.jpg)
សកម្មភាពរថយន្តដែលកំពុងបើកបរលើដងផ្លូវមួយក្នុងខណ្ឌមានជ័យ ម្សិលមិញ។ ហុង មិនា
ភ្នំពេញ៖ ក្រសួងសាធារណការ និងដឹកជញ្ជូន ណែនាំប្រជាពលរដ្ឋ និងម្ចាស់យានយន្តដែលកំពុងកាន់កាប់យានយន្តទិញ-លក់តៗគ្នា ហើយរកម្ចាស់ដើមមិនឃើញ ដែលមានបំណងចង់ផ្ទេរកម្មសិទ្ធិយានយន្តត្រូវដាក់ពាក្យសុំផ្ទេរកម្មសិទ្ធិ ដោយត្រូវភ្ជាប់ជាមួយឯកសារមួយចំនួនដើម្បីបញ្ជាក់អត្តសញ្ញាណជាម្ចាស់យានយន្ត និងយានយន្ត។
សេចក្តីណែនាំរបស់ក្រសួងសាធារណការស្តីពី «ការផ្ទេរកម្មសិទ្ធិយានយន្ត ដែលរកម្ចាស់ដើមមិនឃើញ» ចុះថ្ងៃទី ១២ ខែមីនា ដែលភ្នំពេញប៉ុស្ដិ៍ទទួលបានពីម្សិលមិញបញ្ជាក់ថា ក្រសួងសាធារណការ និងដឹកជញ្ជូនសូមធ្វើការណែនាំដល់អ្នកកំពុងកាន់កាប់យានយន្តដែលបានទិញ-លក់តៗគ្នា ហើយរកម្ចាស់ដើមមិនឃើញ ដែលមានបំណងផ្ទេរកម្មសិទ្ធិយានយន្ត ត្រូវដាក់ពាក្យសុំផ្ទេរកម្មសិទ្ធិយានយន្ត ដោយភ្ជាប់នូវសំណុំឯកសារមួយចំនួន។
សេចក្ដីណែនាំបន្តថា ឯកសារទាំងនោះ ដូចជាពាក្យសុំផ្ទេរកម្មសិទ្ធិយានជំនិះមានផ្តិតស្នាមមេដៃអ្នកស្នើសុំ និងមានបិទសំណៅលេខកាល់ (លេខតួ ឬសាក់ស៊ី) ដែលចម្លងជាក់ស្ដែងពីយានយន្ត បណ្ណសម្គាល់ (ច្បាប់ដើម) និងស្លាកលេខសម្គាល់យានជំនិះ (ករណីផ្ទេរកម្មសិទ្ធិឆ្លងរាជធានី-ខេត្ត)។ ចំពោះអត្តសញ្ញាណ អ្នកលក់ និងអ្នកទិញ ពលរដ្ឋខ្មែរ ត្រូវមាន អត្តសញ្ញាណប័ណ្ណសញ្ជាតិខ្មែរច្បាប់ចម្លងដែលមានបញ្ជាក់ ពីអាជ្ញាធរមានសមត្ថកិច្ច។ រីឯជនបរទេស ត្រូវមានលិខិតឆ្លងដែន ទិដ្ឋាការមានសុពលភាព និងលិខិតបញ្ជាក់ទីលំនៅបច្ចុប្បន្នចេញដោយអាជ្ញាធរមានសមត្ថកិច្ច។
សេចក្ដីណែនាំបន្ថែមថា ក្នុងនោះ ម្ចាស់យានយន្តត្រូវមានបង្កាន់ដៃពន្ធប្រថាប់ត្រាលើការផ្ទេរកម្មសិទ្ធិយានយន្តលិខិតលក់-ទិញ កិច្ចសន្យាធានាដែលមានបញ្ជាក់ពីប៉ុស្ដិ៍នគរបាលរដ្ឋបាល។ ទម្រង់នៃពាក្យសុំផ្ទេរកម្មសិទ្ធិយានយន្ត លិខិតលក់-ទិញ និងកិច្ចសន្យាធានាដែលមាននៅក្នុងឧបសម្ព័ន្ធនៃសេចក្តីណែនាំនេះ។
ក្រសួងបញ្ជាក់ថា៖ «ក្រោយពីទទួលបានសេចក្តីណែនាំនេះ អគ្គនាយកនៃអគ្គនាយកដ្ឋានដឹកជញ្ជូន នៃក្រសួងសាធារណការ និងដឹកជញ្ជូនគ្រប់មន្ទីរសាធារណការ និងដឹកជញ្ជូនរាជធានី-ខេត្ត ប្រធានស្ថាប័នពាក់ព័ន្ធក្រោមឱវាទក្រសួងសាធារណការ និងដឹកជញ្ជូន ត្រូវអនុវត្តតាមភារកិច្ចរៀងៗខ្លួនឲ្យមានប្រសិទ្ធភាព និងដោយស្មារតីទទួលខុសត្រូវខ្ពស់ ចាប់ពីថ្ងៃចុះហត្ថលេខារហូតថ្ងៃទី ៣០ ខែ មិថុនា ឆ្នាំ ២០២០»។
