.jpg)
ម៉ូតូកែច្នៃដែលត្រូវបានបង្ក្រាបនៅបាត់ដំបង នាដើមខែមេសានេះ។ សហការី
បាត់ដំបងៈ សមត្ថកិច្ចនៃស្នងការដ្ឋាននគរបាលខេត្តបាត់ដំបង បានឃាត់ និងដកហូត ម៉ូតូចំនួន ១៦ គ្រឿង ដែលមានការកែច្នៃខុសលក្ខណៈបច្ចេកទេសដោយបានបង្កការរំខានដល់ពលរដ្ឋក្នុងខេត្តនេះ ស្របពេលអាជ្ញាធរព្រមានចុះប្រតិបត្តិការក្តៅបង្ក្រាបទៅលើក្រុមជិះម៉ូតូប្រភេទនេះដើម្បីដកហូត និងឃាត់ទុកបន្តទៀត។
បើតាមលោក ជេត វណ្ណនី ស្នងការរងទទួលផែនការងារនគរបាលព្រហ្មទណ្ឌ នៃស្នងការដ្ឋាននគរបាលខេត្តបាត់ដំបងប្រាប់ភ្នំពេញប៉ុស្តិ៍ ពីម្សិលមិញថា ការបង្ក្រាបទប់ស្កាត់រាល់បទល្មើសដែលកើតមាននៅក្នុងមូលដ្ឋាន នៅដើមខែមេសានេះ គឺបានដកហូតម៉ូតូ ១៦ គ្រឿង ដើម្បីយកមករក្សាទុកបណ្តោះអាសន្ននៅស្នងការដ្ឋាននគរបាលខេត្តបាត់ដំបង។
លោកបន្តថាសកម្មភាពល្មើសទាំងនេះ មានដូចជា ជិះម៉ូតូបំពាក់បំពង់ស៊ីម៉ាំងបំពងសំឡេងឮខ្លាំង បង្ហោះម៉ូតូ និងជិះម៉ូតូជ្រែជាដើម ខណៈក្រុមយុវជនអាយុចន្លោះពី ១៧ ឆ្នាំ ទៅជាង ២០ ឆ្នាំ ចំនួន ១៦ នាក់ ដែលបានជិះម៉ូតូទាំងនេះ ក៏ត្រូវបានអាជ្ញាធរអប់រំណែនាំ និងឲ្យធ្វើកិច្ចសន្យា មុនឲ្យពួកគេត្រឡប់ទៅផ្ទះវិញ ហើយចូលខ្លួនយកគ្រឿងបន្លាស់មកដោះដូរម៉ូតូតម្រូវទៅតាមលក្ខណៈបច្ចេកទេសដើម។
លោកបញ្ជាក់ថា៖ «ក្មេងទាំងនោះ យើងបានអប់រំភ្លាមៗ រួចយកម៉ូតូមកទុក ដោយយើងមិនបានឃាត់ខ្លួនពួកគាត់ទេ ព្រោះក្នុង ១ ថ្ងៃ យើងបានឃាត់ម៉ូតូពី ៣ ទៅ ៤ គ្រឿង ដែលពួកគាត់ បាននាំអាណាព្យាបាល និងយកនូវគ្រឿងបន្លាស់មកដូរ ដើម្បីយកម៉ូតូរបស់គាត់ត្រឡប់ទៅវិញជាបណ្តើរៗហើយ»។
លោក វណ្ណនី សង្កត់ធ្ងន់ថា សកម្មភាពល្មើសទាំងនេះ គឺត្រូវតែបង្ក្រាប ព្រោះវាសុទ្ធសឹងតែអាចបង្កគ្រោះថ្នាក់ និងបង្កការរំខានដល់ប្រជាពលរដ្ឋនៅក្នុងតំបន់ដើម្បីចៀសវាងកុំឲ្យកើតមានបញ្ហាអនាធិបតេយ្យបន្តទៀត។
