.jpg)
សកម្មភាពការងាររបស់វិទ្យុស្ដ្រី FM ១០២ នាពេលកន្លងមក។ រូបថត ហ្វេសប៊ុក
ភ្នំពេញៈ អតីតអ្នកគ្រប់គ្រងមណ្ឌលព័ត៌មានស្ត្រីកម្ពុជាបានទទួលការព្រមានមិនឲ្យលក់ការផ្សាយលើហ្វ្រេកង់ ១០២ FM ទៅស្ថានីយវិទ្យុនេះ ខណៈលោកស្រីមិនទទួលបានការអនុញ្ញាតពីក្រសួងព័ត៌មានជាមុន ហើយបានធ្វើឲ្យមណ្ឌលព័ត៌មានស្ត្រីកម្ពុជាស្ថិតនៅក្នុងភាពមិនច្បាស់លាស់សម្រាប់អនាគតខ្លួន។
រដ្ឋមន្ត្រីក្រសួងព័ត៌មាន លោក ខៀវ កាញារីទ្ធ កាលពីថ្ងៃពុធសប្ដាហ៍មុនបានបង្គាប់ឲ្យលោកស្រី ជា ស៊ុនដាណែត អតីតអ្នកគ្រប់គ្រងនៃមណ្ឌលព័ត៌មានស្ត្រីកម្ពុជា ឈប់ជួល ហ្វ្រេកង់របស់លោកស្រីដោយមិនមានការអនុញ្ញាតពីក្រសួង ខណៈលោកស្រីបានទទួល ហ្វ្រេកង់នេះ«សម្រាប់ការប្រើប្រាស់អាជីវកម្មផ្ទាល់ខ្លួន»។
លិខិតនេះបានលើកឡើងថា៖ «ដើម្បីបំពេញកាតព្វកិច្ចតាមផ្លូវច្បាប់ ប្រសិនបើលោកស្រីចង់ជួលអាជ្ញាប័ណ្ណ ហ្វ្រេកង់វិទ្យុ FM 102 MHz ជាបន្តទៀត សូមលោកស្រីបំពេញសំណុំបែបបទស្នើសុំការអនុញ្ញាតពីក្រសួងព័ត៌មានជាមុនសិន»។
ក្រសួងទុកពេលឲ្យលោកស្រី ស៊ុន ដាណែតរយៈពេល ២ សប្ដាហ៍ ហើយគំរាមចាត់វិធានការផ្លូវច្បាប់ប្រសិនបើមិនគោរពតាម។
លោកស្រី ស៊ុន ដាណែត ដែលឈ្មោះរបស់លោកស្រីត្រូវបានចុះបញ្ជីសម្រាប់ ហ្វ្រេកង់នេះនៅពេលមណ្ឌលព័ត៌មានស្ត្រីកម្ពុជាបានចាប់ផ្តើមដំណើរការកាលពីថ្ងៃពុធបានបដិសេធមិនធ្វើអត្ថាធិប្បាយលម្អិត។
លោកស្រីបានថ្លែងថា៖ «និយាយឲ្យខ្លី ខ្ញុំពិតជាខុស។ ខ្ញុំទទួលស្គាល់កំហុសរបស់ខ្ញុំ»។ «ខ្ញុំមិនអាចនិយាយច្រើនជាងនេះទេ។ ខ្ញុំកំពុងពិនិត្យ[លិខិតនេះ]ឥឡូវនេះ»។
បុគ្គលិកជាន់ខ្ពស់ម្នាក់នៅ មណ្ឌលព័ត៌មានស្ត្រីកម្ពុជាដែលសុំមិនបញ្ចេញឈ្មោះ បានថ្លែងថា ស្ថានីយវិទ្យុនេះកំពុងចាក់ផ្សាយនៅលើហ្វ្រេកង់ ១០២ FM ដោយមិនគិតថ្លៃជាង១៩ឆ្នាំមកហើយ។
បុគ្គលិករូបនេះបន្តថា៖«យើងបារម្ភ។យើងបានក្លាយជាសំឡេងមិនសំចៃមាត់សម្រាប់ស្ត្រី។យើងបានផលិតកម្មវិធីជាច្រើនដើម្បីផ្តល់អំណាចដល់ស្ត្រីក្នុងសង្គម និងបង្កើតកម្មវិធីដើម្បីបញ្ឈប់អំពើហិង្សាក្នុងគ្រួសារ»។
