កោះកុងៈ អាជ្ញាធរមូលដ្ឋានបានប្រាប់ ភ្នំពេញ ប៉ុស្តិ៍ ពីម្សិលមិញថា អ្នកស្រី លាង ហ៊ីម បានចាប់ផ្ដើមប្រើគ្រឿងចក្រកាយដីដែលគាត់បានចាក់រំលោភលើដីចំណីព្រែក និងគ្របលើព្រៃកោងកាងក្នុងតំបន់ដែនជម្រកសត្វព្រៃពាមក្រសោប ស្រុកមណ្ឌលសីមាវិញហើយ បន្ទាប់ពីទទួលបានលិខិតពិន័យផ្នែករដ្ឋបាលពីរដ្ឋបាលខេត្តកោះកុង។
អ្នកស្រី គឹម សុភេម មេឃុំទួលគគីរ ស្រុកមណ្ឌលសីមា បានប្រាប់ ភ្នំពេញ ប៉ុស្តិ៍ ពីម្សិលមិញថា កាលពីថ្ងៃទី ១៩ ខែមីនា រដ្ឋបាលខេត្តកោះកុងបានចេញលិខិត ១ ច្បាប់ដោយតម្រូវឱ្យអ្នកស្រី លាង ហ៊ីម កាយអាចម៍ដីចេញពីមាត់ព្រែកឱ្យអស់ក្នុងរយៈពេល ១ សប្ដាហ៍ចាប់ពីថ្ងៃជូនដំណឹងនោះ។ ជាមួយនេះក៏បានតម្រូវឱ្យដាំដើមកោងកាងស្ដារឡើងវិញលើផ្ទៃដីទំហំ ៣ ៣០២ ម៉ែត្រការ៉េ ដែលគាត់បានចាក់អាចម៍ដីរំលោភពីលើកាលពីពេលថ្មីៗនេះផងដែរ។
អ្នកស្រី សុភេម បានបញ្ជាក់ថា៖ «ពេលនេះ អ្នកស្រី លាងហ៊ីម បានឱ្យក្រុមការងាររបស់គាត់ ជីកកាយអាចម៍ដីនោះចេញវិញហើយ ដោយប្រើគ្រឿងចក្រអេស្កាវ៉ាទ័រចំនួន ១ គ្រឿង និងរថយន្តដឹកដីចំនួន ៣ គ្រឿង»។
បើតាម អ្នកស្រី សុភេម អ្នកស្រី លាង ហ៊ីម បានទិញដីពីពលរដ្ឋក្នុងភូមិទួលគគីរក្រោមសរុប ១២ ហិកតា ប៉ុន្តែដោយសារគាត់មិនបានបោះបង្គោលកំណត់ព្រំប្រទល់ទីតាំងដីឱ្យបានច្បាស់លាស់ ទើបឱ្យគេចាក់ដីលយចូលលើដីចំណីព្រែក និងដីព្រៃកោងកាងនៃតំបន់ដែនជម្រកសត្វព្រៃពាមក្រសោបនោះ។
យ៉ាងណាក៏ដោយពលរដ្ឋបានលើកឡើងថា ចំណាត់ការរបស់ខេត្តកោះកុងហាក់នៅស្រាល ខណៈជនប្រព្រឹត្តបទល្មើសម្ដងហើយម្ដងទៀត បានលួចធ្វើសកម្មភាពចាក់ដីលុបចំណីព្រែក និងឆ្ការព្រៃកោងកាងព្រមទាំងជីវចម្រុះផ្សេងទៀតក្នុងតំបន់ដែនជម្រកសត្វព្រៃដើម្បីយកដីសាធារណៈរបស់រដ្ឋមកធ្វើជាកម្មសិទ្ធិឯកជន។
លោក ពេជ្រ ខៀវ អាយុ ៥៦ ឆ្នាំ មានលំនៅក្នុងភូមិទួលគគីរក្រោម ឃុំទួលគគីរស្រុកមណ្ឌលសីមាបានប្រាប់ភ្នំពេញប៉ុស្តិ៍ថា កន្លងមកមានពលរដ្ឋក្រីក្រមួយចំនួនត្រូវបានសមត្ថកិច្ចឃាត់ខ្លួន និងកសាងសំណុំរឿងបញ្ជូនទៅតុលាការ ផ្ដន្ទាទោសជាប់ពន្ធនាគារដោយសារពួកគាត់ចូលកាប់ដើមកោងកាងធ្វើធ្យូងលក់ដោះស្រាយជីវភាព។
