ភ្នំពេញៈ អ្នកតស៊ូមតិប្រឆាំងនឹងការជួញដូរមនុស្សដែលទទួលរងរឿងអាស្រូវលោកស្រី ម៉ម សុម៉ាលី ឥឡូវនេះត្រឡប់ទៅការងាររៃអង្គាសថវិកាវិញបន្ទាប់ពីមានការស៊ើបអង្កេតផ្លូវច្បាប់ទៅលើភាពអាចជឿជាក់និងភាពអវិជ្ជមានជាសាធារណៈជាច្រើនខែហើយនិងការបង្ខំឲ្យលាលែងពីតំណែងពីមូលនិធិផ្ទាល់របស់លោកស្រី។
នៅក្នុងអ៊ីមែលផ្ញើទៅអ្នកគាំទ្រនាសប្តាហ៍នេះ លោកស្រី ម៉ម សុម៉ាលី បានស្វែងរកការបរិច្ចាគថវិកាដើម្បីបើកអង្គការថ្មីមួយដែលមានមូលដ្ឋាននៅសហរដ្ឋអាមេរិកនៅខែក្រោយហៅថា«មូលនិធិសុម៉ាលីម៉ម ថ្មីៈ សំឡេងនៃការផ្លាស់ប្តូរ»។ នេះបើតាមការរាយការណ៍របស់ទីភ្នាក់ងារ Reuters កាលពីថ្ងៃព្រហស្បតិ៍។
អង្គការថ្មីនេះនឹងបញ្ចូលជាមួយអង្គការ Agir Pour Les Femmes en Situation Precaire (Afesip) ជាអង្គការក្នុងស្រុកប្រឆាំងការជួញដូរបង្កើតឡើងដោយលោកស្រី ម៉ម សុម៉ាលី ដែលបាត់បង់ថវិកាយ៉ាងច្រើន បន្ទាប់ពីមូលនិធិសុម៉ាលីម៉មទី១ ដកការគាំទ្រភ្លាមៗកាលពីខែកក្កដា។
មូលនិធិសុម៉ាលី ម៉ម បានបណ្តេញលោកស្រី ចេញបន្ទាប់ពីការស៊ើបអង្កេតជាច្រើនឆ្នាំពីរឿងលោកស្រីប្រឌិតសាច់រឿងនិងបង្ហាត់ស្រីៗដែលធ្វើការជាមួយគាត់ឲ្យចេះនិយាយរឿងកុហកអំពីការជួញនិងចុះផ្សាយក្នុងកាសែត Newsweek កាលខែឧសភា។ មូលនិធិរាប់លានដុល្លារ បានបិទដំណើរការកាលខែតុលាដោយគ្មានការពន្យល់ពីថវិកាជាច្រើនដែលនៅសល់ ត្រូវទៅណា។
លោកស្រី Stephanie Lorenzo នាយកប្រតិបត្តិនៃគម្រោង Project Futures ដែលផ្តល់ថវិកាដល់អង្គការAfesip បានសរសេរលើទំព័រប្លុកនាខែនេះថា ៖ «ផែនការអនាគតគឺត្រូវបញ្ចូលអង្គការAfesip កម្ពុជា ជាមួយនឹងអង្គការដែលមានមូលដ្ឋាននៅអាមេរិកជាអង្គការតែមួយ»។
បុគ្គលិកអង្គការ Afesip ពីថ្ងៃព្រហស្បតិ៍បានបញ្ជាក់អំពីការរួមបញ្ចូលគ្នានេះ ប៉ុន្តែថ្លែងថា មិនទាន់បញ្ជូលអង្គការនេះជាផ្លូវការនៅឡើយទេ មុននឹងបដិសេធការផ្តល់ព័ត៌មានបន្ថែមដល់ប្រព័ន្ធផ្សព្វផ្សាយ។
ប៉ុន្តែទោះយ៉ាងណា លោកស្រី Lorenzo បង្ហាញនៅក្នុង ប្លុករបស់គាត់ថា បន្ទាប់ពីការ ចុះផ្សាយមិនល្អក្នុងកាសែត Newsweek បុគ្គលិកអង្គការAfesip ពាក់កណ្តាលបានបាត់បង់ការងារ និងជម្រកមួយពីក្នុងជម្រក៣របស់ Afesip នឹងត្រូវបិទនៅត្រឹមចុងឆ្នាំនេះ។
គេហទំព័រមូលនិធិថ្មីរបស់លោកស្រី សុម៉ាលី និយាយថា អង្គការមិនរកប្រាក់ចំណេញនេះ នឹងមិនផ្តោតទៅលើការជួយសង្គ្រោះកុមារីនិងស្រ្តីទេ ប៉ុន្តែនឹងធ្វើការគាំពារនិងអប់រំបន្ទាប់ពីការជួយសង្គ្រោះ។
ខណៈ មិនទាន់មានព័ត៌មានលម្អិតថាតើនៅពេលណាអង្គការថ្មីនឹងចាប់ផ្តើមធ្វើការ គេហទំព័រនេះសរសេរការពារលោកស្រី ម៉ម ជាច្រើន។
អង្គការប្រឆាំងការជួញដូរក្នុងស្រុកកាលពីថ្ងៃសៅរ៍បានថ្លែងថា ពួកគេស្វាគមន៍មូលនិធិថ្មីរបស់អ្នកស្រី ម៉ម សុម៉ាលី។ លោក ចាន់ សារុន ប្រធានគម្រោងនៅអង្គការចាប់ដៃបានថ្លែងថា៖ «វានឹងជារឿងល្អ ប្រសិនគាត់ចាប់ផ្តើមអង្គការ ថ្មី។ វាជាបញ្ហាផ្ទាល់ខ្លួន មិនមែនអំពីការងារល្អរបស់អង្គការក្រៅរដ្ឋាភិបាលទេ»៕ PS
