ស្វាយរៀងៈ ម្ចាស់ស្ថានីយប្រេងម្នាក់ត្រូវបានបុរសជនជាតិចិន ២ នាក់ឆក់យកកាបូបលុយកាលពីព្រឹកម្សិលមិញនៅក្នុងភូមិពោធិ៍ ឃុំ មេសថ្ងក ស្រុកចន្ទ្រាខេត្តស្វាយរៀង ខណៈជនសង្ស័យជិះម៉ូតូ ១ គ្រឿងចូលទៅចាក់សាំង។
លោក គង់ សុខផាត អធិការនគរបាលស្រុកចន្ទ្រាបានប្រាប់កាលពីរសៀល ម្សិលមិញថាម្ចាស់ស្ថានីយប្រេងរងគ្រោះឈ្មោះ អោក សុផា ភេទស្រីអាយុ ៣៨ ឆ្នាំរស់នៅភូមិ-ឃុំកើតហេតុខាងលើ។
លោកប្រាប់តាមសម្តីស្ត្រីរងគ្រោះថាមុនកើតហេតុគឺមានបុរសសង្ស័យជាតិចិន ២ នាក់ជិះម៉ូតូ ១ គ្រឿង មិនចាំម៉ាក និងគ្មានស្លាកលេខបានចូលចាក់សាំងក្នុងស្ថានីយប្រេងរបស់គាត់អស់ ១ ដុល្លារ។ បន្ទាប់ពីចាក់សាំងរួចក្រុមជនសង្ស័យឲ្យលុយ ៥០ ដុល្លារទៅគាត់ និងទាមទារអាប់ជាលុយខ្មែរ។
លោកបន្តថាពេលនោះស្ត្រីរងគ្រោះលូកយកលុយពីកាបូបដែលកំពុងស្ពាយបំណងអាប់លុយឲ្យ ស្រាប់តែក្រុមជនសង្ស័យឆក់ដណ្តើមកាបូបលុយជិះម៉ូតូ ទៅបាត់ដោយលុយក្នុងកាបូបនោះមាន ១ ១២០ ០០០ រៀល។
លោកថា៖ «ខ្ញុំមិនបានដឹងដំណឹងនេះទេ តែក្រោយមកខ្ញុំដឹងតាមរយៈខ្ញុំមើលព័ត៌មាន ហើយខ្ញុំក៏ចុះមកសួរម្ចាស់ការ៉ាស់សាំងតែម្តងទៅ។ ប៉ុន្តែជនរងគ្រោះមិនបានប្តឹងមកសមត្ថកិច្ចខ្ញុំទេ បើគាត់ប្តឹងគឺខាងខ្ញុំចុះធ្វើអន្តរាគមន៍ភ្លាមៗហើយ»។
លោកប្រាប់បន្តថារវាងទីតាំងស្ថានីយប្រេង និងប៉ុស្តិ៍នគរបាលឃុំមេសថ្ងកគឺនៅមិនឆ្ងាយពីគ្នាទេគឺប្រហែលជា ៣០០ ម៉ែត្រពីគ្នាប៉ុណ្ណោះទេ។ ប៉ុន្តែទោះជាយ៉ាងណាលោកថាបានដាក់កម្លាំងចុះស្រាវជ្រាវស្វែងរកក្រុមជនសង្ស័យហើយ៕