លោកថា៖ «ខ្ញុំយល់ថា ករណីអ្នកស្រី លាង ហ៊ីម គួរតែត្រូវបានសមត្ថកិច្ចកសាងសំណុំរឿងឡើងតុលាការ ដើម្បីចាត់ការបន្តតាមផ្លូវច្បាប់ ព្រោះគាត់បានចាក់ដីលុប និងកាប់ទន្ទ្រានដីព្រៃកោងកាងក្នុងតំបន់ដែនជម្រកសត្វព្រៃពាមក្រសោប ខុសច្បាប់ក្នុងចេតនាយកធ្វើជាកម្មសិទ្ធិឯកជនផ្ទាល់ខ្លួន»។
អ្នកស្រី លាង ហ៊ីម មិនអាចទាក់ទងសុំអត្ថាធិប្បាយជុំវិញករណីនេះបានទេ កាលពីម្សិលមិញ។ យ៉ាងណាក្ដី អ្នកនាំពាក្យរដ្ឋបាលខេត្តកោះកុងលោក សុខ សុទ្ធី បានប្រាប់ ភ្នំពេញ ប៉ុស្តិ៍ថា អ្នកស្រី លាង ហ៊ីម បានបំភ្លឺប្រាប់អាជ្ញាធរ ស្រុកមណ្ឌលសីមាថា គាត់គ្មានចេតនាចាក់ដីរំលោភយកដីព្រៃកោងកាងក្នុងតំបន់ដែនជម្រកសត្វព្រៃពាមក្រសោបនោះទេ។ គាត់បានយល់ព្រមកាយអាចម៍ដីទាំងនោះចេញ និងដាំដើមកោងកាងស្ដារឡើងវិញទៅតាមការណែនាំរបស់រដ្ឋបាលខេត្ត និងមន្ទីរជំនាញពាក់ព័ន្ធ។
លោកថ្លែងថា៖ «ពេលនេះ គាត់បានចាប់ផ្ដើមកាយអាចម៍ដីចេញហើយ។ នៅជំហានបន្ទាប់ គឺគាត់ត្រូវដាំកូនកោងកាងស្ដារឡើងវិញនៅលើផ្ទៃដី ៣ ៣០២ ម៉ែត្រការ៉េ ដែលរងការបំផ្លាញដោយសារគាត់ចាក់ដីលុប»។ លោកបានបន្ថែមថា ចំណែកវិធានការច្បាប់ផ្សេងទៀតគឺជាតួនាទីរបស់ព្រះរាជអាជ្ញាដែលត្រូវស្រាវជ្រាវ និងចាត់វិធានការបន្តតាមនីតិវិធីច្បាប់ «ប៉ុន្តែចំណាត់ការបែបណានោះ ខ្ញុំមិនដឹងទេ»។
កាលពីម្សិលមិញលោក ហ៊ុន ម៉ារ៉ាឌី ប្រធានមន្ទីរបរិស្ថានខេត្តកោះកុងបានប្រាប់ ភ្នំពេញ ប៉ុស្តិ៍ថា ក្រុមការងាររបស់លោកនឹងចុះត្រួតពិនិត្យណែនាំពីលក្ខណៈបច្ចេកទេសដាំដើមកោងកាងដល់អ្នកស្រី លាងហ៊ីម ក្រោយពេលគាត់កាយអាចម៍ដីចេញពីតំបន់នោះរួច។
លោកបានបញ្ជាក់ថា៖ «នៅក្រោយពីការដាំស្ដារឡើងវិញនេះគឺគាត់ត្រូវមានកាតព្វកិច្ចមើលថែទាំវារហូតដល់ធំ ក្លាយជាព្រៃកោងកាង ទើបគាត់អាចផុតការកាតព្វកិច្ចនៃការទទួលខុសត្រូវ ព្រោះគាត់បានធ្វើឱ្យវាខាតបង់»៕