.jpg)
សកម្មភាពដើរឃោសនារកសំឡេងឆ្នោតក្រុមប្រឹក្សារបស់គណបក្សប្រជាជនកម្ពុជានៅខេត្តស្ទឹងត្រែងកាលពីម្សិលមិញ។ សហការី
ភ្នំពេញៈ យុទ្ធនាការឃោសនារកសំឡេងឆ្នោតសម្រាប់ ការបោះឆ្នោតជ្រើសក្រុមប្រឹក្សារាជធានី ខេត្ត ក្រុង ស្រុក ខណ្ឌ នៅក្នុងអាណត្តិទី៣ ឆ្នាំ ២០១៩ នេះ នឹងបញ្ចប់នៅថ្ងៃសុក្រនេះបន្ទាប់ពីធ្វើសកម្មភាពអស់រយៈពេល ៨ ថ្ងៃ ដោយមានគណបក្សនយោបាយចំនួន ៧ ចូលរួមខណៈគណបក្សកាន់អំណាច រំពឹងឈ្នះអាសនៈទាំងអស់នៅទូទាំងប្រទេស។
ការឃោសនានេះបានចាប់ផ្ដើមពីថ្ងៃទី ១៧ ដល់ថ្ងៃទី ២៤ ខែ ឧសភា ហើយការបោះឆ្នោតនឹងប្រព្រឹត្តទៅថ្ងៃអាទិត្យ ទី ២៦ ខែ ឧសភា ដោយមានសមាជិកក្រុមប្រឹក្សាឃុំ សង្កាត់ចំនួន ១១ ៥៧២ នាក់ គឺជាអ្នកមានសិទ្ធិបោះឆ្នោត ខណៈសមាជិកក្រុមប្រឹក្សារាជធានី ខេត្ត សរុបមាន ៥៥៩ អាសនៈ រីឯសមាជិកក្រុមប្រឹក្សាក្រុង ស្រុក ខណ្ឌ សរុបមាន ៣ ៥៥៥ អាសនៈ។
ការបោះឆ្នោតនេះធ្វើឡើងដោយមានការិយាល័យបោះឆ្នោតចំនួន ២០៣ ដែលរៀបចំនៅតាមទីប្រជុំជនក្រុង ស្រុក ខណ្ឌនៃរាជធានីខេត្តទាំង ២៥។
លោក ហង្ស ពុទ្ធា សមាជិក និងជាអ្នកនាំពាក្យ គ.ជ.ប បានប្រាប់ភ្នំពេញប៉ុស្តិ៍ថា ការឃោសនាបោះឆ្នោតនេះបានធ្វើទៅតាមប្រតិទិនដែលបានគ្រោងទុក។ ចំណែកសកម្មភាព ទាំងការជួបប្រជុំ ការប្រើឧគ្ឃោសនស័ព្ទ ការដង្ហែក្បួនសុទ្ធតែប្រព្រឹត្តទៅដោយមិនមានភាពអសកម្មណាមួយកើតមានឡើយ។ នេះ ដោយសារមានការសហគ្នាល្អរវាងគណបក្សនយោបាយ មន្ត្រីរៀបចំការបោះឆ្នោតនិងអាជ្ញាធរដែនដី។
លោកបានបញ្ជាក់ថា៖ «គណបក្សនយោបាយក៏លោកបង្ហាញពីភាពចាស់ទុំក្នុងការគោរពច្បាប់ បទបញ្ជា និងនីតិវិធីនៃការបោះឆ្នោត។ ជារួមគឺប្រព្រឹត្តទៅដោយរលូន ល្អប្រសើរ មិនមានបញ្ហាអីកើតឡើងនោះទេ»។
