ភ្នំពេញ: ក្នុងរយៈពេល ៩ ខែឆ្នាំនេះមានយានយន្តដឹកទំនិញលើសទម្ងន់កំណត់ជាង ១៥៤ ម៉ឺនគ្រឿង ត្រូវបានសមត្ថកិច្ច និងមន្ត្រីជំនាញធ្វើការត្រួតពិនិត្យ ខណៈយានយន្តជាង ៤១ ម៉ឺនគ្រឿង ត្រូវបានឃាត់ធ្វើការផាកពិន័យ និងធ្វើកិច្ចសន្យាដែលវិធានការនេះត្រូវបានមន្ត្រីពន្យល់ថា ដើម្បីថែរក្សាផ្លូវជាតិឱ្យបានយូរអង្វែង និងកាត់បន្ថយគ្រោះថ្នាក់ចរាចរណ៍។
តាមរបាយការណ៍របស់ក្រសួងសាធារណការ និងដឹកជញ្ជូនដែលភ្នំពេញប៉ុស្ដិ៍ទទួលបានពីម្សិលមិញបានឱ្យដឹងថា ក្នុងរយៈពេល ៩ ខែឆ្នាំ ២០២០ នេះ ក្រុមការងារជំនាញ សហការជាមួយសមត្ថកិច្ចមូលដ្ឋានបានធ្វើការត្រួតពិនិត្យយានយន្តសរុបចំនួន ១ ៥៤២ ៤៤៤ គ្រឿង។ ក្នុងនោះមានរថយន្តដឹកទំនិញលើសទម្ងន់កម្រិតកំណត់ចំនួន ៤១៥ ៩១៧ គ្រឿង ស្មើនឹង ២៦,៩៦ ភាគរយ នៃចំនួនយានយន្តសរុបនៅកម្ពុជា។ រថយន្តផ្ទុកលើសទម្ងន់ក្រោម ៥ ភាគរយ ចំនួន ៤១៣ ៣៥៣ គ្រឿង ប្រហែល ២៦,៨០ ភាគរយ រថយន្តផ្ទុកលើសទម្ងន់ពី ៥ ទៅ ១០ ភាគរយ មានចំនួន ៦២ គ្រឿង រថយន្តផ្ទុកលើសទម្ងន់ពី ១០ ទៅ ២០ ភាគរយមានចំនួន ១ ៦៥៣ គ្រឿង ប្រហែល ០,១១ ភាគរយ និងរថយន្តផ្ទុកលើសទម្ងន់លើសពី ២០ ភាគរយមានចំនួន ៨៤៩ គ្រឿង ប្រហែល ០,០៦ ភាគរយ។ យានយន្តដែលល្មើសទាំងនេះ ត្រូវបានធ្វើការផាកពិន័យ និងធ្វើកិច្ចសន្យាដោយអនុលោមតាមមាត្រា ៦០ នៃច្បាប់ផ្លូវថ្នល់។
នៅក្នុងកិច្ចប្រជុំប្រចាំត្រីមាសទី ៣ ឆ្នាំ ២០២០ ស្ដីពីការត្រួតពិនិត្យយានយន្តដឹកជញ្ជូនលើសទម្ងន់កម្រិតកំណត់នៅថ្ងៃទី ០៥ ខែតុលាលោក សេង ឈួន រដ្ឋលេខាធិការក្រសួងសាធារណការបានជំរុញឱ្យមន្ត្រីទាំងអស់ខិតខំយកចិត្តទុកដាក់បន្តអនុវត្តការងាររឹតបន្តឹងបទល្មើសដឹកលើសទម្ងន់កម្រិតកំណត់ឱ្យកាន់តែប្រសើរឡើង។
លោកបញ្ជាក់ថា៖ «លើសពីនេះសូមណែនាំដល់មន្ត្រីតាមស្ថានីយឱ្យពង្រឹងការអនុវត្តការងារឱ្យបានកាន់តែប្រសើរ និងមានប្រសិទ្ធភាព ប្រកាន់ខ្ជាប់នូវក្រមសីលធម៌ការងារ និងសហការល្អជាមួយដៃគូពាក់ព័ន្ធនានា»។
លោកបានលើកឡើងពីទិសដៅការងារដែលត្រូវអនុវត្តក្នុងខែ និងត្រីមាសបន្ទាប់ដូចជាយុទ្ធសាស្ត្រក្រុមការងារចល័ត ការសាងសង់ និងការធ្វើឱ្យប្រសើរឡើងនៅតាមស្ថានីយមួយចំនួន។ លោកក៏បានលើកឡើងអំពីបញ្ហាប្រឈមមួយចំនួនលើការអនុវត្តការងាររបស់ស្ថានីយនីមួយៗ និងរបស់ក្រុមការងារចល័តផងដែរ។
