The Phnom Penh Post Search

Search form




Logo of Phnom Penh Post newspaper Phnom Penh Post - មេធាវី​រង់​ចាំ​ការ​សម្រេច​ឲ្យ​កម្មករ​នៅ​កំពង់ចាម​ជាប់​ឃុំ ៥ នាក់​នៅ​ក្រៅ​ឃុំ

មេធាវី​រង់​ចាំ​ការ​សម្រេច​ឲ្យ​កម្មករ​នៅ​កំពង់ចាម​ជាប់​ឃុំ ៥ នាក់​នៅ​ក្រៅ​ឃុំ

មេធាវី​រង់​ចាំ​ការ​សម្រេច​ឲ្យ​កម្មករ​នៅ​កំពង់ចាម​ជាប់​ឃុំ ៥ នាក់​នៅ​ក្រៅ​ឃុំ

ភ្នំពេញៈ មេធាវី​ការពារ​ជន​ត្រូវ​ចោទ ៥ នាក់ ដែល​ត្រូវ​បាន​ចាប់​ឃុំ​ខ្លួន បន្ទាប់​ពី​ផ្ទុះ​បាតុកម្ម​ហិង្សា​នៅ​រោងចក្រ​ស្បែក​ជើង Juhui Footwear ក្នុង ខេត្ត​កំពង់ចាម កំពុង​រង់ចាំ​តុលាការ​ចេញ​សេចក្តី​សម្រេច​លើ​សំណើ​សុំ​ធានា​ឲ្យ​នៅ​ក្រៅ​ឃុំ បន្ទាប់​ពី​មេធាវី​បាន​ដាក់​សំណើ​ជូន​តុលាការ​ខេត្ត តាង​តំណាង​ឲ្យ​កូន​ក្តី កាល​ពី​ថ្ងៃ​សុក្រ​កន្លង​ទៅ។

លោក គឹម សុជាតិ មេធាវី​ការពារ​ជន​ត្រូវ​ចោទ​ទាំង ៥ នាក់​នៃ​សហជីព ស៊ីខៅឌូ ដែល​ត្រូវ​បាន​ចាប់​ឃុំ​ខ្លួន​នៅ​ក្នុង​ការ​ធ្វើ​បាតុកម្ម​តវ៉ា​ហិង្សា​នៅ​រោងចក្រ Juhui Footwear កាល​ពី​ខែ​មុន​បាន​ថ្លែង​កាល​ពី​ម្សិល​មិញ​ថា៖ «តុលាការ​ខេត្ត​មិន​ទាន់​ឆ្លើយ​តប​នឹង​សំណើ​របស់​ខ្ញុំ​ទេ។ តុលាការ​មិន​ឆ្លើយ​តប​ទេ​រហូត​គម្រប់ ៥ ថ្ងៃ បន្ទាប់​ពី​ដាក់​សំណើ​ផ្លូវ​ការ។ ឥឡូវ​ទើប​តែ​បាន ៣ ថ្ងៃ​ប៉ុណ្ណោះ ដូច្នេះ​យើង​នឹង​រង់​ចាំ​ការ​សម្រេច​ពី​តុលាការ​បន្ទាប់​ពី​ចប់​ពិធី​បុណ្យ​អុំ​ទូក»។

បុគ្គលិក​សហជីព ស៊ីខៅឌូ ចំនួន ២ នាក់​ដែល​កំពុង​ជាប់​ឃុំ​ត្រូវ​បាន​ចោទ​ប្រកាន់​ពី​បទ​ញុះ​ញង់​ឲ្យ​ប្រើ​អំពើ​ហិង្សា និង​បង្ក​ការ​ខូច​ខាត​ដោយ​ចេតនា។ ចំណែក​កម្មករ​រោងចក្រ Juhui ចំនួន ៣ នាក់​ទៀត​ដែល​ជាប់​ឃុំ​ត្រូវ​ប្រឈម​នឹង​បទ​ចោទ​ប្រកាន់​ស្រាល​ជាង​បន្តិច គឺ​ចោទ​ពី​បទ​ប្រើ​អំពើ​ហិង្សា​និង​បង្ក​ការ​ខូច​ខាត​ដោយ​ចេតនា។

ទន្ទឹម​នឹង​ការ​ទន្ទឹង​រង់​ចាំ​ការ​សម្រេច​ពី​តុលាការ​លើ​ជោគ​វាសនា​អ្នក​ជាប់​ឃុំ​ទាំង ៥ នាក់​នេះ កាល​ពី​ម្សិល​មិញ ក្រុម​កម្មករ​ជាង ២០០ នាក់​បាន​បន្ត​ធ្វើ​បាតុកម្ម​តវ៉ា​នៅ​មុខ​រោងចក្រ Juhui ដែល​ផ្គត់​ផ្គង់​ឲ្យ Walmart ជា​ថ្មី​ទៀត។

លោក ជីវ ច័ន្ទតារា ព្រះ​រាជ​អាជ្ញា​រង​អម​សាលា​ដំបូង​ខេត្ត​បាន​បដិសេធ​មិន​ធ្វើ​អត្ថាធិប្បាយ​អំពី​សំណើ​សុំ​ធានា​ឲ្យ​នៅ​ក្រៅ​ឃុំ​របស់​មេធាវី​ជន​ត្រូវ​ចោទ​ខាង​លើ​នេះ​ទេ កាល​ពី​ម្សិល​មិញ៕

អត្ថបទគួរចាប់អារម្មណ៍