លោក ហង្ស ពុទ្ធា បានបន្ថែមថា ការប្រើមធ្យោបាយឃោសនាមានភាពស្មើគ្នាដែលរៀបចំឡើងដោយ គ.ជ.ប ប៉ុន្តែវាពាក់ព័ន្ធនឹងសិទ្ធិរបស់គណបក្សនីមួយៗ។ ឧទាហរណ៍ក្នុងចំណោម៧គណបក្ស គឺមានគណបក្សខ្មែរសាធារណរដ្ឋមិនបានឲ្យស្ប៉តមកគ.ជ.ប ដើម្បីជួយចាក់បញ្ចាំងជូនក្នុងទូរទស្សន៍ជាតិកម្ពុជាទេ ហើយគណបក្សនេះក៏មិនធ្វើសកម្មភាពអ្វីដែរ គឺមានតែការផ្សព្វផ្សាយតិចតួច។
លោកថា៖ «នេះគឺជាសិទ្ធិសម្រេចចិត្តរបស់គណបក្សនយោបាយផ្ទាល់។ គ្មានអ្វីជាឧបសគ្គ ឬរារាំងដល់សកម្មភាពរបស់គាត់នោះទេ»។
លោក គង់ មុនីកា ប្រធានគណបក្សឆន្ទៈខ្មែរបានប្រាប់ភ្នំពេញប៉ុស្តិ៍ថា គណបក្សរបស់លោកគ្រាន់តែធ្វើពិធីជួបជុំជាមួយសកម្មជននិងប្រជាពលរដ្ឋតិចតួចនៅតាមតំបន់ ស្រុក និងភូមិ របស់ពួកគាត់ប៉ុណ្ណោះដោយសារមិនមានអង្គបោះឆ្នោត។ ម្យ៉ាងគណបក្សរបស់លោកនៅថ្មីថ្មោងមិនទាន់មានធនធានហិរញ្ញវត្ថុច្រើនទើបឃោសនាទៅតាមការស្ម័គ្រចិត្តនិងលទ្ធភាពរបស់សកម្មជន មិនអាចធ្វើអ្វីជាដុំកំភួនដូចគណបក្សកាន់អំណាចបានទេ។
ក្បួនរថយន្តឃោសនារកសំឡេងឆ្នោតក្រុមប្រឹក្សារបស់ CPP។ សហការី
លោកបានបញ្ជាក់ថា៖ «ដូច្នេះហើយប្រើប្រាស់ឱកាសនេះដើម្បីជួបជាមួយប្រជាពលរដ្ឋទេហើយពន្យល់ពីគោលនយោបាយរបស់គណបក្សផងដើម្បីឆ្លៀតឱកាសយើងពង្រីកទំនាក់ទំនងរវាងគណបក្សជាមួយប្រជាពលរដ្ឋជាមួយសកម្មជនឱ្យទូលំទូលាយជាងមុន»។«ដូច្នេះអាហ្នឹងក៏ជាអ្វីដែលយើងគិតគូរទៅថ្ងៃអនាគតថា តើគួរមានច្បាប់ហិរញ្ញវត្ថុឬក៏ច្បាប់ក្នុងការផ្តល់ជាមូលនិធិសម្រាប់គណបក្សនយោបាយដំណើរការមានសមភាពដែរឬយ៉ាងណា? ព្រោះនៅប្រទេសមួយចំនួនមានច្បាប់គេកំណត់អ៊ីចឹង»។
យ៉ាងណាក្ដី លោក គង់ មុនីកា មិនរំពឹងចំពោះការទទួលបានសំឡេងគាំទ្រទេ ព្រោះគណបក្សលោកមិនមានអង្គបោះឆ្នោត។ក៏ប៉ុន្តែលោកព្យាយាមជួបជាមួយអង្គបោះឆ្នោតជាអតីតសមាជិកក្រុមប្រឹក្សាឃុំមកពីគណបក្សសង្គ្រោះជាតិដើម្បីឱ្យពួកគាត់ជួយបោះឆ្នោតជូនដើម្បីបានសំឡេងចូលរួមអភិវឌ្ឍក្រុមប្រឹក្សារាជធានី ខេត្ត ក្រុង ស្រុក ខណ្ឌ និងឃុំ សង្កាត់ ពីព្រោះការធ្វើជាឯកបក្សមិនមានប្រសិទ្ធភាពដូចពហុបក្សទេ។
