ឧត្ដរមានជ័យ: នាយកគេហទំព័រអនឡាញ «ស្រទាប់យុវវ័យ» លោក ប៉ែន នួន បានប្ដឹងមន្ត្រីសាលាដំបូងខេត្តឧត្ដរមានជ័យចំនួន ២ នាក់ មន្ត្រីយោធា ២ នាក់ និងមន្ត្រីភូមិបាលស្រុកអន្លង់វែងម្នាក់ ទៅអង្គភាពប្រឆាំងអំពើពុករលួយ (ACU) ដោយអះអាងថា មន្ត្រីទាំង ៥ នាក់ឃុបឃិតគ្នារំលោភយកដី ៦ ហិកតា ប៉ុន្ដែមន្ត្រីបដិសេធការចោទប្រកាន់នេះ។
ការប្ដឹងនេះក្រោយពីចៅក្រមសាលាដំបូងខេត្តនេះបានសម្រេចឱ្យលោក ប៉ែន នួន សងសំណងជំងឺចិត្តទៅភាគីលោក អ៊ុក គឹមលី ជាមន្ត្រីយោធា ចំនួន ៨០ លានរៀល និងបង់ចូលរដ្ឋ ៥ លានរៀលពាក់ព័ន្ធសំណុំរឿងបរិហារកេរ្ដិ៍។ ការចោទនេះបន្ទាប់ពីលោក ប៉ែន នួន បានសរសេរលើគេហទំព័រថា លោក អ៊ុក គឹមលី លួចក្លែងលិខិតយកដីពលរដ្ឋ ៦ ហិកតានៅភូមិទួលស្វាយសែនជ័យ ឃុំត្រពាំងតាវ ស្រុកអន្លង់វែង ខេត្តឧត្ដរមានជ័យ។
លោក ប៉ែន នួន បានប្រាប់ភ្នំពេញប៉ុស្ដិ៍ពីថ្ងៃទី ២៧ ធ្នូថាលោកបានដាក់ពាក្យបណ្ដឹងទៅ ACU ដើម្បីប្ដឹងបុគ្គលចំនួន ៥ រូប ទី១- លោក ស៊ឹម ពិចិត្រ ចៅក្រមជំនុំជម្រះនៃសាលាដំបូងខេត្តឧត្ដរមានជ័យ ទី២- លោក គង់ រតនា ព្រះរាជអាជ្ញារងអមសាលាដំបូងខេត្តនេះ ទី៣- លោកឧត្ដមសេនីយ៍ទោ អ៊ុក គឹមលី នាយរងទីចាត់ការការងារព្រំដែននៅអគ្គបញ្ជាការដ្ឋានកងទ័ពជើងគោក ទី៤- លោកវរសេនីយ៍ទោ យឹម សេន អនុប្រធានក្រុមការងារទំនាក់ទំនងព្រំដែនកម្ពុជា-ថៃប្រចាំច្រកទ្វារអន្តរជាតិអូរស្មាច់ និងទី៥- លោក គឹម សំណាង អនុប្រធានការិយាល័យភូមិបាលស្រុកអន្លង់វែង។
លោកបញ្ជាក់ថា៖ «ខ្ញុំជាម្ចាស់កម្មសិទ្ធិដីធ្លី និងជាជនរងគ្រោះពិតប្រាកដក្នុងចំណោមពលរដ្ឋរងគ្រោះ ៤ គ្រួសារដែលលោកផ្កាយ ២ អ៊ុក គឹម លី និងឈ្មោះ យឹម សេន រំលោភយកដី ៦ ហិកតាកាលពីដើមឆ្នាំ ២០១៩។ ឥឡូវតុលាការបានកាត់ក្ដីឱ្យខ្ញុំចាញ់ ហើយត្រូវសងសំណងជំងឺចិត្តទៅគេ ៨០ លានរៀល និងបង់ចូលរដ្ឋ ៥ លានរៀលទៀត។ អ៊ីចឹងគាត់កាត់ក្ដីអយុត្តិធម៌ ខ្ញុំមិនអាចទទួលយកបានទេ»។
