សៀមរាបៈ មេបញ្ជាការកងទ័ពជើងទឹក និងប្រតិភូក្រសួងការពារជាតិនៃបណ្ដាប្រទេសអាស៊ានទាំង ១០ ប្រមាណ ២០០ នាក់ បានមកចូលរួមកិច្ចប្រជុំលើកទី ១៣ នៅសណ្ឋាគារអង្គរ ខេត្តសៀមរាបកាលពីដើមសប្ដាហ៍នេះដោយបានសម្រេចបន្តបង្កើនកិច្ចសហប្រតិបត្តិការដើម្បីសន្តិសុខសមុទ្រយូរអង្វែងនៅក្នុងតំបន់ ប៉ុន្តែឈរលើគោលការណ៍នៃការមិនជ្រៀតជ្រែកកិច្ចការផ្ទៃក្នុង ការគោរពឯករាជភាព អធិបតេយ្យភាព ដោយគោរពគ្នាទៅវិញទៅមក។
លោក ទៀ វិញ អគ្គមេបញ្ជាការរងនៃកងយោធពលខេមរភូមិន្ទ មេបញ្ជាការកងទ័ពជើងទឹក និងជាអគ្គលេខាធិការនៃគណៈកម្មាធិការជាតិសន្តិសុខលម្ហសមុទ្របានថ្លែងឲ្យដឹងនៅលើគេហទំព័រក្រសួងការពារជាតិថា៖ «កិច្ចប្រជុំកងទ័ពជើងទឹកអាស៊ាននាពេលនេះនឹងបន្តពិភាក្សាគ្នាកាន់តែល្អិតល្អន់ ផុលផុសថែមទៀតអំពីបញ្ហាប្រឈមដែលជាគន្លឹះក្នុងការលើកកម្ពស់ ការជឿទុកចិត្តគ្នាក្នុងចំណោមកងទ័ពជើងទឹកអាស៊ាន រួមចំណែកថែរក្សាសន្តិភាព សិ្ថរភាព ការអភិវឌ្ឍ និង វិបុលភាពក្នុងតំបន់រួមគ្នាដោះស្រាយបញ្ហាប្រឈម ក៏ដូចជាស្ថានភាពអាសន្នប្រកបដោយប្រសិទ្ធភាពដោយឈរលើគោលការណ៍នៃការមិនជ្រៀតជ្រែកកិច្ចការផ្ទៃក្នុង ការគោរពឯករាជភាព អធិបតេយ្យភាព គោរពគ្នាទៅវិញទៅមក ដែលជាធាតុចូលដ៏សំខាន់ទាក់ទងទៅនឹងប្រធានបទ (បង្កើនកិច្ចសហប្រតិបត្តិការ ដើម្បីសន្តិសុខសមុទ្រយូរអង្វែង)»។
លោក ទៀ វិញ ក៏បានអះអាងផងដែរថានៅក្នុងកិច្ចប្រជុំនេះក៏មានប្រធានបទជាច្រើនដែលត្រូវយកមកធ្វើកិច្ចពិភាក្សា សំខាន់ពាក់ព័ន្ធដល់សន្តិសុខសមុទ្រ ត្រូវបានពិនិត្យពិចារណា និងលើកយកមកពិភាក្សាក្នុងស្មារតីនៃកិច្ចសហប្រតិបត្តិការប្រកបដោយសុច្ឆន្ទៈ ភាពចុះសម្រុងគ្នា ដើម្បីរិះរកនូវដំណោះស្រាយចំពោះបញ្ហាប្រឈមទាំងឡាយលើផ្ទៃសមុទ្រ។
នៅក្នុងពិធីថ្លែងបើកកិច្ចប្រជុំលោក ទៀ បាញ់ រដ្ឋមន្ត្រីក្រសួងការពារជាតិបានទទួលស្គាល់ថាបញ្ហាប្រឈមដែលកំពុងបន្តកើតឡើងលើលម្ហសមុទ្រដូចជាបញ្ហាអធិបតេយ្យភាពលើដែនសមុទ្រ បញ្ហាចារកម្មប្រដាប់អាវុធ អន្តោប្រវេសន៍ខុសច្បាប់ ការជួញដូរគ្រឿងញៀន និងការនេសាទខុសច្បាប់ ការបំពុលបរិស្ថាន គ្រោះមហន្តរាយធម្មជាតិ និងអំពើភេរវកម្ម។
