ភ្នំពេញៈ មន្ត្រីនគរបាលចរាចរណ៍បានប្រាប់ភ្នំពេញប៉ុស្តិ៍នៅព្រឹកម្សិលមិញថា ម្ចាស់រថយន្តបង្កហេតុគ្រោះថ្នាក់ចរាចរណ៍បណ្ដាលឲ្យនិស្សិតស្រីម្នាក់ស្លាប់កាលពីរសៀលថ្ងៃអង្គារបានចូលខ្លួនឆ្លើយបំភ្លឺនៅការិយាល័យនគរបាលចរាចរណ៍រាជធានីភ្នំពេញ ខណៈអ្នកបើកបរគេចខ្លួនបាត់ស្របពេលមានការថ្កោលទោសពីការបើកបរលឿនខ្វះសីលធម៌ និងឃោរឃៅ។
លោក សែម សុគន្ធា ប្រធានការិយាល័យចរាចរណ៍ជើងគោករាជធានីភ្នំពេញថ្លែងថា លោក យិន ហ្គិច ម្ចាស់រថយន្ត Range Rover ពាក់ស្លាកលេខ 2AF-7777 ដែលបានបង្កគ្រោះថ្នាក់ចរាចរណ៍កាលពីថ្ងៃអង្គារនៅតាមបណ្ដោយផ្លូវ ៣១៧ កែងផ្លូវ ៥២៨ ក្នុងសង្កាត់បឹងកក់ ១ ខណ្ឌទួលគោករាជធានីភ្នំពេញបណ្ដាលឲ្យនិស្សិតស្រីម្នាក់ឈ្មោះ ឌុំ រីដា អាយុ ២២ ឆ្នាំ រៀននៅសាលាផារ៉ាហ្គនអតីតសាលាហ្សាមេនបណ្ដាលឲ្យស្លាប់ភ្លាមៗនៅកន្លែងកើតហេតុនោះបានចេញមុខមកចូលរួមទទួលខុសត្រូវ លើករណីនេះ។
លោក សុគន្ធា បានថ្លែងថា៖ «ក្នុងជំហានដំបូងនេះ លោក យិន ហ្គិច ដែលអះអាងថា ជាម្ចាស់រថយន្តបង្កហេតុបានចេញមុខមកចូលរួមទទួលខុសត្រូវចំពោះមរណភាពរបស់ជនរងគ្រោះនេះដោយគាត់បានទទួលស្គាល់ថា គាត់ គឺជាម្ចាស់រថយន្តបង្កហេតុខាងលើប្រាកដមែន។ ប៉ុន្តែគាត់បានបដិសេធថា គាត់មិនបានរួមដំណើរ ឬជាអ្នកបើករថយន្តបង្កហេតុនៅថ្ងៃកើតហេតុនោះទេ»។
លោក សុគន្ធា បានបន្តថា៖ «ទោះជាបែបណា គាត់ [យិន ហ្គិច] មិនបានបញ្ជាក់អំពីអត្តសញ្ញាណអ្នកបើករថយន្តបង្កហេតុនោះទេ»។
យ៉ាងណាក្ដី បើតាមលោក សុគន្ធា នៅពេលនេះក្រុមសមត្ថកិច្ចជំនាញកំពុងបន្តនីតិវិធីស៊ើបសួរលោក ហ្គិច ដើម្បីស្វែងរកអត្តសញ្ញាណអ្នកបើកបររថយន្តបង្កដើម្បីនាំខ្លួនទៅឲ្យតុលាការផ្ដន្ទាទោសតាមផ្លូវច្បាប់ ខណៈពេលនេះគេបានគេចពីការទទួលខុសត្រូវក្នុងរឿងនេះ។
