​ម្នាក់​ក្នុងចំណោម​ ២ ​នាក់​ ជាប់ចោទ​ជួញ​គ្រឿងញៀន​ សុំ​តុលាការ​ដោះលែង​

ជនជាប់ចោទជួញគ្រឿងញៀនជាតិបែលហ្ស៊ិក ដែលត្រូវបាននាំមកសវនាការម្សិលមិញនៅសាលាឧទ្ធរណ៍។ រូប គឺម សារុំ

ភ្នំពេញៈ បុរសជាប់ចោទជួញដូរគ្រឿងញៀនជនជាតិបែលហ្ស៊ិកម្នាក់ដែលប្តឹងតវ៉ាមកសាលាឧទ្ធរណ៍បានសុំឲ្យតុលាការដោះលែងខ្លួនពីម្សិលមិញដោយអះអាងថា ខ្លួនមិនពាក់ព័ន្ធដូចការចោទនេះទេ ខណៈគូកនម្នាក់ទៀតដែលជាប់ចោទជួញដូរគ្រឿងញៀនកូកាអ៊ីនចំនួនជាង ១៣០០ ក្រាមជាមួយគ្នាកាលពីឆ្នាំ ២០១៨ មិនប្តឹងឧទ្ធរណ៍ ទោះបីត្រូវបានតុលាការថ្នាក់ក្រោមផ្តន្ទាទោសដាក់ពន្ធនាគារម្នាក់ៗ ១ ជីវិតក្តី។

តាមអង្គហេតុរបស់តុលាការបង្ហាញថា បុរសជនជាតិបែលហ្ស៊ិកឈ្មោះ TANGUY E-DDIE. J. TALLER អាយុ ៣៣ ឆ្នាំបានចូលមករស់នៅប្រទេសកម្ពុជាតាំងពីឆ្នាំ ២០១២ មកម្ល៉េះ។ នៅឆ្នាំ ២០១៧ គាត់បានទៅប្រទេសបែលហ្ស៊ិករយៈពេលខ្លី ហើយគាត់ត្រឡប់មកវិញដោយសារប្រពន្ធរបស់គាត់ឆ្លងទន្លេ។

លុះក្នុងអំឡុងខែកុម្ភៈ ឆ្នាំ ២០១៨ គាត់បានស្គាល់បុរសម្នាក់ជាជនជាតិបែលហ្ស៊ិកដូចគ្នាឈ្មោះ CATRY DAVID NOEL ដែលជននោះជាអ្នកលក់នំប៊ឺហ្គឺរ ចល័ត តាមរថយន្តក្នុងរាជធានីភ្នំពេញ។ បន្ទាប់ពីស្គាល់គ្នាបានមួយរយៈមកគាត់បានខ្ចីលុយមិត្តស្រីរបស់ឈ្មោះ CATRY DAVIDNOEL តែភ្លេចចំនួន ហើយក៏មិនបានសងលុយទៅស្ត្រីនោះដែរ។

កំណត់ហេតុបន្តថានៅថ្ងៃទី ៦ ខែ មករា ឆ្នាំ ២០១៨ ឈ្មោះ CATRY DAVID NOEL បានជិះយន្តហោះធ្វើដំណើរពីប្រទេសប្រេស៊ីលមកទីក្រុងបាងកក ប្រទេសថៃ។ បន្ទាប់មកនៅថ្ងៃទី ១០ ខែ មករា ឆ្នាំ ២០១៨ ឈ្មោះ CATRY DAVID NOEL បានជិះយន្តហោះមកប្រទេសកម្ពុជាប៉ុន្តែត្រូវបានសមត្ថកិច្ចប្រចាំច្រកទ្វារព្រលានយន្តហោះអន្តរជាតិភ្នំពេញរកឃើញក្នុងវ៉ាលិសរបស់បុរសនេះ មានបង្កប់ម្សៅក្រាមពណ៌ ស ជាគ្រឿងញៀននៅក្នុងបាតវ៉ាលិសចំនួន ២ កញ្ចប់ធំហើយសមត្ថកិច្ចបានចាប់ខ្លួនជននេះក្រោយរកឃើញថ្នាំញៀន។ សមត្ថកិច្ចនៃមន្ទីរប្រឆាំងគ្រឿងញៀនបានបង្ហាញលទ្ធផលដែលបានពីការចាប់នោះ គឺជាប្រភេទគ្រឿងញៀនកូកាអ៊ីនទម្ងន់ ១ ៣០០,២៤ ក្រាម។

