កំពង់ឆ្នាំង៖ នគរបាលខេត្តកំពង់ឆ្នាំង បានឃាត់ខ្លួនលោក សុខ ឧត្តម ម្ចាស់វិទ្យុ FM ៩៩.៧៥ នៅខេត្តកំពង់ឆ្នាំង និងគេហទំព័រ «រិទ្ធិសែន» បន្ទាប់ពីក្រសួងព័ត៌មាន បានសម្រេចលុបអាជ្ញាប័ណ្ណទាំងអស់របស់លោក ឧត្តម ដោយចោទពីការផ្សាយព័ត៌មានញុះញង់ឲ្យប្រជាពលរដ្ឋទន្ទ្រានយកដីរបស់រដ្ឋ អំឡុងពេលធ្វើការអត្ថាធិប្បាយ នៅក្នុងការឡាយវីដេអូមួយ ក្នុងហេតុការណ៍ពលរដ្ឋមានជម្លោះដីធ្លីធ្វើការតវ៉ា។
លោក អៀរ ប៊ុនធឿន ស្នងការរងខេត្តកំពង់ឆ្នាំង បានប្រាប់ភ្នំពេញប៉ុស្តិ៍កាលពីថ្ងៃព្រហស្បតិ៍ថា លោក សុខ ឧត្តម ត្រូវបានឃាត់ខ្លួនកាលពីយប់ ថ្ងៃទី ១៣ ខែឧសភា ហើយរហូតមកដល់ល្ងាចថ្ងៃព្រហស្បតិ៍ សមត្ថកិច្ចខេត្ត នៅបន្តការសាកសួរបុគ្គលរូបនេះ នៅស្នងការដ្ឋាននៅឡើយ។
លោក ប៊ុនធឿន បានបង្ហើបថា ការឃាត់ខ្លួនម្ចាស់វិទ្យុ និងគេហទំព័ររូបនេះ ព្រោះតែរូបគេ បានផ្សព្វផ្សាយព័ត៌មាននៅក្នុងហេតុការណ៍ជម្លោះដីធ្លី នៅជាប់ព្រំប្រទល់រវាងខេត្តកំពង់ឆ្នាំង និងខេត្តកំពង់ស្ពឺ ហើយក្នុងការផ្សាយនោះ រូបគេធ្វើការញុះញង់ទៅដល់ពលរដ្ឋដែលកំពុងតវ៉ា ឲ្យបន្តទន្ទ្រានយកដីរបស់រដ្ឋ។
លោកបញ្ជាក់ថា៖«យើងក៏មិនទាន់សម្រេចចោទប្រកាន់ ឬបញ្ជូនគាត់ទៅណាទៀតដែរ។ ការចាប់ខ្លួនគាត់នេះ គឺដោយសារគាត់បំផុសសារជាមួយប្រជាពលរដ្ឋហ្នឹង នៅក្នុងជម្លោះដីធ្លីមួយ»។
កាលពីថ្ងៃទី ១២ ឧសភា លោក សុខ ឧត្តម ម្ចាស់វិទ្យុ FM ៩៩.៧៥ នៅខេត្តកំពង់ឆ្នាំង និងគេហទំព័រ «រិទ្ធិសែន» បានឡាយវីដេអូមួយ ជុំវិញករណីតវ៉ារបស់ប្រជាពលរដ្ឋ ១០០ គ្រួសារ ស្ថិតនៅឃុំជៀប ស្រុកទឹកផុស ខេត្តកំពង់ឆ្នាំង។ ក្នុងការឡាយនោះ លោក បានធ្វើអត្ថាធិប្បាយជំនួសឲ្យប្រជាពលរដ្ឋ ដែលមានជម្លោះដីធ្លីជាមួយក្រុមយោធា និងអាជ្ញាធរខេត្តកំពង់ឆ្នាំង ដែលពលរដ្ឋបានចោទប្រកាន់ថា បានរំលោភយកដីពួកគាត់ ដែលបានអាស្រ័យផលក្នុងតំបននោះ។
លោក សុខ ឧត្តម បាននិយាយក្នុងវីដេអូឡាយប្រមាណ ៤០ នាទីយ៉ាងដូច្នេះថា៖ «អភិបាលខេត្តកំពង់ឆ្នាំង បានប្រជុំឲ្យដកដីនៅក្នុងដែនដែលប្រជាពលរដ្ឋអាស្រ័យផល ដោយចោទប្រជាពលរដ្ឋ ថាទៅរំលោភដីរបស់រដ្ឋ។ អ៊ីចឹងត្រូវដកទាំងអស់ លើកលែងតែដីដែលមានប័ណ្ណកម្មសិទ្ធិតែប៉ុណ្ណោះ។ សួរថា ប្រជាពលរដ្ឋមានប័ណ្ណកម្មសិទ្ធិឯណា? ដូចពលរដ្ឋបានបញ្ជាក់អ៊ីចឹង»។
