The Phnom Penh Post Search

Search form




Logo of Phnom Penh Post newspaper Phnom Penh Post - មេ​បញ្ជាការ​កងរាជ​អាវុធហត្ថ​លើ​ផ្ទៃ​ប្រទេស​បញ្ជា​ទិញ​ម៉ូតូ​ចំនួន ១២៥ គ្រឿង សម្រាប់​រក្សា​សន្តិសុខ និង​ធ្វើ​ការងារ​សង្គម​ជូន​ពលរដ្ឋ

មេ​បញ្ជាការ​កងរាជ​អាវុធហត្ថ​លើ​ផ្ទៃ​ប្រទេស​បញ្ជា​ទិញ​ម៉ូតូ​ចំនួន ១២៥ គ្រឿង សម្រាប់​រក្សា​សន្តិសុខ និង​ធ្វើ​ការងារ​សង្គម​ជូន​ពលរដ្ឋ

Content image - Phnom Penh Post
លោក សៅ សុខា អគ្គ​មេបញ្ជាការ​រង​នៃ​កងយោធពល​ខេមរភូមិន្ទ និង​ជា​មេ​បញ្ជាការ​កង​រាជ​អាវុធហត្ថ​លើ​ផ្ទៃ​ប្រទេស។ រូបថត ហ្វេសប៊ុក

មេ​បញ្ជាការ​កងរាជ​អាវុធហត្ថ​លើ​ផ្ទៃ​ប្រទេស​បញ្ជា​ទិញ​ម៉ូតូ​ចំនួន ១២៥ គ្រឿង សម្រាប់​រក្សា​សន្តិសុខ និង​ធ្វើ​ការងារ​សង្គម​ជូន​ពលរដ្ឋ

ភ្នំពេញ៖ អគ្គ​មេបញ្ជាការ​រង​នៃ​កងយោធពល​ខេមរភូមិន្ទ និង​ជា​មេ​បញ្ជាការ​កង​រាជ​អាវុធហត្ថ​លើ​ផ្ទៃ​ប្រទេស លោក សៅ សុខា បាន​បញ្ជា​ទិញ​ម៉ូតូ​ចំនួន ១២៥ គ្រឿង សម្រាប់​ឲ្យ​កងកម្លាំង​អាវុធ​ហត្ថ​ជិះល្បាត​រក្សា​ការពារ​សន្តិសុខ សណ្ដាប់​ធ្នាប់​សាធារណៈ សុវត្ថិភាព​សង្គម និង​ធ្វើ​កិច្ច​ការងារ​មនុស្សធម៌ ជួយ​ដល់​ប្រជាពលរដ្ឋ​នៅ​តំបន់​បិទ​ខ្ទប់​ដោយសារ​ជំងឺ​កូវីដ ១៩។

លោក សៅ សុខា ឲ្យ​ដឹង​ថា ម៉ូតូ​ដែល​លោក​បញ្ជា​ទិញ​នោះ ជា​ប្រភេទ​ម៉ូតូ​ហុងដា កម្លាំង ១៥០ សេសេ។ ក្នុង​នោះ​ចំនួន ១០០ គ្រឿង សម្រាប់​បំពាក់​ឲ្យ​កងរាជ​អាវុធហត្ថ​ចល័ត​រាជធានី​ភ្នំពេញ។ កម្លាំង​នេះ ស្ថិត​ក្រោម​ការ​បញ្ជា​ផ្ទាល់​របស់​បញ្ជាការដ្ឋាន​កងរាជ​អាវុធហត្ថ​លើ​ផ្ទៃ​ប្រទេស។ ចំណែក ២៥ គ្រឿង​ទៀត មាន ១៣ គ្រឿង បំពាក់​ឲ្យ​អាវុធហត្ថ​ខេត្ត​បន្ទាយមានជ័យ និង ១២ គ្រឿង​ សម្រាប់​អាវុធហត្ថ​នៅ​ខេត្ត​ស្វាយរៀង ដែល​កំពុង​ត្រូវ​ការ​ប្រើប្រាស់​បន្ទាន់។

លោក​ថ្លែង​ថា៖ «ខ្ញុំ​ទិញ​ម៉ូតូ​ហ្នឹង​មក​ ដើម្បី​ថែរក្សា​សន្តិសុខ សណ្តាប់​ធ្នាប់ ប៉ុន្តែ​មាន​ការងារ​មួយ​ទៀត គឺ​ជំនួយ​មនុស្សធម៌ ព្រោះ​នេះ​ជា​ប្រតិបត្តិការ​សង្គ្រោះ​គ្រោះ​មហន្តរាយ​ដែល​កើត​ឡើង​ដោយសារ​ជំងឺ​កូវីដ ១៩។