លោក ទៀ បាញ់ ថ្លែងថា៖ «យើងពិតជាទទួលស្គាល់អំពីបញ្ហាប្រឈមទាំងឡាយ (នោះ) ដែលកំពុងកើតមានឡើងលើលម្ហសមុទ្រ (ដែលបញ្ហាទាំងនោះមាន) ទាំងសន្តិសុខបែបប្រពៃណី និងមិនប្រពៃណី ដូចនេះកិច្ចសហប្រតិបត្តិការកងទ័ពជើងទឹកនៃបណ្តាប្រទេសអាស៊ានតាមរយៈនៃកិច្ចប្រជុំ Asean Navy Chiefs Meeting (អេ អិន ស៊ី អិម ANCM ) គឺជាសក្ខីកម្មនៃស្មារតីឯកភាពគ្នា និងជាការខិតខំរួមគ្នាលើវិស័យនាវាចរ ដើម្បីធានាបាននូវសន្តិសុខយូរអង្វែងលើផ្ទៃសមុទ្រ និងទទួលខុសត្រូវលើជោគវាសនារបស់ប្រជាជាតិអាស៊ានទាំងមូល»។
លោក ទៀ វិញ បានអះអាងថានៅក្នុងអង្គប្រជុំនោះ មេបញ្ជាការកងទ័ពជើងទឹកនៃបណ្ដាប្រទេសអាស៊ាននឹងបន្តកិច្ចសហប្រតិបត្តិការដោយផ្អែកលើស្ថានការណ៍ជាក់ស្តែងដែលកំពុងអភិវឌ្ឍន៍ក្នុងតំបន់ និងអនុលោមតាមគោលការណ៍ចំនួន ៣ ដែលបានលើកឡើងក្នុងកិច្ចប្រជុំថ្នាក់រដ្ឋមន្ត្រីការពារជាតិអាស៊ានគឺកសាងភាពធន់ទ្រាំរឹងមាំ កសាងសមត្ថភាពឆ្លើយតប និងកសាងសមត្ថភាពនៃការស្តារឡើងវិញ ដើម្បីបម្រើឲ្យគោលបំណងបង្កើនឡើងនូវកាលានុវត្តភាព និងសម្រេចបានគោលដៅជាបឋមគឺត្រូវថែរក្សាការពារ សុខសន្តិភាព និងសុវត្ថិភាពលើផ្ទៃសមុទ្រក្នុងតំបន់។
យោងតាមគេហទំព័រក្រសួងការពារជាតិដដែលនេះបានឲ្យដឹងថា កិច្ចប្រជុំមេបញ្ជាការកងទ័ពជើងទឹកអាស៊ាន អេ អិន ស៊ី អិម (ANCM ) បានចាប់បដិសន្ធិនៅក្នុងឆ្នាំ ២០០១ តាមរយៈនៃកិច្ចប្រជុំលើកដំបូងរបស់ខ្លួននាទីក្រុងបាងកក (ប្រទេស ថៃ )។
មានប្រធានបទជាច្រើន ជាពិសេសពាក់ព័ន្ធដល់សន្តិសុខសមុទ្រត្រូវបានពិនិត្យ ពិចារណា និងលើកយកមកពិភាក្សាក្នុងស្មារតីនៃកិច្ចសហប្រតិបត្តិការប្រកបដោយសុច្ឆន្ទៈ ភាពចុះសម្រុងគ្នា ដើម្បីរិះរកដំណោះស្រាយ ដោះស្រាយបញ្ហាប្រឈមទាំងឡាយលើផ្ទៃសមុទ្រ ដើម្បីរក្សាសន្តិភាព និងស្ថិរភាពក្នុងតំបន់។
ទោះយ៉ាងណាក៏ដោយលោក ឃុន សុទ្ធី អ្នកនាំពាក្យកងទ័ពជើងទឹកបានបដិសេធសុំមិនធ្វើអត្ថាធិប្បាយពីកិច្ចប្រជុំទេ៕