The Phnom Penh Post Search

Search form




Logo of Phnom Penh Post newspaper Phnom Penh Post - ម៉ុងតាញ៉ា ១៣ នាក់​មាន​លក្ខណៈ​គ្រប់​គ្រាន់​ជា​ជន​ភៀស​ខ្លួន

ម៉ុងតាញ៉ា ១៣ នាក់​មាន​លក្ខណៈ​គ្រប់​គ្រាន់​ជា​ជន​ភៀស​ខ្លួន

ម៉ុងតាញ៉ា ១៣ នាក់​ត្រូវ​តំណាង UN ទៅ​ទទួល​យក​ពី ខេត្ត​រតនគិរី កាល​ពី ខែ​ធ្នូ។
ម៉ុងតាញ៉ា ១៣ នាក់​ត្រូវ​តំណាង UN ទៅ​ទទួល​យក​ពី ខេត្ត​រតនគិរី កាល​ពី ខែ​ធ្នូ។ រូបថត អាដហុក

ម៉ុងតាញ៉ា ១៣ នាក់​មាន​លក្ខណៈ​គ្រប់​គ្រាន់​ជា​ជន​ភៀស​ខ្លួន

ភ្នំពេញៈ ជនជាតិ​ម៉ុងតាញ៉ា​វៀតណាម ទាំង ១៣ នាក់​ដែល​តំណាង​អង្គការ​សហ​ប្រជាជាតិ និង​ក្រសួង​មហាផ្ទៃ​ទៅ​ទទួល​យក​ពី ខេត្ត​រតនគិរី កាល​ពី ខែ​ធ្នូ ឆ្នាំ​២០១៤ មាន​លក្ខណៈ​គ្រប់​គ្រាន់​ក្នុង​ការ​ចុះ​ឈ្មោះ​ជា​ជន​ភៀស​ខ្លួន ហើយ​បើ​មាន​ការ​ទទួល​ស្គាល់​ជា​ផ្លូវ​ការ ពួក​គេ​អាច​មាន​សិទ្ធិ​រស់​នៅ​ប្រទេស​កម្ពុជា ដូច​ជន​អន្តោ​ប្រវេសន៍​ស្រប​ច្បាប់​ដទៃ​ទៀត​បាន។ នេះ​បើ​តាម​មន្ត្រី​ជាន់​ខ្ពស់​ក្រសួង​មហាផ្ទៃ។

លោក មុំ សុផា​ណារិទ្ធិ អនុ​ប្រធាន​នាយកដ្ឋាន​អន្តោ​ប្រវេសន៍​ក្រសួង​មហាផ្ទៃ​បាន​ឲ្យ​ដឹង​កាលពី​ម្សិល​មិញ​ថា ជនជាតិ​ម៉ុង​តា​ញ៉ា​ទាំង ១៣ នាក់ មាន​សម្បទា​គ្រប់​គ្រាន់ ក្នុង​ការ​ចុះ​ឈ្មោះ ស្នើ​សុំ​សិទ្ធិ​ជា​ជន​ភៀស​ខ្លួន​ស្រប​ច្បាប់ ប៉ុន្តែ​ពួក​គេ​មិន​ទាន់​ត្រូវ​បាន​ប្រកាស​ទទួល​ស្គាល់​ជា​ផ្លូវ​ការ​នៅ​ឡើយ​ទេ។

លោក​បញ្ជាក់​ថា៖ «១៣ នាក់​ហ្នឹង​បាន​ស្នើ​មក​កម្ពុជា និង​ស្នើ​សុំ​សិទ្ធិ​ជ្រក​កោន​កាល​ពី​ចុង​ឆ្នាំ​ទៅ។ សមត្ថកិច្ច​បាន​រក​ឃើញ​ថា ពួកគេ​មក​ក្នុង​គោល​បំណង​សុំ​សិទ្ធិ​មែន​គឺ​ខុស​ពី​អ្នក​ផ្សេង​ទៀត (អន្តោ​ប្រវេសន៍​ខុស​ច្បាប់) ដែល​មក​កាប់​ដំឡូង និង​កាប់​ឈើ​ក្នុង​ទឹក​ដី​កម្ពុជា»។

