ភ្នំពេញៈ បន្ទាប់ពីជួបប្រជុំគ្នា អស់រយៈពេលពីរថ្ងៃ ក្រុមមេដឹកនាំសហជីព កាលពីម្សិលមិញ បានឯកភាពគ្នា ដើម្បីបញ្ចុះបញ្ចូលរដ្ឋាភិបាល ឲ្យធ្វើការដំឡើងប្រាក់ឈ្នួលអប្បបរមាចំនួនទ្វេដង ដល់កម្មករក្នុងវិស័យកាត់ដេរ។ នេះបើយោងតាមតំណាងកម្មករដែលបានថ្លែង។
លោក រ៉ុង ឈុន ប្រធានសហភាពសហជីពកម្ពុជា បានថ្លែងថា ក្រុមប្រតិភូសហជីព បានឯកភាពគ្នាលើចំនួន ១២០ ដុល្លារ ក្នុងមួយខែ មុនកិច្ចប្រជុំរដ្ឋាភិបាល ដែលគ្រោងធ្វើឡើងនៅថ្ងៃអង្គារសប្តាហ៍ក្រោយ។ លោក រ៉ុង ឈុន ដែលធ្លាប់ដឹកនាំកម្មករធ្វើការតវ៉ាទាមទារដំឡើងប្រាក់ខែកាលពី ចុងឆ្នាំមុន បានថ្លែងថា៖ «ខ្ញុំចង់បាន ១៥០ ដុល្លារ ក្នុងមួយខែ សម្រាប់កម្មករ។ ប៉ុន្តែខ្ញុំត្រូវតែទទួលយកការឯកភាពរួមគ្នា ដែលបានឯកភាពនៅចំនួន ១២០ ដុល្លារ»។
លោកបានបន្តថា៖ «ខ្ញុំគិតថា និយោជក នឹងមានលទ្ធភាព ផ្តល់ឲ្យកម្មករ ក្នុងចំនួននេះ»។
រដ្ឋមន្រ្តីក្រសួងសង្គមកិច្ច លោក អ៊ិត សំហេង បានថ្លែងកាលពីខែមុនថា ក្រុមសហជីព ត្រូវតែធ្វើការឯកភាពគ្នាជាក់លាក់មួយ អំពីចំនួន ដែលពួកគេចង់បាន នៅមុនពេលក្រុមការងាររដ្ឋាភិបាល ជួបប្រជុំគ្នា។ ការថ្លែងរបស់លោក អ៊ិត សំហេង បានធ្វើឡើងបន្ទាប់ពីមានការអំពាវនាវពីសហភាពសហជីពកម្ពុជា ដែលទាមទារឲ្យដំឡើងដល់ចំនួន ១៥០ ដុល្លារ ក្នុងមួយខែ និងសហជីពសេរីកម្មករ បានទាមទារចំនួន ១២០ ដុល្លារក្នុងមួយខែ។
ក្រុមប្រឹក្សាសហជីពជាតិកម្ពុជា (CCNU) ដែលពាក់ព័ន្ធយ៉ាងខ្លាំង នៅក្នុងការចរចា អនុស្សរណៈនៃការយោគយល់គ្នា ក្នុងឧស្សាហកម្មនេះ ជាមួយសមាគមរោងចក្រកាត់ដេរនៅកម្ពុជា កាលពីឆ្នាំមុនបានសុំឲ្យមានការដំឡើងត្រឹមចំនួន ៩៥ ដុល្លារ។
លោក ខេន លូ អគ្គលេខាធិការ នៃសមាគមរោងចក្រកាត់ដេរនៅកម្ពុជា បានថ្លែងថា គ្មានប្រទេសណាក្នុងពិភពលោក អាចយល់ព្រមមួយរយភាគរយ ចំពោះការដំឡើងប្រាក់ឈ្នួលអប្បបរមានោះទេ។ លោកបានថ្លែងបន្តថា៖«នោះបង្ហាញពីភាពមិនទាន់យល់ដឹងគ្រប់គ្រាន់របស់សហជីព»។
តែ ទោះយ៉ាងណាក្តី លោកបានថ្លែងថា សមាគមរោងចក្រកាត់ដេរនៅកម្ពុជាគាំទ្រចំពោះការឲ្យមានការ ដំឡើងប្រាក់ឈ្នួល ប៉ុន្តែពេលវេលា ដែលត្រូវដំឡើងត្រឹមត្រូវ គឺនៅឆ្នាំក្រោយ។ លោកបានថ្លែងបន្តថា៖ «យើងចង់ឲ្យកម្មករ មានការយល់ដឹង អំពីភាពប្រាកដប្រជា» ប៉ុន្តែលោកបានបដិសេធ មិនធ្វើអត្ថាធិប្បាយអំពីអ្វីទៅដែលជាការដំឡើងប្រាក់ឈ្នួលមាន ភាពប្រាកដប្រជានោះឡើយ។
យុទ្ធនាការសម្លៀកបំពាក់ស្អាតស្អំ ដែលជាក្រុមបញ្ចុះបញ្ចូល មានមូលដ្ឋាននៅអឺរ៉ុប បានថ្លែងនៅក្នុងសេចក្តីថ្លែងការណ៍មួយ កាលពីម្សិលមិញថា ខ្លួនគាំទ្រឲ្យមានការដំឡើងប្រាក់ឈ្នួលអប្បបរមាចំនួន ១៥០ ដុល្លារក្នុងមួយខែ ហើយដែលចំនួននេះ ត្រូវបានចាត់ទុកថា នៅមានកម្រិតទាបខ្លាំងជាង«ប្រាក់ឈ្នួលរស់នៅសមរម្យ»។
លោក Dave Welsh ប្រធានប្រចាំប្រទេសនៃមជ្ឈមណ្ឌលអាមេរិក ដើម្បីសាមគ្គីភាពការងារ អន្តរជាតិ (ACILS) បានថ្លែងថា អង្គការរបស់លោក បានផ្តល់គំនិតឲ្យមានការផ្តួចផ្ដើមមួយចំនួន ក្នុងអំឡុងការជជែកពិភាក្សាគ្នា ដែលមានរយៈពេលពីរថ្ងៃនេះ។ លោកបានថ្លែងថា៖ «យើងបានជំរុញមិនត្រឹមត្រូវ ការដំឡើងប្រាក់ឈ្នួល នៅក្នុងវិស័យកាត់ដេរ ប៉ុន្តែក៏ថែមទាំងប្រាក់ឈ្នួលជាតិ និងវិធីសាស្រ្តជាប្រព័ន្ធមួយ សម្រាប់ការដំឡើងប្រាក់ឈ្នួល ដោយដំឡើងជារៀងរាល់ឆ្នាំម្តងឬ ១៨ ខែម្តង»។
ក្រុមមន្ត្រីសហជីព និងអ្នកពាក់ព័ន្ធផ្សេងទៀត បានលើកឡើងថា ការដំឡើងប្រាក់ខែឲ្យកម្មករ ធ្វើឲ្យពួកគេ អាចរស់នៅបានសមរម្យ គឺជាវិធានការ ដែលមានប្រសិទ្ធភាពចំបងមួយក្នុងការទប់ស្កាត់ការដួលសន្លប់ របស់កម្មករ ដែលតែងតែកើតឡើងជាហូរហែ នៅតាមបណ្តារោងចក្រជាច្រើននៅទូទាំងប្រទេសនេះ៕ PS
