.jpg)
សមត្ថកិច្ចដុតកម្ទេចគ្រឿងញៀន ដែលរឹបអូសបានកន្លងមក។ រូបថត AFP
ភ្នំពេញៈ អាជ្ញាធរជាតិប្រយុទ្ធប្រឆាំងគ្រឿងញៀនចាត់ទុកថា វាចាំបាច់ក្នុងការពង្រីកនិងបន្តផែនការបង្ក្រាបគ្រឿងញៀនដែលគ្រោងនឹងបញ្ចប់កាលពីចុងឆ្នាំមុន ប៉ុន្តែនៅរង់ចាំការអនុម័តផ្លូវការពីរដ្ឋាភិបាលជាមុនសិន។
លោក មាសវិរិទ្ធ អគ្គលេខាធិការដ្ឋានអាជ្ញាធរជាតិប្រយុទ្ធប្រឆាំងគ្រឿងញៀន បានមានប្រសាសន៍ថា ក្រុមការងារបច្ចេកទេសបានបញ្ចប់ការវិភាគរបស់ពួកគេរួចហើយ។
លោកបញ្ជាក់ថា៖«វានៅតែចាំបាច់ក្នុងបន្តយុទ្ធនាការនេះ…... ដោយសារតែលទ្ធផលវិជ្ជមាន»។
លោកបាន អះអាងថា យុទ្ធនាការនេះប៉ុនប៉ងដើម្បី «លុបបំបាត់មូលហេតុឫសគល់» នៃគ្រឿងញៀន។
លោកបន្តថា៖«វាត្រូវការពេលវេលាសម្រាប់មន្ត្រីជាន់ខ្ពស់ក្នុងការសម្រេចចិត្ត។ ប៉ុន្តែយុទ្ធនាការនៅតែបន្ត»។
នៅក្នុងកិច្ចប្រជុំរវាងរដ្ឋាភិបាលនិងភាគីពាក់ព័ន្ធនានាកាលពីម្សិលមិញលោក ថង សុគន្ធា មន្ត្រីអាជ្ញាធរជាតិប្រយុទ្ធប្រឆាំងគ្រឿងញៀនបានបង្ហាញអំពីលទ្ធផលនៃការបង្ក្រាបកាលពីឆ្នាំមុន។
យោងតាមសិក្ខាកាមម្នាក់ដែលបានចូលរួមនៅក្នុងកិច្ចប្រជុំនោះបានឲ្យដឹងថា លោក សុគន្ធា បានផ្តោតទៅលើការអប់រំប្រជាពលរដ្ឋឱ្យទប់ស្កាត់ការប្រើប្រាស់គ្រឿងញៀន។
នៅឆ្នាំ ២០១៧ មនុស្សជាង ១៧ ៨០០ នាក់ត្រូវបានចាប់ខ្លួននៅក្នុងយុទ្ធនាការបង្ក្រាបគ្រឿងញៀននេះ ដោយក្នុងនោះមានជាង ៥០ ភាគរយជាអ្នកប្រើប្រាស់គ្រឿងញៀន។ ក្នុងចំណោមអ្នកទាំងនោះមានប្រមាណ ១១ ០០០ នាក់ត្រូវបានបញ្ជូនទៅមណ្ឌលកែប្រែ។
យុទ្ធនាការ បង្ក្រាបគ្រឿងញៀនពីដំបូងគ្រោងចាប់ផ្តើមតែពីខែមករាដល់ខែមិថុនាប៉ុណ្ណោះកាលពីឆ្នាំមុនប៉ុន្តែត្រូវពន្យារពេលរហូតដល់ចុងឆ្នាំ។ កាន់តែធ្ងន់ធ្ងរថែមទៀត គឺចំនួនអ្នកជាប់ពន្ធនាគារកាន់តែកើនច្រើនឡើងៗនិងកង្វះការថែទាំសុខភាពសម្រាប់ពួកគេ ប៉ុន្តែយុទ្ធនាការនេះត្រូវបានសង្គមស៊ីវិលនិងក្រុមអ្នកសង្កេតការណ៍ខ្លះធ្វើការរិះគន់ផងដែរ ដែលបង្ករឱ្យមានការសង្ស័យទៅលើប្រសិទ្ធភាពនៃយុទ្ធនាការនេះ។