ចំណែកលោក ពេជ្រ ស្រស់ ប្រធានគណបក្សយុវជនកម្ពុជាបានប្រាប់ភ្នំពេញប៉ុស្តិ៍ថា ការឃោសនារបស់គណបក្សលោកមិនមានអ្វីរាំងស្ទះទេ។ ប៉ុន្តែលោកថា ការឃោសនាបានធ្វើតែមួយថ្ងៃគត់នៅភ្នំពេញ រីឯក្រៅពីនោះលោកចុះជួបអង្គបោះឆ្នោត តាមមូលដ្ឋានដែលមានតំណាងឈរឈ្មោះ។
លោក ពេជ្រ ស្រស់ បានបញ្ជាក់ថា៖ «សម្រាប់ការឃោសនាបោះឆ្នោតរបស់គណបក្សយុវជនកម្ពុជាគឺយើងធ្វើដោយលទ្ធភាពនិងយើងមើលឃើញថា គឺមិនមានបញ្ហាអីទេក្នុងការឃោសនា»។
លោកបានថ្លែងថា គណបក្សយុវជនកម្ពុជាមានអង្គបោះឆ្នោតមួយចំនួន ហើយការរំពឹងលើការគាំទ្រក៏លោកមានសង្ឃឹមខ្លះដែរ ពីព្រោះថា គណបក្សប្រជាជនកម្ពុជាបច្ចុប្បន្ននៅក្នុងក្រសែភ្នែករបស់អង្គបោះឆ្នោត និងប្រជាពលរដ្ឋទូទៅ។
លោក ពេជ្រ ស្រស់ បានបន្ថែមថា៖ «អ៊ីចឹងបើគេចង់ឱ្យយុវជនជំនាន់ក្រោយចូលរួមការអភិវឌ្ឍ និងឆ្លុះមើលភាពអសកម្មរបស់រាជរដ្ឋាភិបាល អង្គបោះឆ្នោតនឹងសម្រេចជ្រើសរើសយកគណបក្សយុវជនកម្ពុជាពីព្រោះជាមនុស្សជំនាន់ថ្មី ហើយធ្វើការច្បាស់លាស់ជាមួយជាតិ និងប្រជាពលរដ្ឋ» ។
លោក សុខ ឥសាន អ្នកនាំពាក្យគណបក្សប្រជាជនកម្ពុជា បានប្រាប់ភ្នំពេញប៉ុស្តិ៍ថា គណបក្សរបស់លោកមិនជួបបញ្ហាអ្វីទេ ដូចជា អំពើហិង្សា មិនមានការរអាក់រអួលដោយប្រការណាមួយទេគឺដំណើរទៅដោយរលូន។
លោក សុខ ឥសាន សង្ឃឹមថា គណបក្សរបស់លោកនឹងឈ្នះសំឡេងឆ្នោត ១០០ ភាគរយចំពោះបេក្ខជនដែលបានដាក់ឈរឈ្មោះក្នុងរាយនាមដែលបានបញ្ជូនទៅ គ.ជ.ប។
លោកបញ្ជាក់ថា៖ «អត់មានបាត់ទៅណាទេ ពីព្រោះអង្គបោះឆ្នោត វាជាក្រុមប្រឹក្សាឃុំ សង្កាត់។ អ៊ីចឹងទេ ម្នាក់ៗហ្នឹងសុទ្ធតែជាជនបង្គោលរបស់គណបក្សប្រជាជន។ អ៊ិចឹងទេមិនមានព្រួយបារម្ភពីរឿងបាត់សំឡេងឆ្នោតទេសុទ្ធតែមើមទាំងអស់»។
តាមសេចក្តីប្រកាសព័ត៌មានរបស់ គ.ជ.ប ឱ្យដឹងថា សន្តិសុខ សុវត្ថិភាព និងសណ្តាប់ធ្នាប់នៃយុទ្ធនាការរបស់គណបក្សនីមួយៗត្រូវបានធានា ហើយការឃោសនាប្រព្រឹត្តទៅដោយរលូននិងគ្មានហិង្សានៅទូទាំងប្រទេស៕