កំណត់ហេតុបង្ហាញបន្តថាក្រោយឃាត់ខ្លួនឈ្មោះ CATRY DAVIDNOEL បាននិយាយប្រាប់សមត្ថកិច្ចថាគ្រឿងញៀនដែលសមត្ថកិច្ចឆែកឃើញនោះគាត់បានទទួលវ៉ាលិសពីបុរសម្នាក់ក្នុងប្រទេសប្រេស៊ីលផ្ញើមកឲ្យឈ្មោះ TANGUY EDDIE .J. TALLER ហើយឈ្មោះនេះបានជួលគាត់ក្នុងតម្លៃ ៣ ម៉ឺនដុល្លារអាមេរិក នៅពេលនាំមកដល់ប្រទេសកម្ពុជា។ ប៉ុន្តែមិនទាន់ទាំងទទួលលុយបានផងស្រាប់តែសមត្ថកិច្ចចាប់តែម្តង។ ដោយឡែក ១ ឆ្នាំក្រោយមកលោក TANGUY EDDIE .J. TALLER ត្រូវសមត្ថកិច្ចចាប់ខ្លួនបាននៅព្រំដែនបាវិតកម្ពុជា-វៀតណាម ខេត្តស្វាយរៀង។

សំណុំរឿងនេះត្រូវបានសាលាដំបូងរាជធានីភ្នំពេញបើកសវនាការនៅថ្ងៃទី ១៩ ធ្នូ ឆ្នាំ ២០១៨ កំបាំងមុខលោក TANGUY EDDIE .J. TALLER និងប្រកាសសាលក្រមនៅថ្ងៃទី ២២ មិថុនា ឆ្នាំ ២០១៨ ដោយសម្រេចផ្តន្ទាទោសជនទាំង ២ នាក់ម្នាក់ៗជាប់ពន្ធនាគារ ១ ជីវិតនិងពិន័យប្រាក់ម្នាក់ៗ ៨០ លានរៀលចូលថវិការដ្ឋ។

ជនទាំង ២ ត្រូវបានចោទពីបទជួញដូរ និងដឹកជញ្ជូនសារធាតុញៀនឆ្លងដែនខុសច្បាប់តាមមាត្រា ៤០ នៃច្បាប់ស្តីពីការត្រួតពិនិត្យគ្រឿងញៀន និងចេញដីកាបង្គាប់ឲ្យសមត្ថកិច្ចតាមរកចាប់ខ្លួនឈ្មោះ TANGUY EDDIE .J. TALLER។

នៅក្នុងបន្ទប់សវនាការនៃសាលាឧទ្ធរណ៍ពីម្សិលមិញជនជាប់ចោទឈ្មោះ TANGUY EDDIE .J. TALLER បានប្រាប់ចៅក្រមថា គាត់គ្រាន់តែស្គាល់ឈ្មោះ CATRY DAVID NOEL និងរាប់អានគ្នាក្នុងនាមជាប្រជាជនបែលហ្ស៊ិកដូចគ្នាប៉ុណ្ណោះហើយថា គាត់មិនជាប់ពាក់ព័ន្ធនឹងគ្រឿងញៀននោះទេ។

លោក TANGUY EDDIE .J. TALLER ឆ្លើយប្រាប់ចៅក្រមតាមរយៈអ្នកបកប្រែថា៖ «ខ្ញុំមិនបានជួល CATRY DAVID NOEL រឿងគ្រឿងញៀននោះទេហើយក្រោយតុលាការប្រកាសសាលក្រម ១០ ខែ ទើបសមត្ថកិច្ចចាប់ខ្ញុំ ទាំងខ្ញុំមិនដឹងខ្លួនផង។ ខ្ញុំស្នើសុំដល់តុលាការដោះលែងខ្ញុំវិញ»។

