The Phnom Penh Post Search

Search form




Logo of Phnom Penh Post newspaper Phnom Penh Post - មេ​សហជីព​មិន​ខក​ចិត្ត​ចំពោះ​សង្គ្រោះ​ជាតិ​ទេ

មេ​សហជីព​មិន​ខក​ចិត្ត​ចំពោះ​សង្គ្រោះ​ជាតិ​ទេ

មេ​សហជីព​មិន​ខក​ចិត្ត​ចំពោះ​សង្គ្រោះ​ជាតិ​ទេ

ភ្នំពេញៈ មេ​ដឹក​នាំ​សហជីព កាល​ពី​ម្សិលមិញ​បាន​ថ្លែង​ថា បើ​ទោះ​បី​ជា​បាន​ធ្វើ​កូដកម្ម​អំពាវនាវ​ឲ្យ​មាន​ការ​ដំឡើង​ប្រាក់​ឈ្នួល​អប្បបរមា​ទ្វេ​ដង ដែល​គាំទ្រ និង​ជំរុញ​ដោយ​គណបក្ស​ប្រឆាំង​ក៏​ដោយ​ក៏​ពួក​គេ​មិន​មាន​អារម្មណ៍​ថា គណបក្ស​ប្រឆាំង បាន​ក្បត់​ពួក​គេ ដោយ​សារ​តែ​មិន​បាន​ដាក់​របៀបវារៈ ពី​ការ​ដំឡើង​ប្រាក់​ខែ​អប្បបរមា​ទៅ​ក្នុង​ការ​ចរចា​នយោបាយ​ដែល​ជាប់​គាំង​នោះ​ឡើយ។

បន្ទាប់​ពី​ការ​ប្រកាស​របស់​រដ្ឋាភិបាល​កាល​ពីថ្ងៃ ទី២៤ ខែ ធ្នូ ដែល​បាន​ដំឡើង​ប្រាក់​ឈ្នួល​អប្បបរមា​ពី ៨០ ទៅ ៩៥ ដុល្លារ សហជីព​មួយ​ចំនួន​បាន​អំពាវនាវ​ឲ្យ​មាន​មហា​បាតុកម្ម​ទាមទារ​ប្រាក់​ឈ្នួល​អប្បបរមា​ចំនួន ១៦០ ដុល្លារ​ដែល​ភ្លាមៗ​នោះ ត្រូវ​បាន​គាំទ្រ​ដោយ​គណបក្ស​ប្រឆាំង។

កាល​ពី​ថ្ងៃ ទី១ ខែ មករា មេ​ដឹក​នាំ​គណបក្ស​ប្រឆាំង​លោក សម រង្ស៊ី បាន​ប្រាប់​ទៅ​ក្រុម​អ្នក​តវ៉ា​នៅ​ទីលាន​ប្រជាធិបតេយ្យ​ថា៖ «ខ្ញុំ​មិន​មាន​ផែនការ​ជួប​ជាមួយ​នរណា​មួយ [ពី​គណបក្ស​ប្រជាជន] នោះ​ទេ។ អាទិភាព​របស់​យើង គឺ​ដើម្បី​ជួយ​កម្មករ​ឲ្យ​ទទួល​បាន​ការ​ដំឡើង​ប្រាក់​ឈ្នួល​អប្បបរមា​ប្រចាំ​ខែ​ដល់ ១៦០ ដុល្លារ»។ នៅ​ថ្ងៃ​បន្ទាប់​កង​កម្លាំង​រដ្ឋាភិបាល​បាន​ចាប់​ផ្តើម​ធ្វើ​ការ​បង្ក្រាប​ព្រៃផ្សៃ​ទៅ​លើ​កម្មករ​ដែល​កំពុង​ធ្វើ​កូដកម្ម ហើយ​នៅ​ថ្ងៃ ទី៣ ខែ មករា បាន​បណ្តាល​ឲ្យ​មនុស្ស​យ៉ាង​ហោច​ណាស់ ៤នាក់ ស្លាប់។

ចាប់​តាំង​ពី​ពេល​នោះ​មក​មាន​ការ​លេច​ឮ​ថា គណបក្ស​សង្គ្រោះ​ជាតិ​បាន​ចាប់​ផ្តើម​ការ​ចរចា​ទ្វារ​ក្រោយ ជាមួយ​គណបក្ស​ប្រជាជន​ដោយ​ធ្វើ​ការ​ដោះ​ដូរ​សំណើ​គ្នា​ទៅ​វិញ​ទៅ​មក​ហើយ​បើ​តាម​ប្រភព​កៀក​នឹង​ការ​ចរចា​នោះ បាន​ឲ្យ​ដឹង​ថា សំណើ​សុំ​ដំឡើង​ប្រាក់​ឈ្នួល​អប្បបរមា មិន​ត្រូវ​បាន​ដាក់​ជា​លក្ខខណ្ឌ​នៅ​ក្នុង​សំណើ​នោះ​ទេ។

