The Phnom Penh Post Search

Search form




Logo of Phnom Penh Post newspaper Phnom Penh Post - មេបក្ស​ក្នុង និង​ក្រៅ​រដ្ឋាភិបាល​មមាញឹក​ចុះ​ពន្យល់​ដល់​ពលរដ្ឋ




មេបក្ស​ក្នុង និង​ក្រៅ​រដ្ឋាភិបាល​មមាញឹក​ចុះ​ពន្យល់​ដល់​ពលរដ្ឋ

Content image - Phnom Penh Post
លោក ហ៊ុន សែន ពេល​នៅ​ក្រចេះ និង​លោក កឹម សុខា នៅ​ពោធិ៍សាត់។ FB

មេបក្ស​ក្នុង និង​ក្រៅ​រដ្ឋាភិបាល​មមាញឹក​ចុះ​ពន្យល់​ដល់​ពលរដ្ឋ

ភ្នំពេញៈ ខណៈ​សល់​តែ​ជាង​ ៦០ ​ថ្ងៃ​ទៀត​ដំណើរការ​បោះឆ្នោត​នឹង​​មក​ដល់​​នោះ​មេដឹកនាំ​គណបក្ស​កាន់​អំណាច​ និង​គណបក្ស​ប្រឆាំង​​កំពុង​​មមាញឹក​ចុះ​មូលដ្ឋាន​ដើម្បី​ផ្សព្វផ្សាយ​ពី​កម្មវិធី​នយោបាយ​រៀងៗ​ខ្លួន​ខណៈ​គណបក្ស​ប្រឆាំង​​មិន​ច្បាស់​ថា​ តើ​​នឹង​ត្រូវ​​បាន​ទទួល​ស្គាល់​ដែរ​ឬ​អត់​ក្រោយ​ធ្វើ​សមាជ​កាលពី​ដើម​ខែ​នេះ​​។

កាលពី​ម្សិលមិញ​លោក​នាយក​រដ្ឋមន្រ្តី ហ៊ុន សែន ប្រធាន​គណបក្ស​ប្រជាជន​កម្ពុជា​​បាន​ជួប​ជាមួយ​នឹង​សមាជិក​​ជា​មន្រ្តី​​​​ និង​​ក្រុម​ប្រឹក្សា​ឃុំ​​​​ខេត្ត​កណ្តាល​ ខណៈ​លោក កឹម សុខា ប្រធាន​គណបក្ស​សង្គ្រោះ​ជាតិ​បាន​ជួប​​សមាជិក​នៅ​ខេត្ត​ពោធិ៍សាត់​ បន្ទាប់ពី​មេដឹកនាំ​​កំពូល​ទំាង​ពីរ​​បាន​ជួប​សមាជិក​​បក្ស​តាម​ខេត្ត​ផ្សេងៗ​ពីរ​បី​ថ្ងៃ​មុន​រួច​ហើយ​។

ថ្លែង​ទៅ​កាន់​ក្រុម​ប្រឹក្សា​ឃុំ​​ដើម្បី​ផ្សព្វផ្សាយ​​កម្មវិធី​នយោបាយ​ ៥ ​ចំណុច​​នៅ​​ខេត្ត​ពោធិ៍សាត់​ពី​ម្សិលមិញ​ បន្ទាប់​ពី​ត្រឡប់​ពី​ខេត្ត​សៀមរាប​ ខេត្ត​បន្ទាយមានជ័យ និង​ខេត្ត​បាត់ដំបង​លោក កឹម សុខា ដែល​កំពុង​ប្រឈម​មុខ​នឹង​ការ​មិន​ទទួល​ស្គាល់​ពី​ក្រសួង​មហាផ្ទៃ​​​បន្ទាប់ពី​សមាជ​​វិសាមញ្ញ​​​របស់​គណបក្ស​នេះ​​ត្រូវ​បាន​ចោទ​ថា​ធ្វើ​ឡើង​ផ្ទុយ​នឹង​លក្ខន្តិកៈ​​របស់​ខ្លួន​បាន​ប្រាប់​​​​អ្នក​គាំទ្រ ​និង​សមាជិក​​ថា​គណបក្ស​សង្គ្រោះ​ជាតិ​​មាន​កត្តា​សំខាន់​ ៣ ចំណុច​​ដែល​អាច​ឈ្នះ​​ក្នុង​ការ​ប្រកួត​ប្រជែង​​ ទី​ ១ ការ​​ស្គាល់​​​គណបក្ស​នេះ​ថា​រួម​បញ្ចូល​គ្នា​ទៅ​តាម​ឆន្ទៈ​របស់​ពលរដ្ឋ ទី ២ ​ការ​ជឿ​លើ​ខ្លួនឯង​ ជឿ​លើ​​កម្មវិធី​នយោបាយ​​ ជំហរ​របស់​គណបក្ស​ និង​មេដឹកនាំ​របស់​ខ្លួន​ដែល​គណបក្ស​សង្គ្រោះ​ជាតិ​មិន​អាច​បំបែក​បាន ​និង​ទី​ ៣ ​ការ​​ជួយ​ខ្លួន​ឯង​គឺ​ការ​ចូលរួម​បូជា​ តស៊ូ ​​តាម​ឆន្ទៈ​​របស់​​​ខ្លួន​ដោយ​មិន​មាន​ការ​ទិញ​កម្លាំង​ ទិញ​ទឹកចិត្ត​គិត​ពី​អត្ថប្រយោជន៍​ជាតិ​ និង​ពលរដ្ឋ​ធំ​ជាង​អ្វីៗ​ទាំងអស់។

