The Phnom Penh Post Search

Search form




Logo of Phnom Penh Post newspaper Phnom Penh Post - ម្ចាស់​បែត្រី​បំផ្លាស់​ទី​មក​ទន្លេសាប​ព្រោះ​ត្រី​ងាប់

ម្ចាស់​បែត្រី​បំផ្លាស់​ទី​មក​ទន្លេសាប​ព្រោះ​ត្រី​ងាប់

Content image - Phnom Penh Post
ម្ចាស់​បែត្រី​បំផ្លាស់​ទី​មក​ទន្លេសាប​ព្រោះ​ត្រី​ងាប់។ ផា លីណា

ម្ចាស់​បែត្រី​បំផ្លាស់​ទី​មក​ទន្លេសាប​ព្រោះ​ត្រី​ងាប់

ភ្នំពេញ: ម្ចាស់​បែត្រី​មួយ​ចំនួន​ដែល​ជា​ជនជាតិ​ខ្មែរ​អ៊ិស្លាម​រស់នៅ​តាម​ច្រាំង​ទន្លេសាប​ក្នុង​តំបន់​ច្រាំង​ចំរេះ​ថ្មីៗ​នេះ​បាន​ផ្លាស់ប្ដូរ​ទីតាំង​ដោយ​ធ្វើ​ដំណើរ​តាម​ទូក​ក្នុង​ដង​ទន្លេសាប​នា​រាជធានី​ភ្នំពេញ​ដោយសារ​តែ​ពួកគេ​បាន​អះអាង​ថា​ត្រី​ក្នុង​បែ​ដែល​ពួកគេ​កំពុង​ចិញ្ចឹម​បាន​ងាប់​ច្រើន​ដោយ​ពុល​នៅ​ក្នុង​រដូវក្តៅ​ឆ្នាំ​នេះ ដើម្បី​មក​កាន់​តំបន់​ជ្រោយ​ចង្វារ​ជា​ទីតាំង​ទឹក​ថ្មី​ ខណៈ​ដែល​អាជ្ញាធរ​អះអាង​ថា​ពួកគាត់​តែង​បំផ្លាស់​ទី​រាល់​ឆ្នាំ​នៅ​ពេល​មាន​ត្រី​ពុល​ងាប់។

លោក ថិន ថាន អាយុ ៣៤ ឆ្នាំ​ជនជាតិ​ខ្មែរ​អ៊ីស្លាម​ដែល​ជា​ម្ចាស់​បែ​មួយ​បាន​ឲ្យ​ដឹង​ថា​ឆ្នាំ​នេះ​ត្រី​ចិញ្ចឹម​ក្នុង​បែ​គាត់​បាន​ងាប់​អស់​ជាង ១ តោន​ដោយសារ​ទឹក និង​អាកាសធាតុ​ក្តៅ​រាល់​ឆ្នាំ​នា​ខែ​នេះ​ទើប​នាំ​គ្នា​មក​បំផ្លាស់​ទីលំនៅ​បណ្ដែត​ទឹក​ដើម្បី​ប្តូរ​ទឹក​ដោយ​សង្ឃឹម​ថា​ត្រី​ក្នុង​បែ​នឹង​មិន​បន្ត​ងាប់​ទៀត។

លោក ថាន ថ្លែង​ថា៖ «ខ្វល់​ចិត្ត​ណាស់​ឆ្នាំ​នេះ​ត្រី​ក្នុង​បែ​ពុល​ងាប់​ច្រើន​ជាង​រាល់​ឆ្នាំ​ងាប់​អស់ ១ តោន​ហើយ​ទើប​ខ្ញុំ​បន្លាស់​ទី​មក​តំបន់​នេះ​ដើម្បី​ប្តូរ​ទឹក»។

លោក ពេ្រជ សារឿន ចៅ​សង្កាត់​ជ្រោយចង្វារ​បាន​ឲ្យ​ដឹង​ថា​អាជ្ញាធរ​មិន​បាន​អនុញ្ញាត​ឲ្យ​ពួកគាត់​បន្លាស់​ទី​ទេ​តែ​ពេល​ខ្លះ​ដោយសារ​ត្រី​គាត់​ងាប់​ច្រើន​ទើប​មិន​អាច​ហាមឃាត់​ពួកគាត់​បាន។ លោក សារឿន ថ្លែង​ថា៖ «ខ្ញុំ​នឹង​ចាត់​ឲ្យ​គេ​ចុះ​ទៅ​មើល​បញ្ហា​គឺ​ត្រី​ពួកគាត់​ងាប់​មក​បន្លាស់ប្តូរ​ទឹក​មួយ​រយៈ»។

លោក ណៅ ធួក រដ្ឋលេខាធិការ​ក្រសួង​កសិកម្ម​រុក្ខាប្រមាញ់ និង​នេសាទ​បាន​មាន​ប្រសាសន៍​ថា​ស្ថានភាព​នៃ​ការ​ផ្លាស់ទី​របស់​អ្នក​ចិញ្ចឹម​ត្រី​តាម​បែ​គឺ​កើត​មាន​ជា​រៀងរាល់​ឆ្នាំ​នា​រដូវក្តៅ​ដោយសារ​ត្រី​របស់​គេ​ពុល​ងាប់។

លោក​បាន​មាន​ប្រសាសន៍​ថា៖ «គាត់​ផ្លាស់ប្តូរ​ជា​រៀងរាល់​ឆ្នាំ​ទេ​ដោយសារ​ត្រី​គាត់​ពុល​ងាប់​ដោយសារ​គួបផ្សំ​នឹង​អាកាសធាតុ​ក្តៅ»៕

អត្ថបទគួរចាប់អារម្មណ៍