កាល​ពី​ម្សិលមិញ​លោក សម រង្ស៊ី បាន​អះអាង​ថា ការ​ដំឡើង​ប្រាក់​ឈ្នួល​អប្បបរមា មិន​មែន​ជា «ធាតុ​សំខាន់» នៃ​ការ​ចរចា​ទេ និង​បាន​ដាក់​វា​នៅ​ក្នុង​ចំណោម​បញ្ហា​រយៈ​វែង​ដទៃៗ​ទៀត រួម​មាន​ទាំង​ការ​បញ្ចប់​ការ​ផ្តល់​សម្បទាន​ដី​សេដ្ឋកិច្ច និង​ការ​កាប់​បំផ្លាញ​ព្រៃឈើ។ «អ្នក​ត្រូវ​តែ​ធ្វើ​ឲ្យ​មាន​លក្ខណៈ​ស៊ី​គ្នា​និង​ជ្រើសរើស​ចំណុច​សំខាន់​មួយ​ដែល​អាច​ជា​ការ​ស៊ើប​អង្កេត​ភាព​មិន​ប្រក្រតី​នៃ​ការ​បោះឆ្នោត ឬ​ការ​ធ្វើ​ការ​បោះឆ្នោត​ជា​ថ្មី​ឡើង​វិញ»។

លោក​បន្ត​ថា៖ «នៅ​ពេល​យើង​ខិត​ជិត​ដល់​ការ​ព្រម​ព្រៀង​គ្នា ឬ​នៅ​ពេល​អនុវត្ត​កិច្ច​ព្រម​ព្រៀង ឬ​នៅ​ពេល​យើង​រៀបចំ​លក្ខខណ្ឌ​ធ្វើ​ការងារ​នៅ​សភា​នោះ​បញ្ហា​ដទៃៗ​ទៀត​នឹង​ដាក់​នៅ​ជួរ​មុខ»។

វា​ទំនង​ជា​ថា សហជីព​ដែល​ដឹក​នាំ​កូដកម្ម​មាន​អារម្មណ៍​ដូច​គ្នា​អ៊ីចឹង​ដែរ។

លោក​ស្រី យ៉ាង សោភ័ណ្ឌ ប្រធាន​សម្ព័ន្ធ​សហជីព​កម្ពុជា បាន​ថ្លែង​ថា លោក​ស្រី​យល់​ថា ការ​ដំឡើង​ប្រាក់​ឈ្នួល​អាច​ដាក់​នៅ​ពេល​ក្រោយ​ខណៈ​ការ​ចរចា​នយោបាយ​អាច​ឈាន​ដល់​កិច្ច​ព្រម​ព្រៀង។ «ខ្ញុំ​គិត​ថា លោក សម រង្ស៊ី នឹង​មិន​និយាយ​អំពី​ប្រាក់​ឈ្នួល​កម្មករ​នៅ​ក្នុង​ការ​ចរចា​ទេ​... ​ពីព្រោះ​លោក​គិត​អំពី​ប្រទេស​ជាតិ​របស់​យើង​ជា​អាទិភាព​ទី​មួយ ហើយ​លោក​នឹង​បែរ​មក​យក​ចិត្ត​ទុក​ដាក់​ចំពោះ​កម្មករ​វិញ​នៅ​ពេល​ក្រោយ»។

លោក រ៉ុង ឈុន ប្រធាន​សហភាព​សហជីព​កម្ពុជា​ក៏​បាន​យល់​ស្រប​បែប​នេះ​ដែរ។ លោក​ថ្លែង​ថា៖ «ខ្ញុំ​គិត​ថា អ្វីៗ​នឹង​ដោះស្រាយ​បាន ប្រសិន​បើ​បញ្ហា​នយោបាយ​ត្រូវ​បាន​ដោះស្រាយ​ដូចជា​បញ្ហា​ប្រាក់​ឈ្នួល​កម្មករ និង​ប្រាក់​ខែ​របស់​គ្រូ»។

ប៉ុន្តែ​លោក ជួន មុំថុល ប្រធាន​សហព័ន្ធ​សហជីព​ខ្មែរ ដែល​មាន​សម្ព័ន្ធភាព​ជាមួយ​គណបក្ស​ប្រជាជន​ថ្លែង​ថា លោក​ជឿ​ថា គណបក្ស​សង្គ្រោះ​ជាតិ បាន​ប្រើ​ប្រាស់​កម្មករ​ដើម្បី​កេង​ចំណេញ​នយោបាយ។ «លោក សម រង្ស៊ី គឺ​ប្រើ​ប្រាស់​កម្មករ ដើម្បី​ផ្តួល​រំលំ​សម្តេច​នាយក​រដ្ឋ​មន្រ្តី ហ៊ុន សែន។ គាត់​មិន​ដែល​ធ្វើ​វា​ដើម្បី​អត្ថ​ប្រយោជន៍​កម្មករ​ទេ... »។

លោក អាត់ ធន់ ប្រធាន​សម្ព័ន្ធ​សហជីព​ប្រជាធិបតេយ្យ​កម្មករ​កាត់​ដេរ​កម្ពុជា ហៅ​កាត់ ស៊ីខៅឌូ ថ្លែង​ថា លោក​ជំរុញ​ឲ្យ​ភាគី​ទាំង​អស់​គំាទ្រ​សំណើ​សុំ​ដំឡើង​ប្រាក់​ឈ្នួល​កម្មករ។ «ក្នុង​អំឡុង​កូដកម្ម​លោក សម រង្ស៊ី ថ្លែង​ថា គាត់​គាំទ្រ​ការ​ទាមទារ​របស់​កម្មករ ប៉ុន្តែ​ឥឡូវ​នេះ មិន​ដាក់​វា​ជា​ចំណុច​មួយ​សម្រាប់​ការ​ចរចា​ទេ ដូច្នេះ​ប្រហែល​ជា​វា​មិន​មែន​ជា​អាទិភាព​សម្រាប់​ពួក​គេ​ទេ»។

«ប៉ុន្តែ​យើង​មិន​ខក​ចិត្ត​ដោយ​សារ​រឿង​នេះ​ទេ»៕ PS

អត្ថបទគួរចាប់អារម្មណ៍