ជុំវិញករណីគ្រោះថ្នាក់ចរាចរណ៍ដ៏គួរឲ្យរន្ធត់នេះដែរ លោកនាយករដ្ឋមន្ត្រី ហ៊ុន សែន បានលើកឡើងនៅក្នុងពិធីចែកសញ្ញាបត្រដល់គរុសិស្ស-និស្សិតជិត ២ ពាន់នាក់ នៅឯវិទ្យាស្ថានជាតិអប់រំកាលពីម្សិលមិញថាបញ្ហាគ្រោះថ្នាក់ចរាចរណ៍កំពុងសម្លាប់មនុស្សច្រើនជាងសម័យសង្គ្រាមទៅទៀត។ ជាមួយគ្នានេះលោកបានអំពាវនាវឲ្យសមត្ថកិច្ចពាក់ព័ន្ធពិសេសកម្លាំងសមត្ថកិច្ចនគរបាលចរាចរណ៍បង្កើនការយកចិត្តទុកដាក់ទៅលើបញ្ហានេះ។
លោកបានបញ្ជាក់ថា៖ «ករណីចរាចរណ៍កាលពីម្សិលមិញ ឃើញគេបញ្ចាំងចុះបញ្ចាំងឡើង រឿងបញ្ហាបុកនិស្សិតស្លាប់ ទៅតាមរកឱ្យឃើញបណ្តាលមកពីអី គឺចេញមកពីអត់គុណធម៌ហ្នឹងឯង។ បើយើងជិះកង់ទោះបីជាយើងជិះលឿនយឺតប៉ុនណា គង់លឿនជាងអ្នកដើរដែរហើយបើយើងជិះម៉ូតូ បើទោះបីជាយើងជិះលឿន ជិះយឺតប៉ុនណា ក៏គង់លឿនជាងកង់ លឿនជាងអ្នកដើរដែរ»។
ដោយឡែកអង្គភាពអ្នកនាំពាក្យរាជរដ្ឋាភិបាលកាលពីព្រឹកម្សិលមិញក៏បានចេញសេចក្ដីថ្លែងការណ៍មួយថ្កោលទោសចំពោះអ្នកបើកបររថយន្តបង្កគ្រោះថ្នាក់ដល់និស្សិតស្រីឈ្មោះ ឌុំ រីដា បណ្ដាលឲ្យស្លាប់នោះផងដែរ។ក្នុងសេចក្ដីថ្លែងការណ៍នោះ បានចាត់ទុកទង្វើរបស់អ្នកបើករថយន្តបង្កហេតុនោះថា៖ «ជាអ្នកបើកបរដែលមានឥរិយាបថឃោរឃៅ គ្មានគុណធម៌ សីលធម៌ និងបើកបរដោយភាពធ្វេសប្រហែសបង្កគ្រោះថ្នាក់ដល់អាយុជីវិតសាធារណជន»។
យោងតាមឃ្លីបវីដេអូមួយដែលត្រូវបានគេបង្ហោះនិងចែករំលែកតាមបណ្ដាញសង្គម Facebook កាលពីថ្ងៃអង្គារបានបង្ហាញអំពីគ្រោះថ្នាក់ចរាចរណ៍ដ៏តក់ស្លុតមួយដែលបង្កឡើងដោយអ្នកបើកបររថយន្ត Range Rover ពាក់ស្លាកលេខភ្នំពេញ 2AF-7777 មិនស្គាល់អត្តសញ្ញាណដែលបានបើកបរក្នុងល្បឿនលឿន ហើយបានបុកពេញទំហឹងទៅលើនារីជនរងគ្រោះម្នាក់ដែលក្រោយមកត្រូវបានគេស្គាល់ថា ជាអតីតសិស្សពូកែទូទាំងប្រទេសផ្នែកភាសាខ្មែរឈ្មោះ ឌុំ រីដា ខណៈជនរងគ្រោះកំពុងជិះម៉ូតូបណ្ដាលឲ្យស្លាប់ភ្លាមៗនៅកន្លែងកើតហេតុត្រង់ចំណុចផ្លូវកែង ៣១៧ និង ៥២៨ ក្នុងសង្កាត់បឹងកក់ ១ ខណ្ឌទួលគោក រាជធានីភ្នំពេញ។អ្នកបើករថយន្តបង្កមិនបានឈប់រថយន្តដើម្បីទទួលខុសត្រូវលើជនរងគ្រោះឡើយ គឺបានព្យាយាមបើករត់គេចខ្លួន និងបានឈប់រថយន្តចោលនៅលើដងផ្លូវក្នុងតំបន់សឡា ស្ថិតក្នុងខណ្ឌមានជ័យ។