ឧត្តម​សេនីយ៍​ទោ កែម សារិន ប្រធាន​នាយកដ្ឋាន​អន្តោ​ប្រវេសន៍​ក្រសួង​មហា​ផ្ទៃ បាន​ថ្លែង​ថា ប្រសិន​បើ​កម្ពុជា ផ្តល់​ឋានៈ​ជា​ជន​ភៀស​ខ្លួន​ឲ្យ​អ្នក​ស្នើ​សុំ​ហើយ​នោះ បាន​ន័យ​ថា អ្នក​ស្នើ​សុំ​នោះ អាច​រស់​នៅ​ក្នុង​ប្រទេស​កម្ពុជា​បាន ដូច​ជន​អន្តោ​ប្រវេសន៍​ស្រប​ច្បាប់​ដទៃ​ទៀត​ដែរ។

លោក​ថ្លែង​ថា៖ «មាន​ឋានៈ​ជា​ជន​ភៀស​ខ្លួន​គាត់​អាច​រស់​នៅ​ប្រទេស​កម្ពុជា។ ការ​តាំង​ទីលំនៅ​ថ្មី បើ​មាន​បង​ប្អូន​ធានា​ទៅ​ទៀត អាហ្នឹង​ជា​រឿង​របស់​គាត់»។

លោក​បន្ត​ថា រហូត​មក​ដល់​ពេល​នេះ លោក​មាន​តែ​មនុស្ស ១៣ នាក់​ហ្នឹង​ទេ ដែល​បាន​ស្នើ​សុំ​សិទ្ធិ​ជ្រក​កោន រីឯ ១០ នាក់​ផ្សេង​ទៀត ដែល​ត្រូវ​គេ​រាយការណ៍​ថា បាន​ឡើង​មក​សុំ​សិទ្ធិ​ជ្រក​កោន​នៅ​ភ្នំពេញ​ដោយ​ខ្លួន​ឯង នាយកដ្ឋាន​របស់​លោក​មិន​បាន​ដឹង ឬ​អត់​ទាន់​ឃើញ​មាន​ដាក់​ពាក្យ​សុំ​សិទ្ធិ​ជ្រក​កោន​នោះ​ទេ។

ទាក់​ទង​ទៅ​នឹង​ជន​ភៀស​ខ្លួន​ម៉ុង​តា​ញ៉ា​នេះ​ដែរ ឯក​អគ្គ​រាជទូត​ចក្រភព​អង់គ្លេស ប្រចាំ​កម្ពុជា លោក ប៊ៀល ឡងហឺស៍ បាន​ជួប​ជាមួយ​នឹង​អង្គការ​អាដហុក ខេត្ត​រតនគិរី ពី​ម្សិលមិញ ដើម្បី​សាកសួរ និង​ស្វែង​យល់​ពី​ស្ថានភាព​ម៉ុង​តា​ញ៉ា និង​អ្នក​ការពារ​សិទ្ធិ​មនុស្ស​នៅ​ក្នុង ខេត្ត​រតនគិរី នោះ។

អ្នក​សម្រប​សម្រួល​អង្គការ​អាដហុក លោក ឆាយ ធី បាន​ឲ្យ​ដឹង​បន្ទាប់​ពី​ជំនួប​នោះ​ថា លោក​ឯក​អគ្គ​រាជ​ទូត មាន​ការ​ចាប់​អារម្មណ៍​លើ​រឿង​ជន​ភៀស​ខ្លួន​ម៉ុង​តា​ញ៉ា​នេះ ហើយ​បាន​សួរ​នាំ​ពី​មូលហេតុ​ដែល​ពួកគេ​គេច​ខ្លួន​មក​ពី​ប្រទេស​វៀតណាម និង​ស្ថានភាព​រស់​នៅ​របស់​ពួកគេ ដែល​កំពុង​លាក់​ខ្លួន​ក្នុង​ព្រៃ​ខេត្ត​រតនគិរី។

