The Phnom Penh Post Search

Search form




Logo of Phnom Penh Post newspaper Phnom Penh Post - ម៉ុងតាញ៉ា​ជាង​ ១០ ​នាក់​ចង់​វិល​ត្រឡប់​ទៅ​វៀតណាម​វិញ

ម៉ុងតាញ៉ា​ជាង​ ១០ ​នាក់​ចង់​វិល​ត្រឡប់​ទៅ​វៀតណាម​វិញ

ជនជាតិ​ម៉ុងតាញ៉ា​ឆ្លង​ដែន​ចូល​មក​ខេត្ត​រតនគិរី​នា​ពេល​កន្លង​មក​។
ជនជាតិ​ម៉ុងតាញ៉ា​ឆ្លង​ដែន​ចូល​មក​ខេត្ត​រតនគិរី​នា​ពេល​កន្លង​មក​។ រូបថត អាដហុក

ម៉ុងតាញ៉ា​ជាង​ ១០ ​នាក់​ចង់​វិល​ត្រឡប់​ទៅ​វៀតណាម​វិញ

ភ្នំពេញៈ ខណៈ​ពេល​ដែល​ការ​ជួយ​ទំនុក​បម្រុង​ និង​ឧបត្ថម្ភ​ផ្សេងៗ​ត្រូវ​បាន​កាត់បន្ថយ​ជនជាតិ​ម៉ុងតាញ៉ា​​ជាង ១០ នាក់​ផ្សេង​ទៀត​កំពុង​ពឹង​ឲ្យ​តំណាង​អង្គការ​សហប្រជាជាតិ និង​អាជ្ញាធរ​កម្ពុជា​ជួយ​បញ្ជូន​ពួកគេ​ត្រឡប់​ទៅ​ប្រទេស​វៀតណាម​វិញ។

ប្រភព​ជិតស្និទ្ធ​នឹង​ជនភៀសខ្លួន​ម៉ុងតាញ៉ា​ក្នុង​រាជធានី​ភ្នំពេញ​បាន​ឲ្យ​ដឹង​ថា​ម៉ុងតាញ៉ា​វៀតណាម​ជិត ២០០ នាក់​ដែល​​ស្វះស្វែង​រក​សិទ្ធិ​ជ្រកកោន​នោះ​កំពុង​តែ​មាន​ស្ថានភាព​មិន​ល្អ​ដែល​មាន​រួម​ទាំង​ការ​ខ្វះខាត​ម្ហូប​អាហារ​ផង​ដែរ​។

ប្រភព​បាន​បញ្ជាក់​ថា​៖ «អង្គការ​និង UN ធ្លាប់​ជួយ​ពួកគាត់​ហ្នឹង​បាន​កាត់​បន្ថយ​ហើយ​ដូចជា​អាហារ​ហូបចុក។ ពួកគាត់​រស់នៅ​ជា​ក្រុមៗ​នៅ​ភ្នំពេញ។ ក្រុម​ខ្លះ​ ១០ ​នាក់​ធ្លាប់​បាន​អង្ករ ២ បាវ​តែ​ថ្មីៗ​នេះ​កាត់​នៅ​សល់​តែ ១ បាវ​ទេ»។

លោក​ថា ​ជនភៀស​ខ្លួន​ម៉ុងតាញ៉ា​ទាំង​នោះ​បាន​អំពាវនាវ​សុំ​ឲ្យ​អង្គការ ឬ​រដ្ឋាភិបាល​ជួយ​ដល់​ពួកគាត់​ផង​ព្រោះ​ថា​ពួកគាត់​មិន​ហ៊ាន​ចេញ​ក្រៅ​ដើម្បី​ប្រកប​របរ​រកស៊ី​អី​បាន​នោះ​ទេ។

អ្នកស្រី Vivian Tan ដែល​ជា​អ្នក​នាំ​ពាក្យ​ប្រចាំ​តំបន់​របស់​ UNHCR បាន​ទទួល​ស្គាល់​ថា​ជំនួយ​ឧបត្ថម្ភ​មួយ​ចំនួន​ពិត​ជា​ត្រូវ​បាន​កាត់​បន្ថយ​មែន។

លោកស្រី​បាន​ថ្លែង​តាម​សារ​អេឡិចត្រូនិក​ថា៖ «នា​ពេល​បច្ចុប្បន្ន​នេះ​មាន​ម៉ុងតាញ៉ា​ក្រោម ២០០ នាក់​មិន​ទាន់​បាន​ទទួល​ការ​ចុះ​ឈ្មោះ​នៅ​ភ្នំពេញ​នៅ​ឡើយ​ទេ។ វា​ពិត​ណាស់​ថា​ការ​ជួយ​ឧបត្ថម្ភ​មួយ​ចំនួន​ត្រូវ​បាន​កាត់​បន្ថយ​ដោយសារ​តែ​ថវិកា​មាន​កម្រិត»។

លោកស្រី​ក៏​បាន​ឲ្យ​ដឹង​ផង​ដែរ​ថា​ម៉ុងតាញ៉ា​ជាង ១០ នាក់​ផ្សេង​ទៀត​បាន​ស្ម័គ្រ​ចិត្ត​ត្រឡប់​ទៅ​ប្រទេស​វៀតណាម​វិញ​ហើយ​ក៏​កំពុង​​ស្វះស្វែង​រក​ឲ្យ​ UNHCR ជួយ​ក្នុង​ការ​បញ្ជូន​ទៅ​វៀតណាម​វិញ​។

លោកស្រី​បញ្ជាក់​ថា​ ដូច​ដែល​បី​ក្រុម​មុនៗ​អ៊ីចឹង​ដែរ​គឺ​ UNHCR នឹង​ជួយ​សម្រួល​ឲ្យ​បាន​​វិល​ត្រឡប់​ទៅ​ប្រទេស​វៀតណាម​វិញ​ដោយ​ស្ម័គ្រចិត្ត​របស់​ពួកគេ​នោះ។ ប៉ុន្តែ​មិន​ទាន់​ដឹង​ថា​ថ្ងៃ​ណា​នឹង​អាច​បញ្ជូន​ពួកគេ​ទៅ​វិញ​ច្បាស់លាស់​នៅ​ឡើយ​ទេ។

រដ្ឋាភិបាល​កម្ពុជា​បាន​កំណត់​ឲ្យ​ជនជាតិ​ម៉ុងតាញ៉ា​ទាំង​នោះ​ត្រឡប់​ទៅ​វៀតណាម​វិញ​ឲ្យ​បាន​មុន​ថ្ងៃ​ទី​ ៦ ​ខែ​កុម្ភៈ​ឆ្នាំ ២០១៦ ខាង​មុខ​នេះ។

ជនជាតិ ​ម៉ុងតាញ៉ា​ មួយ​ចំនួន​ធ្លាប់​បាន​អះអាង​ប្រាប់​ភ្នំពេញ​ប៉ុស្តិ៍​ថា​ពួកគេ​នឹង​មិន​ត្រឡប់​ទៅ​ប្រទេស​វៀតណាម​វិញ​នោះ​ទេ​ដោយ​ខ្លាច​ថា​នឹង​ត្រូវ​អាជ្ញាធរ​វៀតណាម​ធ្វើ​ទុក្ខ​បុកម្នេញ​ខ្លាំង​ជាង​មុន​ថែម​ទៀត៕

អត្ថបទគួរចាប់អារម្មណ៍