ទិដ្ឋភាពទីតាំងនៃបន្ទប់ជួល ១ កន្លែងក្នុងខណ្ឌចំការមនពីម្សិលមិញ។ ហុង មិនា
ភ្នំពេញៈ ម្ចាស់ផ្ទះ ឬបន្ទប់ជួលមួយចំនួនបានសម្រេចផ្អាកយកថ្លៃឈ្នួលបន្ទប់មួយរយៈពេល ខណៈអ្នកខ្លះបញ្ចុះតម្លៃពី ៤០ ទៅ ៥០ ភាគរយ ដើម្បីជួយសម្រាលបន្ទុកដល់អ្នកជួល បន្ទាប់ពីបានមើលឃើញពីការលំបាកក្នុងការរកប្រាក់ចំណូលមកផ្គត់ផ្គង់ជីវភាពប្រចាំថ្ងៃ ដោយសារការរីករាលដាលនៃជំងឺកូវីដ ១៩ ពិសេសការចម្លងក្នុងព្រឹត្តិការណ៍សហគមន៍ ២០ កុម្ភៈ។
ម្ចាស់អាជីវកម្មផ្ទះជួល ដែលស្ថិតក្នុងសង្កាត់ស្វាយរលំ ក្រុងតាខ្មៅ ខេត្តកណ្តាល លោក ឈឿន ប៊ុនឆន បានប្រាប់ភ្នំពេញប៉ុស្តិ៍ពីម្សិលមិញថា លោកបានសម្រេចផ្អាកយកថ្លៃឈ្នួលបន្ទប់ពីអ្នកជួលទាំងអស់ដែលមានទាំងកម្មកររោងចក្រ និងបុគ្គលិកឯកជនរយៈពេល ៣ ខែ គឺចាប់ពីខែមីនា មេសា និងខែឧសភា។
លោកបានប្រាប់ថា៖ «ខ្ញុំមានបន្ទប់ជួល ៦៩ បន្ទប់ ដែលភាគច្រើនជាកម្មកររោងចក្រជួលស្នាក់នៅ ហើយថ្ងៃនេះខ្ញុំសម្រេចមិនយកថ្លៃឈ្នួល ៣ ខែ ប៉ុន្តែថ្លៃទឹក និងភ្លើងពួកគាត់ជាអ្នកចេញដោយខ្លួនឯង។ ពួកគេខ្លះបានអរគុណខ្ញុំដោយក្តីរំភើបលាយឡំនឹងទឹកភ្នែកផងដែរ»។
លោក ឈឿន ប៊ុនឆន បានបន្ថែមថា គ្រប់អាជីវកម្មសុទ្ធតែជួបការលំបាកទាំងអស់នៅទូទាំងប្រទេស ប៉ុន្តែមានអ្នកខ្លះយល់ថា រោងចក្រមិនទាន់បិទទ្វារទេ ដូចនេះកម្មកររោងចក្រមិនទាន់ពិបាកទេ តែសម្រាប់រូបលោកបែរជាគិតខុសពីនោះទៅវិញ។
ម្យ៉ាងវិញទៀត រោងចក្រនៅតំបន់របស់លោកនោះមានកម្មករមួយចំនួនបានចាប់ផ្តើមបាត់បង់ការងារថែមម៉ោង និងគ្មានអីវ៉ាន់សម្រាប់ធ្វើច្រើនដូចមុនទៀតទេ។
លោកបានអំពាវនាវដល់ម្ចាស់អាជីវកម្មផ្ទះជួលផ្សេងៗថា៖ «បងប្អូនមានបន្ទប់ជួលទាំងឡាយ បើមានអ្វីជួយបានជួយទៅ គ្មានបរទេសណាមកជួយគ្នាយើងក្រៅពីខ្មែរជួយខ្មែរទេ»។
ចំណែកលោក យ៉ែម សុថានី ដែលមានបន្ទប់ជួលជិត ១០ បន្ទប់នៅសង្កាត់ទឹកថ្លា ខណ្ឌសែនសុខ បានសម្រេចបញ្ចុះតម្លៃបន្ទប់ជួលរបស់លោកចំនួន ៤០ ភាគរយផងដែរ ក្នុងរយៈពេល ២ ខែគឺខែមេសា និងខែឧសភា។
