The Phnom Penh Post Search

Search form

Logo of Phnom Penh Post newspaper Phnom Penh Post - មេ​អង្គការ​ម្នាក់​ត្រូវ​កាត់​ឲ្យ​ជាប់​គុក​ ៣ ​ឆ្នាំ​ពី​បទ​ប្រព្រឹត្ត​អំពើ​អាស​លើ​កុមារ




មេ​អង្គការ​ម្នាក់​ត្រូវ​កាត់​ឲ្យ​ជាប់​គុក​ ៣ ​ឆ្នាំ​ពី​បទ​ប្រព្រឹត្ត​អំពើ​អាស​លើ​កុមារ

Content image - Phnom Penh Post
អតី​តនាយក​អង្គការ​កុមារ​ឈ្មោះ​ ហង្ស វិបុល​ ពេលចេញពី​​សវនាការ​កាល​ពីម្សិលមិញ។ ហុង មិនា

មេ​អង្គការ​ម្នាក់​ត្រូវ​កាត់​ឲ្យ​ជាប់​គុក​ ៣ ​ឆ្នាំ​ពី​បទ​ប្រព្រឹត្ត​អំពើ​អាស​លើ​កុមារ

ភ្នំពេញៈ សាលា​ដំបូង​រាជធានី​ភ្នំពេញ​កាលពី​ម្សិលមិញ​បាន​ប្រកាស​សាលក្រម​លើ​សំណុំ​រឿង​ «ប្រព្រឹត្ត​អំពើ​អាស​ប្រឆាំង​នឹង​អនីតិជន​ក្រោម​អាយុ ១៥ ឆ្នាំ» ដែល​ប្រពឹត្ត​ដោយ​​អតី​តនាយក​អង្គការ​កុមារ​ឈ្មោះ​ ហង្ស វិបុល​ ហើយ​​បាន​កាត់​ទោស​ជន​នេះ​ដាក់​ពន្ធនាគារ​​ ៣ ឆ្នាំ និង​ពិន័យ ៨ ​លាន​​រៀល​​ចូល​រដ្ឋ។

ចៅក្រម គឹម រ័ត្នណារិន ដែល​​ប្រកាស​សាលក្រម​នេះ​ក៏​បាន​​តម្រូវ​ឲ្យ​ជន​ជាប់​ចោទ​បង់​ប្រាក់​សង​ជំងឺ​ចិត្ត​ចំនួន​ ៥ លាន​​រៀល​​ក្នុង​ម្នាក់ៗ​ដល់​គ្រួសារ​ជន​រងគ្រោះ​ចំនួន​ ៤ នាក់ និង​គ្រួសារ​ម្នាក់​ទៀត​ដែល​មាន​ជន​រងគ្រោះ​ ២ នាក់​ត្រូវ​បង់​ប្រាក់​ជំងឺ​ចិត្ត​ចំនួន​ ១០ ​លាន​រៀល​។

ក្រឡាបញ្ជី​ម្នាក់​បាន​ឲ្យ​ដឹង​ថា៖ «​ជន​ជាប់​ចោទ​មាន​សិទ្ធិ​ប្តឹង​​ឧទ្ធរណ៍​តាម​កំណត់​ច្បាប់»​។

ជន​ជាប់ចោទ​លោក ហង្ស វិបុល ដែល​ជា​អតីត​នាយក​អង្គការ​កុមារ «ផ្ទះ​យើង» ស្ថិត​នៅ​សង្កាត់​បឹងទំពុន ​ខណ្ឌ​ចំការមន​ត្រូវ​បាន​​ចាប់​ខ្លួន​ដោយ​សមត្ថកិច្ច​នគរបាល​នាយកដ្ឋាន​ប្រឆាំង​ការ​ជួញដូរ​មនុស្ស និង​គាំពារ​អនីតិជន​នៃ​ក្រសួង​មហាផ្ទៃ​នៅ​ថ្ងៃ​ទី ២ ខែ​មីនា ឆ្នាំ ២០១៥ ពាក់ព័ន្ធ​នឹង​ករណី​បៀតបៀន​ផ្លូវ​ភេទ​លើ​កុមារ​រងគ្រោះ​ជាង​ ១០ នាក់​ស្នាក់នៅ​ក្នុង​មណ្ឌល​អង្គការ​​របស់​គាត់​តាមរយៈ​ហៅ​កុមារា​រងគ្រោះ​ទាំង​នោះ​ចូល​ក្នុង​បន្ទប់​​របស់​គាត់​ឲ្យ​ពួកគេ​ចាប់​លេង​​ប្រដាប់​​ភេទ (លិង្គ) របស់​គាត់​រហូត​ដល់​​សម្រេច​ចេញ​ទឹកកាម​បន្ទាប់​​មក​គាត់​ក៏​បាន​ចាប់​ស្ទាប​លេង​ប្រដាប់​ភេទ​របស់​កុមារ​​រងគ្រោះ​នោះ​វិញ​។

