មណ្ឌលគិរីៈ ម្ដាយក្មេងស្រីម្នាក់ក្នុងអំពើរំលោភបំពានផ្លូវភេទបានជំរុញឱ្យតុលាការខេត្តមណ្ឌលគិរី ពន្លឿននីតិវិធីលើសំណុំរឿងក្ដី «ប្ដីចុងចាប់រំលោភកូនស្រី» របស់គាត់ ដើម្បីស្វែងរកយុត្តិធម៌ជូនកូនស្រី ខណៈជនជាប់ចោទដែលនៅក្រៅឃុំបានបដិសេធបទចោទនេះ។
អ្នកស្រី លឹម សាមឿន អាយុ ៥៣ ឆ្នាំ មានលំនៅភូមិពូត្រុំ ៤ សង្កាត់រមនា ក្រុងសែនមនោរម្យឱ្យដឹងពីម្សិលមិញថា អស់រយៈពេលប្រមាណ ៣ ឆ្នាំមកហើយ ដែលអ្នកស្រី និងកូនស្រីរងគ្រោះក្នុងអំពើរំលោភផ្លូវភេទប្រព្រឹត្តដោយប្ដីចុងរបស់អ្នកស្រីបានរង់ចាំយុត្តិធម៌ពីតុលាការ។
«កាលពីថ្ងៃទី ១៧ ខែមីនា ឆ្នាំ ២០២១ ខ្ញុំនឹងសាក្សីមួយចំនួនបាននាំគ្នាទៅតុលាការដើម្បីចូលរួមសវនាការលើសំណុំរឿងហិង្សាប្រព្រឹត្តដោយអនីតិសង្វាសជន ប៉ុន្តែពេលខ្ញុំទៅដល់មន្ត្រីតុលាការម្នាក់បានប្រាប់ថា តុលាការបានសម្រេចលើកពេលសវនាការគ្រប់រឿងក្តីទាំងអស់ដើម្បីបង្ការទប់ស្កាត់ការឆ្លងរីករាលដាលនៃជំងឺកូវីដ ១៩»។
បើតាមអ្នកស្រី សាមឿន សំណុំរឿង «ហិង្សាប្រព្រឹត្តដោយអនីតិសង្វាសជន» នេះជនជាប់ចោទគឺជាប្ដីចុងអ្នកស្រី ឈ្មោះ ឯក រស្មី អាយុ ៤០ ឆ្នាំ ចំណែកជនរងគ្រោះគឺជាកូនស្រីប្ដីមុនរបស់អ្នកស្រី។
លោក មាស ប្រុស អ្នកនាំពាក្យសាលាដំបូងខេត្តមណ្ឌលគិរីថ្លែងថា សំណុំរឿងក្ដីនេះកំពុងស្ថិតក្រោមចំណាត់ការនីតិវិធីរបស់តុលាការហើយ។ «ខ្ញុំយល់ថា ស្ត្រីរងគ្រោះ និងម្ដាយគួរតែយល់អំពីស្ថានភាពនាពេលបច្ចុប្បន្ន ដែលកំពុងប្រឈមខ្លាំងជាមួយជំងឺឆ្លងកូវីដ។ តុលាការនឹងមិនទុកសំណុំរឿងនេះចោលនោះទេ។ សូមមេត្តារង់ចាំ តុលាការនឹងស្វែងរកយុត្តិធម៌ជូនពួកគាត់ តាមរយៈសវនាការជំនុំជម្រះលើអង្គសេចក្ដី ក្រោយករណីកូវីដ ១៩ បានស្ងប់ស្ងាត់»។
បើតាមអ្នកស្រី សាមឿន ក្រោយពីប្ដីដើមរបស់អ្នកស្រីជួបគ្រោះថ្នាក់ចរាចរណ៍ស្លាប់មកនៅឆ្នាំ ២០១១ អ្នកស្រីបាននាំកូនស្រីអាយុ ១០ ឆ្នាំ និងកូនប្រុសអាយុ ៦ ឆ្នាំមករស់នៅភ្នំពេញហើយបានជួបប្តីចុងរូបនេះ និងបានរួមរស់ជាមួយគ្នាដល់ចុងឆ្នាំ ២០១៨។
អ្នកស្រីអះអាងថា នៅពេលអ្នកស្រីទៅលេងស្រុកប្តីចុងបានឆ្លៀតឱកាសចាប់រំលោភកូនស្រីរបស់អ្នកស្រីរហូតដល់បានសម្រេចចំនួន ២ លើក និង បានគំរាមសម្លាប់កូនរបស់អ្នកស្រីទាំង ២ នាក់ចោលថែមទៀត ប្រសិនបើធ្វើឱ្យរឿងនេះដឹងដល់អ្នកស្រី ឬសាច់ញាតិណាម្នាក់។
នៅដើមឆ្នាំ ២០១៩ អ្នកស្រីកូនៗ និងប្តីចុងបាននាំគ្នាមករស់នៅស្រុកកំណើតក្នុងខេត្តមណ្ឌលគិរីជួបជុំសាច់ញាតិ។ នៅពេលក្រោយមក កូនស្រីរបស់អ្នកស្រីក៏បានទម្លាយពីរឿងអាស្រូវចាប់រំលោភនេះ ហើយក្រោយពេលដឹងរឿងដ៏អាស្រូវនេះ អ្នកស្រីរួមទាំងអ្នកភូមិមួយចំនួនបានទៅដាក់ពាក្យប្តឹងនៅស្នងការដ្ឋាននគរបាលខេត្តមណ្ឌលគិរីនាថ្ងៃទី ៦ ខែ ឧសភា ឆ្នាំ ២០១៩ ។
ប៉ុន្តែលោក ឯក រស្មី បានប្រាប់ ភ្នំពេញ ប៉ុស្តិ៍ ដោយច្រានចោលការចោទប្រកាន់ពីអ្នកស្រី លឹម សាមឿន។ លោកថា ករណីនេះសមត្ថកិច្ចនគរបាលនៃការិយាល័យព្រហ្មទណ្ឌក៏បានហៅលោកទៅសាកសួរជាច្រើនដងមកហើយដែរ។
មិនតែប៉ុណ្ណោះ តុលាការក៏បានកោះហៅលោកឱ្យចូលបំភ្លឺជាច្រើនដង ប៉ុន្តែការជំនុំជម្រះត្រូវបានលើកពេលម្ដងហើយម្ដងទៀតដោយសារកូវីដ។ «ប្រសិនបើករណីនេះ ជាការពិតមែននោះ ខ្ញុំប្រហែលជាត្រូវបានសមត្ថកិច្ចចាប់ញាត់គុកបាត់ទៅហើយ មិនមែននៅដល់ពេលនេះទេ»៕