.jpg)
សមត្ថកិច្ច ចុះពិនិត្យទីតាំងគ្រោះថ្នាក់ចរាចរណ៍ម៉ូតូបើកបុករថយន្តកាលពីវេលាទៀបភ្លឺឈានចូលថ្ងៃទី ៥ ខែមករាស្ថិតនៅភូមិស្មាច់ដែង ឃុំរាម ស្រុកព្រៃនប់។ ហ្វេសបុ៊ក
ព្រះសីហនុៈ អ្នកបើកបររថយន្តកុងតឺន័រម្នាក់ត្រូវភ្លើងឆេះស្លាប់កៀបជាប់ក្នុងកាបិនរថយន្ត ខណៈដែលអ្នកបើកម៉ូតូម្នាក់ទៀតក៏ត្រូវស្លាប់ដែរ នៅក្នុងគ្រោះថ្នាក់ចរាចរណ៍ម៉ូតូបើកបុករថយន្តកាលពីវេលាទៀបភ្លឺឈានចូលថ្ងៃទី ៥ ខែមករាស្ថិតនៅភូមិស្មាច់ដែង ឃុំរាម ស្រុកព្រៃនប់។
លោក សួន គឹមសុង អធិការរងទទួលផ្នែកចរាចរណ៍នៃអធិការដ្ឋាននគរបាលស្រុកព្រៃនប់បានឲ្យដឹងកាលពីថ្ងៃអាទិត្យថា ជនរងគ្រោះដែលស្លាប់ជាម្ចាស់ម៉ូតូស្កុបពីឈ្មោះ អឹប សេថន ភេទប្រុស អាយុ ២២ ឆ្នាំមានលំនៅភូមិបត់គគីរ ឃុំអូរឧកញ៉ាហេង ស្រុកព្រៃនប់ ខេត្តព្រះសីហនុ។ ចំណែកឯជនរងគ្រោះជាតៃកុងរថយន្តកុងតឺន័រ សមត្ថកិច្ចកំពុងស្រាវជ្រាវរកអត្តសញ្ញាណនៅឡើយ។ លោកថ្លែងថា៖ «គ្រោះថ្នាក់ចរាចរណ៍នេះមកពីខាងម៉ូតូបើកវ៉ាជែងរថយន្តក្នុងល្បឿនលឿន»។
លោក រំឭកប្រាប់តាមសម្តីសាក្សីនៅកន្លែងកើតហេតុថា មុនកើតហេតុគេបានឃើញម៉ូតូស្កុបពី ១ គ្រឿងបើកបរដោយជនរងគ្រោះខាងលើក្នុងល្បឿនលឿនពីទិសភ្នំពេញទៅក្រុងព្រះសីហនុ។ រីឯរថយន្តកុងតឺន័របើកបរពីទិសខេត្តព្រះសីហនុទៅរាជធានីភ្នំពេញ។
លុះដល់ចំណុចកើតហេតុក្នុងភូមិ-ឃុំខាងលើស្រាប់តែជនរងគ្រោះជាម្ចាស់ម៉ូតូបានបន្ថែមល្បឿនវ៉ាជែងនឹងរថយន្តតែវ៉ាមិនផុតក៏ជ្រុលបុកចូលក្រោមក្បាលរថយន្តពេញទំហឹងត្រូវរថយន្តកិនស្លាប់ភ្លាមៗតែម្តង។
ចំណែកអ្នកបើករថយន្តវិញពេលឃើញម៉ូតូបើកបុកដូច្នេះក៏ខំគេចតែក៏រេចង្កូតធ្លាក់ផ្លូវទៅបុកដើមអាកាស្យាផ្ទុះឆាបឆេះជាអណ្តាតភ្លើងតែម្តង។ លោកបានបន្ថែមថា៖ «ខាងសមត្ថកិច្ចបានចុះទៅវាស់វែងឃើញថា ភាគីម៉ូតូខុស ហើយគាត់បើកលឿនវ៉ាជែងគេទៀត»។
លោក សួន គឹមសុង បានបញ្ជាក់ថា សមត្ថកិច្ចរបស់លោកបានយករថយន្តពន្លត់អគ្គិភ័យ ១ គ្រឿងទៅជួយអន្តរាគមន៍តែដោយសារចម្ងាយផ្លូវឆ្ងាយទម្រាំតែទៅដល់គឺនៅផ្នែកក្បាលរថយន្តកុងតឺន័រនោះឆេះស្ទើរអស់ទៅហើយ។
លោកបានប្រាប់ថា ក្រោយកើតហេតុសមត្ថកិច្ចបានប្រគល់សាកសពភាគីម៉ូតូទៅឲ្យក្រុមគ្រួសារយកទៅធ្វើបុណ្យ ចំណែកឯសាកសពជនរងគ្រោះដែលជាអ្នកបើកបររថយន្តកុងតឺន័រត្រូវយកទៅតម្កល់ទុកនៅវត្តក្នុងភូមិកើតហេតុនោះ ដើម្បីស្វែងរកសាច់ញាតិ។ ចំពោះរថយន្តកុងតឺន័រ និងម៉ូតូសមត្ថកិច្ចបាននាំយកទៅរក្សាទុកនៅអធិការដ្ឋាននគរបាលស្រុកព្រៃនប់ ដើម្បីរង់ចាំការដោះស្រាយជាក្រោយ៕