លោកបានបញ្ជាក់ប្រាប់ ភ្នំពេញ ប៉ុស្តិ៍ថា៖ «ខ្ញុំអាចបញ្ចុះតម្លៃបានត្រឹមតែ ៤០ ភាគរយទេ ដោយសារតម្លៃបន្ទប់ជួលរបស់ខ្ញុំ ខ្ញុំយកតម្លៃខ្ពស់បំផុតតែ ៥៥ ដុល្លារប៉ុណ្ណោះ ក្នុង ១ ខែ ហើយការបញ្ចុះនេះ គឺដើម្បីជួយទប់លំនឹងសេដ្ឋកិច្ចចូលរួមកាត់បន្ថយការចំណាយមួយផ្នែករបស់បងប្អូនអ្នកជួលបន្ទប់របស់ខ្ញុំក្នុងអំឡុងផ្ទុះជំងឺកូវីដ ១៩ នេះ»។
លោក យ៉ែម សុថានី បានបន្តថា ក្រោយពីបញ្ចុះតម្លៃរួច តម្លៃបន្ទប់នៅត្រឹមតែពី ១៨ ដុល្លារ ទៅ ៤២ ដុល្លារប៉ុណ្ណោះ ក្នុង ១ ខែ។
ចំណែកម្ចាស់អាជីវកម្មបន្ទប់ជួលម្នាក់ទៀតបានបង្ហោះលើបណ្តាញសង្គមរបស់លោកដោយប្រកាសចូលរួមដល់សេដ្ឋកិច្ចពលរដ្ឋខ្មែរផងដែរដោយលោកបានបញ្ចុះថ្លៃបន្ទប់ជួលរហូតដល់ ៥០ ភាគរយ នៃតម្លៃបន្ទប់ដោយមិនបានកំណត់រយៈពេលនៃការបញ្ចុះនេះឡើយ។
លោកបានសរសេរថា៖ «ក្នុងនាមខ្ញុំជាម្ចាស់បន្ទប់ជួលទាំង ២០ បន្ទប់ សូមចូលរួមជួយដល់សេដ្ឋកិច្ចបងប្អូនដោយវីរុសកូរ៉ូណាទើបលំបាក និងប៉ះពាល់ដល់ចំណូលបងប្អូនជាច្រើន ខ្ញុំសូមចុះថ្លៃបន្ទប់ ៥០% រហូតដល់ប្រទេសជាតិប្រសើរឡើងវិញ»។
អ្នកនាង ស្រី យ៉ា ជាកម្មការិនីរោងចក្រកាត់ដេរ ដែលបានមកធ្វើការនៅទីក្រុងភ្នំពេញ និងបានជួលបន្ទប់ស្នាក់នៅតាំងពីឆ្នាំ ២០១២ មកបានថ្លែងថា អ្នកនាងមិនទាន់ដឹងថា តើម្ចាស់បន្ទប់ជួលនឹងបញ្ចុះតម្លៃឬទេ ប៉ុន្តែកាលពីឆ្នាំមុន ម្ចាស់បន្ទប់ជួលបានចុះរហូតដល់ ៥០ ភាគរយ គឺពី ៥០ ដុល្លារ មក ២៥ ដុល្លារ ក្នុង ១ ខែ។
អ្នកនាងបានស្នើសុំដល់ម្ចាស់បន្ទប់ជួលរបស់អ្នកនាងឱ្យបញ្ចុះតម្លៃជួលបន្ទប់ដូចឆ្នាំមុនដែរ ដោយសារពេលនេះកម្មករបាត់បង់ចំណូលច្រើន និងជួបបញ្ហាជីវភាពច្រើន ដោយសារជំងឺកូវីដ ១៩ នេះ ហើយនាងសង្ឃឹមថាម្ចាស់បន្ទប់ជួលនឹងមានការយោគយល់លើបញ្ហារបស់កម្មករ។
ទាក់ទងនឹងការបញ្ចុះតម្លៃបន្ទប់ជួលនេះលោក ហ្វា សាលី ប្រធានសម្ព័ន្ធសហជីពជាតិបានសរសើរដល់ទឹកចិត្តម្ចាស់ផ្ទះ ឬបន្ទប់ជួលទាំងនេះហើយលោកក៏បានអំពាវនាវដល់អ្នកមានបន្ទប់ជួលទាំងអស់គួរតែយោគយល់ដល់កម្មករក៏ដូចជា អ្នកដែលមានការលំបាកក្នុងកាលៈទេសៈនេះ។
