើយ​ពួក​គេ​ត្រូវ​ការ​ពេល​ប្រហែល​ជា ៣ ខែ​ទៀត។

អ្នក​នាំ​ពាក្យ​សាលា​ក្តី​ខ្មែរ​ក្រហម លោក នេត្រ ភក្ត្រា បាន​ថ្លែង​ថា៖ «ករណី​នេះ គ្រប់​ភាគី​ទាំង​អស់ គឺ ផ្តល់​តម្លៃ​លើ​ការងារ​រៀងៗ​ខ្លួន មេធាវី លោក នួន ជា និង​លោក ខៀវ សំផន សុទ្ធ​តែ​បង្ហាញ​ទឡ្ហីករណ៍​របស់​ខ្លួន ភាគី​ពាក់​ព័ន្ធ​នឹង​ពិចារណា​ក្នុង​កិច្ច​ប្រជុំ​នេះ​នៅ​ថ្ងៃ​ចន្ទ»។ លោក ភក្ត្រា បាន​ឲ្យ​ដឹង​ថា តាម​វិធាន​ផ្ទៃ​ក្នុង សវនា​ការ​សំណុំ​រឿង ០០២ វគ្គ ២ នេះ នឹង​មិន​អាច​ដំណើរ​ការ​បាន​ឡើយ បើ​មិន​មាន​វត្តមាន​របស់​ជន​ចាប់​ចោទ ឬ​មេធាវី​ការពារ​ក្តី។

មុន​បិទ​សវនាការ​ក្រោយ​ការ​ដើរ​ចេញ​របស់​សហ​មេធាវី​ជន​ជាប់​ចោទ កាល​ពី​ថ្ងៃ​សុក្រ លោក​ចៅ​ក្រម និល ណុន បាន​ប្រកាស​ថា សវនាការ​នឹង​បន្ត​នៅ​ថ្ងៃ ទី២១ ខែ​តុលា ខាង​មុខ​នេះ តែ​អង្គ​ជំនុំ​ជម្រះ​នឹង​ចេញ​សេចក្តី​សម្រេច​ពី​ការ​ធ្វើ​ពហិការ​នោះ ទៅ​កាន់​ក្រុម​មេធាវី​ការពារ​ក្តី ហើយ​បញ្ហា​ដែល​មេធាវី​បាន​លើក​ឡើង​នោះ គឺ​នឹង​ត្រូវ​ពិភាក្សា​នៅ​ក្នុង​កិច្ច​ប្រជុំ​របស់​គណៈ​គ្រប់​គ្រង​សវនាការ​ផង​ដែរ។

សម្រាប់​មេធាវី​តំណាង​ដើម​បណ្តឹង​រដ្ឋ​ប្បវេណី លោក ហុង គឹមសួន ចាត់​ទុក​ថា នេះ​ជា​ក្តី​បារម្ភ​មួយ​នៃ​ការ​អូស​បន្លាយ​ពេល​វេលា ខណៈ​ដែល​ជន​ជាប់​ចោទ កាន់​តែ​ចាស់​ជរា រីឯ​ជន​រង​គ្រោះ បាន​ស្លាប់​ជា​បន្ត​បន្ទាប់។

លោក​ថា៖ «បើ​ដំណើរ​ការ​ឆាប់​គឺ​ល្អ មេធាវី​ការពារ​ក្តី ក៏​មាន​គ្នា​ច្រើន បើ​គាត់​អាច​បែង​ចែក​ក្រុម​ការងារ​គឺ​ល្អ។ ការ​សុំ​ពេល​វេលា យើង​គិត​ថា បើ​ចៅ​ក្រម​ឲ្យ​ត្រឹម ១ ខែ​ខ្ញុំ​គិត​ថា វា​គ្រប់​គ្រាន់​ហើយ ដើម​ឆ្នាំ​ក្រោយ​គឺ​វា​យូរ​ពេក»។

មន្រ្តី​សម្រប​សម្រួល​កម្មវិធី​នៃ​គម្រោង​យុត្តិធម៌​នៅ​កម្ពុជា លោក ឡុង បញ្ញាវុធ យល់​ថា មូល​ហេតុ​ទាំង​ពីរ ដែល​សហ​មេធាវី​ការពារ​កូន​ក្តី​លើក​ឡើង​នោះ គឺ​មិន​អាច​នាំ​ឲ្យ​ប៉ះពាល់​ដល់​ដំណើរការ​សវនាការ​តុលាការ​កំពូល​នោះ​ទេ៕

អត្ថបទគួរចាប់អារម្មណ៍