ភ្នំពេញៈ ម្ចាស់អាជីវកម្មនៅតាមអាហារដ្ឋាន ទេសចរណ៍ ខារ៉ាអូខេ ឌីស្កូថែក រង្គសាល បៀរហ្គាដិន និងសេវាកម្សាន្តនៅទូទាំងប្រទេសអាចប្រឈមនឹងការផ្អាកអាជីវកម្ម ឬដកហូតអាជ្ញាប័ណ្ណបើល្មើសនឹងសារាចរណែនាំមិនឲ្យលក់គ្រឿងស្រវឹងនៅមុន និងក្នុងថ្ងៃបោះឆ្នោតនាថ្ងៃ ២៨-២៩ កក្កដា។ នេះបើតាមលោក សុខ វណ្ណា ប្រធាននាយកដ្ឋានគ្រប់គ្រងសេវាកម្សាន្ដ និងកីឡាទេសចរណ៍។
លោក វណ្ណា បានថ្លែងថាម្ចាស់អាជីវកម្មកន្លែងកម្សាន្ដផ្សេងៗ បើនៅតែបន្ដលក់គ្រឿងស្រវឹងបំពានសារាចរ អាជ្ញាធរនឹងចាត់វិធានការនៅនឹងកន្លែងតាមកម្រិតដែលបានប្រព្រឹត្ដ។
លោកបន្ដថា៖ «ប្រសិនជាមានអាជីវកម្មណាមួយគាត់បំពាននូវសារាចរណែនាំ ឬក៏អនុក្រឹតរបស់រាជរដ្ឋាភិបាលនោះ អាជ្ញាធរមូលដ្ឋានខេត្ដគាត់នឹងចាត់វិធានការទៅតាមផ្លូវច្បាប់»។
លោកបានអះអាងថា៖ «វិធានការទី ១ បើគាត់នៅតែប្រព្រឹត្ដបំពាន អាជ្ញាធរនឹងចុះទៅណែនាំ ឬឃាត់ពួកគាត់ ដើម្បីរក្សានូវសន្ដិសុខ សុវត្ថិភាពអំឡុងពេលបោះឆ្នោតដោយមិនបង្កឲ្យមានបញ្ហាក្ឌុងក្ឌាំងអ្វីទេ។ ប៉ុន្ដែប្រសិនបើគាត់មិនព្រមហើយនៅតែបំពានទៀតយើងអាចផ្អាកអាជ្ញាប័ណ្ណគាត់ ពិន័យទៅតាមច្បាប់ និងទំហំនៃទោសកំហុសរបស់ពួកគាត់»។
បើតាមលោក វណ្ណា ច្បាប់បានកំណត់ឲ្យផ្អាកអាជីវកម្មបណ្ដោះអាសន្នដកហូតអាជ្ញាប័ណ្ណអាជីវកម្ម និងបិទលែងឲ្យដំណើរការចំពោះការបំពាន។
លោក ឧត្ដម ប្រធានគ្រប់គ្រង ក្លិបកម្សាន្ដសោនក្លិប២ (Sound Club 2) នៅរាជធានីភ្នំពេញបានប្រាប់ភ្នំពេញ-ប៉ុស្ដិ៍ ពីម្សិលមិញថាលោកបានដឹងពីសារាចរនេះរួចហើយ។
លោកបានថ្លែងថា៖ «យើងនឹងគោរពតាមអាជ្ញាធរ ហើយនឹងផ្អាកដំណើរការ ការលក់ដូររយៈពេល ២ ថ្ងៃតាមសារាចរដែលបានប្រកាសនេះដោយមិនបើកដំណើរការអាជីវកម្មឡើយក្នុងអំឡុងថ្ងៃ ២៨-២៩ ខែកក្កដានេះ»។
គួរបញ្ជាក់ថាក្រសួងទេសចរណ៍បានចេញសារាចរណែនាំមួយដល់ម្ចាស់អាជីវកម្មភោជនីយដ្ឋាន អាហារដ្ឋានទេសចរណ៍ ខារ៉ាអូខេ ឌីស្កូថែក រង្គសាល បៀរហ្គាដិន និងសេវាកម្សាន្តទេសចរណ៍ទាំងអស់នៅទូទាំងប្រទេសត្រូវផ្អាកការលក់ដូរគ្រឿងស្រវឹងចំនួន ២ ថ្ងៃក្នុងនោះរួមមាន ១ ថ្ងៃមុនការបោះឆ្នោត និងនៅថ្ងៃបោះឆ្នោតជ្រើសរើសតំណាងរាស្ត្រនីតិកាលទី ៦ នៃរដ្ឋសភា ពោលគឺក្រសួងមិនអនុញ្ញាតឱ្យលក់គ្រឿងស្រវឹងនៅថ្ងៃទី ២៨-២៩ ខែកក្កដាឆ្នាំ ២០១៨ នោះទេ។
សារាចរដែលបានប្រកាសនៅថ្ងៃទី ២១ ខែកក្កដាឆ្នាំនេះបានឲ្យដឹងថា៖ «ម្ចាស់ ឬអ្នកគ្រប់គ្រងអាជីវកម្មខារ៉ាអូខេឌីស្កូថែក រង្គសាល បៀរហ្គាដិន និងសេវាកម្សាន្តទេសចរណ៍នានានៅទូទាំងរាជធានី-ខេត្តត្រូវផ្អាកសកម្មភាពអាជីវកម្មរយៈពេល ១ ថ្ងៃមុនថ្ងៃបោះឆ្នោត និងថ្ងៃបោះឆ្នោតចាប់ពីថ្ងៃទី ២៨ និងទី ២៩ ខែកក្កដាឆ្នាំ ២០១៨។ ចំណែកឯអាជីវកម្មភោជនីយដ្ឋាន និងអាហារដ្ឋានទេសចរណ៍នានានៅទូទាំងរាជធានី-ខេត្តអាចដំណើរការអាជីវកម្មរបស់ខ្លួនបាន ប៉ុន្តែត្រូវផ្អាកការលក់ដូរគ្រឿងស្រវឹង ២ ថ្ងៃនេះ»៕