លិខិតនេះឥឡូវនេះបានធ្វើឲ្យមានការសង្ស័យទៅលើអនាគតរបស់ស្ថានីយវិទ្យុនេះ។ បុគ្គលិករូបនេះបានថ្លែងបន្តថា៖«នៅត្រង់ចំណុចនេះ គណៈកម្មាធិការគ្រប់គ្រងកំពុងពិភាក្សា»។
កាលពីខែ សីហា ក្រសួងព័ត៌មានបានបិទស្ថានីយវិទ្យុយ៉ាងហោចណាស់ចំនួន១៥ទូទាំងប្រទេស។
លោក ខៀវ កាញារីទ្ធ បានប្រកាសថា មណ្ឌលព័ត៌មានស្ត្រីកម្ពុជាមានកំហុសដោយសារផ្តល់ការផ្សាយទៅវិទ្យុសំឡេងអាមេរិក និងវិទ្យុអាស៊ីសេរី ដែលរិះគន់រដ្ឋាភិបាល ដោយមិនមានការស្នើសុំការអនុញ្ញាត ក៏ប៉ុន្តែត្រូវបានផ្តល់ឲ្យនូវសេរីភាពដោយសារការងារសង្គមរបស់ខ្លួនអ្នកនាំពាក្យក្រសួងព័ត៌មាន លោក អ៊ុក គឹមសេង បានថ្លែងថា លោកអាចធ្វើអត្ថាធិប្បាយលើលិខិតនេះក្នុងលក្ខណៈទូទៅ។
លោកថា៖«ពិតណាស់ វិទ្យុ១០២[FM]គឺជាកម្មសិទ្ធិរបស់បុគ្គលឯកជន...ហេតុដូច្នេះ ក្រសួងរំឭកម្ចាស់ ហ្វ្រេកង់នេះឲ្យគោរពទៅតាមកិច្ចព្រមព្រៀងរវាងក្រសួង និងម្ចាស់ ហ្វ្រេកង់»។
លោកបានបន្តថា ប្រសិនបើម្ចាស់ឯកជនជួល ហ្វ្រេកង់បន្ត ត្រូវជម្រាបមកក្រសួង។ នៅពេលសួរថា តើម្ចាស់ ហ្វ្រេកង់នេះបានដាក់ពាក្យសុំការអនុញ្ញាតឬអត់ និងថា តើផលវិបាកអ្វីនឹងកើតមាន លោកបានថ្លែងថា សូមចាំមើលសិន។ «សូមរង់ចាំមើលសិន ដើម្បីឲ្យនាយកដ្ឋានបច្ចេកទេស និងរដ្ឋបាលពិនិត្យ»។
លោក មឿន ឈានណារិទ្ធិ ប្រធានវិទ្យាស្ថានកម្ពុជាសម្រាប់ការសិក្សាផ្នែកសារព័ត៌មាន បានថ្លែងថា វាជាការវាយទៅលើសិទ្ធិរបស់ស្ត្រីប្រសិនបើស្ថានីយនេះត្រូវបិទ ប្រសិនបើមិនមានការស្វែងរកដំណោះស្រាយ។
លោកបានបញ្ជាក់ថា៖ «វាជាការក្រៀមក្រំណាស់។ មិនមែនសម្រាប់តែសេរីភាពសារព័ត៌មានទេ ប៉ុន្តែសម្រាប់ស្ត្រី និងកុមារ ពីព្រោះយើងត្រូវការឮសិទ្ធិរបស់ពួកគេ និងដោះស្រាយបញ្ហា»។ «ស្ត្រី និងកុមារជាញឹកញាប់ត្រូវបានបំភ្លេចដោយប្រព័ន្ធផ្សព្វផ្សាយផ្សេងៗ»។
លោក មឿន ឈានណារិទ្ធិ បានពន្យល់ថា ស្ថានីយវិទ្យុនេះមានអ្នកស្តាប់ច្រើន និងបង្កើនការគ្រប់ដណ្តប់របស់ខ្លួនពី២០០មេហ្គាវ៉ាត់ទៅ១០គីឡូវ៉ាត់ក្នុងរយៈកាលប៉ុន្មានឆ្នាំចុងក្រោយនេះ និងជាស្ថានីយវិទ្យុមួយក្នុងចំណោមស្ថានីយវិទ្យុដែលមានវិជ្ជាជីវៈក្នុងប្រទេសកម្ពុជា៕ PS
