.jpg)
មនុស្ស ៤០០ នាក់ ពេលត្រូវបានឃាត់ខ្លួននៅឯកិ្លបលុច្សសារី។ សហការី
ភ្នំពេញៈ សមត្ថកិច្ចបានកំណត់មុខសញ្ញាម្ចាស់ក្លិប លុច្សសារីរួចហើយ ហើយនឹងឈានទៅឃាត់ខ្លួនក្នុងពេលខាងមុខ ខណៈអ្នកដែលត្រូវបានឃាត់ខ្លួននៅក្នុងក្លិបជាង ៤០០ នាក់ ដែលមានពាក់កណ្តាលជាស្ត្រី និងជាង ៣០ ភាគរយ ជាជនបរទេស កំពុងត្រូវបានមន្ត្រីជំនាញពិនិត្យរកសារធាតុញៀន។នេះបើតាម លោក ស ថេត ស្នងការនគរបាលរាជធានីភ្នំពេញ។
កាលពីយប់រំលងអាធ្រាត្រឈានចូលថ្ងៃទី ៨ ខែ មិថុនា កម្លាំងនៃស្នងការដ្ឋាននគរបាលរាជធានីភ្នំពេញបានបើកប្រតិបត្តិការចុះឆែកឆេរក្លិបកម្សាន្ត «លុច្សសារី» ស្ថិតនៅតាមបណ្ដោយផ្លូវលេខ ២១៤ កែងផ្លូវ ៦៣ ក្នុងសង្កាត់បឹងរាំង ខណ្ឌដូនពេញ ដោយបានរកឃើញថ្នាំញៀនមួយចំនួន និងឃាត់ខ្លួនអ្នកចូលលេងកម្សាន្តក្នុងក្លិបនោះជាង ៤០០ នាក់។
ក្រោយការឆែកឆេរ កម្លាំងសមត្ថកិច្ច បានបិទក្លិបនេះជាបណ្តោះអាសន្ន និងបាននាំខ្លួនអ្នកចូលលេងកម្សាន្តក្នុងក្លិបនេះជាង ៤០០ នាក់ ទៅស្នងការដ្ឋាននគរបាលរាជធានី ហើយពួកគេទាំងនោះ មានប្រមាណពាក់កណ្តាលជាស្ត្រី ខណៈជនបរទេសមានជាង ៣០ % ភាគច្រើនជាជនជាតិចិន និងវៀតណាម។ នេះបើតាមលោក ស ថេត អគ្គស្នងការរងនគរបាលជាតិ និងជាស្នងការរាជធានីភ្នំពេញ។
លោក ស ថេត បានប្រាប់ភ្នំពេញប៉ុស្តិ៍កាលពីម្សិលមិញថា ចំពោះគ្រឿងញៀនដែលដកហូតបានជំនាញកំពុងពិនិត្យ និងបែងចែកសារធាតុញៀនទាំងនេះ ដើម្បីអាចបញ្ជាក់បានថា មានចំនួនប៉ុន្មាន និងមានប្រភេទអ្វីខ្លះ ខណៈអ្នកចូលលេងកម្សាន្តក្នុងក្លិបដែលត្រូវបានឃាត់ខ្លួនទាំងជាង ៤០០ នាក់នោះ សមត្ថកិច្ចកំពុងតាមដាន និងពិនិត្យដើម្បីឈានទៅរកមុខសញ្ញាពាក់ព័ន្ធគ្រឿងញៀន និងស្វែងរកអ្នកប្រើប្រាស់ ដើម្បីធ្វើការអប់រំកែប្រែ ឬដោះលែងពួកគេឲ្យបានត្រឡប់ទៅផ្ទះវិញ។
លោកបញ្ជាក់ថា៖ «គ្រឿងញៀនហ្នឹងមិនទាន់រកឃើញយ៉ាងណាទេ យើងកំពុងពិនិត្យ ដោយមានអ្នកជំនាញយើងមកពិនិត្យ យើងមិនអាចនិយាយតាមហ្នឹងដោយមិនមានការពិនិត្យបានទេ គ្រាន់តែថា មានមួយចំនួន ប៉ុន្តែវាមិនច្រើនពេកទេ។ ទោះបីយ៉ាងណាក៏ដោយ ក៏ការអនុវត្តតាមផ្លូវច្បាប់ យើងបានធ្វើឡើងល្អដែរ ព្រោះអ្នករងផលប៉ះពាល់នៃការប្រើប្រាស់គ្រឿងញៀននៅទីហ្នឹងច្រើន»។
ចំណែកមុខសញ្ញាម្ចាស់ក្លិប លុច្សសារី វិញ លោក ស ថេត បញ្ជាក់ថា៖ «យើងកំណត់អត្តសញ្ញាណបានហើយ (ម្ចាស់ក្លិប) តែយើងមិនអាចបញ្ជាក់បានទេទុកឲ្យមានការស្រាវជ្រាវ ហើយតែរកឃើញគឺចាប់ខ្លួនហើយ។ អ្វីៗផ្សេងទៀតមិនទាន់បញ្ជាក់បានទេ តែក្រោយសរុប និងពិនិត្យការងារចប់ យើងនឹងបង្ហាញជូន»។