បន្ទាប់ពីមានឧបទ្ទវហេតុនេះ ក្រុមសមត្ថកិច្ចបាននាំយករថយន្តបង្កនោះទៅរក្សាទុកនៅការិយាល័យនគរបាលចរាចរណ៍រាជធានីភ្នំពេញដើម្បីកសាងសំណុំរឿងបញ្ជូនទៅតុលាការតាមនីតិវិធីច្បាប់ ខណៈសពនិស្សិតរងគ្រោះរូបនេះត្រូវបានក្រុមគ្រួសារសាច់ញាតិនាំយកទៅធ្វើបុណ្យនៅឯស្រុកកំណើតក្នុងភូមិកំពង់ដំរី ឃុំព្រែកតាមាក់ ស្រុកខ្សាច់កណ្តាល ខេត្តកណ្តាល។
កាលពីព្រឹកម្សិលមិញ មានសេចក្ដីរាយការណ៍ពីអាជ្ញាធរមូលដ្ឋានថា លោក យិន ហ្គិច បានផ្ដល់ថវិកាចំនួន ៥ ០០០ ដុល្លារ តាមរយៈតំណាងរបស់ខ្លួនជួយដល់គ្រួសារសពដើម្បីរៀបចំពិធីបុណ្យសពជនរងគ្រោះ។
ជុំវិញករណីនេះ លោក អៀ ចរិយា ទីប្រឹក្សាវិទ្យាស្ថានសុវត្ថិភាពចរាចរណ៍ បានថ្លែងថា ករណីគ្រោះថ្នាក់ចរាចរណ៍ដែលបណ្ដាលឲ្យមានជនរងគ្រោះស្លាប់ ហើយជនបង្កបើករត់គេចវេះពីការទទួលខុសត្រូវបែបនេះអាជ្ញាធរគប្បី ស្រាវជ្រាវតាមស្វែងរកចាប់ខ្លួនមកផ្ដន្ទាទោសឲ្យធ្ងន់ធ្ងរទៅតាមស្ថានទម្ងន់ទោសដែលបានកំណត់ដោយច្បាប់ចរាចរណ៍ដើម្បីផ្ដល់យុត្តិធម៌ដល់ជនរងគ្រោះនិងក្រុមគ្រួសាររបស់ពួកគេ។
លោកបានបញ្ជាក់ថា៖ «ករណីបុកស្លាប់ហើយបើករត់នេះ វាបង្កឲ្យមានផលវិបាកច្រើនយ៉ាងដល់សង្គមជាតិ ដូចជាធ្វើឲ្យមាននិទ្ទណ្ឌភាពសង្គម ការមិនគោរពច្បាប់ និងធ្វើឲ្យសីលធម៌សង្គមមានការធ្លាក់ចុះកាន់តែធ្ងន់ធ្ងរដែលទាមទារឲ្យសមត្ថកិច្ច ចាត់វិធានការតឹងរ៉ឹងបំផុត និងដោយពុំមានការលើកលែងចំពោះជនបង្កគ្រោះថ្នាក់ចរាចរណ៍បែបនេះ»។
លោកបានបន្ថែមថាតាមមាត្រា ៨៥ នៃច្បាប់ចរាចរណ៍ផ្លូវគោកជនបង្កគ្រោះថ្នាក់ដល់ជនរងគ្រោះបណ្ដាលឲ្យស្លាប់ ត្រូវផ្ដន្ទាទោសជាប់ពន្ធនាគារពី ១ ឆ្នាំដល់ ៣ ឆ្នាំនិងពិន័យជាប្រាក់ពី ៤ លានរៀលទៅ ១៥ លានរៀលក្នុងករណីជនបង្កបើករត់ពីកន្លែងកើតហេតុដើម្បីគេចវេះពីការទទួលខុសត្រូវចំពោះមុខច្បាប់និងជនរងគ្រោះត្រូវផ្តន្ទាទោសឲ្យដាក់ពន្ធនាគារពី ២ ឆ្នាំទៅ ៥ ឆ្នាំនិងពិន័យជាប្រាក់ពី ១០ លានរៀលទៅ ២៥ លានរៀល៕