លោក តាន់ សេណារ៉ុង តំណាង មហាអយ្យការសន្និដ្ឋានថាតាមអង្គហេតុចម្លើយរបស់ CATRY DAVID NOEL បានឆ្លើយថាជនជាប់ចោទ TANGUY EDDIE .J. TALLER ជាអ្នកជួល។ ប៉ុន្តែរឿងនេះហាក់ដូចជាមានលក្ខណៈស្មុគស្មាញព្រោះថាជនជាប់ចោទ TALLER បដិសេធហើយម្យ៉ាងលោក CATRY DAVID NOEL មិនបានប្តឹងទាស់មកសាលាឧទ្ធរណ៍ទេ។ មានន័យថា បើគាត់មិនប្តឹងមកឧទ្ធរណ៍អាចថា គាត់ទទួលស្គាល់ថា ប្រព្រឹត្តមែន។

លោក ណារ៉ុង បានប្រាប់អង្គសវនាការថា៖ «ខ្ញុំកាន់សំណុំរឿងគ្រឿងញៀនធំៗបែបនេះច្រើនហើយមិនដែលឃើញសមត្ថកិច្ចចាប់បានអ្នកបញ្ជាពីក្រោយខ្នងទេតែចាប់បានតែអ្នកគេជួល។ តែនេះជាករណីលើកទី ១ ហើយដែលចាប់បានអ្នកនៅពីក្រោយខ្នង»។

លោកថា៖ «ខ្ញុំមិនជឿថា ជនជាប់ចោទឈ្មោះ TANGUY EDDiE .J. TALLER ជាអ្នកពាក់ព័ន្ធទេ ខ្ញុំតំណាងមហាអយ្យការទុកឲ្យក្រុមប្រឹក្សាជំនុំជម្រះពិចារណារកអ្នកស្អាតស្អំក្នុងរឿងនេះចុះ»។

លោកមេធាវី ការពារសិទ្ធិឲ្យជនចាប់ចោទម្នាក់ក្នុងចំណោម ២ នាក់សន្និដ្ឋានថា ក្នុងអង្គហេតុគឺកូនក្តីរបស់លោកបានរាប់អានឈ្មោះ CATRY DAVID NOEL មែន ប៉ុន្តែ គាត់មិនបានពាក់ព័ន្ធគ្រឿងញៀនទេ។ ចំពោះការចាប់ខ្លួនកូនក្តីរបស់លោកវិញ មិនទាំងដឹងខ្លួនថាតុលាការចេញដីកាចាប់ខ្លួនផងទេ។ ព្រោះបើគាត់ជាអ្នកប្រព្រឹត្តមែននោះម្ល៉េះគាត់ទៅប្រទេសគាត់បាត់ហើយមិនចាំដល់ ១០ ខែក្រោយទើបឲ្យសមត្ថកិច្ចចាប់ខ្លួនគាត់ទេ។

លោកប្រាប់ចៅក្រមថា៖ «ខ្ញុំសូមតុលាការឧទ្ធរណ៍ពិចារណាហើយមេត្តាដោះលែងកូនក្តីខ្ញុំឲ្យមានសេរីភាពវិញផង»។

ក្រោយពីជំនុំជម្រះលោកចៅក្រម សេង ស៊ីវុត្ថា ប្រធានក្រុមប្រឹក្សាជំនុំជម្រះថ្លែងថា សាលដីកានេះនឹងប្រកាសនៅថ្ងៃទី ៦ ខែមេសា៕

ម្នាក់ក្នុងចំណោម ២ នាក់ ជាប់ចោទជួញគ្រឿងញៀន សុំតុលាការដោះលែង

ព័ត៌មានថ្មីៗ

វីដេអូ

ម្នាក់​ក្នុងចំណោម​ ២ ​នាក់​ ជាប់ចោទ​ជួញ​គ្រឿងញៀន​ សុំ​តុលាការ​ដោះលែង

ព័ត៌មានជាតិ

ព័ត៌មានថ្មីៗ

វីដេអូ

ម្នាក់ក្នុងចំណោម ២ នាក់ ជាប់ចោទជួញគ្រឿងញៀន សុំតុលាការដោះលែង