លោក ម៉េត មាសភក្តី អ្នកនាំពាក្យសាលារាជធានីភ្នំពេញ និងលោក ហួត ហៃ ប្រធានផ្នែករដ្ឋបាលសាលារាជធានីភ្នំពេញ បានថ្លែងកាលពីម្សិលមិញថា ពួកលោកមិនទាន់អាចបញ្ជាក់បានថា ម្ចាស់ក្លិបលុច្សសារី ដែលអាជ្ញាធររាជធានីបានផ្តល់អាជ្ញាប័ណ្ណនោះ ជានរណានោះទេ ដោយអះអាងថា ខ្លួនកំពុងស្រាវជ្រាវហើយព័ត៌មានលម្អិតយ៉ាងណាទៀតនោះ អាជ្ញាធរនឹងបញ្ជាក់នៅពេលក្រោយ។
លោក មាសភក្តី បញ្ជាក់ថា៖ «នៅទេ មិនអាចជម្រាបជូនបានទេ យើងកំពុងតែធ្វើការលើរឿងនេះ អាចជូនព័ត៌មានបឋមតែប៉ុណ្ណឹង តាមរយៈសកម្មភាពនៃការចុះឆែកឆេរ និងត្រួតពិនិត្យទៅ មានការរកឃើញអីហ្នឹងតែរឿងអីទៀត កំពុងតែស្រាវជ្រាវ ធ្វើការងារហ្នឹងសិន មិនទាន់អាចជម្រាបជូនបានទេ»។
ក្នុងរយៈពេល ៦ ខែដើមឆ្នាំនេះ សមត្ថកិច្ច បានចុះប្រតិបត្តិការបង្ក្រាបក្លិបកម្សាន្តធំៗក្នុងរាជធានីភ្នំពេញចំនួន ៣ ហើយបូករួមនឹងក្លិបកម្សាន្ត លុច្សសារីនេះ ដោយកាលពីចុងខែកុម្ភៈ កន្លងទៅ សមត្ថកិច្ច បានសម្រុកចូលក្លិបកម្សាន្តរ៉ុកដោយឃាត់ខ្លួនមនុស្សជាង ៣០០ នាក់ ហើយរឹបអូសបានថ្នាំញៀនជាង ៥០ គីឡូក្រាមខណៈម្ចាស់ក្លិបកម្សាន្តរ៉ុក គឺលោកឧកញ៉ា គិត ធាង ក៏ត្រូវបានសមត្ថកិច្ចឃាត់ខ្លួន និងត្រូវតុលាការចោទប្រកាន់ថា បានជាប់ពាក់ព័ន្ធនឹងគ្រឿងញៀនជាង ៥០ គីឡូក្រាម។
ចំណែកមួយករណីទៀត គឺកាលពីពាក់កណ្តាល ខែមេសា សមត្ថកិច្ច បានចុះបង្ក្រាបក្លិបកម្សាន្ត «ម៉ៃអាមី» ក្នុងនោះ បានឃាត់ខ្លួនមនុស្សប្រុសស្រីជាង ៥០ នាក់ និងបានរឹបអូសគ្រឿងញៀនជាង ១០ គីឡូក្រាម ព្រមទាំងឧបករណ៍ជក់ និងកែច្នៃគ្រឿងញៀនយ៉ាងច្រើននៅក្នុងក្លិបនេះផងដែរ។ ជាមួយនឹងការបង្ក្រាបក្លិបនេះ ម្ចាស់ក្លិប «ម៉ៃអាមី» ឈ្មោះ ស្រេន វីរៈ និងបុគ្គលិកចំនួន ៦ នាក់ទៀត ត្រូវបានចាប់បញ្ជូនទៅតុលាការ ដោយចោទប្រកាន់ពាក់ព័ន្ធនឹងបទល្មើសគ្រឿងញៀន។
លោក មាស សុវណ្ណ ប្រធានសមាគមសង្គ្រោះជនរងគ្រោះ ដោយគ្រឿងញៀនកម្ពុជា ហៅកាត់ DARAC បានប្រាប់ភ្នំពេញប៉ុស្តិ៍ កាលពីម្សិលមិញថា ការបង្ក្រាបនេះ គឺជារឿងប្រសើរមួយក្នុងការទប់ស្កាត់បទល្មើសគ្រឿងញៀន ហើយបានចូលរួមកាត់បន្ថយក្នុងការប្រើប្រាស់គ្រឿងញៀនបានមួយកម្រិត ស្របពេលដែលពួកគេតែងយកក្លិបទាំងនេះ ជាកន្លែងប្រើប្រាស់គ្រឿងញៀន។
ជាមួយនឹងការសាទរនេះ លោក ចង់ឃើញការចុះបង្ក្រាបនៅតាមបណ្តាក្លិបទូទាំងប្រទេសឲ្យបានជាប្រចាំ និងត្រូវប្រាកដថា ជនល្មើស ឬមេខ្លោងធំៗ នឹងត្រូវទទួលទោសតាមច្បាប់កម្ពុជា។
លោកបញ្ជាក់ថា៖ «បើសិនជាយើងមានការប្រឹងប្រែងរបៀបនេះរហូត អ៊ីចឹងគ្រប់កន្លែងទាំងអស់ការប្រើប្រាស់គ្រឿងញៀន នឹងមានការថយចុះ ហើយបើរកឃើញថា អ្នកមានសារធាតុជាតិនៅក្នុងខ្លួន នោះគួរតែបញ្ចូនទៅមណ្ឌលអប់រំកែប្រែភ្លាម ណាមួយក៏បានដើម្បីធ្វើការព្យាបាល មិនគួរលែងឲ្យទៅផ្ទះវិញនោះទេ ហើយអ្នកណាដែល រកឃើញទាក់ទងនឹងការជួញដូរនិងម្ចាស់ទីតាំង គួរតែទទួលទោសតាមផ្លូវច្បាប់ និងកំណត់ដោយតុលាការ ដោយមិនត្រូវលើកលែងឡើយ»៕