លោកថា៖ «ខ្ញុំក៏សុំស្នើដល់បងប្អូនម្ចាស់ផ្ទះទាំងអស់នៅក្នុងប្រទេសរបស់យើង ដែលមានផ្ទះជួល គួរតែយោគយល់ មិនថា ជួលសម្រាប់បងប្អូនក្នុងវិស័យអីទេ គឺគួរតែជួយគ្នាក្នុងគ្រានេះក្នុងនាមជាខ្មែរដូចគ្នា»។
លោក ហ្វា សាលី បានបន្ថែមថា ក្រសួងការងារ និងបណ្តុះបណ្តាលវិជ្ជាជីវៈគួរតែចូលរួមជួយអំពាវនាវឱ្យម្ចាស់ផ្ទះបញ្ចុះតម្លៃជួលសម្រាប់កម្មករ-និយោជិត ប៉ុន្តែអាជ្ញាធរមិនមានសិទ្ធិបង្ខំពួកគាត់នោះទេ គឺជាការសម្រេចរបស់ម្ចាស់ផ្ទះក្នុងការបញ្ចុះតម្លៃនេះ។
ចំណែកលោក ប៉ាវ ស៊ីណា ប្រធានសហភាពចលនាកម្មករកម្ពុជាបានប្រាប់ ភ្នំពេញ ប៉ុស្តិ៍ ដែរថា ប្រទេសកម្ពុជា បានអនុវត្តនូវទីផ្សារសេរីដែលមានការពិបាកក្នុងការស្នើឱ្យស្ថាប័នពាក់ព័ន្ធចេញលិខិត និងបទប្បញ្ញត្តិនានា ដើម្បីឱ្យម្ចាស់ផ្ទះបញ្ចុះថ្លៃជួល ឬការមិនយកថ្លៃជាដើម។
លោកបានបញ្ជាក់ថា៖ «វាជាការពិបាក ប៉ុន្តែខ្ញុំយល់ថា យើងអាចធ្វើបាន ដោយការអំពាវនាវរបស់ស្ថាប័នរដ្ឋាភិបាល ប៉ុន្តែការដាក់កំហិតគឺជាឧបសគ្គ តែអ្វីដែលសំខាន់គឺយើងពឹងផ្អែកទៅលើលទ្ធភាពនៃការជួយគ្នាក្នុងការបញ្ចុះតម្លៃ ឬមិនយកថ្លៃតែម្តង»។
លោក ប៉ាវ ស៊ីណា មិនមានជាតួលេខថាតើមានកម្មករនិយោជិតប៉ុន្មានភាគរយដែលនៅបន្ទប់ជួលទេ ប៉ុន្តែតាមការសង្កេតរបស់លោក កម្មករដែលស្នាក់នៅផ្ទះ ឬបន្ទប់ជួលមានចំនួនច្រើន។
មន្ត្រីក្រសួងការងារ និងបណ្តុះបណ្តាលវិជ្ជាជីវៈមិនអាចទាក់ទងសុំការអធិប្បាយក្នុងករណីនេះបានទេ ប៉ុន្តែលោកនាយករដ្ឋមន្ត្រី ហ៊ុន សែន ធ្លាប់បានអំពាវនាវដល់ម្ចាស់ផ្ទះជួល ឬទីតាំងសម្រាប់ជួលឱ្យយោគយល់កុំដំឡើងថ្លៃ ឬអាចបញ្ចុះតម្លៃតាមដែលអាចធ្វើបានក្នុងកាលៈទេសៈនេះ។
លោក ហ៊ុន សែន បានថ្លែងក្នុងសន្និសីទកាសែតមួយកាលពីខែមីនា ឆ្នាំមុនថា៖ «ការបង់ថ្លៃឈ្នួលផ្ទះ ការបង់រំលស់ផ្ទះ បង់រំលស់រថយន្តព្រមទាំងការបង់រំលស់អ្វីៗគួរគប្បីម្ចាស់ទីតាំង និងអតិថិជនដែលជាអ្នកបង់រំលស់ត្រូវផ្តល់នូវការយោគយល់គ្នាទៅវិញទៅមក ដើម្បីចូលរួមសម្រួលការលំបាកក្នុងកាលៈទេសៈប្រទេសកម្ពុជាកំពុងតែជួបវិបត្តិការរាតត្បាតនៃវីរុស COVID-19 នេះ»៕
វីដេអូ៖
.jpg)
