.jpg)
ទូកទេសចរណ៍មួយនៅអែបព្រែកកំពតកន្លងមក។ រូបថត សហការី
កំពតៈ រដ្ឋបាលខេត្តកំពតបានកំណត់រយៈពេល ២០ ថ្ងៃ សម្រាប់ម្ចាស់ទូកទេសចរណ៍ចំនួន ១៩ គ្រឿង នៅតាមបណ្ដោយ ព្រែកកំពង់បាយ ឬព្រែកកំពត ក្រុងកំពត ដោយតម្រូវឱ្យផ្លាស់ប្ដូរចំណតទទួលភ្ញៀវទេសចរពីត្រើយខាងកើត ទៅត្រើយខាងលិចវិញចាប់ពីចុងខែវិច្ឆិកានេះតទៅ ដើម្បីសម្រួលដល់ការងារកែលម្អសោភណភាពក្រុង និងសុវត្ថិភាពភ្ញៀវទេសចរ។
ប៉ុន្ដែសម្រាប់ការផ្លាស់ប្តូរទីចំណតទូកទេសចរណ៍នេះ ក្រុមម្ចាស់ទូកទេសចរណ៍ក៏បានស្នើរដ្ឋបាលខេត្តឱ្យជួយដោះស្រាយរឿងស្ទះចរាចរណ៍ និងកែលម្អសោភណភាពនៅទីតាំងថ្មីនេះឱ្យបានល្អផង។ ពួកគេអះអាងថាផ្លូវចូលទៅទីតាំងចំណតថ្មីនោះមានលក្ខណៈតូចចង្អៀត និងស្ទះចរាចរណ៍ខ្លាំង។
អភិបាលខេត្តកំពតលោក ជាវ តាយ បានប្រាប់ភ្នំពេញប៉ុស្ដិ៍ពីម្សិលមិញថា លោកបានកត់សម្គាល់ឃើញថា នៅត្រើយខាងកើតនេះ មានលក្ខណៈតូចចង្អៀត និងរញ៉េរញ៉ៃគ្មានសណ្ដាប់ធ្នាប់។ ដូច្នេះរដ្ឋបាលខេត្តបានពិភាក្សាគ្នាសម្រេចរៀបចំកន្លែងថ្មីឱ្យក្រុមម្ចាស់ទូកនៅត្រើយខាងលិចវិញ ព្រោះនៅត្រើយខាងលិចមានលក្ខណៈធំទូលាយ និងមានសោភណភាពល្អ។ ម្យ៉ាងទៀត អាជ្ញាធរចង់ឱ្យទីតាំងទាំង ២ នេះមានតុល្យភាពនឹងគ្នាដែលអាចទាក់ទាញភ្ញៀវទេសចរកាន់តែច្រើនថែមទៀត។
លោកបានបញ្ជាក់ថា៖ «យើងទុកពេលឲ្យពួកគាត់ ២០ ថ្ងៃ គឺឱ្យរុះរើអីវ៉ាន់គាត់មកដាក់រៀបចំនៅទីតាំងថ្មីវិញ។ ក្រុមអាជីវករម្ចាស់ទូកទាំង ១៩ គ្រឿង ត្រូវប្ដូរទៅចតទូកនៅទល់មុខសាលាខេត្តកំពតវិញរហូតដល់គល់ស្ពានចាស់ ដែលមានប្រវែង ៤៤០ ម៉ែត្រ ស្ថិតនៅភូមិទ្វីខាងត្បូង សង្កាត់អណ្តូងខ្មែរ ក្រុងកំពត យ៉ាងយូរត្រឹមថ្ងៃទី ១៥ ខែ ធ្នូ ឆ្នាំ ២០១៩ នេះ»។
លោកបន្ថែមថា៖ «ខ្ញុំជម្រាបថា បើគិតពីសុវត្ថិភាព គឺកន្លែងថ្មីនេះត្រូវបានធានាពីសុវត្ថិភាពខ្ពស់។ ប៉ុន្ដែម្ចាស់ទូកមួយចំនួននៅបារម្ភខ្លាចភ្ញៀវរកទីតាំងទូកទេសចរណ៍ថ្មីហ្នឹងមិនឃើញ ហើយខ្ញុំបានពន្យល់ពួកគាត់វិញថា យើងត្រូវដូរទាំងអស់គ្នាបែបនេះមិនបាច់បារម្ភគ្មានភ្ញៀវទេ បើគេរកនៅទីនោះមិនឃើញ គេនឹងមករកនៅទីនេះហើយ»។