កាលពី​ថ្លែង​នៅ​​ខេត្ត​សៀមរាប លោក កឹម សុខា ​បញ្ជាក់​ថា​៖ «​​យើង​មិន​ធ្វើ​បដិវត្តន៍​ទេ​។ យើង​មិន​ប្រើ​ហិង្សា​។ យើង​មិន​ធ្វើ​សង្គ្រាម​។ ​យើង​ដើរ​ទៅ​រក​ការ​បោះឆ្នោត​។ ​នេះ​ជា​គោលដៅ​របស់​យើង​»។ «​សង្គ្រាម​គឺ​គ្រប់គ្រាន់​ហើយ​សម្រាប់​ពលរដ្ឋ​ខ្មែរ​។ ​យើង​បង្កើត​​គណបក្ស​សង្គ្រោះជាតិ​ យើង​ចង់​​ទាត់​​សង្គ្រាម​​ចេញ​ជំនួស​ដោយ​​ការ​បោះឆ្នោត​ដោយ​សេរី​ និង​យុត្តិធម៌​»។

លោក សុខា បាន​បន្ថែម​ថា​គណបក្ស​សង្គ្រោះ​ជាតិ​មិន​ឈ្លោះ​ជាមួយ​​គេ​ទេ​គណបក្ស​សង្គ្រោះជាតិ​បាន​ និង​កំពុង​​​ស្វែងរក​​វិធី​ល្អ​បំផុត​​​ដើម្បី​ឲ្យ​ប្រសើរ​ជាង​មុន​ដើម្បី​ឈ្នះ​ឆ្នោត​ហើយ​បើ​មិន​ដូច្នោះ​ទេ ពលរដ្ឋ​នឹង​មិន​គាំទ្រ​​គណបក្ស​សង្គ្រោះ​ជាតិ​​ហើយ​នៅ​តែ​បោះឆ្នោត​ឲ្យ​គណបក្ស​ប្រជាជន​។

លោក​បាន​បន្ត​ថា​៖ «​​ចាញ់​ឈ្នះ​អាស្រ័យ​លើ​ពលរដ្ឋ​។ ​ទុក​ឱកាស​ឲ្យ​​ពលរដ្ឋ​សម្រេច​​តាម​ឆន្ទៈ​របស់​ខ្លួន​។ ​នេះ​ជា​​គោល​បំណង​​ក្នុង​សង្គម​ប្រជាធិបតេយ្យ​​ដែល​​គណបក្ស​សង្គ្រោះ​ជាតិ​ចង់​​បាន​»។

លោក កឹម សុខា បាន​សន្យា​ថា បន្ទាប់ពី​ការ​បោះឆ្នោត​គណបក្ស​សង្គ្រោះ​ជាតិ​នឹង​ចាត់​ទុក​​រឿង​ចាញ់​ឈ្នះ​ជា​រឿង​ធម្មតា ប៉ុន្តែ​ទាមទារ​ឲ្យ​ការ​បោះឆ្នោត​ត្រូវ​តែ​យុត្តិធម៌ និង​​អព្យាក្រឹត​ហើយ​ប្រសិន​បើ​គណបក្ស​ណា​​ឈ្នះ​ ឬ​ចាញ់​គណបក្ស​ទាំង​ពីរ​ត្រូវ​តែ​ធ្វើការ​ជាមួយ​គ្នា​​ទៅ​តាម​តួនាទី​របស់​បក្ស​​រៀងៗ​ខ្លួន​ដើម្បី​អត្ថប្រយោជន៍​ជាតិ​។

ដោយ​ឡែក​ប្រធាន​គណបក្ស​ប្រជាជន​កម្ពុជា​លោក​នាយក​រដ្ឋមន្រ្តី ហ៊ុន សែន កាលពី​ថ្ងៃ​ចន្ទ និង​ម្សិលមិញ​បាន​ជួប​ជាមួយ​អ្នក​គាំទ្រ​ និង​សមាជិក​​នៅក្នុង​ខេត្ត​ក្រចេះ​ និង​ខេត្ត​កណ្តាល​។

