The Phnom Penh Post Search

Search form




Logo of Phnom Penh Post newspaper Phnom Penh Post - ម្ដាយ​ពលការិនី​សុំ​ឲ្យ​ជួយ​កូន​បាន​វិល​ពី​ម៉ាឡេស៊ី​វិញ

ម្ដាយ​ពលការិនី​សុំ​ឲ្យ​ជួយ​កូន​បាន​វិល​ពី​ម៉ាឡេស៊ី​វិញ

Content image - Phnom Penh Post
ពលការិនី​ (​ឆ្វេង​) ​ពេល​ត្រឡប់​ពី​ម៉ាឡេស៊ី​កន្លង​ទៅ​។ ហេង ជីវ័ន

ម្ដាយ​ពលការិនី​សុំ​ឲ្យ​ជួយ​កូន​បាន​វិល​ពី​ម៉ាឡេស៊ី​វិញ

រតនគិរីៈ ម្ដាយ​ពលការិនី​ធ្វើការ​នៅ​ប្រទេស​ម៉ាឡេស៊ី​ម្នាក់​បាន​ស្វែងរក​អន្តរាគមន៍​នៅ​ខេត្ត​រតនគិរី​កាលពី​ម្សិលមិញ ខណៈ​កូនស្រី​គាត់​ទៅ​ធ្វើការ​នៅ​ប្រទេស​មួយ​នេះ​ជាង​ ២ ​ឆ្នាំ តែ​មិន​បាន​ប្រាក់​ឈ្នួល​ និង​ចង់​ត្រឡប់​មក​ស្រុក​កំណើត​វិញ​។

ស្ត្រី​ជា​ម្តាយ​ឈ្មោះ មាស សម្ផស្ស អាយុ​ ៤៨ ​ឆ្នាំ​មកពី​ស្រុក​ចិត្របុរី ខេត្ត​ក្រចេះ​ដែល​បច្ចុប្បន្ន​កំពុង​ធ្វើការ​នៅ​ខេត្ត​រតនគិរី​បាន​ឲ្យ​ដឹង​ថា​កូន​អ្នកស្រី​គាត់​ឈ្មោះ​ វីន ណារ៉ន អាយុ​ ២១ ​ឆ្នាំ​បាន​ទៅ​ម៉ាឡេស៊ី​នៅ​ឆ្នាំ​ ២០១៤ ​តែ​បាត់​ដំណឹង​ហើយ​ទើប​តែ​ថ្មីៗ​នេះ​នាង​បាន​ទូរស័ព្ទ​មក​ផ្ទះ​ដើម្បី​ឲ្យ​ជួយ​។

អ្នកស្រី សម្ផស្ស បាន​ថ្លែង​ថា​កូនស្រី​គាត់​ទើប​ទូរស័ព្ទ​ប្រាប់​ថា​ចង់​មក​ស្រុក​វិញ ព្រោះ​ធ្វើការ​​នៅ​ម៉ាឡេស៊ី​ជាង​ ២ ​ឆ្នាំ​មិន​មាន​ប្រាក់​ឈ្នួល​ទេ ហើយ​ថៅកែ​បាន​​ដកហូត​លិខិត​ឆ្លងដែន​ទៀត​។

ស្ត្រី​រូប​នោះ​បញ្ជាក់​ថា​៖ «​គ្មាន​ដែល​ផ្ញើ​អី​មក​ផ្ទះ​សូម្បី​តែ​មួយ​រៀល តែ​ឥឡូវ​ខ្ញុំ​លែង​ត្រូវការ​ហើយ​ធ្វើ​ម៉េច​ចង់​ឲ្យ​កូន​មក​ស្រុក​វិញ​ដោយ​សុវត្ថិភាព​ព្រោះ​មិន​ដឹង​នៅ​ធ្វើ​អី បើ​ធ្វើការ​លំបាក​គ្មាន​ប្រាក់​ឈ្នួល​អ៊ីចឹង​នោះ​»​។

លោក​ ឌិន ខន្នី អ្នក​សម្រប​សម្រួល​សមាគម​អាដហុក​ខេត្ត​រតនគិរី​បាន​ឲ្យ​ដឹង​ថា​ករណី​នេះ​ក្រុម​គ្រួសារ​ស្ត្រី​រងគ្រោះ​បាន​ទូរស័ព្ទ​មក​ហើយ​សមាគម​អាដហុក​​នឹង​រៀបចំ​ពាក្យ​បណ្ដឹង​ជូន​។

