ស្ទឹងត្រែង: អគ្គមេបញ្ជាការនៃកងយោពលខេមភូមិន្ទលោក វង្ស ពិសេន បានសម្រេចព្យួរមុខតំណែង លោកវរសេនីយ៍ត្រី សុខ រិទ្ធី មេបញ្ជាការមូលដ្ឋានកងរាជអាវុធហត្ថស្រុកសេសាន ដើម្បីទុកលទ្ធភាពជូនតុលាការចាត់វិធានការតាមនីតិវិធីច្បាប់ បន្ទាប់ពីមេបញ្ជាការរូបនេះបានបង្ករបួសស្នាមលើពលរដ្ឋម្នាក់នៅភូមិព្រែក សង្កាត់-ក្រុងស្ទឹងត្រែងកាលពីថ្ងៃទី ២៤ ខែវិច្ឆិកា។
សេចក្ដីសម្រេចចុះថ្ងៃទី ២៥ ខែវិច្ឆិកាដែលភ្នំពេញប៉ុស្ដិ៍ទទួលបានពីម្សិលមិញឱ្យដឹងថា ត្រូវបានព្យួរមុខតំណែង វរសេនីយ៍ត្រី សុខ រិទ្ធី អត្ថលេខ ០៣២៣-៣០ ដើម្បីទុកជូនសមត្ថកិច្ចតុលាការចាត់ការតាមនីតិវិធី។
សេចក្ដីសម្រេចបញ្ជាក់ថា៖ «នាយខុទ្ទកាល័យ នាយកទីចាត់ការបុគ្គលិក បញ្ជាការដ្ឋានកងរាជអាវុធហត្ថលើផ្ទៃប្រទេស ស្ថាប័ន កងឯកភាពដែលមានការពាក់ព័ន្ធ ត្រូវទទួលបន្ទុកអនុវត្តសេចក្ដីសម្រេចនេះតាមភារកិច្ចរៀងៗខ្លួនចាប់ពីថ្ងៃចុះហត្ថលេខាតទៅ»។
លោក អេង ហ៊ី អ្នកនាំពាក្យកងរាជអាវុធហត្ថលើផ្ទៃប្រទេសបានថ្លែងពីម្សិលមិញថា ថ្នាក់ដឹកនាំនៃបញ្ជាការដ្ឋានកងយោធពលខេមភូមិន្ទបានចាត់វិធានការតាមនិវិធីច្បាប់ចំពោះមន្ត្រីដែលបានប្រព្រឹត្តកំហុសឆ្គងកន្លងមក។ លោកថា វរសេនីយ៍ត្រី សុខ រិទ្ធី បានប្រើអំពើហិង្សាទៅលើភាគីទំនាស់របស់ខ្លួនរហូតមានរបួសធ្ងន់ ប៉ុន្ដែលោកមិនបានបញ្ជាក់ដើមហេតុច្បាស់លាស់ទេ។
លោកបញ្ជាក់ថា៖ «ការបង្កហិង្សានេះ គឺមិនមែនក្នុងអំឡុងពេលគាត់បំពេញតួនាទី ឬភារកិច្ចបេសកកម្មទេ ពោលគឺគាត់ និងភាគីទំនាស់បានឈ្លោះប្រកែកគ្នាក្នុងរឿងផ្ទាល់ខ្លួនរបស់គាត់ទាំង ២ នាក់ ប៉ុន្ដែខ្ញុំអត់ដឹងរឿងហេតុវាយ៉ាងណាច្បាស់លាស់ទេ គឺខ្ញុំគ្រាន់តែដឹងថា លោក សុខ រិទ្ធី វ៉ៃគេឱ្យមានរបួសស្នាម។ អ៊ីចឹងគាត់ត្រូវតែទទួលរងពិន័យពីថ្នាក់លើបែបនេះ»។
លោក អៀង វ៉ាន់ឌី មេបញ្ជាការកងរាជអាវុធហត្ថខេត្តស្ទឹងត្រែងពីម្សិលមិញមិនទាន់អាចទាក់ទងសុំការបញ្ជាក់ជុំវិញករណីនេះបានទេ។ ចំណែកលោក សុខ រិទ្ធី ក៏មិនទាន់អាចស្វែងរកប្រភពទាក់ទងសុំការបញ្ជាក់បន្ថែមជុំវិញករណីនេះបានដែរ។
ប៉ុន្ដែលោក រិទ្ធី បានសរសេរលិខិតបំភ្លឺមួយកាលពីថ្ងៃទី ២៨ ខែវិច្ឆិកាដែលភ្នំពេញប៉ុស្ដិ៍ទទួលបានពីម្សិលមិញថា លោក និងមិត្តភក្តិម្នាក់ទៀតនៅយប់ថ្ងៃទី ២៤ ខែវិច្ឆិកាបានចូលហាងលក់បបរ ១ កន្លែងស្ថិតនៅភូមិព្រែក សង្កាត់-ក្រុងស្ទឹងត្រែង ប៉ុន្ដែម្ចាស់ហាងឈ្មោះ ជី បូណា បានប្រាប់ថា ហាងគាត់គ្មានអ្វីលក់ទេ គឺបិទហាងហើយ។ ពេលនោះលោក និងមិត្តភក្តិបានចេញមកវិញក៏ទៅរកហាងផ្សេងដែលនៅជិតនោះ។
លោកបន្តថា ក្រោយម្ចាស់ហាងដែលគ្មានអ្វីលក់នោះបានស្រែកហាមមិនឱ្យពួកលោកចតឡាននៅខាងមុខហាងគាត់ ប៉ុន្ដែមិត្តលោកបានប្រាប់ទៅវិញថា បើហាងគាត់មិនលក់ទេ មិនប៉ះពាល់អ្វីទេ ព្រោះឡានចតនៅលើផ្លូវសាធារណៈ។ ស្រាប់តែម្ចាស់ហាងស្រែកឡូឡា ពេលនោះមានការប៉ះទង្គិចពាក្យសម្តីគ្នា ក្រោយមកម្ចាស់ហាងបានកាន់ដបស្រាបៀរ ហើយគំរាមវាយក្បាលលោកនឹងដបនោះ ប៉ុន្ដែលោកបានដើរចូលទៅជិតក្នុងបំណងចាប់យកដបស្រាបៀរចេញពីដៃ ប៉ុន្ដែគាត់បានរើបម្រះ ហើយបានដួលទៅប៉ះកៅអីជ័រ និងដួលទៅលើដី ស្រាប់តែមានរបួសស្នាមក្រហមលើផ្ទៃមុខ។
លោក សុខ រិទ្ធី បញ្ជាក់ថា៖ «ខ្ញុំមិនបានបង្ករបួសស្នាមទៅលើបុរសម្ចាស់ហាងនោះទេ ដោយគាត់បានដួលខ្លួនគាត់ ហើយប៉ះកៅអីជ័រក្នុងហាងគាត់។ លើសពីនេះ ខ្ញុំបានដាក់ពាក្យប្ដឹងទៅតុលាការរួចហើយ ដើម្បីប្ដឹងម្ចាស់ហាងពីបទប្រើហិង្សាមកលើខ្ញុំ»។
លោក ជី បូណា ដែលជាភាគីជម្លោះម្ខាងទៀត មិនទាន់អាចស្វែងរកប្រភពទាក់ទងសុំការបញ្ជាក់ជុំវិញករណីនេះបានទេកាលពីម្សិលមិញ៕