The Phnom Penh Post Search

Search form

Logo of Phnom Penh Post newspaper Phnom Penh Post - ម្ចាស់​រោងចក្រ​អនុញ្ញាត​ឲ្យ​កម្មករ​ឈប់ ១ សប្ដាហ៍​ដើម្បី​ពិនិត្យ​គុណភាព​អគារ




ម្ចាស់​រោងចក្រ​អនុញ្ញាត​ឲ្យ​កម្មករ​ឈប់ ១ សប្ដាហ៍​ដើម្បី​ពិនិត្យ​គុណភាព​អគារ

ម្ចាស់​រោងចក្រ​អនុញ្ញាត​ឲ្យ​កម្មករ​ឈប់ ១ សប្ដាហ៍​ដើម្បី​ពិនិត្យ​គុណភាព​អគារ

131128_03
រោងចក្រ Sui Quinh ដែលរញ្ជូយបណ្តាលឲ្យកម្មករភ័យខ្លាចឈប់ធ្វើការ ម៉ៃ វីរៈ

ភ្នំពេញៈ កម្មករ​ជាង ៤០០ នាក់​នៅ​រោងចក្រ SIU QUINH Garment (MFG) ត្រូវ​បាន​អនុញ្ញាត​ឲ្យ​ឈប់​សម្រាក​ប្រហែល​មួយ​សប្តាហ៍​ដោយ​សារ​តែ​ភ័យ​ខ្លាច​ចំពោះ​គុណភាព​អគារ​មាន​សភាព​ញ័រ​រញ្ជួយ​ដែល​នឹង​ត្រូវ​រង់ចាំ​ការ​ពិនិត្យ​ពី​មន្រ្តី​ជំនាញ​របស់​ក្រសួង រៀបចំ​ដែនដី​នគរូបនីយកម្ម និង​សំណង់។

កម្មការិនី​ម្នាក់​ឈ្មោះ បួយ ស្រីមុំ អាយុ ២៥ឆ្នាំ បាន​ប្រាប់​កាល​ពី​ម្សិលមិញ​ថា កម្មករ​បាន​រត់​ចេញ​ពី​អគារ​រោងចក្រ​ភ្លាមៗ​នៅ​ពេល​អគារ​នេះ​និង បរិក្ខារ​នៅ​ក្នុង​រោងចក្រ​ញ័រ​រញ្ជួយ។ អ្នក​នាង​បាន​បន្ត​ថា៖ «យើង​បាន​រត់​ចេញ​ពី​អគារ​រោងចក្រ​ទៅ​កន្លែង​សុវត្ថិភាព​ពីព្រោះ​វា ញ័រ​ដូច​រញ្ជួយ​ផែន​ដី ហើយ​យើង​មាន​ការ​ភ័យ​ខ្លាច​ថា វា​បាក់​សង្កត់​លើ​យើង»។

នាង បួយ ស្រីមុំ បាន​និយាយ​ថា អគារ​នេះ​បាន​រញ្ជួយ​តាំង​ពី​ថ្ងៃ​ព្រហស្បតិ៍​សប្តាហ៍​មុន ហើយ​កម្មករ​មិន​ហ៊ាន​ចូល​ទៅ​ធ្វើ​ការ​នៅ​ក្នុង​អគារ​ប៉ុន្តែ​រោងចក្រ​បាន​បង្ខំ​កម្មករ​ឲ្យ​បន្ត​ធ្វើ​ការ។

អ្នក​នាង ស្រីមុំ បាន​ថ្លែង​បន្ត​ថា៖ «យើង​មិន​អាច​ធ្វើ​ការ​នៅ​ក្នុង​អគារ ដែល​ញ័រ​រញ្ជួយ​ទៀត​ទេ​រហូត​ទាល់​តែ​យើង​ប្រាកដ​ថា វា​មាន​សុវត្ថិភាព​សម្រាប់​យើង ហើយ​រោងចក្រ​ក៏​អនុញ្ញាត​ឲ្យ​យើង​សម្រាក​ចាប់​ពី​ថ្ងៃ​នេះ​រហូត​ដល់ ថ្ងៃ​ចន្ទ​សប្តាហ៍​ក្រោយ»។

អ្នក​នាង ស្រីមុំ ថ្លែង​ទៀត​ថា៖ អាជ្ញាធរ​មូលដ្ឋាន​បាន​ចុះ​មក​នៅ​ព្រឹក​នេះ​ដើម្បី​ពិនិត្យ​មើល​អគារ ហើយ​ពួក​គេ​បាន​បញ្ជា​រោងចក្រ​ឲ្យ​អនុញ្ញាត​ឲ្យ​កម្មករ កម្មការិនី​ឈប់​សម្រាក​រហូត​ដល់​រោងចក្រ​ជួស​ជុល​និង​ធានា​ថា វា​មាន​សុវត្ថិភាព​សម្រាប់​យើង»។