លោកបញ្ជាក់ថា៖ «នេះជាការបង្ការ រាល់បទល្មើសដែលបានបង្កឡើងជាយថាហេតុ ដូច្នេះការបំពងសំឡេងអីហ្នឹង គឺជាការរំខាន ធ្វើឲ្យប៉ះពាល់ដល់សាធារណជនមួយចំនួន។ ជួនកាលពេលដែលគាត់ រោទ៍បំពង់ស៊ីម៉ាំងខុសប្រក្រតី ពេលគាត់បើកបរ នឹងបណ្តាលឲ្យប៉ះពាល់ដល់អ្នកដទៃ។ ចំណែកមួយទៀត ក្មេងទាំងនេះ អាចជាក្មេងអនាធិបតេយ្យផងដែរ»។
ក្រោយចុះបង្ក្រាបជាបន្តបន្ទាប់បទល្មើសទាំងនេះ គឺពុំមានការកើតមានទៀតទេ ប៉ុន្តែអាជ្ញាធរ នៅបន្តចុះប្រតិបត្តិការជាប្រចាំ ហើយកាន់តែរឹតបន្តឹងបន្តទៀត ចាប់ពីពេលនេះ រហូតដល់ឱកាសចូលឆ្នាំមកដល់។ នេះបើតាមការអះអាងរបស់លោកអ៊ុច សុខុន ស្នងការនគរបាលខេត្តបាត់ដំបង។
លោកបញ្ជាក់យ៉ាងខ្លីថា៖ «យើងធ្វើតែរហូត ហើយនៅធ្វើបន្តទៀត»។
លោក យិន ម៉េងលី អ្នកសម្របសម្រួលនៃសមាគមការពារសិទ្ធិមនុស្ស អាដហុក ប្រចាំខេត្តបាត់ដំបង បាននិយាយថា ការអនុវត្តបែបនេះ គឺជារឿងប្រសើរ ដែលអាជ្ញាធរចុះបង្ក្រាប និងអនុវត្តច្បាប់ចរាចរណ៍ ដើម្បីការពារសុខសុវត្ថិភាពរបស់ប្រជាពលរដ្ឋនៅក្នុងតំបន់។
លោកបញ្ជាក់ថា ច្បាស់ណាស់បើមិនមានការទប់ស្កាត់ទេ ក្រុមក្មេងៗទាំងនេះនឹងបង្កភាពអនាធិបតេយ្យ និងអសន្តិសុខនៅក្នុងក្រុងបាត់ដំបងច្បាស់ជាមិនខាន ព្រោះពួកគេមានចរិតកោងកាច។
លោកបញ្ជាក់ថា៖ «ពួកម៉ូតូប្រភេទហ្នឹងឲ្យតែជិះម្តងៗ គឺលាន់ឮទ្រហឹងពេញក្រុងបាត់ដំបងតែម្តង ដូច្នេះហើយអាជ្ញាធរគួរតែចូលរួមអនុវត្តច្បាប់នេះ ហើយធ្វើឲ្យបានត្រឹមត្រូវតាមច្បាប់ បើខុសផាកពិន័យ ឬក៏អប់រំណែនាំយ៉ាងម៉េច ចៀសវាងការយកច្បាប់ យកតួនាទីធ្វើអ្វីផ្សេង ដូចជាយកលុយពីក្រុមម៉ូតូទាំងនោះដែលជាហេតុបើកឱកាសឲ្យពួកគេនៅតែប្រព្រឹត្តសកម្មភាពអនាធិបតេយ្យបែបនេះបន្តទៀត ព្រោះថា មួយរយៈចុង ក្រោយនេះ ហាក់ស្ងប់ស្ងាត់ហើយ»។
លោកបានបន្តថា វាជារឿងដែលត្រឹមត្រូវ ដែលអាជ្ញាធរគួរតែចុះអនុវត្តសកម្មភាពបែបនេះឲ្យបានទៀងទាត់ ខណៈលោកមើលឃើញថា សកម្មភាពល្មើសទាំងនេះ មានការថយចុះជាលំដាប់នៅពេលអាជ្ញាធររឹតបន្តឹង៕