តាមពាក្យបណ្ដឹងរបស់លោក ប៉ែន នួន ដាក់ទៅ ACU ពីថ្ងៃទី ២៤ ធ្នូ ដែល ភ្នំពេញ ប៉ុស្ដិ៍ ទទួលបានពីថ្ងៃទី ២៧ ធ្នូ ឱ្យដឹងថា សុំប្ដឹងបុគ្គលចំនួន ៥ នាក់ ដោយសារឈ្មោះ ស៊ឹម ពិចិត្រ និងឈ្មោះ គង់ រតនា ជាអ្នកកាន់សំណុំរឿងរបស់ឈ្មោះ អ៊ុក គឹមលី និងឈ្មោះ យឹម សេន បានប្រើប្រាស់ឯកសារលិខិតកាន់កាប់ និងប្រើប្រាស់ដីធ្លីក្លែងបន្លំខុសទីតាំងភូមិដែលចុះវាស់វែងចេញដោយលោក គឹមសំណាង នៅថ្ងៃទី ៥ ខែ មេសា ឆ្នាំ ២០១៩ ឱ្យទៅឈ្មោះ អ៊ុក គឹមលី និងឈ្មោះ យឹម សេន ជាន់លើដីរបស់លោក និងពលរដ្ឋ ៣ គ្រួសារទៀតដែលមានបណ្ណកម្មសិទ្ធិត្រឹមត្រូវ (ប្លង់រឹង)។
ពាក្យបណ្ដឹងថា «ចៅក្រមជំនុំជម្រះតុលាការខេត្តនៅថ្ងៃទី ១៩ ខែ វិច្ឆិកា ឆ្នាំ ២០២០ បានកាត់ក្ដីឱ្យខ្ញុំចាញ់ត្រូវសងជំងឺចិត្តឱ្យទៅឈ្មោះ អ៊ុក គឹមលី ចំនួន ៤០ លានរៀល និងសងជំងឺចិត្តឱ្យទៅឈ្មោះ យឹម សេន ៤០ លានរៀល និងផាកពិន័យចូលរដ្ឋ ៥ លានរៀល ដោយចោទប្រកាន់ខ្ញុំពីបទបរិហារកេរ្ដិ៍»។
ការប្ដឹងពីបទបរិហារកេរ្ដិ៍នេះបន្ទាប់ពីលោកចុះផ្សាយតាមគេហទំព័រខាងលើពីថ្ងៃទី ៦ ខែតុលា ឆ្នាំមុន ក្រោមចំណងជើងថា៖ «ពលរដ្ឋទប់កំហឹងមិនបាន ចោទលោកផ្កាយ ២ អ៊ុក គឹមលី ថា ជាផ្កាយចោរលួច និងប្លន់ដីរបស់ពួកគាត់យកទៅកាយស្រះ សង់ផ្ទះ និងដាំដំណាំស្ដែងៗនៅនឹងមុខពលរដ្ឋ»។
លោក យ៉ិនទៀង ពុទ្ធារិទ្ធ ជំនួយការផ្ទាល់របស់លោក ឱម យ៉ិនទៀង ប្រធាន (ACU) បានបដិសេធធ្វើអត្ថាធិប្បាយពីករណីនេះកាលពីថ្ងៃ ២៧ ធ្នូ ដោយលោកអះអាងថា មិនអាចនិយាយជាសាធារណៈបាន។ ចំណែកលោក នួន បូផល អនុប្រធាន ACU បានបញ្ជាក់យ៉ាងខ្លីតាមទូរស័ព្ទថា លោកកំពុងជាប់រវល់ និងមិនមានព័ត៌មានអ្វីនៅក្នុងដៃទេ។