លោក​ថា​៖ «​ករណី​នេះ​យើង​នឹង​ជួយ​រៀបចំ​ពាក្យ​បណ្តឹង​ជូន​គាត់​ជា​លាយលក្ខណ៍​អក្សរ​ព្រោះ​បច្ចុប្បន្ន​អាដហុក​ទើប​តែ​ទទួល​ព័ត៌មាន​ពី​គ្រួសារ​តាម​ទូរស័ព្ទ​»​។

កាលពី​ម្សិលមិញ​ដែរ​អ្នក​នាំពាក្យ​ក្រសួង​ការបរទេស​កម្ពុជា​បាន​ចេញ​សេចក្តី​ប្រកាស​ព័ត៌មាន​មួយ​ថា​ស្ថាន​ឯកអគ្គ​រាជទូត​កម្ពុជា​នៅ​ម៉ាឡេស៊ី​បាន​រៀបចំ​មាតុភូមិ​និវត្តន៍​របស់​ពលការិនី​ខ្មែរ​ ២ ​នាក់​គឺ​ស្ត្រី​ម្នាក់​អាយុ​ ៣៣ ​ឆ្នាំ​មកពី​ស្រុក​សន្ទុក ខេត្ត​កំពង់ធំ​បាន​ទៅ​ធ្វើការ​តាម​ផ្ទះ​​នៅ​ទី​នោះ​កាលពី​ថ្ងៃ​ទី​ ២១ ​ខែ​មីនា​ឆ្នាំ​ ២០១៤ តាមរយៈ​ក្រុមហ៊ុន​មួយ​។ ​ដោយ​ធ្វើការ​លំបាក​នៅ​ថ្ងៃ​ទី​ ៨ ​ខែ​មេសា​ឆ្នាំ​នេះ នាង​បាន​ស្នើសុំ​ឲ្យ​ស្ថានទូត​ជួយ​ទារ​ប្រាក់ខែ​ដែល​នៅ​សល់​ពី​និយោជក និង​ជួយ​ឲ្យ​បាន​ត្រឡប់​មក​កម្ពុជា​វិញ​។ ក្រោម​អន្តរាគមន៍​និយោជក ពលការិនី​រូប​នោះ​បាន​ប្រគល់​ប្រាក់ខែ​នៅ​សល់​ ៥២៤៧ ​ដុល្លារ​ឲ្យ​នាង​វិញ​នៅ​ថ្ងៃ​ទី​ ២៨ ​ខែ​មេសា​ឆ្នាំ​ ២០១៧​។

រីឯ​ស្ត្រី​ខ្មែរ​ម្នាក់​ទៀត​អាយុ​ ២៥ ​ឆ្នាំ​មកពី​ស្រុក​សំបូរ​ខេត្ត​ក្រចេះ​បាន​ទៅ​ម៉ាឡេស៊ី​ខុស​ច្បាប់​ និង​ធ្វើការ​ក្នុង​ភោជនីយដ្ឋាន​មួយ​តែ​ដោយ​ចង់​ត្រឡប់​មក​វិញ​ទើប​នាង​ក៏​ស្នើសុំ​អន្តរាគមន៍​។

ក្នុង​អំឡុងពេល​រង់ចាំ​ត្រឡប់​មក​វិញ​ស្ថានទូត​បាន​ផ្តល់​កន្លែង​ស្នាក់នៅ និង​អាហារ​ដល់​ពលការិនី​ទាំង​ពីរ​នាក់​នោះ​ដោយ​ពួកគេ​បាន​មក​ដល់​កម្ពុជា​វិញ​កាលពី​ម្សិលមិញ​។

បើ​តាម​លោក​ ជុំ សុន្ទរី ក្នុង​ត្រីមាស​ទី ​១ ​ឆ្នាំ​នេះ​ស្ថាន​ឯកអគ្គរាជទូត​កម្ពុជា​ប្រចាំ​ម៉ាឡេស៊ី​បាន​ជួយ​ដោះស្រាយ​បញ្ហា​​ និង​រៀបចំ​មាតុភូមិ​និវត្តន៍​ជូន​ពលរដ្ឋ​ខ្មែរ​បាន​ ៦០ ​នាក់​ក្នុង​នោះ​​ស្ត្រី​ ៥១ ​នាក់​៕

អត្ថបទគួរចាប់អារម្មណ៍