.jpg)
កាហ្វេដែលគេអះអាងថាក្លែងក្លាយត្រូវបានបង្ក្រាបនៅខេត្តកណ្តាលថ្ងៃទី ២ កក្កដា។ រូបថត CCC
ភ្នំពេញៈ តំណាងអយ្យការអមសាលាដំបូងខេត្តកណ្តាលសម្រេចចោទប្រកាន់ជនជាប់ចោទ ២ រូប ពីបទក្លែងផលិតផលទំនិញដែលបានលីងកាហ្វេ និងសណ្តែកផ្សំសារធាតុគីមីដោយបញ្ជូនសំណុំរឿងនេះទៅជំនុំជម្រះផ្ទាល់តែម្តង បន្ទាប់ពីរកឃើញភ័ស្តុតាងគ្រប់គ្រាន់ និងការឆ្លើយសារភាពរបស់ជនជាប់ចោទ។
កាលពីរសៀលថ្ងៃទី ២ ខែកក្កដា កម្លាំងគណៈកម្មាធិការប្រយុទ្ធប្រឆាំងផលិតផលក្លែងក្លាយ និងមានការសម្របសម្រួលដោយព្រះរាជអាជ្ញារងនៃអយ្យការអមសាលាដំបូងខេត្តកណ្តាលលោក ឯក ស៊ុនរស្មី បានចុះត្រួតពិនិត្យ និងបិទទីតាំងសិប្បកម្មលីងកាហ្វេ និងសណ្ដែកផលិតជាកាហ្វេ ១ កន្លែង នៅភូមិត្រពាំងខ្ទឹម ឃុំក្រាំងម្កាក់ ស្រុកអង្គស្នួល ខេត្តកណ្តាល។
តាមដីកាសន្និដ្ឋានបញ្ជូនរឿងទៅជំនុំជម្រះផ្ទាល់ចុះថ្ងៃទី ១៦ កក្កដា របស់តុលាការខេត្តកណ្តាលបានឲ្យដឹងថា តំណាងអយ្យការអមសាលាដំបូងខេត្តកណ្តាលបានសម្រេចចោទប្រកាន់ជនជាប់ចោទឈ្មោះ ថុន ណាត អាយុ ៣៣ ឆ្នាំ ជាម្ចាស់សិប្បកម្មគ្មានច្បាប់ និងឈ្មោះ លួត លាង អាយុ ២៤ ឆ្នាំ ជាអ្នកលីងកាហ្វេ និងជាមេការពីបទក្លែងផលិតផលទំនិញ។
ដីកាសន្និដ្ឋានឲ្យដឹងបន្តថា៖ «សំណុំរឿងនេះមានសាវតារជាតិជនជាប់ចោទច្បាស់លាស់ ភ័ស្តុតាងជាឯកសារចម្លើយសារភាពរបស់ជនជាប់ចោទ ដែលមានលក្ខណៈគ្រប់គ្រាន់សមល្មមអាចជំនុំជម្រះផ្ទាល់បានដោយពុំចាំបាច់បើកការស៊ើបសួរនោះទេ ដែលគោរពទៅតាមគោលការណ៍នៃការជំនុំជម្រះក្តីដោយមានភាពឆាប់រហ័ស»។
លោក ឯក ស៊ុនរស្មី ព្រះរាជអាជ្ញារងនៃអយ្យការអមសាលាដំបូងខេត្តកណ្តាលលើកឡើងដែរថា ជាលទ្ធផលនៃការស្រាវជ្រាវបានរកឃើញ និងសន្និដ្ឋានថា ឈ្មោះ ថុន ណាត និងឈ្មោះ លួត លាង ពិតជាបានប្រព្រឹត្តកំហុសល្មើសច្បាប់ ផលិតកាហ្វេលាយផ្សំសារធាតុគីមី ហាមឃាត់ ខុសស្តង់ដាដោយគ្មានការអនុញ្ញាតពីក្រសួងពាក់ព័ន្ធនានាដែលមិនអនុលោម និងខុសច្បាប់ស្តង់ដា ហើយក៏បង្កគ្រោះថ្នាក់មានហានិភ័យខ្ពស់ដល់សុខភាព និងសុវត្ថិភាពសង្គម។
