The Phnom Penh Post Search

Search form




Logo of Phnom Penh Post newspaper Phnom Penh Post - មេ​សហជីព​ជំទាស់​មាត្រា​ខ្លះ​នៃ​សេចក្តី​ព្រាង​ច្បាប់​សហជីព

មេ​សហជីព​ជំទាស់​មាត្រា​ខ្លះ​នៃ​សេចក្តី​ព្រាង​ច្បាប់​សហជីព

កម្មករ​រោង​ចក្រ​កាត់ដេរ​ធ្វើកូដកម្ម​ក្រោមការ​ដឹកនាំរបស់​សហជីពកន្លងមក​​​។
កម្មករ​រោង​ចក្រ​កាត់ដេរ​ធ្វើកូដកម្ម​ក្រោមការ​ដឹកនាំរបស់​សហជីពកន្លងមក​​​។ ផា លីណា

មេ​សហជីព​ជំទាស់​មាត្រា​ខ្លះ​នៃ​សេចក្តី​ព្រាង​ច្បាប់​សហជីព

ភ្នំពេញៈ ខណៈ​ច្បាប់​ស្តីពី​សហជីព​ត្រូវ​បង្កើត​ឡើង​ដើម្បី​ពង្រីក​សិទ្ធិ​ការងារ​ក្រុម​មេ​ដឹក​នាំ​សហជីព​បាន​ជំទាស់​លើ​ផ្នែក​ខ្លះ​នៃ​សេចក្តី​ព្រាង​ច្បាប់​នេះ ថា​ច្បាប់​ថ្មី​នេះ​នឹង​រារាំង​លទ្ធភាព​ក្នុង​ការ​បង្កើត​សហជីព។

ក្នុង​ពេល​មេ​ដឹក​នាំ​សហជីព​គ្រោង​ជួប​ប្រជុំ​គ្នា​នៅ​ក្រសួង​ការងារ​និង​មន្រ្តី​ក្នុង​ឧស្សាហកម្ម​នេះ​នៅ​សណ្ឋាគារ​អាំងទែរកុងទីណង់តាល់ ថ្ងៃ​នេះ​និង​ថ្ងៃ​ស្អែក​មេ​ដឹក​នាំ​មួយ​ចំនួន​បាន​និយាយ​ថា ពួក​គេ​ជំទាស់​លើ​ចំណុច​បន្ថែម​ថ្មី​ក្នុង​សេចក្តី​ព្រាង​ច្បាប់​នេះ ដែល​សេចក្តី​ព្រាង​ច្បាប់ ទី១ បាន​រៀបចំ​ឡើង​កាល ខែ​វិច្ឆិកា ឆ្នាំ​២០១១។

លោក ប៉ាវ ស៊ីណា ប្រធាន​សហព័ន្ធ​សហជីព​ចលនា​កម្មករ​និយាយ​ថា៖ «វា​ហាក់​ដូចជា​ចាក់​សោ​យើង​ឲ្យ​ចេញ​ពី​ការ​បង្កើត​សហជីព»។

ប្រសិន​បើ​ត្រូវ​បាន​អនុម័ត​ច្បាប់​នេះ​នឹង​តម្រូវ​ឲ្យ​មាន​សមាជិក​យ៉ាង​ហោច ២០ ភាគរយ​នៅ​កន្លែង​ធ្វើ​ការ​ចូល​រួម​សហជីព​ដើម្បី​ឲ្យ​សហជីព​មួយ​អាច​ដំណើរការ​ទៅ​បាន។ ច្បាប់​នេះ​ក៏​ចែង​ដែរ​ថា នៅ​ក្នុង​កន្លែង​ការងារ​មួយ​អាច​មាន​សហជីព​តែ​មួយ​ប៉ុណ្ណោះ។