លោក ចាន់ សំបូរ ប្រធានមន្ទីរសាធារណការ និងដឹកជញ្ជូនខេត្តបាត់ដំបង ថ្លែងពីម្សិលមិញថា ក្រុមការងារចល័តរបស់ក្រសួងសហការជាមួយមន្ទីរសាធារណការ និងអាជ្ញាធរមូលដ្ឋានបានចុះត្រួតពិនិត្យយានយន្តដឹកទំនិញលើផ្លូវជាតិលេខ ៥៧ ដោយឃាត់រថយន្តចំនួន ១១ គ្រឿងដែលដឹកទំនិញលើសទម្ងន់កម្រិតកំណត់។ លោកបន្តថា ក្រុមការងារបានពិនិត្យរថយន្តដឹកស៊ីម៉ងត៍ ថ្ម ខ្សាច់ ដែក គ្រឿងទេស និងទំនិញផ្សេងៗទៀតសរុបចំនួន ៥១ គ្រឿងដោយឃាត់បានរថយន្តដឹកលើសទម្ងន់ចំនួន ១១ គ្រឿងដែលដឹកលើសទម្ងន់ចាប់ពី ៧ តោន ដល់ ១៩ តោន។ រថយន្តដឹកលើសទម្ងន់កម្រិតកំណត់ទាំងនោះបានធ្វើការផាកពិន័យ និងធ្វើកិច្ចសន្យាដោយអនុលោមតាមច្បាប់ផ្លូវថ្នល់មាត្រាទី ៦០។
លោក សំបូរ បញ្ជាក់ថា៖ «ខ្ញុំអំពាវនាវឱ្យក្រុមហ៊ុនផ្គត់ផ្គង់ សហគ្រាស និងម្ចាស់រថយន្តដឹកជញ្ជូនទាំងអស់ចូលរួមសហការដោយធ្វើការដឹកជញ្ជូនតាមច្បាប់កំណត់ដើម្បីថែរក្សាផ្លូវជាតិឱ្យបានយូរអង្វែង និងកាត់បន្ថយគ្រោះថ្នាក់ចរាចរណ៍»។
លោក គឹម បញ្ញា នាយកអង្គការមូលនិធិបង្ការរបួសអាស៊ីប្រចាំកម្ពុជា (AIP) បានគាំទ្រចំណាត់ការរបស់សមត្ថកិច្ចជំនាញដែលបានចាត់វិធានការជាបន្តបន្ទាប់ ប៉ុន្ដែលោកជំរុញឱ្យក្រសួងសាធារណការ គួរតែកោះហៅតំណាងក្រុមហ៊ុនដឹកជញ្ជូនមកប្រជុំពីបញ្ហាដែលត្រូវដោះស្រាយ ក៏ដូចជាផ្ដល់អនុសាស្ត្រណែនាំជុំវិញការដឹកជញ្ជូនទំនិញរបស់ក្រុមហ៊ុន។
លោកថា៖ «ការដឹកលើសទម្ងន់នេះគឺវាមានហានិភ័យខ្ពស់បំផុតក្នុងការបង្កគ្រោះថ្នាក់ចរាចរណ៍ដល់អ្នករួមដំណើរលើដងផ្លូវ ជាពិសេសគឺធ្វើឱ្យខូចខាតផ្លូវថ្នល់។ ប្រសិនយើងបានណែនាំហើយ ប៉ុន្ដែក្រុមហ៊ុននៅតែមិនអនុវត្តទេគឺស្ថាប័នជំនាញត្រូវតែដកអាជ្ញាប័ណ្ណពីក្រុមហ៊ុនដឹកជញ្ជូនហ្នឹង ព្រោះជាការព្រមានដល់ក្រុមហ៊ុនដឹកជញ្ជូនផ្សេងៗទៀត»។
លោក បញ្ញា បន្ថែមថាក្រៅពីដកអាជ្ញាប័ណ្ណក្រុមហ៊ុន មន្ត្រីជំនាញគួរតែដកហូតរថយន្តទុកមិនឱ្យធ្វើចរាចរណ៍បន្តទៀតក្នុងរយៈពេលកំណត់ណាមួយ ដើម្បីឱ្យក្រុមហ៊ុន និងអ្នកបើកយានយន្តមានការរាងចាលក៏ដូចជាខ្លាចការអនុវត្តច្បាប់មកលើពួកគេទៀត។ បើធ្វើបានតឹងរ៉ឹងយ៉ាងដូច្នេះលើកក្រោយ ពួកគេនឹងលែងហ៊ានប្រព្រឹត្តល្មើសបន្តទៀតហើយ៕