កម្មការិនី​ម្នាក់​ទៀត​ឈ្មោះ អានី អាយុ ២៦ឆ្នាំ បាន​ប្រាប់​ថា អ្នក​នាង​នឹង​មិន​ត្រឡប់​ទៅ​ធ្វើ​ការ​វិញ​ទេ ប្រសិន​បើ​អគារ​នោះ​មិន​ត្រូវ​បាន​ជួស​ជុល។ នាង​បន្ត​ទៀត​ថា៖ «ខ្ញុំ​ឆ្ងល់​ថា ហេតុ​អ្វី​មន្រ្តី​រោងចក្រ​នៅ​តែ​បង្ខំ​កម្មករ​ឲ្យ​នៅ​ធ្វើ​ការ​ខណៈ​កន្លែង​ការងារ​របស់​យើង​កំពុង​ញ័រ​រញ្ជួយ»។

លោក ប៊ុន ឡេង អ្នក​គ្រប់​គ្រង​រដ្ឋបាល​រោងចក្រ SIU QUINH Garment បាន​និយាយ​ឲ្យ​ដឹង​កាល​ពី​ម្សិលមិញ​ថា លោក​បាន​អនុញ្ញាត​ឲ្យ​កម្មករ​ឈប់​សម្រាក​រហូត​ដល់​សប្តាហ៍​ក្រោយ​រង់​ចាំ​លទ្ធផល​ពិនិត្យ​ពី​ក្រសួង​គ្រប់​គ្រង​ដែនដី នគរូបនីយកម្ម និង​សំណង់​។ លោក​ថ្លែង​បន្ត​ថា៖ «យើង​បាន​យក​ម៉ាស៊ីន​មួយ​ចំនួន​ទៅ​ទុក​នៅ​ខាង​ក្រៅ​រោងចក្រ​ដើម្បី​ឲ្យ​មន្រ្តី​ក្រសួង​ធ្វើ​ការ​វាយតម្លៃ​អគារ​ម្តង​ទៀត បន្ទាប់​ពី​យើង​បាន​ពិនិត្យ​រួច​ហើយ​ដោយ​ក្រុមហ៊ុន​ឯកជន ហើយ​ក្រុមហ៊ុន​ឯកជន​នោះ​បាន​និយាយ​ថា អគារ​នេះ​មិន​អី​ទេ។

លោក​ថ្លែង​បន្ត​ថា៖ «យើង​បាន​ព្យាយាម​ពន្យល់​កម្មករ​អំពី​ការ​ញ័រ​រញ្ជួយ​នេះ​ថា វា​គឺ​ដោយ​សារ​ការ​សាង​សង់​ផ្លូវ​នៅ​ជិត​រោងចក្រ​របស់​យើង​ដែល បាន​បណ្តាល​ឲ្យ​វា​ញ័រ ប៉ុន្តែ​ពួក​គេ​មិន​ជឿ ដូច្នេះ​យើង​បាន​អនុញ្ញាត​ឲ្យ​ពួក​គេ​ឈប់​សម្រាក»។

លោក ប៊ុន ឡេង បាន​ថ្លែង​ថា លោក​នឹង​ជួស​ជុល​កន្លែង​ប្រេះស្រាំ ហើយ​ពិនិត្យ​អគារ។

លោក​បន្ត​ថា៖ «កម្មករ​លែង​ជឿ​យើង​ទៀត​ហើយ ដូច្នេះ​ទុក​ឲ្យ​ក្រសួង​បង្ហាញ​លទ្ធផល​ទៅ​ពួក​គេ»។

លោក ហ៊ុយ ណារ៉ា អគ្គ​នាយក​នៃ​នាយកដ្ឋាន​សំណង់​នៃ​ក្រសួង គ្រប់​គ្រង​ដែនដី នគរូបនីយកម្ម និង​សំណង់ បាន​ថ្លែង​ថា លោក​បាន​ចុះ​ទៅ​រោងចក្រ​នេះ ហើយ​វា​មិន​ទាន់​ធ្ងន់​ធ្ងរ​ខ្លាំង​នៅ​ឡើយ​ទេ ប៉ុន្តែ​លោក​មិន​ដឹង​ទេ​ថា តើ​អគារ​នេះ​មាន​សុវត្ថិភាព​កម្រិត​ណា។ លោក ហ៊ុយ ណារ៉ា ថ្លែង​ថា៖ «យើង​ត្រូវ​តែ​យក​អ្នក​ជំនាញ​ពី​ក្រសួង​ដើម្បី​ពិនិត្យ​អគារ​នេះ និង​ដើម្បី​ការពារ​សុវត្ថិភាព​កម្មករ»។

លោក ហ៊ុយ ណារ៉ា បាន​ថ្លែង​ទៀត​ថា អាជ្ញាធរ និង​ក្រសួង​ផង​ដែរ​នឹង​ពិនិត្យ ហើយ​សិក្សា​អំពី​អគារ​នេះ​ម្តង​ទៀត​ដើម្បី​ឲ្យ​ប្រាកដ​ថា វា​មាន​សុវត្ថិភាព​សម្រាប់​កម្មករ៕ PS

អត្ថបទគួរចាប់អារម្មណ៍