លោក ប៉ាល់ ច័ន្ទតារា រដ្ឋលេខាធិការ និងជាអ្នកនាំពាក្យក្រសួងសាធារណការ និងដឹកជញ្ជូន ពីម្សិលមិញបានបដិសេធការធ្វើអត្ថាធិប្បាយជុំវិញតម្លៃសេវាកាត់ឈ្មោះ ឬផ្ទេរសិទ្ធិកាន់កាប់យានយន្តនេះ ដោយលោកអះអាងថា កំពុងជាប់រវល់ប្រជុំ។
ឯលោក ហ៊ាង សុទ្ធាយុត្ត ប្រធាននាយកដ្ឋានព័ត៌មាន និងទំនាក់ទំនងសាធារណៈនៃក្រសួងសាធារណការ និងដឹកជញ្ជូន ក៏បដិសេធការធ្វើអត្ថាធិប្បាយដែរ ដោយលោកកំពុងជាប់រវល់ប្រជុំ។
លោក គង់ រតនៈ នាយកវិទ្យាស្ថានសុវត្ថិភាពចរាចរណ៍គាំទ្រចំពោះការសម្របសម្រួលឲ្យម្ចាស់យានយន្ត និងពលរដ្ឋទាំងអស់មានឱកាសផ្ទេរកម្មសិទ្ធិយានយន្តដោយមិនចាំបាច់ស្វែងរកម្ចាស់ដើមយានយន្តដែលគាត់បានទិញបន្តពីអ្នកផ្សេង ព្រោះនីតិវិធីនេះមិនបង្កការលំបាកវែងឆ្ងាយដល់ពួកគាត់។
លោកថ្លែងពីម្សិលមិញថា៖ «កន្លងមកនេះមានករណីគ្រោះថ្នាក់ចរាចរណ៍ ចោរប្លន់ និងករណីបាត់បង់យានយន្ត ហើយម្ចាស់យានយន្តបានមកដាក់ពាក្យប្ដឹងសមត្ថកិច្ចឲ្យជួយតាមរក គឺសមត្ថកិច្ច គាត់អាចរកឃើញត្រឹមម្ចាស់ដើម នៃយានយន្តហ្នឹង។ ប៉ុន្ដែគាត់មិនអាចស្វែងរកម្ចាស់ទី២ ដែលកំពុងកាន់កាប់យានយន្តនេះទេ ព្រោះពិបាកស្រាវជ្រាវ។ ដូច្នេះវាជាឧបសគ្គសម្រាប់សមត្ថកិច្ចក្នុងការស្រាវជ្រាវរកអត្តសញ្ញាណម្ចាស់យានយន្តដែលកំពុងកាន់កាប់»។
លោក រតនៈ បន្តថា លោកជំរុញឲ្យក្រសួងសាធារណការ និងដឹកជញ្ជូនរកវិធីកែសម្រួលនីតិវិធីកុំឲ្យមានការបំពេញបែបបទស្មុគស្មាញខ្លាំងពេក ដើម្បីឲ្យម្ចាស់យានយន្តងាយស្រួលយល់ និងបំពេញបែបបទ។ ចំពោះតម្លៃសេវាគួរតែសម្រួល ឲ្យទាបជាងតម្លៃបច្ចុប្បន្នតាមដែលអាចធ្វើទៅបាន ដើម្បីពលរដ្ឋមានលទ្ធភាពកាត់ឈ្មោះ ឬផ្ទេរឈ្មោះយានយន្តរបស់ខ្លួន។
តាមលិខិតរបស់ក្រសួងសេដ្ឋកិច្ច និងហិរញ្ញវត្ថុចុះថ្ងៃ ១៧ ខែ កុម្ភៈ ឆ្នាំ ២០២០ ស្តីពីការអនុគ្រោះឲ្យបង់ពន្ធលើមធ្យោបាយដឹកជញ្ជូន និងយានជំនិះគ្រប់ប្រភេទ ចំនួន ៣ ឆ្នាំចុងក្រោយចាប់ពីឆ្នាំ ២០១៧-២០១៩ គឺមានការលើកលែងប្រាក់ពិន័យទោសទណ្ឌលើរថយន្តមិនបានបង់ពន្ធលើមធ្យោបាយដឹកជញ្ជូន និងយានជំនិះគ្រប់ប្រភេទពីមុនមក នៅពេលម្ចាស់យានយន្តដាក់ពាក្យស្នើសុំបង់ពន្ធប្រថាប់ត្រាផ្ទេរកម្មសិទ្ធិយានយន្ត៕