ផ្នែក​នេះ​មិន​បាន​លើក​ឡើង​ថា តើ​នឹង​មាន​អ្វី​កើត​ឡើង​បើ​មាន​សហជីព​ពីរ​ឬ​ច្រើន​ជាង​នេះ ដែល​សហជីព​នីមួយៗ​ត្រូវ​មាន​សមាជិក ២០ ភាគរយ​ចង់​បង្កើត​សហជីព​រៀងៗ​ខ្លួន​នៅ​ក្នុង​កន្លែង​ការងារ​មួយ។

លោក រ៉ុង ឈុន ប្រធាន​សហភាព​សហជីព​កម្ពុជា​ថ្លែង​ថា ច្បាប់​នេះ​នឹង​នាំ​ឲ្យ​មាន​ការ​កើន​សហជីព​គាំទ្រ​រដ្ឋាភិបាល​និង​ធ្វើ​ឲ្យ​ប៉ះ​ពាល់​ធ្ងន់​ធ្ងរ​ដល់​សហជីព​ឯករាជ្យ។

លោក ឈុន ថ្លែង​ដែរ​ថា៖ «ខ្ញុំ​នឹង​ទាម​ទារ​ឲ្យ​ផ្លាស់​ប្តូរ​ចំណុច​ខ្លះ [នៅ​ថ្ងៃ​ស្អែក]»។

លោក ហេង សួរ មន្រ្តី​ក្រសួង​ការងារ បាន​ថ្លែង​ថា មន្រ្តី​ក្រសួង​ចាប់ផ្តើម​ធ្វើ​ការងារ​ជាមួយ​អង្គការ​ពលកម្ម​អន្តរជាតិ​ស្តីពី​សេចក្តី​ព្រាង​ច្បាប់​បច្ចុប្បន្ន​កាល​ពី ខែ​ធ្នូ។

លោក​ថា ច្បាប់​នេះ​នឹង​ការពារ​មិន​ឲ្យ​អនាធិបតេយ្យ​និង​កេង​ប្រវ័ញ្ច​លើ​សេរីភាព»។

ខណៈ​មិន​ប្រាកដ​ពី​ភាសា​ដែល​បញ្ចូល​ក្នុង​សេចក្តី​ព្រាង​ចុង​ក្រោយ​លោក Dave Welsh នាយក​ប្រចាំ​ប្រទេស​នៃ​មជ្ឈមណ្ឌល​អាមេរិក​ដើម្បី​សាមគ្គីភាព​កម្មករ ថ្លែង​ថា គំនិត​នៃ​ការ​អនុម័ត​ច្បាប់​នេះ​គឺ​ដើម្បី​បញ្ឈប់​សហជីព​ពី​ការ «កេង​ប្រវ័ញ្ច​លើ​សេរីភាព» គឺ​ផ្ទុយ​នឹង​ច្បាប់​អន្តរជាតិ។

លោក Welsh បន្ត​ថា៖ «ប្រសិន​បើ​នោះ​ជា​គោល​បំណង​នៃ​ច្បាប់​កម្ពុជា​ពិត​មែន​វា​ពិសេស​ជាង​គេ​ក្នុង​ពិភពលោក ប៉ុន្តែ​នោះ​ជា​ហេតុ​ផល​ខុស»។

បើ​ទោះ​ជា​មាន​ការ​ប្រឆាំង​ក្តី​លោក ស៊ីណា បាន​ថ្លែង​ថា ការ​បន្ទាប​អាយុ​អប្បបរមា​ដល់​សមាជិក​សហជីព​អាច​ឈរ​ឈ្មោះ​ជា​ប្រធាន​ពី ២៥​ឆ្នាំ មក ១៨​ឆ្នាំ នឹង​ជា​តំណាង​ប្រសើរ​មួយ​សម្រាប់​កម្មករ​វ័យ​ក្មេង​ដែល​ជា​កម្លាំង​ការងារ​សំខាន់​របស់​កម្ពុជា៕ PS

អត្ថបទគួរចាប់អារម្មណ៍