ភ្នំពេញៈ ប្រធានសហភាពសហជីពការងារ លោក រ៉ុង ឈុន បានស្នើសុំលោកនាយករដ្ឋមន្ត្រី ហ៊ុន សែន ឲ្យទទួលរូបលោក និងគ្រូបង្រៀនសរុប ១០ នាក់ឱ្យចូលបម្រើការងារវិញក្រោយពួកគាត់ត្រូវក្រសួងអប់រំបញ្ឈប់ពីការងារកាលពីខែមករា ឆ្នាំ ២០១៨ ។
លោក រ៉ុង ឈុន ប្រធានសហភាពសហជីពការងារកាលពីថ្ងៃទី ៤ ខែធ្នូ បានសរសេរលិខិត ១ ច្បាប់ជូនលោកនាយករដ្ឋមន្ត្រី ហ៊ុន សែន ដោយស្នើសុំឲ្យលោកនាយករដ្ឋមន្ត្រីទទួលយកបុគ្គលិកអប់រំដែលមានរូបលោក និងគ្រូបង្រៀនចំនួន ១០ នាក់មកពីខេត្តកំពង់ចាម ព្រះសីហនុ ព្រៃវែង សៀមរាប កំពត និងបាត់ដំបង ដើម្បីបានចូលបម្រើការងារវិញ ។ លោកបញ្ជាក់ថា រូបលោក និងបុគ្គលិកអប់រំទាំង ១០ នាក់ត្រូវបានបញ្ឈប់ទាំងអយុត្តិធម៌ក្រោមការចោទប្រកាន់ថាបានឈប់ពីការងារដោយមិនមានការអនុញ្ញាត និងបោះបង់ការងារ។
លិខិតលោក រ៉ុង ឈុន សរសេរថា៖ «ចំពោះបុគ្គលិកអប់រំទាំងអស់ខាងលើនេះ មិនបានប្រព្រឹត្តកំហុសដូចការចោទប្រកាន់របស់ក្រសួងអប់រំ យុវជន និងកីឡា នោះទេ»។
លោកបន្ថែមថាចំណាត់ការដែលក្រសួងអប់រំ យុវជន និងកីឡាចេញប្រកាសលុបឈ្មោះបុគ្គលិកអប់រំចេញពីក្របខ័ណ្ឌទាំងគ្មានកំហុស និងដោយអយុត្តិធម៌នេះមិនបានអនុវត្តតាមនីតិវិធី និងជាការរំលោភលើអនុក្រឹត្យស្តីពីការស្ថិតនៅក្រៅក្របខ័ណ្ឌដើម និងច្បាប់ស្តីពីលក្ខន្តិកៈមន្ត្រីរាជការស៊ីវិល។
ថ្លែងប្រាប់ភ្នំពេញប៉ុស្តិ៍ពីម្សិលមិញលោក រ៉ុង ឈុន ឲ្យដឹងថាសមាគមគ្រូបង្រៀនកម្ពុជាឯករាជ្យធ្លាប់បានសរសេរលិខិតសុំអន្តរាគមន៍ពីលោកនាយករដ្ឋមន្ត្រី និងក្រសួងអប់រំ យុវជន និងកីឡាម្តងរួចមកហើយកាលពីដើមឆ្នាំនេះ ប៉ុន្តែគ្មានលទ្ធផល។ លោកថាសមាគមគ្រូបង្រៀនឯករាជ្យក៏ដូចជាសហភាពសហជីពការងារក៏បានសរសេរលិខិតសុំអន្តរាគមន៍ទៅអង្គការស្ថាប័នអន្តរជាតិដើម្បីសុំឲ្យក្រសួងអប់រំទទួលពួកគាត់ធ្វើការនៅក្របខ័ណ្ឌក្រសួងអប់រំវិញដែរ។
លោកនិយាយថាការលុបឈ្មោះគាត់ និងគ្រូបង្រៀន ១០ នាក់ទៀត ដោយសារតែឥទ្ធិពលនៃរឿងនយោបាយគឺដោយសារលោកធ្លាប់ជាសមាជិកនៃគណៈកម្មាធិការជាតិរៀបចំការបោះឆ្នោត (គជប) ពីកូតាគណបក្សសង្គ្រោះជាតិ ហើយគ្រូបង្រៀន ១០ នាក់ផ្សេងទៀតគឺជាមន្ត្រីក្រុមប្រឹក្សាគណបក្សសង្គ្រោះជាតិនៅថា្នក់ឃុំ ស្រុក និងខេត្ត។
លោក រ៉ុង ឈុន ថ្លែងថា៖ «ខ្ញុំគិតថាវាងាយស្រួលទេ សម្រាប់លោកនាយករដ្ឋមន្ត្រីក្នុងការដោះស្រាយរឿងនេះ ព្រោះវាមិនជាប់ពាក់ព័ន្ធនឹងតុលាការទេ។ ករណីនេះគឺស្ថិតក្រោមអំណាចរបស់គាត់ ហើយការលុបឈ្មោះវាជាប់ពាក់ព័ន្ធនឹងរឿងនយោបាយ ។ គ្រូបង្រៀនទាំងអស់ហើយនិងខ្ញុំបានបញ្ចប់ការងារនៅកន្លែងថ្មី ហើយយើងអាចសុំទៅធ្វើការនៅកន្លែងដើមវិញបាន។ ប្រកាស និងច្បាប់អនុញ្ញាតឲ្យយើងមកធ្វើការកន្លែងចាស់វិញបាន ពេលយើងបញ្ចប់ការងារកន្លែងថ្មីបាន»។
កាលពីខែមីនាអង្គការអន្តរជាតិ ២ រួមមានសម្ព័ន្ធសហភាពពាណិជ្ជកម្មអន្តរជាតិហៅកាត់ថា ITUC និងអង្គការអប់រំអន្តរជាតិហៅកាត់ថា EI បានស្នើឲ្យក្រសួងអប់រំទទួលយកបុគ្គលិកអប់រំទាំង ១១ រូបចូលបម្រើការងារវិញ។
នៅពេលទាក់ទងពីម្សិលមិញលោក ឌី ខាំបូលី អ្នកនាំពាក្យក្រសួងអប់រំ យុវជន និងកីឡាមិនធ្វើអត្ថាធិប្បាយលម្អិតទេ ដោយគ្រាន់តែបញ្ជាក់ថា ក្រសួងមិនទាន់បានទទួលលិខិតនោះទេ ប៉ុន្តែលោកថាលិខិតនោះគឺសរសេរទៅកាន់លោកនាយករដ្ឋមន្ត្រី៕