លោក អ៊ុក គឹមលី បានថ្លែងពីថ្ងៃទី ២៧ ធ្នូថា ការចោទប្រកាន់របស់លោក ប៉ែន នួន គ្មានមូលដ្ឋានទេ។ ក៏ប៉ុន្តែលោកបញ្ជាក់ថានឹងទទួលទោសតាមច្បាប់ប្រសិនបើលោកបានប្រព្រឹត្តកំហុសដូចការចោទប្រកាន់មែននោះ។
លោកថា៖ «ដីហ្នឹងខ្ញុំបានទិញពីពលរដ្ឋដែលមានការដឹងឮពីអាជ្ញាធរមូលដ្ឋាន និងសាក្សីកាលពីឆ្នាំ ២០១៩ បន្ទាប់មកឈ្មោះ ប៉ែន នួន គាត់បែរជាចោទមកខ្ញុំថា រំលោភយកដីគាត់ និងដីពលរដ្ឋ។ គាត់បានបង្ហោះលើគេហទំព័រមួលបង្កាច់ខ្ញុំថាខ្ញុំលួចដីពលរដ្ឋធ្វើប្លង់ក្លែងក្លាយអ៊ីចឹងខ្ញុំប្ដឹងគាត់ទៅតុលាការពីបទបរិហារកេរ្ដិ៍ហើយតុលាការក៏សម្រេចឱ្យខ្ញុំឈ្នះក្ដីនេះ»។
លោកបន្ថែមថា ក្រោយពីបញ្ចប់រឿងក្ដីនៅតុលាការ ភាគីលោក ប៉ែន នួន មិនសុខចិត្តដោយបានដាក់ពាក្យប្ដឹងទៅ ACU ទាក់ទងការរំលោភយកដីធ្លីទៅវិញ។ លោកនឹងចូលបំភ្លឺតាមដីកាកោះហៅ ប្រសិនបើអង្គភាព ACU ហៅទៅសាកសួរជុំវិញករណីនេះ។
ចំណែកលោក ស៊ឹម ពិចិត្រ ចៅក្រមជំនុំជម្រះនៃសាលាដំបូងខេត្តឧត្ដរមានជ័យបានថ្លែងពីថ្ងៃទី ២៧ ធ្នូថា លោកបានទទួលសំណុំរឿងទាក់ទងបទបរិហារកេរ្ដិ៍យកមកជំនុំជម្រះកាលពីខែវិច្ឆិកា។ ដោយបានពិនិត្យលើភ័ស្តុតាង ឯកសារពាក់ព័ន្ធ និងតាមរយៈការសាកសួរអ្នកពាក់ព័ន្ធនានា លោកបានសម្រេចជូនភាគីរងគ្រោះរួចរាល់ហើយ។
លោកបញ្ជាក់ថា៖ «ខ្ញុំអត់យល់ថា លោក ប៉ែន នួន គាត់ប្ដឹងខ្ញុំទៅ ACU ទេ ព្រោះសំណុំរឿងដែលខ្ញុំជំនុំជម្រះគឺរឿងបទបរិហារកេរ្ដិ៍ ដែលគាត់បានផ្សព្វផ្សាយបង្ខូចឈ្មោះគេ ប៉ុន្ដែគាត់ប្ដឹងខ្ញុំទៅ ACU រឿងទំនាស់ដីធ្លីទៅវិញ។ អ៊ីចឹងខ្ញុំធ្វើយ៉ាងម៉េចដឹងរឿងទំនាស់របស់គាត់?
ខ្ញុំធ្វើការសម្រេចឱ្យភាគីម្ខាងទៀតឈ្នះគឺផ្អែកលើភ័ស្តុតាង និងការសាកសួរអ្នកពាក់ព័ន្ធ ខ្ញុំមិនដែលកាត់ក្ដីលម្អៀងប្រកាន់បក្ខពួកនយោបាយណាទេ គឺផ្អែកលើច្បាប់»៕