តាមរយៈ​ម៉ូតូ​នេះ យើង​អាច​ដឹក​ជញ្ជូន​ស្បៀង​បណ្តោះអាសន្ន​ទៅ​កន្លែង​ដែល​ចាំបាច់​ហើយ​ឡាន​ចូល​មិន​ដល់ ដើម្បី​ដោះស្រាយ​បាន​បញ្ហា​បន្ទាន់​ជូន​ពលរដ្ឋ ទម្រាំ​នឹង​ជំនួយ​ធំ​របស់​រាជរដ្ឋាភិបាល​មក​ដល់​ជូយ​ពួក​គាត់»។

លោក សៅ សុខា បញ្ជាក់​ថា ស្បៀង​អាហារ គ្រឿង​ឧបភោគ​បរិភោគ ដែល​កម្លាំ​អាវុធហត្ថ​ដឹក​ជញ្ជូន​សម្រាប់​ផ្តល់​ជូន​ប្រជាពលរដ្ឋ​នោះ មិនមែន​ផ្តល់​ដោយ​រាជរដ្ឋាភិបាល​ទេ។ វា​គឺ​ជា​ជំនួយ​សប្បុរសធម៌​ដែល​បាន​ផ្តល់​មក​ឲ្យ​កងកម្លាំង​អាវុធហត្ថ ប៉ុន្តែ​ដោយសារ​ចាំបាច់​ជួយ​ប្រជាពលរដ្ឋ ទើប​បង្វែរ​គ្រឿង​ឧបភោគ​បរិភោគ​ទាំង​នោះ ជួយ​ទៅ​ដល់​ពលរដ្ឋ។

បើ​តាម លោក សៅ សុខា ថវិកា​ដែល​ទិញ​ម៉ូតូ​នេះ​មាន​ចំនួន​ជិត ៥០ ម៉ឺន​ដុល្លារ ជា​ថវិកា​សប្បុរសធម៌​ដែល​លោក​កៀរគរ​បាន​សម្រាប់​សាងសង់​មន្ទីរពេទ្យ​នៅ​ស្រុក​រមាសហែក​ ខេត្ត​ស្វាយរៀង ដែល​មាន​តម្លៃ ៨៩ ម៉ឺន​ដុល្លារ។ ប៉ុន្តែ​ដើម្បី​ជួយ​ដោះ​ស្រាយ​បញ្ហា​ចំពោះ​មុខ ទើប​លោក​សុំ​ពន្យារពេល​សាងសង់​មន្ទីរពេទ្យ​សិន ដោយ​បង្វិល​លុយ​ជិត ៥០ ម៉ឺន​ដុល្លារ​នោះ ទៅ​ទិញ​ម៉ូតូ ដើម្បី​ធ្វើ​ភារកិច្ច​ជួយ​ប្រជាជន។

លោក​បញ្ជាក់​ថា ក្រៅ​ពី​ម៉ូតូ កម្លាំ​អាវុធហត្ថ​បាន​ត្រៀម​រួច​ជា​ស្រេច​នូវ​មធ្យោបាយ​សង្គ្រោះ​ផ្សេងៗ​ទៀត ក្នុង​នោះ​មាន ម៉ូតូ​កង់បី​ចំនួន ១០០ គ្រឿង សម្រាប់​ល្បាត​ពេល​ភ្លៀង និង​អាច​ដឹក​ជញ្ជូន​ស្បៀង​បាន​ច្រើន​ជាង​ម៉ូតូ។ ក្រៅ​ពី​នោះ​លោក​ក៏​បាន​គិតគូរ​ដល់​ការ​សង្គ្រោះ​គ្រោះ​មហន្តរាយ​តាម​ផ្លូវ​ទឹក​ផង​ដែរ ក្នុង​នោះ​លោក​គ្រោង​បង្កើត​អូប័រ​ខ្នាត​តូច ១០០ គ្រឿង​បន្ថែម​ទៀត បើ​សិន​ជា​មាន​ជំនួយ​ថវិកា​មនុស្ស​ធម៌​គ្រប់គ្រាន់។

លោក​ថ្លែង​ថា៖ «ខ្ញុំ​បាន​គិត​ និង​រក​វិធី ធ្វើ​ការ​រៀបចំ​ផលិត​អូប័រ ដែល​ពួក​ខ្ញុំ​នឹង​ធ្វើ​ដោយ​ខ្លួន​ឯង ព្រោះ​ពួក​ខ្ញុំ​ធ្វើ​បាន​សម្បក​វា។ ប៉ុន្តែ​ត្រូវ​ទិញ​ម៉ាស៊ីន​ដើម្បី​យក​មក​បំពាក់​វា។ អូប័រ​តូចៗ​ដែល​អាច​ដឹក​បាន​ក្នុង​រង្វង់ ១០នាក់ វា​អាច​ជួយ​បាន​ភ្លាមៗ។ បើ​យើង​ធ្វើ​ធំ​ពេក ត្រូវ​ការ​ពេល​ស្ទូច អា​ហ្នឹង​យឺត»៕

អត្ថបទគួរចាប់អារម្មណ៍