លោកធ្វើការអត្ថាធិប្បាយបន្តថា៖«នៅភូមិជៀប ប្រជាពលរដ្ឋមិនទាន់បានវាស់វែងទេ អ៊ីចឹងវាអភ័ព្វទេសម្រាប់អ្នករស់នៅក្នុងឃុំជៀន។ ចំណុចកន្លែងនេះ ព័ត៌មានថ្ងៃនេះ សង្ឃឹមថា រាជរដ្ឋាភិបាល នឹងបានដឹង ជាពិសេសសម្តេចពុក លោកនឹងបានដឹង ហើយបញ្ចូនក្រុមអធិការកិច្ចមកសិក្សាផ្ទាល់ គួរដកដីរបស់ពួកគាត់(ពលរដ្ឋ) ឬទុកឲ្យគាត់អាស្រ័យផល? ហើយបើដកដីរបស់គាត់ ឲ្យពួកគាត់ទៅរស់នៅឯណា?»។
ក្រៅពីអត្ថាធិប្បាយបែបនេះ លោកក៏បានធ្វើការចោទប្រកាន់ទៅកាន់អភិបាលខេត្តកំពង់ឆ្នាំង មន្ត្រីថ្នាក់ក្រោមក្នុងខេត្តនេះ រួមនឹងផ្នែកយោធាផងដែរថា បានរំលោភយកដីរបស់ប្រជាពលរដ្ឋ និងដីរបស់រដ្ឋ ដើម្បីកាន់កាប់ ហើយយកទៅលក់បន្តជាដើម។
ភ្លាមៗ ក្រោយពីធ្វើអត្ថាធិប្បាយបែបនេះ នៅថ្ងៃទី ១២ ឧសភា ដដែល លោក ខៀវ កាញារីទ្ធ រដ្ឋមន្ដ្រីក្រសួងព័ត៌មាន បានចេញប្រកាសលុបចោលអាជ្ញាប័ណ្ណរបស់លោក សុខ ឧត្តម ដែលមានស្ថានីយវិទ្យុ FM ៩៩.៧៥ និងគេហទំព័រឈ្មោះ «រិទ្ធិសែន»។
លោក ខៀវ កាញារីទ្ធ បានសរសេរនៅក្នុងសេចក្តីប្រកាសថា ការសម្រេចលុបនេះ ដោយសារម្ចាស់អាជ្ញាប័ណ្ណទាំងពីរខាងលើ បានផ្សព្វផ្សាយព័ត៌មានបំផ្លើសការពិត ញុះញង់ឲ្យកើតមានអំពើហិង្សា បង្កការរើសអើងពូជសាសន៍ បង្កអសន្ដិសុខ និងចលាចលនៅក្នុងសង្គម ដែលជាការរំលោភបំពានលើវិជ្ជាជីវៈ និងកិច្ចសន្យាដែលសាមីខ្លួនបានតម្កល់នៅក្រសួងព័ត៌មាន។
លោក សំ ច័ន្ទគា មន្ត្រីសម្របសម្រួលអង្គការអាដហុក ប្រចាំខេត្តកំពង់ឆ្នាំង បានថ្លែងថា ការឃាត់ខ្លួន និងលុបចោលអាជ្ញាប័ណ្ណរបស់អ្នកកាសែតរូបនេះ គឺហាក់ធ្វើឡើងប្រញាប់ប្រញាល់ និងលឿនខ្លាំង ដោយមិនបានពិនិត្យឲ្យបានល្អិតល្អន់ និងគោរពទៅតាមច្បាប់ស្តីពីរបបសារព័ត៌មានដែលមានចែង ដោយលោក ចាត់ទុកថា ការចាប់ខ្លួននេះ គឺជារូបភាពគំរាមកំហែងទៅសេរីភាពសារព័ត៌មាននៅក្នុងប្រទេសកម្ពុជា។
លោកបញ្ជាក់ថា៖«យើងសុំឲ្យរាជរដ្ឋាភិបាល ពិនិត្យមើលចំណាត់ការនេះឡើងវិញ ពីព្រោះរដ្ឋាភិបាលកម្ពុជា បានប្តេជ្ញាចិត្តក្នុងការធ្វើឲ្យរីកចម្រើនផ្នែកសិទ្ធិមនុស្សនៅក្នុងប្រទេសកម្ពុជា ហើយបានប្តេជ្ញាចិត្ត មិនឲ្យមានអំពើរំលោភសិទ្ធិរបស់អ្នកផ្សេងទេ។ បើសិនជាមានបណ្តឹងណាមួយ ដែលចោទថា អ្នកសារព័ត៌មានធ្វើខុសវិជ្ជាជីវៈអីហ្នឹង គួរតែធ្វើអធិការកិច្ចជាមុនសិនទៅ ហើយចង់ដាក់ពិន័យ ជាអីទៅ ប៉ុន្តែនេះ មិនទាន់ធ្វើអធិការកិច្ច ឲ្យគេមកបំភ្លឺអីផង ក៏សម្រេចភ្លាមៗទៀត»។
បើតាម លោក សំ ច័ន្ទគា អង្គការអាដហុក នឹងបន្តតាមដាន និងឃ្លាំមើលក្នុងករណីនេះ បន្តទៀត ហើយក៏នឹងផ្តល់ជាមេធាវី ដើម្បីការពារសិទ្ធិដល់អ្នកកាសែតរូបនេះ ក្នុងការប្រឆាំងតទល់តាមផ្លូវតុលាការផងដែរ៕