ការ​ប្រកាស​សាលក្រម​កាលពី​ម្សិលមិញ​នេះ​គឺ​បន្ទាប់​ពី​បាន​បើក​សវនាការ​ចំនួន​ពីរ​លើក​គឺ​លើក​​ទី ​១ ​កាលពី​ខែ​តុលា និង​លើក​ទី​ ២ ​ខែ​វិច្ឆិកា។

ទោះ​យ៉ាង​ណា​លោក ស៊ុយ សុខុន មេធាវី​ការពារ​ក្តី​ឲ្យ​ជនជាប់ចោទ​ដែល​ទាក់ទង​​មិន​បាន​កាលពី​ម្សិលមិញ​ធ្លាប់​បាន​​ប្រាប់​ក្នុង​សវនាការ​ថា​កូន​ក្តី​របស់​​លោក ឈ្មោះ ហង្ស វិបុល បាន​ឆ្លើយ​បដិសេធ​យ៉ាង​ដាច់​អហង្ការ​ចំពោះ​ការ​ចោទប្រកាន់​របស់​តំណាង​អយ្យការ​ពីព្រោះ​គាត់​មិន​បាន​ប្រព្រឹត្ត​អ្វី​ដូច​ការ​ឆ្លើយ​ដាក់​របស់​កុមារ​រងគ្រោះ​នោះ​ទេ។

លោក​បន្ត​ថា​​ តាម​ពិត​រឿងក្តី​នេះ​គឺជា​រឿង​គំនុំ និង ការ​ទាស់ទែង​គ្នា​រវាង​កូនក្តី​របស់​លោក​ជាមួយ​នឹង​នាយក​រង​អង្គការ​របស់​គាត់​ម្នាក់ និង​បុរស​ជនបរទេស​ជនជាតិ​បារាំង​ចំនួន ៣ នាក់​ទៀត​ឈ្មោះ Jan Marry Hano ភេទ​ប្រុស ឈ្មោះ Jerry Danode ភេទ​ប្រុស និង ឈ្មោះ Guylin Praseth ហើយ ឈ្មោះ Jan Marry Hano និង ឈ្មោះ Jerry Danode បាន​រៀបចំ​ផែនការ​ដើម្បី​ធ្វើការ​ទម្លាក់​កំហុស​ទៅលើ​ឈ្មោះ ហង្ស វិបុល ដែល​ជា​នាយក​អង្គការ​តែ​ម្តង​ទៅ។

ប៉ុន្តែ​លោក សំលៀង សិលា នាយក​អង្គការ​កុមារ APLE ដែល​បាន​ផ្តល់​មេធាវី​ការពារ​ក្តី​ឲ្យ​កុមារ​រងគ្រោះ​បាន​ថ្លែង​កាលពី​ម្សិលមិញ​ថា​លោក​មិន​ពេញចិត្ត​នឹង​សាលក្រម​របស់​សាលា​ដំបូង​រាជធានី​នេះ​ទេ​ដោយសារ​តែ​កាត់​ឲ្យ​ជាប់​ទោស​តិច​ពេក និង​សំណង​ក៏​តិចតួច​ដែល​មិន​គ្រប់គ្រាន់​នឹង​ការ​ព្យាបាល​ផ្លូវ​ចិត្ត​របស់​កុមារ​ទាំង​នេះ​ដែល​ភាគច្រើន​ជា​កុមារា (កុមារី​តែ​ម្នាក់​គត់) ​នោះ​​ឡើយ​។

លោក​ថ្លែង​ថា៖ «ទោស​នេះ​វា​មិន​សម​នឹង​ស្ថាន​ទម្ងន់​ទោស​ដែល​គាត់​ប្រព្រឹត្ត​ទេ​ព្រោះ​ការ​រំលោភ​បាន​កើត​យូរ​ហើយ​ ហើយ​កុមារ​​មាន​សម្ពាធ​ផ្លូវ​ចិត្ត​ខ្ពស់​ដែល​ត្រូវ​ការ​ចំណាយ​ថវិកា​ច្រើន​ក្នុង​ការ​ព្យាបាល​។ អ៊ីចឹង​សំណង​លើ​ការ​ថែទាំ​កុមារ​មិន​គ្រប់គ្រាន់​ទេ»។

លោក​បន្ត​ថា​ដោយ​សារ​ភាគី​ដើម​បណ្តឹង​ក្នុង​រឿង​ព្រហ្មទណ្ឌ​តាម​ផ្លូវ​ច្បាប់​មិន​មាន​សិទ្ធិ​ក្នុង​ការ​ប្តឹង​ឧទ្ធរណ៍​ដូច្នេះ​លោក​​​នឹង​ស្នើ​តាមរយៈ​អយ្យការ​តុលាការ​ឲ្យ​ប្តឹង​ឧទ្ធរណ៍​ចំពោះ​ការ​សម្រេច​ទោស​ ៣ ឆ្នាំ​នេះ​ហើយ​អង្គការ​លោក​នឹង​ពិភាក្សា​ជាមួយ​កូនក្តី​ជា​ភាគី​រងគ្រោះ​ដើម្បី​ប្តឹង​ចំពោះ​សំណង​ដែល​លោក​យល់​ថា​តិចតួច​៕

អត្ថបទគួរចាប់អារម្មណ៍