លោកអភិបាលខេត្តក៏បានឱ្យដឹងដែរថា បច្ចុប្បន្នខេត្តកំពតមានភ្ញៀវទេសចរជាតិ-អន្តរជាតិមកកម្សាន្តកើនឡើងជាលំដាប់ ដោយបម្រើដល់ផលប្រយោជន៍ប្រជាពលរដ្ឋ។ ប៉ុន្តែបញ្ហាប្រឈមនានាដូចជា សណ្ដាប់ធ្នាប់ របៀបរៀបរយ សោភណភាព អនាម័យ បរិស្ថានក្រុងកំពតនៅមានកម្រិតនៅឡើយ។ ដូច្នេះរដ្ឋបាលខេត្តកំពត និងមន្ទីរជំនាញពាក់ព័ន្ធត្រូវមានគោលការណ៍ផ្លាស់ប្ដូរទីតាំងថ្មីមួយនេះជាចាំបាច់សំដៅអភិវឌ្ឍខេត្ត និងសោភណភាពកាន់តែល្អ ពង្រីកវិសាលភាពអេកូទេសចរណ៍ក្នុងខេត្ត។
លោក ប៉ុន រ៉ា ម្ចាស់ទូកទេសចរណ៍ម្នាក់ក្នុងចំណោម ១៥ នាក់ផ្សេងទៀត បានប្រាប់ភ្នំពេញប៉ុស្តិ៍ពីម្សិលមិញថា លោកអភិបាលខេត្ត ជាវ តាយ បានកោះហៅលោក និងម្ចាស់ទូកទេសចរណ៍ផ្សេងទៀតចំនួន ១៤ នាក់ ដែលកំពុងប្រកបមុខរបរផ្នែកសេវាកម្មទេសចរណ៍នៅតាមបណ្ដោយព្រែកកំពង់បាយ ឬព្រែកកំពត ដើម្បីជូនដំណឹងពីការផ្លាស់ប្ដូរទីតាំងទទួលភ្ញៀវទេសចរឱ្យទៅនៅកន្លែងផ្សេងវិញ។
លោកបានបន្តថា ម្ចាស់ទូកទេសចរណ៍ទាំងអស់នឹងត្រូវប្ដូរទៅចតទូកនៅទល់មុខសាលាខេត្តកំពតវិញរហូតដល់គល់ស្ពានចាស់ស្ថិតនៅភូមិទ្វីខាងត្បូង សង្កាត់អណ្តូងខ្មែរ ក្រុងកំពតត្រឹមថ្ងៃទី ១៥ ខែធ្នូ ឆ្នាំ ២០១៩ ខាងមុខនេះ។ ទីតាំងកន្លែងផ្សេងនេះនឹងមានបញ្ហាប្រឈមខ្លាំងជាមួយនឹងចរាចរណ៍ ព្រោះផ្លូវចូលទៅរកទូកតូចចង្អៀត គ្មានកន្លែងចតរថយន្ត ម៉ូតូ។
លោកបញ្ជាក់ថា៖ «ពួកខ្ញុំមិនមានអ្វីតវ៉ាទេ បើថ្នាក់លើគេតម្រូវមកអ៊ីចឹង ប៉ុន្ដែនៅកន្លែងថ្មីនេះ ពួកខ្ញុំបារម្ភរឿងផ្លូវចូលទៅរកទូកនេះតូចពេក ហើយស្ពានមានតែមួយ ហើយនៅតំបន់ហ្នឹង គឺស្ទះចរាចរណ៍ខ្លាំងណាស់។ បើដូរទីតាំងបែបនេះ ពួកខ្ញុំត្រូវរើរុះអីវ៉ាន់ ហើយវាអាចបែកបាក់មួយចំនួនទៀត។ ជាពិសេសភ្ញៀវធ្លាប់មករកទូកយើងនៅកន្លែងចាស់នេះ ពួកគាត់នឹងមិនស្គាល់កន្លែងថ្មីនេះ អ៊ីចឹងយើងត្រូវចំណាយពេលផ្សព្វផ្សាយប្រាប់ភ្ញៀវពីទីតាំងថ្មីហ្នឹង»។
ជាមួយគ្នានេះលោក ប៉ុន រ៉ា ក៏បានសំណូមពរដល់រដ្ឋបាលខេត្តកំពតជួយរៀបចំទីតាំងកន្លែងថ្មីនេះឲ្យមានសោភណភាពជាងមុន ហើយត្រូវបែងចែកកន្លែងចតទូកឱ្យមានតម្លាភាព ដើម្បីចៀសវាងបាតុភាពណាមួយកើតឡើងនាពេលក្រោយទៀត។ ព្រោះប្រសិនបើបែងចែកទីតាំងចតទូកមិនស្មើភាពគ្នា អាចនឹងមានទំនាស់កើតឡើងរវាងអាជីវករ និងអាជីវករដូចគ្នា៕