លោក​ថ្លែង​ថា៖ «យើង​បាន​ប្រាប់​ឯក​អគ្គ​រាជ​ទូត​អង់គ្លេស​តាម​ការ​អង្កេត​របស់​យើង​ថា ម៉ុង​តា​ញ៉ា ភៀស​ខ្លួន​មក​គឺ​ដោយ​សារ​តែ​មាន​ការ​ធ្វើ​ទុក្ខ​បុក​ម្នេញ​ផ្នែក​សាសនា និង​បំបិទ​សិទ្ធិ​សេរីភាព»។

លោក​បាន​ប្រាប់​បន្ត​ថា ចាប់​ពី​ចុង ឆ្នាំ​២០១៤ មក មាន​ការ​ហូរ​ចូល​នូវ​ជនជាតិ​ភាគ​តិច​ម៉ុង​តា​ញ៉ា​ក្នុង​ទ្រង់​ទ្រាយ​ធំ ប៉ុន្តែ​ក៏​មាន​ការ​ចាប់​បញ្ជូន​ទៅ​វិញ​ក្នុង​ទ្រង់​ទ្រាយ​ធំ​ផង​ដែរ រហូត​ធ្វើ​ឲ្យ​មាន​ការ​ចាប់​និង​បាត់​ខ្លួន​ជន​ជាតិ​ដើម​ចារ៉ាយ​លោក ឌី ហ៊ឺន ដែល​ជា​អ្នក​នាំ​ផ្លូវ​ម្នាក់។

អាដហុក​សំណូមពរ​ឲ្យ​ឯក​អគ្គ​រាជ​ទូត​ចក្រភព​អង់គ្លេស ជួយ​អន្តរាគមន៍​ទៅ​អាជ្ញាធរ​ខេត្ត ក៏​ដូច​ជា​រដ្ឋាភិបាល ឲ្យ​មាន​ការ​គោរព​តាម​សន្ធិ​សញ្ញា​ជន​ភៀស​ខ្លួន ពោល​គឺ​កុំ​ទាន់​អាល​ចាត់​ទុក​អ្នក​កំពុង​លាក់​ខ្លួន​ក្នុង​ព្រៃ​ថា​ជា​អន្តោ​ប្រវេសន៍​ខុស​ច្បាប់ ដោយ​ត្រូវ​ធ្វើ​សម្ភាស​ពួកគេ​ជា​មុន​សិន ព្រោះ​ថា បើ​ចាប់​បញ្ជូន​ពួក​គេ​ទៅ​វិញ​ភ្លាមៗ មិន​បាន​សម្ភាស​នោះ គឺ​រំលោភ​សិទ្ធិ​មនុស្ស។

លោក អ៊ុក ហៃសិលា ប្រធាន​នាយកដ្ឋាន​ស៊ើប​អង្កេត និង​នីតិវិធី​នៃ​អគ្គ​នាយកដ្ឋាន​អន្តោ​ប្រវេសន៍ ក្រសួង​មហាផ្ទៃ បាន​បដិសេធ​ថា នគរបាល មិន​បាន​ចាប់​ខ្លួន​អ្នក​នាំ​ផ្លូវ​ជនជាតិ​ភាគ​តិច​នោះ​ទេ ប៉ុន្តែ​បាន​ចាប់​បញ្ជូន​ជនជាតិ​វៀតណាម ៣៦ នាក់ (ស្រី ៣ នាក់) ទៅ​ប្រទេស​វៀតណាម​វិញ ដោយ​សារ​តែ​ពួក​គេ បាន​ឆ្លង​ដែន​ខុស​ច្បាប់។

លោក ហៃសិលា បញ្ជាក់​ថា៖ «ប៉ូលិស​ចាប់​និង​បញ្ជូន​ជនជាតិ​វៀតណាម ៣៦ នាក់​ទៅ​វិញ «ហើយ​ចំពោះ​ខ្មែរ​អ្នក​ជូន អត់​មាន​ឃាត់​ទេ។ ខ្មែរ​មាន​អ្នក​ណា​យក​ទៅ​ណា»៕

អត្ថបទគួរចាប់អារម្មណ៍