បាត់ដំបង៖ ស្រ្តីម្នាក់ស្លាប់ភ្លាមៗនៅកន្លែងកើតហេតុ ដោយសារតែគាត់យកដុំម្សៅថ្នាំគីមី ទៅបុកឲ្យហ្មត់សម្រាប់យកទៅលាយទឹកបាញ់ដើមតាង៉ែន ដើម្បីឲ្យឆាប់ចេញផ្កា ហើយក៏បានផ្ទុះ កាលពីថ្ងៃទី ១៣ មិថុនា នៅភូមិតាគ្រក់ ឃុំត្រែង ស្រុករតនមណ្ឌុល ខេត្តបាត់ដំបង។
លោក សន និល អធិការនគរបាលស្រុករតនមណ្ឌល ប្រាប់ពីម្សិលមិញថា ស្រ្តីរងគ្រោះស្លាប់ឈ្មោះ យាន យ៉ា អាយុ ៣០ ឆ្នាំ និងមានប្តីឈ្មោះ ណាន សុខា អាយុ ៣២ឆ្នាំ។ ទាំង ២ នាក់ ជាកម្មករចម្ការតាង៉ែន ហើយពួកគេស្នាក់នៅក្នុងភូមិ-ឃុំខាងលើ។ ចំណែកឯម្ចាស់ចម្ការឈ្មោះ ឈឿង ម៉ៅ អាយុ ៥៧ ឆ្នាំ។
លោកប្រាប់តាមសាក្សីនៅកន្លែងកើតហេតុថា ស្រ្តីរងគ្រោះ និងប្តី បានមកធ្វើជាកម្មករក្នុងចម្ការតាង៉ែនទើបតែបាន ៥ ថ្ងៃប៉ុណ្ណោះ និងទទួលបានតម្លៃឈ្នួលក្នុង ១ ថ្ងៃ ម្នាក់ ៣ ម៉ឺនរៀល។ ពួកគេទាំង ២ នាក់ប្តីប្រពន្ធមានមុខងារលាយម្សៅថ្នាំគីមី ហើយយកទៅបាញ់ដើមតាង៉ែនដើម្បីឲ្យឆាប់ចេញផ្កា។
លោកថ្លែងថា៖ «ស្រ្តីរងគ្រោះគាត់យកម្សៅថ្នាំគីមីនោះ ដាក់ក្នុងធុងប៉េត្រូ ហើយបុកឲ្យហ្មត់តែត្រូវម្សៅគីមីនោះផ្ទុះបណ្តាលឲ្យត្រូវតែម្តង»។
លោកបន្តថា ហេតុការណ៍នេះ កើតឡើងនៅវេលាម៉ោង ១ កន្លះរសៀល ថ្ងៃទី ១៣ មិថុនា។ មុនកើតហេតុគេបានឃើញស្រ្តីរងគ្រោះយកការ៉ុងម្សៅដុំថ្នាំគីមី ដែលមានឈ្មោះ ប៉ូតាស្យូមក្លូរីដ ផលិតនៅប្រទេស ចិន មកស្រាយមាត់ការ៉ុងហើយបានយកដុំម្សៅគីមីនោះទៅដាក់ក្នុងធុងប៉េត្រូ ដើម្បីបុកឲ្យហ្មត់បំណងយកទៅលាយជាមួយទឹកសម្រាប់បាញ់ដើម តាង៉ែន ដើម្បីឲ្យឆាប់ចេញផ្កា។ ប៉ុន្តែ ពេលស្រ្តីរងគ្រោះកំពុងបុកដុំម្សៅគីំមីនោះនៅក្រោមដើមតាង៉ែន ស្រាប់តែផ្ទុះឡើងតែម្តង។
លោកបន្ថែមថា ក្រោយកើតហេតុប្រជាពលរដ្ឋបានរាយការណ៍ប្រាប់សមត្ថកិច្ច ហើយភ្លាមៗនោះ សមត្ថកិច្ចបានចុះទៅដល់កន្លែងកើតហេតុពិនិត្យឃើញថា នៅដើមតាង៉ែនត្រូវបាក់មែក និងជ្រុះស្លឹកស្ទើរអស់មួយចំហៀងដើម ដោយសារកម្លាំងផ្ទុះ។ រីឯ មនុស្សបានខ្ទាតចេញពីកន្លែងកើតហេតុប្រមាណជា ២ ទៅ ៣ ម៉ែត្រ។ ចំពោះសាកសពវិញ ពីក្បាលដល់ចង្កេះត្រូវសុះសាច់ ហើយត្រឹមចង្កេះចុះមកក្រោមត្រូវបែកសាច់ទាំងដុំៗ និង ដាច់ឆ្អឹងត្រង់ជង្គង់ចុះក្រោមខ្ទេចសុះសាច់តែម្តង។
លោកប្រាប់ទៀតថា បើតាមស្រ្តីចំណាស់ម្នាក់ ដែលធ្វើការក្នុងចម្ការតាង៉ែននោះដែរបាននិយាយប្រាប់សមត្ថកិច្ចថា ស្រ្តីរងគ្រោះធ្លាប់និយាយប្រាប់គាត់ថា នាងធ្វើការជាកម្មករចម្ការតាង៉ែន នៅប្រទេស ថៃ ១០ ឆ្នាំមកហើយ។ ស្រ្តីរងគ្រោះក៏មានបទពិសោធក្នុងការលាយថ្នាំគីមីបាញ់ឲ្យតាង៉ែនឆាប់ចេញផ្កាដែរ។ ប៉ុន្តែដោយសារនៅប្រទេសថៃ មានបញ្ហាជំងឺកូវិដ ១៩ ទើបស្រ្តីរងគ្រោះត្រឡប់មកស្រុកកំណើតវិញ និងទើបតែចូលធ្វើកម្មករក្នុងចម្ការកើតហេតុបាន ៥ ថ្ងៃប៉ុណ្ណោះ។
ពាក់ព័ន្ធនឹងម្ចាស់ចម្ការវិញ លោកអធិការមិនបានបញ្ជាក់ថា តើគាត់នឹងមានចំណែកទទួលខុសត្រូវក្នុងហេតុការណ៍នោះយ៉ាងណាទេ។
តែសមត្ថកិច្ចមួយរូបនៃអធិការដ្ឋាននគរបាលស្រុក រតនមណ្ឌល ស្នើមិនឲ្យបញ្ចេញឈ្មោះប្រាប់ថា ករណីនេះគ្មានជាប់ពាក់ព័ន្ធនឹងម្ចាស់ចម្ការតាង៉ែននោះទេ ព្រោះជាឧបទ្ទវហេតុដោយចៃដន្យប៉ុណ្ណោះ។ តែម្ចាស់ចម្ការក៏ជួយចេញសំណងមួយចំនួនក្នុងការចាត់ចែងពិធីបុណ្យសពដែរ៕