ថ្លែង​នៅ​ខេត្ត​ក្រចេះ​លោក ហ៊ុន សែន បាន​រំឭក​​​ពី​កម្មវិធី​នយោបាយ​​​​របស់​ខ្លួន​​​ថា​ការ​ទទួល​បាន​សន្តិភាព​​ដែល​កើត​មាន​សព្វ​ថ្ងៃ​នេះ​គឺ​ដោយសារ​កិច្ចខិតខំ​ប្រឹងប្រែង​របស់​គណបក្ស​ប្រជាជន​កម្ពុជា​ហើយ​​សមិទ្ធផល​ទាំង​នេះ​ត្រូវ​តែ​ការពារ​។

លោក​ ហ៊ុន សែន ​បាន​អំពាវនាវ​ឲ្យ​​ពលរដ្ឋ​បន្ត​បោះឆ្នោត​​ឲ្យ​គណបក្ស​លោក​​​​ដើម្បី​សន្តិភាព​ និង​​​ការ​អភិវឌ្ឍ​ថែម​ទៀត។

លោក​បាន​បញ្ជាក់​នៅ​ខេត្ត​ក្រចេះ​ថា​៖ «​​ខ្ញុំ​សូម​អរគុណ​ប្រជាពលរដ្ឋ​ក្នុង​ខេត្ត​ក្រចេះ​​ និង​ទូទាំង​ប្រទេស​​ដែល​បាន​បោះឆ្នោត​ឲ្យ​គណបក្ស​ប្រជាជន​កម្ពុជា​ហើយ​សង្ឃឹម​ថា​ប្រជាពលរដ្ឋ​នឹង​បន្ត​​បោះឆ្នោត​ឲ្យ​គណបក្ស​ប្រជាជន​កម្ពុជា​​បន្ថែម​ទៀត​​...»។

ប៉ុន្តែ​នៅក្នុង​ជំនួប​ជាមួយ​​សមាជិក​នៅ​​​ខេត្ត​កណ្តាល​​ពី​ម្សិលមិញ​​​គឺជា​កិច្ចប្រជុំ​បិទទ្វារ​ហើយ​លទ្ធផល​​នៃកិច្ចប្រជុំ​នេះ​គឺ​មិន​​ត្រូវ​បាន​លេចធ្លាយ​ទេ​។

អ្នក​វិភាគ​នយោបាយ​លោក មាស នី បាន​កត់សម្គាល់​ថា​ពីរ​បី​ថ្ងៃ​មុន​ស្ថានភាព​នយោបាយ​​ហាក់បី​ដូចជា​​ប្រសើរ​ជាង​មុន​ប្រមាណ​ពីរ​បី​សប្តាហ៍​បន្ទាប់ពី​ព្រះមហាក្សត្រ​ នរោត្តម សីហមុនី ​បាន​ចេញ​​​ព្រះរាជសារ​​អំពាវនាវ​ឲ្យ​​ពលរដ្ឋ​​ទៅ​បោះឆ្នោត​ដោយ​សេរី​កុំ​ភ័យ​ខ្លាច​ការ​បំភិត​បំភ័យ​​ទៅ​បោះឆ្នោត​តាម​ឆន្ទៈ​របស់​ខ្លួន​ខណៈ​លោក​នាយក​រដ្ឋមន្រ្តី​ក៏​បាន​អំពាវនាវ​​ផង​ដែរ​ឲ្យ​គណបក្ស​នយោបាយ​ទាំងអស់​​កុំ​ប្រើ​ឱកាស​នេះ​ វាយប្រហារ​​ ឬ​​ជេរ​ប្រមាថ​​គណបក្ស​ដទៃ​​​​​ក្នុង​ពេល​ឃោសនា​ដើម្បី​គេច​ពី​ជម្លោះ​​​។

លោក មាស នី បាន​​បន្ត​ថា​៖ «​​...នេះ​ជា​ភាព​ចាស់ទុំ​របស់​​អ្នក​នយោបាយ​ដែល​យើង​ចង់​ឃើញ​»។

លោក​បាន​បន្ថែម​ថា​គណបក្ស​សង្គ្រោះ​ជាតិ​​ និង​គណបក្ស​ប្រជាជន​​​​មាន​កម្មវិធី​នយោបាយ​ល្អ​ដូច​គ្នា​ ប៉ុន្តែ​​គណបក្ស​សង្គ្រោះជាតិ​មាន​កម្មវិធី​នយោបាយ​ថ្មី​​គឺ​ថា​នៅ​ពេល​គណបក្ស​សង្គ្រោះជាតិ​ឈ្នះឆ្នោត​​ និង​គ្រប់គ្រង​ប្រទេស​គណបក្ស​​នេះ​ថា​នឹង​ផ្តល់​​ ៥០ ម៉ឺន​​ដុល្លារ​ទៅ​​ដល់​រាល់​​ឃុំ​សង្កាត់​ក្នុង​មួយ​ឆ្នាំ​​សម្រាប់​អភិវឌ្ឍ​​តាម​មូលដ្ឋាន​៕ PS

អត្ថបទគួរចាប់អារម្មណ៍