លោកបញ្ជាក់ថា៖ «បទល្មើសដែលត្រូវចោទប្រកាន់ជាបទមជ្ឈិម យោងតាមមាត្រា ៦៣ ទោសដាក់ពន្ធនាគារពី ១ ខែដល់ ១ ឆ្នាំ និងពិន័យជាប្រាក់ពី ៥ លានរៀលដល់ ១០ លានរៀលនៃច្បាប់ស្តីពីការគ្រប់គ្រងគុណភាព សុវត្ថិភាពលើផលិតផលទំនិញ និងសេវា។ ហេតុនេះគប្បីបញ្ជូនទៅជម្រះផ្ទាល់តាមច្បាប់នៃក្រមនីតិវិធីព្រហ្មទណ្ឌ»។
តាមកំណត់ហេតុរបស់ជនជាប់ចោទបានឲ្យដឹងថា សិប្បកម្មលីងកាហ្វេ និងសណ្តែកមានសារធាតុគីមីនេះបានបើកដំណើរការរយៈពេល ២ ឆ្នាំមកហើយ ចាប់តាំងពីឆ្នាំ ២០១៨។ រូបមន្តនៃការផលិតកាហ្វេនេះគឺខ្លួនចេះបន្តពីគេ ដោយគ្រាប់កាហ្វេបានទិញពីផ្សារអូរឫស្សីម្តង ១ តោនក្នុង ១ ខែដោយមានតម្លៃ ១ គីឡូក្រាម ១៥ ០០០ រៀល។
តាមចម្លើយសារភាពដដែលបានឲ្យដឹងថាក្នុង ១ ថ្ងៃ សិប្បកម្មនេះផលិតកាហ្វេបាន ៥ ឡដោយក្នុង ១ ឡមានទម្ងន់ ១២០ គីឡូក្រាមដែលបានលាយគ្រឿងផ្សំជាច្រើនមុខបញ្ចូលគ្នាដូចជា ស្រា អំបិល សណ្តែក Caramel (ទឹកស្ករ ការ៉ាម៉ែល) ប៊ីចេង ទឹកត្រី ស្ករអំពៅ ទឹកដោះគោ និងប៊័រ។
កំណត់ហេតុសារភាពរបស់ជនជាប់ចោទទាំង ២ បញ្ជាក់ថា៖ «[ជនជាប់ចោទ] ខ្លួនពុំបានលើកស្លាកយីហោអាជីវកម្មទេ ដោយសារជាលក្ខណៈគ្រួសារ ហើយខ្លួនទទួលស្គាល់កំហុសថា ការផលិត កែច្នៃកាហ្វេ វេចខ្ចប់ និងចែកចាយ លក់លើទីផ្សារ គឺពុំមានច្បាប់អនុញ្ញាត ហើយក៏សុំកែប្រែកំហុសឡើងវិញ»។
តាមរបាយការណ៍របស់គណៈកម្មាធិការប្រយុទ្ធប្រឆាំងផលិតផលក្លែងក្លាយបានឲ្យដឹងថា ក្រោយការចុះបង្ក្រាបសមត្ថកិច្ចបានត្រួតពិនិត្យរកឃើញមាន ១- គ្រាប់សណ្តែកសៀង ៦០ បាវ ២- គ្រាប់កាហ្វេលេខ ១ ចំនួន ៦ បាវ ៣- គ្រាប់កាហ្វេលេខ ២ ចំនួន ១០ បាវ ៤- កាហ្វេលីងរួច ៦ បាវ ៥- ម៉ាស៊ីនលាយប៊័រ ១គ្រឿង ៦- ម៉ាស៊ីនលាយស្ករ ១ គ្រឿង មេក្លិនសម្រាប់លាយកាហ្វេ និងសម្ភារផ្សេងៗមួយចំនួនទៀត។
លោក កឹម ជាតិ អនុរដ្ឋលេខាធិការក្រសួងមហាផ្ទៃ និងជាអនុគណៈកម្មាធិការប្រយុទ្ធប្រឆាំងផលិតផលក្លែងក្លាយដែលបានដឹកនាំចុះបង្ក្រាបទីតាំងខាងលើនេះប្រាប់ភ្នំពេញប៉ុស្តិ៍ពីថ្ងៃអាទិត្យថា ជាជំហររបស់គណៈកម្មាធិការ គឺគិតសុខភាពប្រជាពលរដ្ឋជាចម្បង ហើយមិនអនុញ្ញាតឲ្យជនណាមួយមកលួច ឬលក់ និងបំផ្លាញសុខភាពរបស់ប្រជាពលរដ្ឋឡើយ។
លោកបានបញ្ជាក់ថា៖ «យើងនឹងបន្តស្រាវជ្រាវបង្ក្រាបរាល់បទល្មើស និងដាក់ស្ថានទម្ងន់ទោស ហើយសុំប្រព័ន្ធតុលាការផ្តន្ទាទោសតាមប្រការនៃច្បាប់ជាធរមាន»៕