កាលពីម្សិលមិញ លោក វិរិទ្ធបានថ្លែងថា ដំណាក់កាលយុទ្ធនាការលើកទីបី គ្រោងនឹងបញ្ចប់រហូតដល់បញ្ចប់អាណត្តិរបស់រដ្ឋាភិបាលដែលការបោះឆ្នោតនឹងចូលមកដល់នៅខែកក្កដា។
លោកស្រី ស៊ូ សុចិន្តា មន្ត្រីអង្គការខាណា នៅក្នុងបទសម្ភាសន៍មួយកាលពីដើមឆ្នាំនេះបានថ្លែងថា រដ្ឋាភិបាលទំនងផ្លាស់ប្តូរការផ្តោតរបស់ខ្លួនចំពោះការព្យាបាលតាមសហគមន៍ច្រើនជាងមុន ប៉ុន្តែទោះបីជាយ៉ាងណាក្តីការអនុវត្តរបស់ខ្លួននៅតែត្រូវការកែលម្អ។
លោកស្រីបញ្ជាក់ថា៖ «សម្រាប់ដំណាក់កាលទី ២ វាហាក់ដូចជាយើងបានធ្វើការកាន់តែជិតស្និទ្ធជាមួយរដ្ឋាភិបាលហើយរដ្ឋាភិបាលកំពុងយកចិត្តទុកដាក់បន្ថែមទៀតលើអ្វីដែលអ្នកប្រើគ្រឿងញៀនត្រូវការ។ ហើយវាហាក់ដូចជាផ្តោតលើការចូលរួមរបស់អ្នកពាក់ព័ន្ធសំខាន់ៗទាំងអស់»។
លោកស្រីពន្យល់ថា ប៉ុន្តែទោះជាយ៉ាងណាក៏ដោយ វានៅតែត្រូវការបន្ថែមទៀតហើយចាំបាច់ត្រូវមានការព្យាបាលតាមសគមន៍ឲ្យបានកាន់តែល្អប្រសើរពីព្រោះគ្រូពេទ្យក្នុងមូលដ្ឋានពួកគាត់ មានភារកិច្ចទទួលខុសត្រូវអ្នកជំងឺច្រើនមិនមែនមានតែ «អ្នក ប្រើគ្រឿងញៀន» ប៉ុណ្ណោះទេ។ លោកស្រីបន្តថា៖ «នោះគឺជាគម្លាតមួយ»។
ខណៈមានការស្វាគមន៍កិច្ចខិតខំប្រឹងប្រែងរបស់រដ្ឋាភិបាលចំពោះយុទ្ធនាការប្រយុទ្ធប្រឆាំងការប្រើប្រាស់គ្រឿងញៀននិងការញៀននោះ នាយកប្រតិបត្តិអង្គារខាណា លោក ជួប សុខចំរើន បានសរសេរនៅក្នុងអ៊ីម៉ែលមួយដោយលោកបានលើកឡើងថា រដ្ឋាភិបាលត្រូវតែបន្តវិនិយោគលើគុណភាពនៃការផ្តល់ជូនសេវាម្មនេះ។
លោកបញ្ជាក់ថា៖ «ចំណុចនេះគឺរួមបញ្ចូលទាំងការផ្គត់ផ្គង់ឱសថឲ្យបានគ្រប់គ្រាន់និងទាន់ពេលវេលាក៏ដូចជាសម្ភារៈនិងឧបករណ៍វេជ្ជសាស្ត្រសម្រាប់ជួយអ្នកផ្តល់សេវាកម្មទាំងនោះដើម្បីបំពេញការងាររបស់ពួកគេ»៕NS
